ꠁꠘ꠆ꠎꠤꠟ ১: ꠝꠕꠤ 13
13
ꠢꠎꠞꠔ ꠁꠍꠣꠞ ꠛꠣꠔꠣꠁꠟ ꠡꠣꠔ ꠇꠤꠌ꠆ꠍꠣ (১৩:১-৫২)
ꠄꠇ ꠉꠤꠞꠡ꠆ꠔꠞ ꠎꠣꠟꠣ ꠛꠣꠁꠘ ꠇꠞꠣꠞ ꠇꠤꠌ꠆ꠍꠣ
1ꠢꠎꠞꠔ ꠁꠍꠣ ꠅꠃ ꠖꠤꠘ ꠊꠞ ꠕꠣꠇꠤ ꠛꠣꠞ ꠅꠁꠀ ꠀꠅꠞꠞ ꠙꠣꠞꠅ ꠉꠤꠀ ꠛꠁꠟꠣ। 2ꠛꠁꠀ ꠢꠣꠞꠟꠦ ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠀ ꠜꠤꠠ ꠟꠣꠉꠣꠁ ꠖꠤꠟꠣ, ꠜꠤꠠ ꠖꠦꠈꠤꠀ ꠔꠣꠁꠘ ꠉꠤꠀ ꠄꠇ ꠘꠣꠅꠅ ꠃꠑꠤꠀ ꠛꠁꠟꠣ ꠀꠞ ꠢꠇꠟ ꠝꠣꠘꠥꠡ ꠙꠣꠞꠅ ꠃꠛꠣꠁ ꠞꠁꠟꠣ। 3ꠅꠃ ꠡꠝꠄ ꠔꠣꠁꠘ ꠇꠤꠌ꠆ꠍꠣ ꠢꠥꠘꠣꠁ ꠢꠥꠘꠣꠁ ꠘꠣꠘꠣꠘ ꠘꠝꠥꠘꠣꠞ ꠔꠣꠟꠤꠝ ꠖꠤꠟꠣ।
ꠔꠣꠁꠘ ꠇꠁꠟꠣ, “ꠝꠘꠅ ꠇꠞꠅ, ꠄꠇ ꠉꠤꠞꠡ꠆ꠔꠦ ꠎꠣꠟꠣ ꠛꠣꠁꠘ ꠇꠞꠣꠔ ꠉꠦꠟ। 4ꠉꠤꠀ ꠛꠣꠁꠘ ꠇꠞꠣꠞ ꠛꠣꠟꠣ ꠇꠤꠍꠥ ꠎꠣꠟꠣ ꠀꠁꠟꠞ ꠝꠣꠎꠦ ꠙꠠꠟ, ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠁꠔꠣ ꠈꠣꠁꠟꠤꠟ। 5ꠔꠣꠞ ꠇꠤꠍꠥ ꠎꠣꠟꠣ ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠟ, ꠁ ꠎꠣꠟꠣ ꠚꠥꠐꠤꠀ ꠀꠟꠤ ꠛꠣꠞ ꠅꠁꠟꠦꠅ ꠔꠟꠦ ꠛꠦꠡꠤ ꠝꠣꠐꠤ ꠘꠣ ꠕꠣꠇꠣꠄ, ꠎꠟꠖꠤ ꠛꠣꠠꠤꠟ। 6ꠛꠣꠖꠦ ꠡꠥꠞꠥꠎ ꠃꠑꠤꠀ ꠢꠣꠞꠟꠦ ꠎꠁꠞ ꠈꠣꠁꠟꠤꠟ, ꠀꠞ ꠔꠟꠞ ꠎꠠꠦ ꠞꠡ ꠘꠣ ꠙꠣꠅꠀꠄ ꠢꠥꠇꠣꠁꠀ ꠝꠞꠤꠉꠦꠟ। 7ꠇꠤꠍꠥ ꠎꠣꠟꠣ ꠛꠘ-ꠎꠋꠟꠣꠞ ꠝꠣꠎꠦ ꠙꠠꠟ, ꠀꠞ ꠅꠃ ꠛꠘ-ꠎꠋꠟꠣ ꠛꠣꠠꠤꠀ ꠁꠔꠣꠞꠦ ꠎꠣꠔꠤꠀ ꠗꠞꠟ। 8ꠅꠁꠟꠦ ꠇꠤꠍꠥ ꠎꠣꠟꠣ ꠜꠣꠟꠣ ꠎꠝꠤꠘꠅ ꠙꠠꠟ, ꠁ ꠎꠣꠟꠣꠄ ꠜꠣꠟꠣ ꠗꠣꠘ ꠅꠁꠟ, ꠁꠔꠣꠞ ꠇꠥꠘꠥ ꠍꠠꠣꠄ ꠔꠤꠡ, ꠇꠥꠘꠥ ꠍꠠꠣꠄ ꠡꠣꠁꠐ, ꠇꠥꠘꠥ ꠍꠠꠣꠄ ꠄꠇ-ꠡ ꠉꠥꠘ ꠛꠦꠡꠤ ꠗꠣꠘ ꠗꠞꠟ।”
9ꠅꠃ ꠇꠤꠌ꠆ꠍꠣ ꠢꠥꠘꠣꠘꠤꠞ ꠛꠣꠖꠦ ꠁꠍꠣꠄ ꠇꠁꠟꠣ, “ꠎꠣꠞ ꠇꠣꠘ ꠀꠍꠦ, ꠢꠦ ꠢꠥꠘꠃꠇ।”
10ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟꠦ ꠇꠁꠟꠣ, “ꠀꠙꠘꠦ ꠈꠣꠟꠤ ꠇꠤꠌ꠆ꠍꠣ ꠇꠁꠀ ꠝꠣꠘꠡꠞꠦ ꠔꠣꠟꠤꠝ ꠖꠤꠞꠣ ꠇꠦꠘꠦ?”
