Tourat 1: Foyda Nama 33

Boṛo bai Shek Ishʼor loge miṭ-maṭ

1Iakube saia deḳla, tan boṛo bai Ishe sair-sho manush loia aguaia aira. Ou tain huruttaintore tan bibin Lea ar Rahela ar duio bandir gese baṭia dilaila. 2Tain tan bandin ar tarar huruttaintore samnor ḳataro raḳla. Bade Lea ar tan huruttaintore, hoḳol heshe raḳla Rahela ar Iusufre. 3Ar nize erar age gia shatbar maṭit soizda ḳoria tan bair gese azir oila.

4Teu Ishe tan gese douṛaia aia ainja ḳori golat doria hunga dila, ar duiozone ḳandita lagla. 5Bade Ishe muk tulia ou beṭin ar huruttaintore dekia zikaila, “Tumar loge era ḳegu?” Tain ḳoila, “Allae tan rohomote afnar gulamre i huruttain disoin.” 6Teu foyla bandi oḳole Ishʼor ḳasat aia tarar hurutta loia mata nuaila, 7bade Leae-o huruttaintore loia aguaia mata nuaila, heshe Iusuf ar Rahelae gia mata nuaila. 8Teu Ishe ḳoila, “Foto zeta dolbol deḳlam, ita kior lagi?” Tain ḳoila, “Amar munibor gese doya faoar lagi.” 9Ishe ḳoila, “Baire, amar boutta ase, tumar ita tumar-u taḳouk.” 10Tain ḳoila, “Ji na, ami minot ḳoria ḳoiar, zudi amar bae afnar doya oy, taile amar deoa i dan-dokkina afne neukka. Afne zebla amare kushi mone kobul ḳorsoin, te afnar muk deḳa ar Allar didar faoa amar lagi homan. 11Allae amare rohomot dan ḳorsoin, amar boutta ase ar ou zeta ufohar afnar lagi anchi, ita afne neukka.” Tain oula minot-ḳajji korae, Ishe ita kobul ḳorla. 12Ishe ḳoila, “Solo, amra roana oi, ami tumar loge roimu.” 13Iakube tanre ḳoila, “Amar munibe to zanra, i hurutta oḳol-o huru ar dudal gaiain-meṛin-o loge ase, bezan oia itare eḳdin-u aṭaile, hokkolṭi moriziba. 14Te munib, afne amar age zaukkagi, foshur fal ar hurutta oḳlor solar ḳemota buzia ami aste aste Seir elaḳat afnar gese airam.” 15Ishe ḳoila, “Taile amar logor ota ḳoyzonre tumar gese toia zaigi.” Tain ḳoila, “Itar dorḳar kita? Amar munibor gese ami ze rohom faisi, oṭa-u to boutta.” 16Ar Ish hou din-u Seiror bae roana dilaila. 17Oile Iakube Sukkoto fosia nizor lagi ḍera banaia, foshur falor lagi-o ḳoyḳan batan banaila, teu i zagar nam oilo Sukkot [mani, ḍera oḳol].

18Foddon-Iram tone bar oia Iakube, sohi-salamote Kenan deshor Shikim ṭauno aia, ṭaunor bare tambuin gaṛila. 19Heshe ou tambuala zominḳan tain, Shikimor baf Homuror fuaintor ges tone, rufar eḳ-sho ṭeḳa dia ḳorid ḳorla. 20Ar hono ekkan kurbani kana banaia er nam dila El-Iluhe-Israil [mani, Alla, Israilor uforala].

Currently Selected:

Tourat 1: Foyda Nama 33: sylL

Highlight

Copy