ꠁꠘ꠆ꠎꠤꠟ ১: ꠝꠕꠤ 12

ꠎꠥꠝ꠆ꠝꠣꠛꠣꠞꠞ ꠛꠦꠙꠣꠞꠦ ꠔꠣꠟꠤꠝ

1ꠄꠇ ꠎꠥꠝ꠆ꠝꠣꠛꠣꠞꠦ ꠢꠎꠞꠔ ꠁꠍꠣ ꠈꠦꠔꠞ ꠀꠁꠟꠦꠖꠤ ꠀꠐꠤꠀ ꠎꠣꠅꠀꠔ ꠀꠍꠟꠣ। ꠔꠣꠘ ꠡꠣꠉꠞꠤꠖ ꠅꠇꠟꠞ ꠙꠦꠐꠅ ꠜꠥꠇ ꠟꠣꠉꠣꠄ, ꠔꠣꠞꠣ ꠗꠣꠘꠞ ꠍꠠꠣ ꠍꠤꠠꠤ ꠍꠤꠠꠤ ꠈꠣꠅꠀꠔ ꠟꠣꠉꠟꠣ। 2ꠁꠔꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠝꠣꠘꠡꠦ ꠁꠍꠣꠞꠦ ꠇꠁꠟꠣ, “ꠀꠝꠞꠣꠞ ꠡꠞꠤꠅꠔꠦ ꠇꠄ, ꠎꠥꠝ꠆ꠝꠣꠛꠣꠞꠦ ꠇꠥꠘꠥ ꠇꠣꠝ ꠇꠞꠣ ꠎꠣꠁꠎ ꠘꠣꠄ, ꠔꠦ ꠀꠙꠘꠣꠞ ꠡꠣꠉꠞꠤꠖ ꠅꠇꠟꠦ ꠗꠣꠘꠞ ꠍꠠꠣ ꠍꠤꠠꠤꠞꠣ ꠇꠦꠘꠦ?”

3ꠁꠍꠣꠄ ꠎꠥꠀꠙ ꠖꠤꠟꠣ, “ꠖꠣꠃꠖ ꠘꠛꠤ ꠀꠞ ꠔꠣꠘ ꠟꠉꠞ ꠝꠣꠘꠡꠦ ꠄꠇꠛꠣꠞ ꠙꠦꠐꠞ ꠜꠥꠇꠦ ꠎꠦꠔꠣ ꠇꠞꠍꠟꠣ, ꠁꠔꠣ ꠀꠙꠘꠣꠞꠣ ꠙꠠꠍꠂꠘ ꠘꠣ ꠘꠤ? 4ꠔꠣꠁꠘ ꠀꠟ꠆ꠟꠣꠞ ꠇꠣꠛꠣ ꠊꠞꠅ ꠢꠣꠝꠣꠁꠀ ꠢꠃ ꠙꠛꠤꠔ꠆ꠞ ꠞꠥꠐꠤ ꠈꠣꠁꠍꠟꠣ, ꠁ ꠞꠥꠐꠤ ꠈꠣꠅꠀ ꠔ ꠔꠣꠁꠘ ꠀꠞ ꠔꠣꠘ ꠟꠉꠞ ꠝꠣꠘꠡꠞ ꠟꠣꠉꠤ ꠘꠣꠎꠣꠁꠎ, ꠁꠔꠣ ꠈꠣꠟꠤ ꠁꠝꠣꠝ ꠍꠣꠛꠞ ꠟꠣꠉꠤ ꠎꠣꠁꠎ ꠀꠍꠤꠟ। 5ꠀꠞ ꠀꠙꠘꠣꠞꠣ ꠔꠃꠞꠣꠔ ꠡꠞꠤꠚꠅ ꠙꠠꠍꠂꠘ ꠘꠣ ꠘꠤ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠁꠝꠣꠝ ꠅꠇꠟꠦ ꠎꠥꠝ꠆ꠝꠣꠛꠣꠞꠦ ꠎꠥꠝ꠆ꠝꠣꠞ ꠖꠤꠘꠞ ꠘꠤꠅꠝ ꠜꠣꠋꠟꠦꠅ ꠔꠣꠞꠣꠞ ꠇꠥꠘꠥ ꠉꠥꠘꠣ ꠅꠄ ꠘꠣ। 6ꠅꠁꠟꠦ ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤꠅ ꠖꠣꠝꠤ ꠄꠇ ꠝꠣꠘꠥꠡ ꠅꠘꠅ ꠀꠍꠂꠘ। 7ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠀꠄꠀꠔꠞ ꠜꠦꠖ ꠎꠥꠖꠤ ꠀꠙꠘꠣꠞꠣ ꠛꠥꠎꠔꠣ, ꠎꠦ ꠀꠄꠀꠔꠅ ꠀꠍꠦ, ‘ꠀꠝꠤ ꠖꠄꠀ ꠖꠦꠈꠔꠣꠝ ꠌꠣꠁ, ꠙꠡꠥ-ꠇꠥꠞꠛꠣꠘꠤ ꠘꠣꠄ।’ ꠔꠦ ꠀꠙꠘꠣꠞꠣ ꠘꠤ-ꠅꠙꠞꠣꠗꠤꠞꠦ ꠅꠙꠞꠣꠗꠤ ꠛꠣꠘꠣꠁꠟꠣ ꠘꠣ ꠅꠘꠦ। 8ꠢꠥꠘꠃꠇ꠆ꠇꠣ, ꠎꠥꠝ꠆ꠝꠣꠛꠣꠞꠞ ꠔꠣꠝꠣꠝ ꠄꠈꠔꠤꠀꠞ ꠀꠝꠤ ꠛꠤꠘ-ꠀꠖꠝꠞ ꠀꠔꠅ।”

