Tourat 1: Foyda Nama 32

Mohonoyimo firista oḳlor loge deḳa

1Iakub-o tan fote roana oile, Allar firista oḳole tanre deḳa dila. 2Erare dekia tain ḳoila, “Ita Allar fouz.” Ar i zagar nam raḳla Mohonoyim [mani, dui fouz].

Shek Ishʼor gese ufohar faṭani

3Iakube tan age ḳori Seir ba Idum desho, tan boṛo bai Ishʼor gese ḳoyzon ḳobria faṭaila. 4Tain erare hikai dila, “Tumra amar munib Ishʼre ḳoio, tan gulam Iakube ḳoise, ami otodin tone amrar mamu Labonor gese musafirit aslam. 5Amar goru-gada, sagol-meṛa ar gulam-bandi hoḳolta-u ase. Amar munibor gese doya faoar ashae tumrare faṭailam.”

6Ḳobria oḳole firia aia Iakubre ḳoila, “Amra afnar bai Ishʼor gese geslam. Tain sair-sho manshore loia afnar loge mulaḳat ḳorat aira.” 7Ou Iakube ḍoraia kub ostir oigela. Tain logor hoḳol manshore, goru-sagol, meṛa-meṛi ar uṭ-gada oḳolre dui dole algaila. 8Tain ḳoila, baie aia eḳ dolre hamla ḳorle-o aroḳ dol nirafode roibo.

9Ar Iakube dua ḳorla, “O Alla, amar dada Ibrahimor Mabud ar amar baf Isʼhakor Mabud, tumi-u amare hukum ḳorso zen, ‘Tumar desho tumar nizor manshor gese firia zao, teu ami tumare rohom ḳormu.’ 10Tumar i gulamor bae ze rohom ar imandari deḳaiso, ami ita kuntar-u laḳ nae. Ami to egu laṭi loia i Zordan gang faroislam, ar oḳon dui dol oigesi. 11Mabud, ami aroz ḳoriar, amar bai Ishʼor at tone amare basao. Amar ḍor ḳorer, he aia bou fua-fuṛir loge amare-o kun ḳorbo. 12Tumi-u to oada ḳorso, ‘Ami oboshsho-u tumar balai kormu, tumar oarish oḳolre doriar faror balur laḳan behishab ḳormu, zela gonia fuṛae na.’ ”

13Iakube i rait hono roila ar tan zotota asil er maz taki kotoḳan loia tan bai Ishʼor lagi eḳ ufohar toiar ḳorla. 14Ita oilo dui-sho sagi, kuṛiṭa sagol, dui-sho meṛi, kuṛiṭa meṛa, 15tishgu baichcha-ala dudor uṭ, dui kuṛi gai, doshgu bisal, ek kuṛi gadi ar doshgu gada, 16bade tain eḳ ek gulamor ato eḳ eḳ fal shomzai dia ḳoila, “Tumra amar age oia zao ar eḳ fal taki aroḳ falor maze faḳ rakio.” 17Foyla dolor gulamre tain hikai dila, “Amar bai Ishʼor loge deḳa oar bade zebla zikaiba, ‘Ḳoi zaitae ba? Tumi kar manush? Tumar homḳor foshuin ḳar?’ 18Tumi zuaf dio, ‘Ita afnar gulam Iakubor. Tain amar munib Ishʼor lagi, ita ufohar faṭaisoin. Ar tain amrar ḳore oia aira.’ ” 19Ou laḳan tain dui nombor, tin nombor dolor gulam oḳolre-o hikai dila zen, “Ishʼor loge deḳa oile tumra-o oula ḳoio. 20Ar heshe ḳoio, afnar gulam Iakub-o amrar ḳore oia aira.” Iakube mono ḳorla, “Age ufohar oḳol faṭaia tane ṭanḍa ḳormu, bade tan loge deḳa-shaikkat ḳormu, te tain amare maya ḳorilita faroin.” 21Tan age oia ufohar oḳol gelogi, oile tain rait tan ḍerat roila.

Firistar loge kustir bade noya nam Israil

22Heshe rait uṭia tan duio bibin, duio bandi ar egarogu fuare loia faoe aṭia, Zabbuk kalor hofaro toia aila. 23Tain erare ḳal far ḳoraia tan hoḳol mal-samana-o hono faṭai dila. 24Ar tain eḳla ono roila, teu gaibi eḳzon manush aia tan loge raitbor kusta-kusti korla. 25Oile tain Iakubre ḳabu ḳorta na farae en urator zuṛat marla ar Iakubor urator aṛ zaga tone ḍuli gelo. 26Heshe hi manshe ḳoila, “Fozor oizar, oḳon tumi amare saṛi deo.” Iakube ḳoila, “Afne amare dua na ḳorle saṛtam nae.” 27Hi manshe zikaila, “Tumar nam kita?” Tain ḳoila, “Iakub.” 28Ou hein ḳoila, “Tumi Alla ar manshor loge laṛai koria zitso ḳori, tumar nam ar Iakub roito nae, tumar nam oilo Israil [mani, Allar loge kusti korra].” 29Iakube tanre ḳoila, “Afnar namḳan kita ḳoukka.” Tain ḳoila, “Tumi kitar lagi amar nam zikairae?” Heshe tain Iakubre dua ḳorla. 30Ou Iakube i zagar nam raḳla Ponuel [mani, Allar surot]. Tain ḳoila, “Ami Alla Pakre mukamuki dekia-o zinda roisi.” 31Ar Iakube Ponuel faronir bade shuruz uṭigelo. Tan urator mairor lagi lengṛaita lagla. 32Erlagi Boni Israile oḳono ranor zuṛar gust ḳain na, ḳaron tain urator zuṛar rogor maze Iakubre marsla.

Currently Selected:

Tourat 1: Foyda Nama 32: sylL

Highlight

Copy