11ꠔꠣꠁꠘ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠉꠥꠙꠘ ꠞꠢꠁꠡ꠆ꠡ ꠎꠣꠘꠣꠞ ꠡꠥꠎꠥꠉ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠦ, ꠅꠁꠟꠦ ꠛꠣꠇꠤ ꠝꠣꠘꠡꠞ ꠉꠦꠍꠦ ꠁꠔꠣ ꠛꠣꠔꠥꠘꠤ ꠞꠁꠍꠦ। 12ꠢꠥꠘꠅ, ꠎꠣꠞ ꠀꠍꠦ, ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ, ꠔꠣꠞ ꠀꠞꠅ ꠛꠣꠠꠤꠛ। ꠅꠁꠟꠦ ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ, ꠅꠔꠣꠅ ꠇꠣꠠꠤꠀ ꠘꠦꠅꠀ ꠅꠁꠛ। 13ꠄꠞꠟꠣꠉꠤ ꠀꠝꠤ ꠇꠤꠌ꠆ꠍꠣꠞ ꠝꠣꠎꠖꠤ ꠄꠞꠣꠞꠦ ꠔꠣꠟꠤꠝ ꠖꠤꠞꠣꠝ, ꠄꠞꠣ ꠔ ꠖꠦꠈꠤꠀꠅ ꠖꠦꠈꠦ ꠘꠣ, ꠢꠥꠘꠤꠀꠅ ꠢꠥꠘꠦ ꠘꠣ ꠀꠞ ꠇꠥꠘ꠆ꠔꠣ ꠛꠥꠎꠦꠅ ꠘꠣ। 14ꠄꠞꠣꠞ ꠝꠣꠎꠖꠤꠀꠃ ꠁꠡꠣꠄꠀ ꠘꠛꠤꠞ ꠛꠣꠔꠣꠁꠟ ꠅꠃ ꠀꠄꠀꠔ ꠙꠥꠞꠣ ꠅꠁꠍꠦ, ꠔꠣꠁꠘ ꠇꠁꠍꠟꠣ,
ꠔꠥꠝꠞꠣ ꠇꠣꠘꠦ ꠢꠥꠘꠟꠦꠅ ꠇꠥꠘ꠆ꠔꠣ ꠛꠥꠎꠔꠣꠄ ꠘꠣꠄ,
ꠌꠃꠈꠦ ꠖꠦꠈꠟꠦꠅ ꠇꠥꠘ꠆ꠔꠣ ꠌꠤꠘꠔꠣꠄ ꠘꠣꠄ।
15ꠁꠔꠣ ꠝꠣꠘꠡꠞ ꠖꠤꠟ ꠅꠡꠣꠠ ꠅꠁꠉꠦꠍꠦ,
ꠔꠣꠞꠣꠞ ꠇꠣꠘꠅ ꠔꠣꠟꠣ ꠟꠣꠉꠤꠉꠦꠍꠦ।
ꠔꠣꠞꠣ ꠎꠣꠞꠎꠤꠞ ꠌꠃꠈ ꠝꠥꠎꠤ ꠛꠁꠞꠁꠍꠦ,
ꠎꠣꠔꠦ ꠌꠃꠈꠦ ꠘꠣ ꠖꠦꠈꠦ,
ꠇꠣꠘꠦ ꠘꠣ ꠢꠥꠘꠦ,
ꠖꠤꠟ ꠖꠤꠀ ꠘꠣ ꠛꠥꠎꠦ।
ꠇꠤꠎꠣꠘꠥ ꠔꠣꠞꠣ ꠔꠃꠛꠣ ꠇꠞꠤꠀ
ꠀꠝꠣꠞ ꠛꠣꠄ ꠚꠤꠞꠤꠎꠣꠁꠘ,
ꠀꠞ ꠀꠝꠤ ꠔꠣꠞꠣꠞ ꠡꠤꠚꠣ ꠇꠞꠤꠟꠣꠁ।
16ꠅꠁꠟꠦ ꠘꠦꠇ-ꠇꠙꠣꠟꠤ ꠔ ꠔꠥꠝꠞꠣ, ꠔꠥꠝꠞꠣꠞ ꠌꠃꠈꠦ ꠖꠦꠈꠦ, ꠀꠞ ꠇꠣꠘꠦ ꠢꠥꠘꠦ। 17ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣꠞ ꠌꠃꠈꠦ ꠎꠦꠔꠣ ꠖꠦꠈꠞꠣꠄ ꠀꠞ ꠇꠣꠘꠦ ꠎꠦꠔꠣ ꠢꠥꠘꠞꠣꠄ, ꠁꠔꠣ ꠛꠃꠔ ꠘꠛꠤ ꠀꠞ ꠅꠟꠤ-ꠀꠃꠟꠤꠀꠄ ꠖꠦꠈꠣꠞ ꠀꠡꠣ ꠇꠞꠟꠦꠅ ꠖꠦꠈꠣꠞ ꠇꠙꠣꠟ ꠅꠁꠍꠦ ꠘꠣ, ꠀꠞ ꠢꠥꠘꠣꠞ ꠀꠡꠣ ꠇꠞꠟꠦꠅ ꠢꠥꠘꠣꠞ ꠇꠙꠣꠟ ꠅꠁꠍꠦ ꠘꠣ।
18“ꠅꠈꠘ ꠔꠥꠝꠞꠣꠞꠦ ꠅꠃ ꠉꠤꠞꠡ꠆ꠔꠞ ꠇꠤꠌ꠆ꠍꠣꠞ ꠝꠣꠘꠤ ꠛꠥꠎꠣꠁ ꠖꠤꠞꠣꠝ, 19ꠢꠥꠘꠅ, ꠀꠁꠟꠞ ꠝꠣꠎꠦ ꠙꠠꠣ ꠎꠣꠟꠣ ꠖꠤꠀ ꠅꠟꠣꠈꠣꠘ ꠝꠣꠘꠡꠞ ꠛꠦꠙꠣꠞꠦ ꠛꠥꠎꠣꠁꠟ ꠅꠁꠍꠦ, ꠎꠦ ꠝꠣꠘꠡꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠇꠕꠣ ꠢꠥꠘꠤꠀꠅ ꠛꠥꠎꠦ ꠘꠣ, ꠄꠞꠟꠣꠉꠤ ꠁꠛꠟꠤꠍꠦ ꠀꠁꠀ ꠅꠃ ꠎꠘꠞ ꠖꠤꠟꠅ ꠀꠟ꠆ꠟꠣꠞ ꠎꠦ ꠇꠣꠟꠣꠝ ꠛꠣꠁꠘ ꠇꠞꠣ ꠅꠁꠍꠤꠟ, ꠅꠔꠣ ꠇꠣꠠꠤꠀ ꠘꠦꠄꠉꠤ। 20ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ ꠀꠞ ꠈꠥꠛ ꠈꠥꠡꠤ ꠅꠁꠀ ꠇꠛꠥꠟ ꠇꠞꠦ, 21ꠅꠁꠟꠦ ꠔꠣꠞꠣꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠢꠣꠝꠣꠄ ꠘꠣ, ꠄꠞꠟꠣꠉꠤ ꠁꠔꠣ ꠕꠥꠠꠣ ꠇꠄꠖꠤꠘ ꠞꠄ, ꠛꠣꠖꠦ ꠁ ꠇꠣꠟꠣꠝꠞ ꠟꠣꠉꠤ ꠇꠥꠘꠥ ꠎꠥꠟꠥꠝ-ꠝꠍꠤꠛꠔ ꠀꠁꠟꠦꠃ ꠔꠣꠞꠣ ꠈꠞꠟꠣꠝꠤ ꠎꠣꠄ। 22ꠛꠘ-ꠎꠋꠟꠣꠞ ꠝꠣꠎꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ, ꠅꠁꠟꠦ ꠖꠥꠘꠤꠀꠛꠤ ꠌꠤꠘ꠆ꠔꠣ-ꠜꠣꠛꠘꠣ ꠀꠞ ꠗꠘ-ꠍꠣꠝꠣꠘꠣꠞ ꠝꠣꠄꠀꠄ ꠁ ꠇꠣꠟꠣꠝꠞꠦ ꠎꠣꠔꠤꠀ ꠗꠞꠤꠟꠣꠄ, ꠄꠞꠖꠣꠄ ꠇꠣꠟꠣꠝꠦ ꠇꠥꠘꠥ ꠚꠣꠄꠖꠣ ꠅꠄ ꠘꠣ। 23ꠀꠞ ꠜꠣꠟꠣ ꠎꠝꠤꠘꠅ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ, ꠢꠥꠘꠤꠀ ꠛꠥꠎꠦ ꠀꠞ ꠀꠝꠟ ꠇꠞꠦ। ꠇꠦꠃ ꠎꠤꠘ꠆ꠖꠦꠉꠤꠔ ꠔꠤꠡ ꠉꠥꠘ, ꠇꠦꠃ ꠡꠣꠁꠐ ꠉꠥꠘ, ꠇꠦꠃ ꠄꠇ-ꠡ ꠉꠥꠘ ꠛꠦꠡꠤ ꠚꠟ ꠖꠦꠄ।”
ꠗꠣꠘ ꠀꠞ ꠚꠥꠚꠞꠣ ꠉꠣꠍꠞ ꠇꠤꠌ꠆ꠍꠣ
24ꠛꠣꠖꠦ ꠁꠍꠣꠄ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠀꠞꠇ ꠇꠤꠌ꠆ꠍꠣ ꠢꠥꠘꠣꠁꠟꠣ। ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠉꠤꠞꠡ꠆ꠔꠞ ꠟꠣꠈꠣꠘ, ꠎꠦꠁꠘ ꠘꠤꠎꠞ ꠎꠝꠤꠘꠅ ꠜꠣꠟꠣ ꠗꠣꠘꠞ ꠎꠣꠟꠣ ꠛꠣꠁꠘ ꠖꠤꠟꠣ। 25ꠛꠣꠖꠦ ꠞꠣꠁꠔ ꠅꠁꠀ ꠢꠣꠞꠟꠦ ꠎꠦꠛꠟꠣ ꠢꠇꠟ ꠝꠣꠘꠥꠡ ꠊꠥꠝꠣꠁ ꠉꠦꠍꠂꠘ, ꠅꠃ ꠡꠝꠄ ꠔꠣꠘ ꠄꠇ ꠖꠥꠡꠝꠘꠦ ꠀꠁꠀ ꠛꠣꠁꠘ ꠖꠦꠅꠀ ꠅꠃ ꠎꠝꠤꠘꠞ ꠝꠣꠎꠦ ꠚꠥꠚꠞꠣ ꠉꠣꠍꠞ ꠛꠤꠌꠤ ꠍꠤꠐꠣꠁꠀ ꠉꠦꠟꠉꠤ। 26ꠢꠦꠡꠦ ꠗꠣꠘꠞ ꠉꠣꠍ ꠎꠦꠛꠟꠣ ꠛꠠ ꠅꠁꠀ ꠍꠠꠣ ꠍꠣꠠꠟ, ꠅꠃ ꠡꠝꠄ ꠄꠞꠝꠣꠎꠦ ꠚꠥꠚꠞꠣ ꠉꠣꠍꠅ ꠖꠦꠈꠣ ꠉꠦꠟ। 27ꠁꠔꠣ ꠖꠦꠈꠤꠀ ꠛꠣꠠꠤꠞ ꠌꠣꠇꠞ ꠅꠇꠟꠦ ꠔꠣꠞꠣꠞ ꠝꠥꠘꠤꠛꠞꠦ ꠇꠁꠟꠣ, ‘ꠀꠙꠘꠦ ꠎꠝꠤꠘꠅ ꠈꠣꠟꠤ ꠜꠣꠟꠣ ꠗꠣꠘ ꠛꠣꠁꠘ ꠖꠤꠍꠟꠣ ꠘꠣ ꠘꠤ? ꠅꠈꠘ ꠚꠥꠚꠞꠣ ꠉꠣꠍ ꠅꠁꠟ ꠇꠥꠀꠁ ꠕꠣꠇꠤ?’
28“ꠔꠣꠁꠘ ꠇꠁꠟꠣ, ‘ꠇꠥꠘꠥ ꠖꠥꠡꠝꠘꠦ ꠁ ꠇꠣꠝ ꠇꠞꠍꠦ।’ ꠌꠣꠇꠞ ꠅꠇꠟꠦ ꠔꠣꠘꠞꠦ ꠎꠤꠇꠣꠁꠟ, ‘ꠔꠦ ꠀꠝꠞꠣ ꠉꠤꠀ ꠅꠃ ꠚꠥꠚꠞꠣ ꠉꠣꠍ ꠍꠣꠚ ꠇꠞꠤꠟꠔꠣꠝ ꠘꠤ?’ 29ꠝꠥꠘꠤꠛꠦ ꠇꠁꠟꠣ, ‘ꠘꠣ, ꠘꠣ, ꠔꠥꠝꠞꠣ ꠚꠥꠚꠞꠣ ꠉꠣꠍ ꠍꠣꠚ ꠇꠞꠣꠔ ꠉꠤꠀ, ꠗꠣꠘꠞ ꠉꠣꠍꠅ ꠔꠥꠟꠤꠟꠤꠛꠣꠄ। 30ꠄꠞꠟꠣꠉꠤ ꠗꠣꠘ ꠖꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠕꠣꠇꠃꠇ। ꠛꠣꠖꠦ ꠖꠣꠅꠀꠞ ꠛꠣꠟꠣ ꠀꠝꠤ ꠝꠣꠘꠡꠞꠦ ꠇꠁꠝꠥ, ꠙꠄꠟꠣ ꠢꠇꠟ ꠚꠥꠚꠞꠣ ꠉꠣꠍ ꠔꠥꠟꠔꠣ, ꠀꠞ ꠖꠣꠞꠥ ꠎꠣꠟꠣꠘꠤꠞ ꠟꠣꠉꠤ ꠀꠐꠤ ꠛꠣꠘ꠆ꠖꠤꠔꠣ, ꠛꠣꠖꠦ ꠗꠣꠘ ꠖꠣꠁꠀ ꠀꠝꠣꠞ ꠃꠉꠣꠞꠅ ꠔꠥꠟꠛꠣ।’ ”
ꠒꠦꠋꠉꠣ ꠛꠤꠌꠤ ꠀꠞ ꠈꠣꠝꠤꠞꠞ ꠇꠤꠌ꠆ꠍꠣ