ꠢꠥꠇꠘꠣ ꠀꠔꠀꠟꠣ ꠛꠦꠝꠣꠞꠤꠞ ꠡꠤꠚꠣ

9ꠛꠣꠖꠦ ꠢꠎꠞꠔ ꠁꠍꠣ ꠁꠘ ꠕꠘꠦ ꠉꠤꠀ ꠅꠃ ꠚꠞꠤꠡꠤ ꠅꠇꠟꠞ ꠝꠍꠤꠖꠅ ꠢꠣꠝꠣꠁꠟꠣ। 10ꠢꠘꠅ ꠅꠟꠣ ꠄꠇ ꠛꠦꠐꠣ ꠀꠍꠤꠟ, ꠔꠣꠞ ꠄꠇ ꠀꠔ ꠛꠦꠝꠣꠞꠦ ꠢꠥꠇꠣꠁ ꠉꠦꠍꠦ। ꠁꠍꠣꠞ ꠇꠥꠘꠥ ꠈꠥꠔ ꠛꠣꠞ ꠇꠞꠤꠀ ꠔꠣꠘꠞꠦ ꠖꠥꠡꠤ ꠛꠣꠘꠣꠘꠤꠞ ꠘꠤꠅꠔꠦ, ꠅꠃ ꠝꠍꠤꠖꠞ ꠝꠣꠘꠡꠦ ꠔꠣꠘꠞꠦ ꠎꠤꠇꠣꠁꠟ, “ꠍꠣꠛ, ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠎꠥꠝ꠆ꠝꠣꠛꠣꠞꠦ ꠇꠦꠃꠞꠞ ꠛꠦꠝꠣꠞ ꠡꠤꠚꠣ ꠇꠞꠣ ꠎꠣꠁꠎ ꠘꠤ?”

