ꠁꠘ꠆ꠎꠤꠟ ১: ꠝꠕꠤ 11
11
ꠢꠎꠞꠔ ꠁꠍꠣꠞꠦ ꠡꠘ꠆ꠖꠄ ꠀꠞ ꠛꠤꠞꠥꠗꠤꠔꠣ ꠇꠞꠣ (১১:১-১২:৫০)
ꠢꠎꠞꠔ ꠁꠍꠣꠞ ꠖꠞꠛꠣꠞꠅ ꠄꠢꠤꠀ ꠘꠛꠤꠞ ꠡꠣꠉꠞꠤꠖ ꠅꠇꠟ
1ꠢꠎꠞꠔ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠅꠃ ꠔꠣꠟꠤꠝ ꠖꠤꠀ ꠢꠣꠞꠟꠦ, ꠔꠣꠁꠘ ꠉꠣꠃꠄ ꠉꠣꠃꠄ ꠉꠤꠀ ꠔꠛꠟꠤꠉ ꠀꠞ ꠔꠣꠟꠤꠝ ꠖꠦꠅꠀꠞ ꠟꠣꠉꠤ ꠞꠅꠀꠘꠣ ꠅꠁꠉꠦꠟꠣ।
2ꠄꠢꠤꠀ ꠘꠛꠤꠄ ꠎꠦꠟꠅ ꠕꠣꠇꠤ ꠎꠦꠛꠟꠣ ꠀꠟ-ꠝꠍꠤꠞ ꠇꠣꠝꠞ ꠇꠕꠣ ꠢꠥꠘꠟꠣ, ꠅꠃ ꠡꠝꠄ ꠔꠣꠘ ꠇꠄꠎꠘ ꠡꠣꠉꠞꠤꠖꠞꠦ ꠙꠣꠑꠣꠁꠟꠣ ꠈꠛꠞ ꠎꠣꠘꠣꠞ ꠟꠣꠉꠤ। ꠄꠞꠣ ꠉꠤꠀ ꠁꠍꠣꠞꠦ ꠎꠤꠇꠣꠁꠟꠣ, 3“ꠢꠥꠎꠥꠞꠦ ꠇꠁꠍꠂꠘ, ꠎꠦꠁꠘ ꠀꠁꠛꠣꠞ ꠇꠕꠣ ꠀꠍꠤꠟ, ꠀꠙꠘꠦꠃ ꠢꠦꠁꠘ ꠘꠤ? ꠘꠣ ꠀꠝꠞꠣ ꠀꠞ ꠇꠦꠃꠞꠞ ꠟꠣꠉꠤ ꠛꠣꠞ ꠌꠣꠁꠔꠣꠝ?”
4ꠁꠍꠣꠄ ꠇꠁꠟꠣ, “ꠢꠥꠘꠅ, ꠅꠘꠅ ꠀꠁꠀ ꠔꠥꠝꠞꠣꠞ ꠘꠤꠎꠞ ꠌꠃꠈꠦ ꠎꠦꠔꠣ ꠖꠦꠈꠍ ꠀꠞ ꠢꠥꠘꠍ, ꠅꠔꠣ ꠉꠤꠀ ꠄꠢꠤꠀꠞꠦ ꠇꠅ। 5ꠔꠣꠘꠞꠦ ꠇꠁꠅ, ꠀꠘ꠆ꠖꠣ ꠝꠣꠘꠡꠦ ꠌꠃꠈꠦ ꠖꠦꠈꠞꠣ, ꠟꠦꠋꠠꠣꠄꠅ ꠀꠐꠤꠞꠣ, ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠜꠣꠟꠣ ꠅꠁꠞꠣ, ꠈꠣꠟꠥꠀ ꠅꠇꠟꠦ ꠢꠥꠘꠞꠣ, ꠝꠞꠣ ꠝꠣꠘꠥꠡ ꠎꠤꠔꠣ ꠅꠁꠞꠣ, ꠀꠞ ꠉꠞꠤꠛ ꠅꠇꠟꠞ ꠉꠦꠍꠦ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠞ। 6ꠢꠥꠘꠅ, ꠢꠦ-ꠃ ꠘꠦꠇ-ꠇꠙꠣꠟꠤ, ꠎꠣꠞ ꠖꠤꠟꠅ ꠀꠝꠣꠞ ꠛꠦꠙꠣꠞꠦ ꠇꠥꠘꠥ ꠛꠣꠗꠣ ꠀꠄ ꠘꠣ।”
ꠄꠢꠤꠀ ꠘꠛꠤ ꠀꠍꠟꠦ ꠇꠦ
7ꠄꠢꠤꠀ ꠘꠛꠤꠞ ꠡꠣꠉꠞꠤꠖ ꠅꠇꠟ ꠎꠣꠁꠞꠣꠉꠤ, ꠅꠃ ꠡꠝꠄ ꠄꠢꠤꠀꠞ ꠛꠦꠙꠣꠞꠦ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠇꠤꠔꠣ ꠛꠣ, ꠝꠞꠥꠜꠥꠝꠤꠔ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠛꠣꠔꠣꠡ ꠀꠁꠟꠦ ꠎꠦꠔꠣ ꠘꠟ-ꠈꠣꠉꠠꠣꠄ ꠟꠠꠦ, ꠅꠔꠣ ꠖꠦꠈꠣꠔ ꠉꠦꠍꠟꠣꠄ ꠘꠤ? 