31ꠢꠎꠞꠔ ꠁꠍꠣꠄ ꠀꠞꠇ ꠇꠤꠌ꠆ꠍꠣ ꠢꠥꠘꠣꠁꠟꠣ। ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠄꠉꠥ ꠒꠦꠋꠉꠣ ꠛꠤꠌꠤꠞ ꠟꠣꠈꠣꠘ। ꠄꠇꠎꠘ ꠝꠣꠘꠡꠦ ꠄꠉꠥ ꠒꠦꠋꠉꠣꠞ ꠛꠤꠌꠤ ꠔꠣꠞ ꠎꠝꠤꠘꠅ ꠛꠣꠁꠘ ꠖꠤꠟ। 32ꠁ ꠛꠤꠌꠤ ꠔ ꠢꠇꠟ ꠎꠣꠔꠞ ꠛꠤꠌꠤ ꠕꠣꠇꠤ ꠢꠥꠞꠥ। ꠅꠁꠟꠦ ꠛꠣꠁꠘ ꠖꠦꠅꠀꠞ ꠛꠣꠖꠦ ꠁ ꠉꠣꠍ ꠢꠇ꠆ꠇꠟ ꠎꠣꠔꠞ ꠢꠣꠉ-ꠔꠞꠇꠣꠞꠤ ꠕꠣꠇꠤ ꠛꠠ ꠅꠄ, ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠔꠣꠞ ꠒꠣꠟ-ꠙꠣꠟꠣꠔ ꠛꠣꠖꠣ ꠛꠣꠘꠣꠄ।”
33ꠄꠞꠛꠣꠖꠦ ꠀꠞꠇ ꠇꠤꠌ꠆ꠍꠣꠞ ꠝꠣꠎꠦ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠈꠣꠝꠤꠞꠞ ꠟꠣꠈꠣꠘ। ꠄꠇꠎꠘ ꠛꠦꠐꠤ ꠝꠣꠘꠡꠦ ꠔꠤꠘ ꠛꠡ꠆ꠔꠣ ꠝꠄꠖꠣꠞ ꠝꠣꠎꠦ ꠕꠥꠠꠣ ꠈꠣꠝꠤꠞ ꠝꠤꠡꠣꠁꠟ। ꠈꠣꠝꠤꠞꠞ ꠚꠣꠚꠦ ꠢꠇꠟ ꠝꠄꠖꠣ ꠚꠥꠟꠤꠀ ꠃꠑꠟ।”
34ꠢꠎꠞꠔ ꠁꠍꠣꠄ ꠇꠤꠌ꠆ꠍꠣ ꠢꠥꠘꠣꠁ ꠢꠥꠘꠣꠁ ꠢꠇꠟ ꠘꠝꠥꠘꠣꠞ ꠔꠣꠟꠤꠝ ꠖꠤꠟꠣ। ꠇꠤꠌ꠆ꠍꠣ ꠍꠣꠠꠣ ꠔꠣꠁꠘ ꠇꠥꠘꠥ ꠔꠣꠟꠤꠝ ꠖꠤꠟꠣ ꠘꠣ। 35ꠁꠔꠣ ꠢꠇ꠆ꠇꠟꠔꠣ ꠅꠁꠟ, ꠎꠣꠔꠦ ꠘꠛꠤꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠤꠟ, ꠅꠔꠣ ꠅꠈꠘ ꠙꠥꠞꠣ ꠅꠄ,
ꠔꠣꠟꠤꠝꠦ ꠜꠞꠣ ꠇꠤꠌ꠆ꠍꠣ ꠢꠥꠘꠣꠁ ꠢꠥꠘꠣꠁ
ꠀꠝꠤ ꠝꠣꠔꠤꠝꠥ,
ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠎꠔꠔꠣ ꠛꠣꠔꠥꠘꠤ ꠀꠍꠤꠟ,
ꠅꠔꠣ ꠅꠈꠘ ꠈꠥꠟꠝꠥ।
ꠗꠣꠘ ꠀꠞ ꠚꠥꠚꠞꠣ ꠉꠣꠍꠞ ꠇꠤꠌ꠆ꠍꠣꠞ ꠅꠞ꠆ꠕ
36ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠛꠤꠖꠣꠄ ꠖꠤꠀ ꠊꠞꠅ ꠢꠣꠝꠣꠁꠟꠣ। ꠅꠃ ꠡꠝꠄ ꠔꠣꠘ ꠡꠣꠉꠞꠤꠖ ꠅꠇꠟꠦ ꠀꠁꠀ ꠇꠁꠟꠣ, “ꠢꠥꠎꠥꠞ, ꠚꠥꠚꠞꠣ ꠉꠣꠍꠞ ꠇꠤꠌ꠆ꠍꠣꠞ ꠝꠣꠘꠤꠈꠣꠘ ꠀꠝꠞꠣꠞꠦ ꠛꠥꠎꠣꠁ ꠖꠦꠃꠇ꠆ꠇꠣ।”
37ꠔꠣꠁꠘ ꠇꠁꠟꠣ, “ꠜꠣꠟꠣ ꠗꠣꠘꠞ ꠎꠣꠟꠣ ꠎꠦꠁꠘ ꠛꠣꠁꠘ ꠇꠞꠂꠘ, ꠄꠁꠘ ꠅꠁꠟꠣꠝ ꠀꠝꠤ ꠛꠤꠘ-ꠀꠖꠝ। 38ꠎꠝꠤꠘ ꠅꠁꠟ ꠅꠃ ꠎꠉꠔ, ꠀꠞ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠝꠣꠘꠥꠡ ꠅꠁꠟꠣ ꠜꠣꠟꠣ ꠛꠤꠌ। ꠁꠛꠟꠤꠍꠞ ꠈꠣꠘ꠆ꠖꠣꠘ ꠅꠁꠟ ꠅꠃ ꠚꠥꠚꠞꠣ ꠉꠣꠍ। 39ꠎꠦ ꠖꠥꠡꠝꠘꠦ ꠚꠥꠚꠞꠣ ꠉꠣꠍ ꠛꠣꠁꠘ ꠖꠤꠍꠤꠟ, ꠢꠦ ꠅꠁꠟ ꠁꠛꠟꠤꠍ। ꠗꠣꠘ ꠖꠣꠅꠀꠞ ꠡꠝꠄ ꠅꠁꠟ ꠇꠤꠀꠝꠔ, ꠀꠞ ꠖꠣꠅꠞꠣ ꠅꠇꠟ ꠅꠁꠟꠣ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ। 40ꠚꠥꠚꠞꠣ ꠉꠣꠍ ꠀꠐꠤ ꠛꠣꠘ꠆ꠖꠤꠀ ꠎꠦꠟꠣ ꠖꠣꠞꠥ ꠎꠣꠟꠣꠘꠤ ꠅꠄ, ꠇꠤꠀꠝꠔꠞ ꠡꠝꠄ ꠑꠤꠇ ꠅꠟꠣꠃ ꠅꠁꠛ। 41ꠛꠤꠘ-ꠀꠖꠝꠦ ꠔꠣꠘ ꠚꠤꠞꠤꠡ꠆ꠔꠣ ꠅꠇꠟ ꠙꠣꠑꠣꠁꠛꠣ। ꠎꠦ ꠝꠣꠘꠡꠦ ꠘꠤꠎꠦ ꠉꠥꠘꠣ ꠇꠞꠦ ꠀꠞ ꠀꠞꠇ ꠎꠘꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠔꠣꠞꠣ ꠢꠇꠟꠞꠦ ꠚꠤꠞꠤꠡ꠆ꠔꠣ ꠅꠇꠟꠦ ꠛꠤꠘ-ꠀꠖꠝꠞ ꠛꠣꠖꠡꠣꠁꠞ ꠝꠣꠎ ꠕꠣꠇꠤ ꠄꠇꠈꠣꠘꠅ ꠖꠟꠣ ꠇꠞꠤꠀ, 42ꠖꠥꠎꠈꠞ ꠀꠉꠥꠘꠤꠔ ꠚꠣꠟꠣꠁꠛꠣ। ꠢꠤꠘꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛꠣ। 43ꠢꠤ ꠡꠝꠄ ꠀꠟ꠆ꠟꠣꠞꠣꠁꠀ ꠝꠣꠘꠡꠦ ꠔꠣꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠛꠣꠖꠡꠣꠁꠔ ꠘꠥꠞꠣꠘꠤ ꠍꠥꠞꠔꠦ ꠡꠥꠞꠥꠎꠞ ꠟꠣꠈꠣꠘ ꠏꠤꠟꠝꠤꠟ ꠇꠞꠛꠣ। ꠢꠥꠘꠣꠞ ꠟꠣꠈ ꠇꠣꠘ ꠎꠣꠞ ꠀꠍꠦ, ꠢꠦ ꠢꠥꠘꠃꠇ।
ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠀꠞꠅ ꠔꠤꠘ ꠇꠤꠌ꠆ꠍꠣ