11ꠁꠍꠣꠄ ꠎꠥꠀꠙ ꠖꠤꠟꠣ, “ꠗꠞꠃꠇ꠆ꠇꠣ, ꠀꠙꠘꠣꠞꠣ ꠄꠇꠎꠘꠞ ꠄꠉꠥ ꠝꠦꠠꠣ ꠎꠥꠖꠤ ꠎꠥꠝ꠆ꠝꠣꠛꠣꠞꠦ ꠉꠣꠔꠞ ꠝꠣꠎꠦ ꠙꠠꠤꠎꠣꠄ, ꠔꠦ ꠅꠃ ꠖꠤꠘ ꠁ ꠝꠦꠠꠣꠞꠦ ꠉꠣꠔꠅ ꠕꠣꠇꠤ ꠔꠥꠟꠔꠣ ꠘꠣꠄ ꠘꠤ? 12ꠀꠞ ꠝꠣꠘꠡꠞ ꠖꠣꠝ ꠔ ꠝꠦꠠꠣ ꠕꠣꠇꠤ ꠛꠃꠔ ꠛꠦꠡꠤ। ꠄꠞꠟꠣꠉꠤ ꠛꠥꠎꠣ ꠎꠣꠄ, ꠎꠥꠝ꠆ꠝꠣꠛꠣꠞꠦꠅ ꠘꠦꠇ ꠇꠣꠝ ꠇꠞꠣ ꠎꠣꠁꠎ ꠀꠍꠦ।” 13ꠛꠣꠖꠦ ꠔꠣꠁꠘ ꠅꠃ ꠢꠥꠇꠘꠣ ꠀꠔꠀꠟꠣ ꠛꠦꠐꠣꠞꠦ ꠇꠁꠟꠣ, “ꠔꠥꠝꠣꠞ ꠀꠔꠈꠣꠘ ꠛꠣꠠꠣꠅ।” ꠢꠦ ꠔꠣꠞ ꠀꠔ ꠛꠣꠠꠣꠁꠔꠦꠃ ꠢꠥꠇꠘꠣ ꠀꠔ ꠅꠁꠘ꠆ꠘ ꠀꠔꠞ ꠟꠣꠈꠣꠘ ꠙꠥꠞꠣꠙꠥꠞ ꠜꠣꠟꠣ ꠅꠁꠉꠦꠟ। 14ꠛꠣꠖꠦ ꠢꠃ ꠚꠞꠤꠡꠤ ꠅꠇꠟꠦ ꠛꠣꠞꠦ ꠉꠤꠀ ꠙꠞꠣꠝꠤꠡ ꠇꠞꠟꠣ, ꠁꠍꠣꠞꠦ ꠇꠤꠟꠣ ꠎꠣꠘꠦ ꠝꠣꠞꠣ ꠎꠣꠄ।

ꠢꠎꠞꠔ ꠁꠍꠣꠃ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ

15ꠔꠣꠞꠣꠞ ꠅꠃ ꠙꠞꠣꠝꠤꠡꠞ ꠈꠛꠞ ꠁꠍꠣꠄ ꠎꠣꠘꠤꠟꠤꠟꠣ, ꠄꠞꠟꠣꠉꠤ ꠔꠣꠁꠘ ꠢꠤꠘ ꠕꠘꠦ ꠢꠞꠤꠉꠦꠟꠣ। ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠀꠁꠟꠣ। ꠄꠞꠣꠞ ꠝꠣꠎꠦ ꠎꠔ ꠛꠦꠝꠣꠞꠤ ꠀꠍꠟꠣ, ꠔꠣꠁꠘ ꠄꠞꠣ ꠢꠇꠟꠞꠦ ꠜꠣꠟꠣ ꠇꠞꠟꠣ। 16ꠔꠣꠁꠘ ꠄꠞꠣꠞꠦ ꠖꠠꠣꠁꠀ ꠇꠁꠟꠣ, “ꠈꠛꠞꠖꠣꠞ, ꠔꠥꠝꠞꠣ ꠀꠝꠣꠞ ꠙꠞꠤꠌꠄ ꠎꠣꠁꠞ ꠇꠞꠤꠅ ꠘꠣ।” 17ꠁꠔꠣ ꠅꠁꠍꠤꠟ ꠎꠣꠔꠦ ꠀꠉꠞ ꠀꠝꠟꠞ ꠘꠛꠤ ꠁꠡꠣꠄꠀꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠤꠟ, ꠅꠔꠣ ꠚꠟꠤꠎꠣꠄ। ꠔꠣꠁꠘ ꠇꠁꠍꠟꠣ,

18ꠢꠥꠘꠅ, ꠀꠝꠤ ꠀꠝꠣꠞ ꠅꠃ ꠉꠥꠟꠣꠝꠞꠦ ꠙꠍꠘ꠆ꠖ ꠇꠞꠍꠤ।

ꠄꠁꠘꠃ ꠀꠝꠣꠞ ꠝꠣꠄꠀꠞ ꠎꠘ, ꠔꠣꠘ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ।

ꠄꠘ ꠃꠙꠞꠦ ꠀꠝꠤ ꠀꠝꠣꠞ ꠞꠥꠢꠥ ꠖꠤꠝꠥ,

ꠢꠇꠟ ꠎꠣꠔꠤꠞ ꠉꠦꠍꠦ ꠔꠣꠁꠘ ꠀꠝꠣꠞ ꠢꠇ ꠛꠤꠌꠣꠞꠞ ꠇꠕꠣ ꠎꠣꠘꠣꠁꠛꠣ।

19ꠔꠣꠁꠘ ꠇꠥꠘꠥ ꠔꠞ꠆ꠇꠣ-ꠔꠞ꠆ꠇꠤ ꠛꠣ ꠌꠤꠟ꠆ꠟꠣ-ꠌꠤꠟ꠆ꠟꠤ ꠇꠞꠔꠣ ꠘꠣꠄ,

ꠙꠕꠦ-ꠊꠣꠐꠦ ꠇꠥꠘꠥ ꠝꠣꠘꠡꠦ ꠔꠣꠘ ꠀꠅꠀꠎ ꠢꠥꠘꠔ ꠘꠣꠄ।

20ꠢꠇ ꠛꠤꠌꠣꠞ ꠇꠣꠁꠝ ꠅꠀꠞ ꠀꠉ ꠙꠞ꠆ꠎꠘ꠆ꠔ,

ꠔꠣꠁꠘ ꠍꠦꠌꠣ ꠘꠟ-ꠈꠣꠉꠠꠣ ꠜꠣꠋꠉꠤꠔꠣ ꠘꠣꠄ,

ꠀꠞ ꠝꠤꠐ ꠝꠤꠐ ꠇꠞꠤ ꠎꠟꠞꠣ ꠟꠦꠝꠞ ꠚꠤꠔꠣꠅ ꠟꠤꠝꠣꠁꠔꠣ ꠘꠣꠄ।

21ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠔꠣꠘ ꠃꠙꠞꠦꠃ ꠜꠞꠡꠣ ꠇꠞꠛꠣ।

ꠢꠎꠞꠔ ꠁꠍꠣ ꠀꠞ ꠎꠤꠘꠞ ꠛꠣꠖꠡꠣ

22ꠛꠣꠖꠦ ꠝꠣꠘꠡꠦ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟ। ꠁ ꠛꠦꠐꠣ ꠀꠍꠤꠟ ꠀꠘ꠆ꠖꠣ ꠀꠞ ꠛꠥꠛꠣ। ꠔꠣꠁꠘ ꠅꠃ ꠛꠦꠐꠣꠞꠦ ꠜꠣꠟꠣ ꠇꠞꠟꠣ। ꠢꠦ ꠜꠣꠟꠣ ꠅꠁꠀ ꠝꠣꠔ-ꠇꠕꠣ ꠝꠣꠔꠤꠟ ꠀꠞ ꠌꠃꠈꠦꠅ ꠖꠦꠈꠟ। 23ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠖꠣꠃꠖ ꠘꠛꠤꠞ ꠈꠣꠘ꠆ꠖꠣꠘꠅ ꠎꠦꠁꠘ ꠎꠘꠝ ꠅꠀꠞ ꠇꠕꠣ, ꠄꠁꠘꠃ ꠢꠦꠁꠘ ꠘꠤ?” 24ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠅꠇꠟꠦ ꠇꠁꠟꠣ, “ꠁꠉꠤꠄ ꠔ ꠎꠤꠘꠞ ꠛꠣꠖꠡꠣ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠄ।”

25ꠔꠣꠞꠣꠞ ꠝꠘꠞ ꠌꠤꠘ꠆ꠔꠣ ꠛꠥꠎꠤꠀ ꠁꠍꠣꠄ ꠇꠁꠟꠣ, “ꠇꠥꠘꠥ ꠖꠦꠡꠞ ꠜꠤꠔꠞꠦ ꠖꠟꠣꠖꠟꠤ ꠟꠣꠉꠤꠉꠦꠟꠦ, ꠁ ꠖꠦꠡ ꠔ ꠛꠤꠘꠣꠡ ꠅꠁꠎꠣꠄ। ꠅꠃ ꠟꠣꠈꠣꠘ ꠇꠥꠘꠥ ꠙꠞꠤꠛꠣꠞꠞ ꠝꠣꠎꠦ ꠛꠣ ꠇꠥꠘꠥ ꠐꠣꠃꠘꠅ ꠎꠦꠛꠟꠣ ꠖꠟꠣꠖꠟꠤ ꠟꠣꠉꠤꠎꠣꠄ, ꠁꠔꠣꠅ ꠀꠞ ꠐꠤꠇꠦ ꠘꠣ। 26ꠅꠃꠟꠣ ꠡꠄꠔꠣꠘꠦ ꠎꠥꠖꠤ ꠡꠄꠔꠣꠘꠞꠦ ꠈꠦꠖꠣꠁ ꠖꠦꠄ, ꠔꠦ ꠔ ꠔꠣꠞ ꠘꠤꠎꠞ ꠝꠣꠎꠦꠃ ꠖꠟꠣꠖꠟꠤ ꠟꠣꠉꠤꠉꠦꠟ। ꠔꠣꠞ ꠞꠣꠎꠔ꠆ꠔ ꠀꠞ ꠇꠤꠟꠣ ꠐꠤꠇꠛ? 27ꠀꠝꠤ ꠎꠥꠖꠤ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔꠥꠝꠞꠣꠞ ꠝꠣꠘꠡꠦ ꠇꠣꠞ ꠛꠟꠦ ꠍꠣꠠꠣꠄ? ꠔꠥꠝꠞꠣꠞ ꠝꠣꠔꠞ ꠛꠤꠌꠣꠞ ꠔꠥꠝꠞꠣꠞ ꠝꠣꠘꠡꠦꠃ ꠇꠞꠛꠣ। 28ꠅꠁꠟꠦ ꠀꠝꠤ ꠎꠥꠖꠤ ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔ ꠀꠟ꠆ꠟꠣꠞ ꠛꠣꠖꠡꠣꠁ ꠔꠥꠝꠞꠣꠞ ꠗꠣꠞꠅ ꠀꠁꠌ꠆ꠍꠦ।

29“ꠇꠥꠘꠥ ꠛꠟꠀꠟꠣ ꠝꠣꠘꠡꠞ ꠛꠣꠠꠤꠔ ꠟꠥꠐ-ꠔꠞꠣꠎ ꠇꠞꠣꠔ ꠀꠁꠀ, ꠙꠄꠟꠣ ꠛꠟꠀꠟꠣ ꠎꠘꠞꠦ ꠘꠣ ꠛꠣꠘ꠆ꠖꠤꠟꠦ, ꠇꠦꠝꠘꠦ ꠟꠥꠐ-ꠔꠞꠣꠎ ꠇꠞꠛ? ꠅꠁꠟꠦ ꠔꠣꠞꠦ ꠛꠣꠘ꠆ꠖꠤꠀ ꠢꠣꠞꠟꠦ ꠟꠥꠐ-ꠙꠣꠐ ꠇꠞꠔ ꠙꠣꠞꠛ।

30“ꠇꠦꠃ ꠎꠥꠖꠤ ꠀꠝꠣꠞ ꠙꠇ꠆ꠇꠦ ꠘꠣ ꠕꠣꠇꠦ, ꠢꠦ ꠔ ꠀꠝꠣꠞ ꠛꠤꠙꠇ꠆ꠇꠦ। ꠎꠦ ꠎꠘꠦ ꠀꠝꠣꠞ ꠟꠉꠦ ꠔꠥꠇꠣꠄ ꠘꠣ, ꠢꠦ ꠔ ꠍꠤꠔ꠆ꠞꠣꠄ। 31ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠝꠣꠘꠡꠞ ꠔꠣꠝꠣꠝ ꠘꠝꠥꠘꠣꠞ ꠉꠥꠘꠣ ꠀꠞ ꠇꠥꠚꠥꠞꠤꠞ ꠝꠣꠚꠤ ꠀꠍꠦ, ꠅꠁꠟꠦ ꠙꠣꠇ ꠞꠥꠢꠥꠞ ꠛꠦꠙꠣꠞꠦ ꠇꠥꠚꠥꠞꠤ ꠇꠞꠟꠦ, ꠁ ꠇꠥꠚꠥꠞꠤꠞ ꠇꠥꠘꠥ ꠝꠣꠚꠤ ꠝꠤꠟꠔ ꠘꠣꠄ। 32ꠀꠝꠤ ꠛꠤꠘ-ꠀꠖꠝꠞ ꠛꠤꠞꠥꠖ꠆ꠖꠦ ꠇꠦꠃ ꠇꠥꠘ꠆ꠔꠣ ꠝꠣꠔꠤꠟꠦꠅ ꠢꠦ ꠝꠣꠚꠤ ꠙꠣꠁꠛ, ꠅꠁꠟꠦ ꠙꠣꠇ ꠞꠥꠢꠥꠞ ꠛꠤꠞꠥꠖ꠆ꠖꠦ ꠝꠣꠔꠤꠟꠦ ꠔꠣꠞ ꠇꠥꠘꠥ ꠝꠣꠚꠤ ꠘꠣꠁ, ꠁ ꠎꠤꠘ꠆ꠖꠦꠉꠤꠔꠅ ꠘꠣꠁ, ꠀꠈꠦꠞꠅ-ꠅ ꠘꠣꠁ।

ꠚꠟ ꠖꠦꠈꠤꠀ ꠉꠣꠍ ꠌꠤꠘꠣ ꠎꠣꠄ

33“ꠝꠘꠅ ꠞꠣꠈꠛꠣ, ꠉꠣꠍ ꠜꠣꠟꠣ ꠅꠁꠟꠦ ꠔꠣꠞ ꠚꠟꠅ ꠜꠣꠟꠣ ꠅꠄ, ꠀꠞ ꠉꠣꠍ ꠛꠥꠞꠣ ꠅꠁꠟꠦ ꠔꠣꠞ ꠚꠟꠅ ꠛꠥꠞꠣ ꠅꠄ। ꠚꠟ ꠖꠤꠀꠃ ꠉꠣꠍ ꠌꠤꠘꠣ ꠎꠣꠄ। 34ꠅ ꠢꠣꠚꠞ ꠛꠣꠁꠌ꠆ꠌꠣꠁꠘ, ꠔꠥꠝꠞꠣ ꠘꠤꠎꠦꠃ ꠔ ꠈꠣꠞꠣꠙ, ꠔꠦ ꠔꠥꠝꠞꠣꠞ ꠝꠥꠈ ꠕꠘꠦ ꠜꠣꠟꠣ ꠛꠥꠟꠤ ꠇꠦꠝꠘꠦ ꠛꠣꠞ ꠅꠁꠛ? ꠝꠣꠘꠡꠞ ꠖꠤꠟ ꠎꠦꠔꠣꠖꠤ ꠜꠞꠣ, ꠝꠥꠈ ꠕꠣꠇꠤ ꠔ ꠅꠔꠣꠃ ꠛꠣꠞꠅꠄ। 35ꠜꠣꠟꠣ ꠝꠣꠘꠡꠞ ꠖꠤꠟꠞ ꠜꠤꠔꠞꠞ ꠜꠣꠟꠣꠁ ꠕꠘꠦ ꠜꠣꠟꠣ ꠛꠥꠟꠤ ꠛꠣꠞꠅꠄ, ꠀꠞ ꠛꠣꠖ ꠝꠣꠘꠡꠞ ꠖꠤꠟꠞ ꠛꠥꠞꠣꠁ ꠕꠘꠦ ꠛꠣꠖ ꠛꠥꠟꠤ ꠛꠣꠞꠅꠄ। 36ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠦ ꠝꠣꠘꠡꠦ ꠀꠎꠦ-ꠛꠣꠎꠦ ꠛꠦꠞ-ꠛꠦꠞꠤ ꠇꠞꠦ, ꠢꠣꠡꠞꠞ ꠝꠄꠖꠣꠘꠅ ꠔꠣꠞ ꠙꠞꠔꠦꠇ ꠝꠣꠔꠞ ꠢꠤꠡꠣꠛ ꠖꠤꠔꠦ ꠅꠁꠛ। 37ꠔꠥꠝꠣꠞ ꠎꠛꠣꠘꠦꠃ ꠔꠥꠝꠣꠞꠦ ꠖꠥꠡꠤ ꠛꠣꠘꠣꠁꠛ, ꠀꠞ ꠅꠃ ꠎꠛꠣꠘꠦꠃ ꠔꠥꠝꠣꠞꠦ ꠘꠤꠞ꠆ꠖꠥꠡꠤꠅ ꠛꠣꠘꠣꠁꠛ।”

38ꠛꠣꠖꠦ ꠇꠄꠎꠘ ꠝꠃꠟꠣꠘꠣ ꠀꠞ ꠚꠞꠤꠡꠤꠄ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠀꠙꠘꠣꠞ ꠄꠇꠈꠣꠘ ꠇꠦꠞꠣꠝꠔꠤ ꠖꠦꠈꠔꠣꠝ ꠌꠣꠁ।” 39ꠁꠍꠣꠄ ꠎꠥꠀꠙ ꠖꠤꠟꠣ, “ꠁ ꠎꠝꠣꠘꠣꠞ ꠘꠣꠚꠞꠝꠣꠘ ꠀꠞ ꠛꠦꠁꠝꠣꠘ ꠅꠇꠟꠦ ꠈꠣꠟꠤ ꠇꠦꠞꠣꠝꠔꠤ ꠖꠦꠈꠔꠣ ꠌꠣꠁꠘ, ꠅꠁꠟꠦ ꠁꠃꠘꠥꠍ ꠘꠛꠤꠞ ꠇꠦꠞꠣꠝꠔꠤ ꠍꠣꠠꠣ ꠖꠥꠍꠞꠣ ꠇꠥꠘꠥ ꠇꠦꠞꠣꠝꠔꠤ ꠔꠣꠞꠣꠞꠦ ꠖꠦꠈꠣꠁꠟ ꠅꠁꠔ ꠘꠣꠄ। 40ꠁꠃꠘꠥꠍ ꠘꠛꠤ ꠎꠦꠟꠣ ꠝꠣꠍꠞ ꠙꠦꠐꠅ ꠔꠤꠘ ꠖꠤꠘ, ꠔꠤꠘ ꠞꠣꠁꠔ ꠀꠍꠟꠣ, ꠀꠝꠤ ꠛꠤꠘ-ꠀꠖꠝꠅ ꠅꠃꠟꠣ ꠔꠤꠘ ꠖꠤꠘ, ꠔꠤꠘ ꠞꠣꠁꠔ ꠝꠣꠐꠤꠞ ꠔꠟꠦ ꠞꠁꠝꠥ। 41ꠇꠤꠀꠝꠔꠞ ꠖꠤꠘ ꠢꠃ ꠘꠤꠘꠜ ꠐꠣꠃꠘꠞ ꠝꠥꠞ꠆ꠖꠣ ꠅꠇꠟ ꠃꠑꠤꠀ ꠢꠣꠞꠤ, ꠁ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠁꠃꠘꠥꠍ ꠘꠛꠤꠞ ꠔꠛꠟꠤꠉ ꠢꠥꠘꠤꠀ ꠔꠣꠞꠣ ꠔꠃꠛꠣ ꠇꠞꠍꠤꠟꠣ। ꠅꠁꠟꠦ ꠅꠈꠘ ꠔ ꠁꠃꠘꠥꠍ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠁꠘꠅ ꠀꠍꠂꠘ, ꠔꠣ-ꠅ ꠝꠣꠘꠡꠦ ꠔꠃꠛꠣ ꠇꠞꠦꠞ ꠘꠣ। 42ꠞꠥꠎ ꠇꠤꠀꠝꠔꠞ ꠖꠤꠘ ꠖꠃꠇꠘꠞ ꠖꠦꠡꠞ ꠞꠣꠘꠤ ꠃꠑꠤꠀ ꠀꠁꠀ ꠅꠃ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠛꠣꠖꠡꠣ ꠍꠥꠟꠣꠁꠝꠣꠘꠞ ꠀꠈꠟꠞ ꠇꠕꠣ ꠢꠥꠘꠣꠞ ꠈꠤꠀꠟꠦ ꠔꠣꠁꠘ ꠖꠥꠘꠤꠀꠞ ꠢꠦꠡ ꠝꠣꠕꠣ ꠕꠣꠇꠤ ꠀꠁꠍꠟꠣ। ꠅꠁꠟꠦ ꠅꠈꠘ ꠔ ꠍꠥꠟꠣꠁꠝꠣꠘ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠅꠘꠅ ꠀꠍꠂꠘ।