8ꠘꠣ, ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠡꠥꠘ꠆ꠖꠞ ꠇꠣꠙꠠ ꠚꠤꠘ꠆ꠘ ꠇꠥꠘꠥ ꠝꠣꠘꠡꠞꠦ ꠘꠤ? ꠀꠍꠟꠦ, ꠎꠦꠞꠣ ꠖꠣꠝꠤ ꠖꠣꠝꠤ ꠇꠣꠙꠠ ꠚꠤꠘ꠆ꠖꠂꠘ, ꠔꠣꠞꠣ ꠔ ꠞꠣꠎꠛꠣꠠꠤꠔ ꠕꠣꠇꠂꠘ। 9ꠔꠦ ꠔꠥꠝꠞꠣ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠇꠥꠘꠥ ꠘꠛꠤꠞꠦ ꠖꠦꠈꠣꠔ ꠘꠤ? ꠢꠥꠘꠅ, ꠀꠝꠤ ꠇꠁꠞꠣꠝ, ꠄꠢꠤꠀ ꠔ ꠈꠣꠟꠤ ꠘꠛꠤ ꠘꠣꠄ, ꠘꠛꠤ ꠕꠣꠇꠤꠅ ꠛꠠ। 10ꠄꠁꠘ ꠔ ꠢꠃ ꠎꠘ, ꠎꠦꠘ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ,
ꠢꠥꠘꠅ, ꠔꠥꠝꠣꠞ ꠀꠉꠦ ꠙꠣꠑꠣꠁꠀꠞ ꠀꠝꠤ, ꠀꠝꠣꠞ ꠙꠦꠉꠣꠝ꠆ꠛꠞ,
ꠄꠁꠘ ꠉꠤꠀ ꠑꠤꠇ-ꠑꠣꠇ ꠇꠞꠛꠣ ꠔꠥꠝꠣꠞ ꠌꠟꠣꠞ ꠙꠕ।
11ꠔꠦ ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠄꠢꠤꠀ ꠕꠣꠇꠤ ꠛꠠ ꠀꠡ꠆ꠔꠣ ꠖꠥꠘꠤꠀꠔꠃ ꠇꠥꠘꠥ ꠀꠖꠝ ꠀꠍꠟꠣ ꠘꠣ। ꠅꠁꠟꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠝꠣꠎꠦ ꠢꠇꠟ ꠕꠣꠇꠤ ꠢꠥꠞꠥ ꠎꠘꠅ, ꠄꠢꠤꠀ ꠕꠣꠇꠤ ꠝꠢꠣꠘ। 12ꠄꠢꠤꠀ ꠘꠛꠤꠞ ꠀꠝꠟ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠈꠥꠛ ꠝꠎꠛꠥꠔ ꠅꠁꠀ ꠀꠉꠥꠀꠞ, ꠀꠞ ꠎꠦꠞꠣ ꠁꠝꠣꠘꠦ ꠝꠎꠛꠥꠔ, ꠔꠣꠞꠣ ꠖꠤꠟꠦ-ꠎꠣꠘꠦ ꠀꠁꠀ ꠄꠞ ꠜꠤꠔꠞꠦ ꠢꠣꠝꠣꠁꠞꠣ। 13ꠢꠥꠘꠅ, ꠄꠢꠤꠀ ꠘꠛꠤꠞ ꠀꠝꠟ ꠙꠞ꠆ꠎꠘ꠆ꠔ ꠢꠎꠞꠔ ꠝꠥꠍꠣꠞ ꠔꠃꠞꠣꠔ ꠇꠤꠔꠣꠛ ꠀꠞ ꠡꠛ ꠘꠛꠤꠞ ꠍꠢꠤꠚꠣꠞ ꠝꠣꠎꠦ, ꠀꠟ꠆ꠟꠣꠞ ꠛꠣꠖꠡꠣꠁ ꠀꠅꠀꠞ ꠇꠕꠣ ꠎꠣꠘꠣꠁꠟ ꠅꠁꠍꠦ। 14ꠅꠈꠘ ꠎꠥꠖꠤ ꠀꠙꠘꠣꠞꠣ ꠀꠝꠣꠞ ꠝꠣꠔ ꠄꠇꠤꠘ ꠇꠞꠂꠘ, ꠔꠦ ꠢꠥꠘꠃꠇ꠆ꠇꠣ, ꠎꠦ ꠁꠟꠤꠀꠍ ꠘꠛꠤꠄ ꠢꠤꠞꠛꠣꠞ ꠀꠁꠛꠣꠞ ