Yowana 11

Bwa Lasa̱ru

1Wuka nii we, di̱n ki̱nu n Lasa̱ru, a bubuwe. N ki̱n naba Betani, a bi̱n bi̱u Maryamu ke Marta #11:1 Luk 10:38-39. 2Lasa̱ru wa bubuwe, nang ke Maryamu we wu a kur Tewuduwe mi̱n ki̱nung ki̱ki fi̱rfi̱range, yinu a musu ki̱mi̱nti̱ nanikiyu ki̱ni ri durite.#11:2 Yow 12:3. 3N Yesu a ya di̱tumbi̱r we kebu Lasa̱ri̱m bi̱wuwiye ki̱mu. N chi a tum Yesu mi̱n ko, “Tewuduwe, wu mwang mi̱lane a bubuwe.”

4Tiyangu n Yesu a nwengu, a yi ko, “A ne bwadi ki̱n. Burang ki̱ku n Kwama ka yaang dwiyen, yinu Bwe Kwama ka yati̱ ri̱kaku we mure ti̱n.” 5N Yesu a mi̱la Marta ti keko wuwiye ti Lasa̱ru. 6Yinu yo n ki̱n a nwe ya̱m burame, a ki̱la dati̱ yikai diti yurau.

7A kuteng ki̱ku, a yi miyari̱m ki̱mu ko, “Ni ki̱la Yafudiya.” 8Miyari̱m ki̱mu a yi ko, “Tete, mun ki̱latidu we bwanu ni̱bu Yafudam a bau ka kwelanu ki̱ni kaliya?”

9N Yesu a yi chi ko, “We di wiine, n ke awa kub chiri yuraba? Nii ki̱ya yayu ki̱ni kuko, a ne ngau bewure. N chi ki̱kudu ki̱ni yiiku ti̱ti̱niyang. 10Aya wu ki̱ya yayu kume, ka ngau bewure, di̱ne n ki̱n a newe ki̱ni yiiku.”

11A kuteng ki̱ku a fwaang ya̱m bi̱bangu, a fwati̱ ki̱da ko, “N fati̱ chire Lasa̱ru a da duum. Aya mi̱n yadu yamang kuku ki̱nu.”

12Miyari̱m ki̱mu ko, “Tewuduwe, ka ki̱da duume, a ta̱ma̱ngu a ya.” 13N chi ko kano n Yesu ki̱fwa duum bi̱bu ni kabadi̱mu. Aya n Yesu ki̱fwa bwa.

14Yinu n Yesu a fwa chimi̱n ko, “N Lasa̱ru a lai kabu.” 15A chakakku ko, “N nwe ta̱ma̱ng di̱ne mang newe bwa. A yi chi ko, bwa wu ka ni chi̱n wuka da wu ta ken bi̱yili̱m a di̱mi̱ne.” A yi chi ko, “Ni yika bwako.”

16M Toma wu n chi ki̱yalu ko, ngabi burabe, #11:16 Ngabbi burau: Nang bwesi̱mu ni a bi̱bi burabi̱mu. a yi miyari̱mu ko, “N chi̱ni ni ya ti̱n, ka bwange ni bwa ware.”

N Yesu nang kunki̱ku n ti ti̱kuri

17Yo n Yesu a lam fiko, a ya ko n Lasa̱ru a bwa. A ma ditiyi yaana we furu. 18Betani a kwatuwe Wurchalima, a lambu siriyi yurabiyu. 19ni̱bu Yafudam we fiko nabwen, a be ki̱kire Marta ti Maryamu mi̱nu we furi ki̱lina ya chiye we bwa ke chiye. 20Kangu Marta a nwe ko n Yesu a lamengu, a chir yaka mwate Yesu a du Maryamu we lo.

21M Marta a yi Yesu ko, “Tewuduwe, ka no m mun we fiye, kemi a no bwabu. 22N yim n Kwama a ne ko mi̱n chitu mwang bi̱ditu.”

23N Yesu a ke ki̱mi̱n ko, “Kemo ka kabati̱nuwe.”

24M Marta ko, “N fwa bi̱yili̱m, aya ka kunnu di swan kute.”

25N Yesu a yi ki̱n ko, “M mi̱n nang wu ki̱kukku ni̱be, m mi̱n nang wu ki̱ni ti̱kuriye, nii a ke bi̱yili̱ma di̱mi̱ne, kono a bwa, ka kunnu. 26Ka nii wu ki̱ni ti̱kuriye, a ke bi̱yili̱mu we di̱mi̱ne, a ne bwadu ki̱diya kwad. N ke bi̱yili̱ma?”

27M Marta a yi ko, “We yiko Tewuduwe. N ke bi̱yili̱mu mi, m mun nang Masiya naba yuke, Bwe Kwama wu ki̱be ti̱ti̱niye.”

N Yesu a ki wii

28Yo n ki̱n a ri ya̱m bi̱be, a yikan, a ya yale keko wuwiye m Maryamu. A yi ko, “Naba yungke a be ki̱baddu ka ku numo.”

29Maryamu a kaibu ki̱swi, a kuni ngi̱rtu a yika bwa a di̱Yesuwe. 30N Yesu we finu m Marta a mwati̱n ki̱ne, a tibu le bi̱nu. 31Kangu ni̱bu Yafudam a no be siku bwangu, a ku Maryamu a chiri furtu ki̱yikadangu, a bunti̱n ko kano ki̱yika bwa fure, di̱ne furi ki̱lin ki̱nu.

32Yo m Maryamu a lam fi n Yesu we mi̱ne, a yari fi̱m we ti̱mu ko “Tewuduwe, ka no mun we fiye, kemi a no neka bwadu.”

33Kangu n Yesu a ku Maryamu ti ni̱bu Yafudam a bung ki̱mi̱nte ki̱kira wiiniyangu, ki̱bune a tau ki̱n. 34A yi chi ko, “Ti̱fur ki̱n a fi̱re?”

N chi a yi ko, “Tewuduwe, be da̱ng.”

35N Yesu a ki wii.

36Ni̱bu Yafudam a yi ko, “Ki̱ki wii di̱ne a Mi̱la ki̱ne.”

37Bi̱kam a yi ko, “Yo n ki̱n a be ki̱duwe, a mayire n ki̱n a du nii wu a bwange?”

38Kangu ni̱r Yesu a kaiyanangu, n ki̱n a yawe furu. Fura wure. N chi a yinge furu ki̱ni wuka ne ti kale. 39Yesu a yi chi ko, “Ti̱bi̱li̱n kale.”

M Marta wuwiye ke baki̱ti̱me a yi Yesu ko, “Tewuduwe, ka ma nunang, kangu wudiye yaana we furangu.”

40Yinu n Yesu a yi ki̱n ko, “Mare n ya̱n mi, ka n ke bi̱yili̱me, mwang ku dukan Kwamanu.”

41Yo n chi a wum kale we fure, n Yesu a kuku nuyu we di a yi ko, “Tewuduwe, mwang ma be tiyangu mwang nwe twa̱ba̱ki̱ mangu.”

42N yim mun nweyi kwadu, aya n fwa ying di̱ne ke ni̱bu bi̱bu n ni̱n waremu a swan ko m mun n twiye.

43Yo a ri ya̱me, a yali ki̱ni dukan ko, “Lasa̱ru! Chire.”

44Kwa̱me a chire ki̱ni kaniyu ti naniyu a kwabakwabane we furu ki̱ni kulunu ni̱bu a fur mi̱ni̱nu wetuwe kabuko. N Yesu a yi chi ko, “Ti̱kwiran, a ya yayu.”

Ni̱bu a do ka chi̱u Yesu

(Mat 26:1-5; Mar 14:1-2; Luk 22:1-2)

45Ni̱bu Yafudam nabwen a no be ki̱si Maryamu, a ku chitu n Yesu a maatu. N chi a ke bi̱yili̱mu we di̱Yesu we. 46Aya bi̱kamu a ya fwa ni̱bu Farisamu mi̱n chitu n Yesu a maatu. 47Di̱ne yiko, wuduwe fansetiyeyu n ti ni̱bu Farisamu a yal muraku ti kwa̱l yilangi̱n. N chi a yi ko, “Ni ma wureni? Nii wu ki̱ma chi ka̱ta̱kitu nabwen. 48N chi ko ka ni du ki̱n a chakakku ki̱ni nangi̱n ti̱te, kuuti ni̱bi kwang ka ke bi̱yili̱mu we di̱ki̱ne. Ki̱chitu wu ka yo Roma beka yitu ni ti̱m chi̱remu ti Kan Kwamana Wurchalimanu.”

49Wuka naba nii we, di̱n ki̱nu n Kayafa. N ki̱n tikake Fanse, a yi chi ko, “Ta yimbu chi ko bayim. 50Ka la chi nii wiin ka bwadu di̱ne ti̱m ki̱mu n ti ki̱ku kuuti ni̱bi ki̱ni kwang ka bwadangu.”

51Ya̱m bi̱bu n Kaiyafa a ma fa̱kui wemu a kurbu a ni̱r ki̱n, n Kwama a yo, yade n ki̱n nang tikake Fanse we swa̱r di̱ki̱ne, n ki̱n a fwa ya̱mu ki̱yungdu n Yesu beka bwadu di̱ne kuu ni̱bu Yafudam. 52Aya n ke di̱ne ni̱bu Yafudam n chikun, aya ke a ki̱bte bwesi̱m Kwamamu a yaran a yikai kuuti mu, ke a be a swe fi wiin. 53A mwetuwe diko, n chi a do ya̱mu ko chi chi̱u Yesu.

54Di̱ne yiko n Yesu a yati̱bu ki̱da kwa̱rikwa̱ri we nuyi ni̱bu Yafudamu. Aya a du bi̱nu a yika di̱kan bi̱n di̱da kwati̱n a di̱ki̱ri̱n. Ni̱bu ki̱yalu ko Yifi̱remu. A swe a bwako n ti miyari̱m ki̱mu.

55Yo Yiye yabake wa ni̱bu Yafuda a mwatawe, Kutiyu a ti̱m bi̱ki̱miyu nabwen a yika Wurchalima di̱ne wauwade wa dutu chiye, ka ya mi̱n Yiye. 56N chi a le Kan Kwamanu ki̱babba Yesu. N chi a ti̱ran ki̱twaiyadu ko kano we beda? 57Aya wuduwe fansetiyeye n ti ni̱bu Farisamu a tu a na yilang ko, “Kanang wuwule niye wa ku fi n Yesu we mi̱ne, a be fwa chi mi̱n ke chi tau.”

Currently Selected:

Yowana 11: Tula

Highlight

Copy