43“ꠢꠥꠘꠅ, ꠇꠥꠘꠥ ꠜꠥꠔꠦ ꠎꠦꠛꠟꠣ ꠝꠣꠘꠡꠞ ꠟꠉ ꠍꠣꠠꠤꠀ ꠎꠣꠄꠉꠤ, ꠅꠃ ꠡꠝꠄ ꠢꠦ ꠀꠞꠣꠝꠦ ꠕꠣꠇꠣꠞ ꠈꠤꠀꠟꠦ ꠢꠇꠟ ꠢꠥꠇꠘꠣ ꠎꠣꠉꠣꠔ ꠀꠡꠞꠄ ꠔꠥꠇꠣꠄ। ꠅꠁꠟꠦ ꠀꠞꠣꠝꠞ ꠎꠣꠉꠣ ꠘꠣ ꠙꠣꠁꠀ ꠛꠣꠖꠦ ꠇꠄ, 44‘ꠗꠥꠞ, ꠀꠝꠣꠞ ꠀꠉꠞ ꠊꠞꠃ ꠜꠣꠟꠣ, ꠎꠦꠉꠥꠞ ꠉꠦꠍ ꠕꠣꠇꠤ ꠀꠁꠍꠤ, ꠅꠉꠥꠞ ꠉꠦꠍꠦꠃ ꠚꠤꠞꠤꠀ ꠎꠣꠁꠉꠤ।’ ꠚꠤꠞꠤꠀ ꠀꠁꠀ ꠖꠦꠈꠦ ꠁ ꠊꠞꠈꠣꠘ ꠈꠣꠟꠤ, ꠍꠣꠚ-ꠍꠚꠣ ꠀꠞ ꠢꠣꠎꠣꠁꠟ-ꠙꠣꠠꠣꠁꠟ। 45ꠖꠦꠈꠤꠀ ꠢꠦ ꠉꠤꠀ ꠔꠣꠞ ꠕꠘꠦ ꠀꠞꠅ ꠈꠣꠞꠣꠙ ꠡꠣꠔꠉꠥ ꠜꠥꠔ ꠟꠉꠦ ꠟꠁꠀ ꠀꠄ, ꠀꠁꠀ ꠅꠃ ꠊꠞꠅ ꠞꠄ। ꠄꠞꠖꠣꠄ ꠅꠃ ꠝꠣꠘꠡꠞ ꠖꠡꠣ ꠙꠄꠟꠣ ꠕꠣꠇꠤ ꠢꠦꠡꠦ ꠀꠞꠅ ꠛꠦꠡꠤ ꠈꠣꠞꠣꠙ ꠅꠄ। ꠔꠦ ꠁ ꠎꠝꠣꠘꠣꠞ ꠘꠣꠚꠞꠝꠣꠘ ꠅꠇꠟꠞ ꠖꠡꠣꠅ ꠅꠟꠣꠈꠣꠘ ꠅꠁꠛ।”

ꠢꠎꠞꠔ ꠁꠍꠣꠞ ꠝꠣꠄꠀꠞ ꠝꠣꠘꠥꠡ ꠇꠦ?

46ꠁꠍꠣꠄ ꠎꠦꠛꠟꠣ ꠝꠣꠘꠡꠞ ꠟꠉꠦ ꠝꠣꠔꠤꠞꠣ, ꠅꠃ ꠡꠝꠄ ꠔꠣꠘ ꠝꠣ ꠀꠞ ꠜꠣꠁꠀꠁꠘ ꠛꠣꠞꠦ ꠀꠁꠀ, ꠔꠣꠘ ꠟꠉꠦ ꠖꠦꠈꠣ ꠇꠞꠣꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠟꠣ। 47ꠔꠦꠃ ꠄꠇꠎꠘ ꠝꠣꠘꠡꠦ ꠀꠁꠀ ꠔꠣꠘꠞꠦ ꠇꠁꠟ, “ꠢꠥꠎꠥꠞ, ꠀꠙꠘꠣꠞ ꠝꠣ ꠀꠞ ꠜꠣꠁꠀꠁꠘ ꠀꠙꠘꠣꠞ ꠟꠉꠦ ꠝꠣꠔꠣꠞ ꠟꠣꠉꠤ ꠛꠣꠞꠦ ꠃꠛꠣꠁ ꠞꠁꠍꠂꠘ।”

48ꠁꠈꠣꠘ ꠢꠥꠘꠤꠀ ꠁꠍꠣꠄ ꠔꠣꠞꠦ ꠇꠁꠟꠣ, “ꠀꠝꠣꠞ ꠝꠣ ꠇꠦ, ꠀꠞ ꠀꠝꠣꠞ ꠜꠣꠁꠀꠁꠘꠃ ꠛꠣ ꠇꠦ?” 49ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠖꠦꠈꠣꠁꠀ ꠇꠁꠟꠣ, “ꠄꠞꠣꠃ ꠀꠝꠣꠞ ꠝꠣ ꠀꠞ ꠜꠣꠁꠀꠁꠘ। 50ꠎꠣꠞꠣ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠂꠘ, ꠔꠣꠞꠣꠃ ꠀꠝꠣꠞ ꠝꠣ ꠀꠞ ꠜꠣꠁ-ꠛꠁꠘ।”

Currently Selected:

ꠁꠘ꠆ꠎꠤꠟ ১: ꠝꠕꠤ 12: sylN

Highlight

Copy