44“ꠢꠥꠘꠅ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ, ꠝꠣꠐꠤꠞ ꠔꠟꠦ ꠟꠥꠇꠣꠁꠟ ꠇꠥꠘꠥ ꠗꠘꠞ ꠟꠣꠈꠣꠘ। ꠇꠥꠘꠥ ꠝꠣꠘꠡꠦ ꠅꠃ ꠗꠘ ꠔꠥꠇꠣꠁꠀ ꠙꠣꠁꠟ, ꠙꠣꠁꠀ ꠢꠤꠞꠛꠣꠞ ꠉꠣꠠꠤꠀ ꠕꠁ ꠖꠤꠟ। ꠁ ꠗꠘ ꠙꠣꠁꠀ ꠈꠥꠡꠤ ꠅꠁꠀ ꠢꠦ ꠔꠣꠞ ꠢꠇꠟ ꠍꠣꠝꠣꠘꠣ ꠛꠦꠌꠤꠀ, ꠅꠃ ꠎꠝꠤꠘꠈꠣꠘ ꠈꠞꠤꠖ ꠇꠞꠟ।
45“ꠢꠤꠞꠛꠣꠞ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠅꠟꠣ ꠄꠇ ꠡꠖꠣꠉꠞꠞ ꠟꠣꠈꠣꠘ, ꠁ ꠡꠖꠣꠉꠞꠦ ꠈꠣꠐꠤ ꠝꠘꠤ-ꠝꠥꠇ꠆ꠔꠣ ꠔꠥꠇꠣꠘꠤꠔ ꠀꠍꠤꠟ। 46ꠢꠦ ꠄꠇꠐꠣ ꠖꠣꠝꠤ ꠝꠥꠇ꠆ꠔꠣꠞ ꠈꠛꠞ ꠙꠣꠁꠀ, ꠔꠣꠞ ꠢꠇ꠆ꠇꠟꠔꠣ ꠛꠦꠌꠤꠀ ꠅꠃ ꠝꠥꠇ꠆ꠔꠣ ꠈꠞꠤꠖ ꠇꠞꠟ।
47“ꠛꠣ ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠎꠣꠟꠞ ꠟꠣꠈꠣꠘ, ꠁ ꠎꠣꠟꠖꠤ ꠀꠅꠞꠅ ꠐꠣꠘ ꠖꠤꠟꠦ ꠄꠞ ꠜꠤꠔꠞꠦ ꠢꠇ꠆ꠇꠟ ꠎꠣꠔꠞ ꠝꠣꠍ ꠢꠣꠝꠣꠁꠟ। 48ꠝꠣꠍꠦ ꠎꠣꠟ ꠜꠞꠤꠉꠦꠟꠦ ꠎꠣꠟꠥꠀ ꠅꠇꠟꠦ ꠁꠈꠣꠘꠞꠦ ꠐꠣꠘꠤꠀ ꠙꠣꠞꠅ ꠔꠥꠟꠟ। ꠛꠣꠖꠦ ꠔꠣꠞꠣ ꠜꠣꠟꠣ ꠜꠣꠟꠣ ꠝꠣꠍ ꠛꠣꠍꠤꠀ ꠌꠣꠋꠉꠣꠔ ꠕꠁꠟ ꠀꠞ ꠛꠣꠖ ꠉꠥꠁꠘ ꠚꠣꠟꠣꠁ ꠖꠤꠟ। 49ꠔꠦ ꠢꠣꠡꠞꠞ ꠝꠄꠖꠣꠘꠅ ꠅꠃ ꠢꠣꠟꠔ ꠅꠁꠛ। ꠚꠤꠞꠤꠡ꠆ꠔꠣ ꠅꠇꠟꠦ ꠀꠁꠀ ꠀꠟ꠆ꠟꠣꠞꠣꠁꠀ ꠝꠣꠘꠡꠞ ꠖꠟ ꠕꠣꠇꠤ, ꠘꠣꠚꠞꠝꠣꠘ ꠅꠇꠟꠞꠦ ꠀꠟꠉꠣꠁꠀ ꠖꠥꠎꠈꠞ ꠀꠉꠥꠘꠤꠔ ꠚꠣꠟꠣꠁꠛꠣ। 50ꠢꠤꠘꠅ ꠔꠣꠞꠣ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛꠣ।”
51ꠄꠞꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠎꠤꠇꠣꠁꠟꠣ, “ꠔꠥꠝꠞꠣ ꠁꠔꠣ ꠢꠇꠟꠔꠣ ꠛꠥꠎꠍ ꠘꠤ?”
ꠔꠣꠞꠣ ꠇꠁꠟꠣ, “ꠎꠤꠅꠄ, ꠛꠥꠎꠍꠤ।”
52ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠎꠦ ꠝꠃꠟꠣꠘꠣ ꠅꠇꠟꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠔꠣꠟꠤꠝ ꠙꠣꠁꠍꠂꠘ, ꠔꠣꠞꠣ ꠅꠟꠣ ꠄꠇ ꠉꠤꠞꠡ꠆ꠔꠞ ꠟꠣꠈꠣꠘ, ꠎꠦ ꠉꠤꠞꠡ꠆ꠔꠦ ꠔꠣꠘ ꠡꠘ꠆ꠖꠥꠇ ꠕꠣꠇꠤ ꠘꠄꠀ ꠀꠞ ꠙꠥꠞꠣꠘꠣ ꠝꠣꠟ ꠛꠣꠞ ꠇꠞꠂꠘ।”
ꠢꠎꠞꠔ ꠁꠍꠣꠄ ꠇꠦꠘꠦ ꠔꠡꠞꠤꠚ ꠀꠘꠍꠂꠘ (১৩:৫৩-১৭:২৭)
ꠘꠤꠎꠞ ꠉꠣꠃꠔ ꠢꠎꠞꠔ ꠁꠍꠣꠞ ꠅꠡꠝ꠆ꠝꠣꠘ
53ꠢꠎꠞꠔ ꠁꠍꠣꠄ ꠇꠤꠌ꠆ꠍꠣ ꠇꠁꠀ ꠇꠁꠀ ꠔꠣꠟꠤꠝ ꠖꠤꠀ ꠢꠣꠞꠟꠦ ꠁꠘ ꠕꠘꠦ ꠉꠦꠟꠣꠉꠤ। 54ꠉꠤꠀ ꠔꠣꠘ ꠘꠤꠎꠞ ꠉꠣꠃꠞ ꠝꠍꠤꠖꠅ ꠢꠣꠝꠣꠁꠀ ꠅꠀꠎ-ꠘꠍꠤꠅꠔ ꠇꠞꠟꠣ। ꠔꠣꠘ ꠛꠄꠀꠘ ꠢꠥꠘꠤꠀ ꠝꠣꠘꠡꠦ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠁ ꠛꠦꠐꠣꠄ ꠇꠦꠝꠘꠦ ꠅꠔ ꠁꠟꠤꠝ ꠀꠞ ꠇꠦꠞꠣꠝꠔꠤ ꠙꠣꠁꠟ? 55ꠄ ꠇꠤꠔꠣ ꠢꠃ ꠇꠣꠑ ꠝꠦꠡ꠆ꠔꠞꠤꠞ ꠙꠥꠀ ꠘꠣꠄ ꠘꠤ? ꠔꠣꠞ ꠝꠣʼꠞ ꠘꠣꠝ ꠝꠞꠤꠅꠝ ꠘꠣꠄ ꠘꠤ? ꠢꠦ ꠁꠀꠇꠥꠛ, ꠁꠃꠍꠥꠚ, ꠍꠣꠁꠝꠘ ꠀꠞ ꠄꠢꠥꠖꠣꠞ ꠜꠣꠁ ꠘꠣꠄ ꠘꠤ? 56ꠔꠣꠞ ꠛꠁꠘꠣꠁꠘ ꠔ ꠀꠝꠞꠣꠞ ꠉꠣꠃꠔꠃ ꠞꠁꠞꠣ? ꠔꠦ ꠢꠦ ꠁꠔꠣ ꠁꠟꠤꠝ ꠇꠁ ꠕꠣꠇꠤ ꠙꠣꠁꠟ?” 57ꠅꠃ ꠟꠣꠈꠣꠘ ꠁꠍꠣꠞꠦ ꠟꠁꠀ ꠝꠣꠘꠡꠞ ꠖꠤꠟꠅ ꠛꠤꠔꠤꠡꠘꠣ ꠀꠁꠟ। ꠅꠃ ꠡꠝꠄ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠘꠤꠎꠞ ꠛꠣꠠꠤ-ꠊꠞ ꠛꠣ ꠉꠣꠃ-ꠖꠦꠡ ꠍꠣꠠꠣ ꠀꠞ ꠢꠇꠟ ꠎꠣꠉꠣꠔꠃ ꠘꠛꠤ ꠅꠇꠟꠦ ꠡꠝ꠆ꠝꠣꠘ ꠙꠣꠁꠘ।”
58ꠉꠣꠃꠞ ꠝꠣꠘꠡꠞ ꠁꠝꠣꠘ ꠘꠣꠁ ꠖꠦꠈꠤꠀ, ꠔꠣꠁꠘ ꠢꠤꠈꠣꠘꠅ ꠛꠦꠡꠤ ꠇꠦꠞꠣꠝꠔꠤ ꠖꠦꠈꠣꠁꠟꠣ ꠘꠣ।
Currently Selected:
ꠁꠘ꠆ꠎꠤꠟ ১: ꠝꠕꠤ 13: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
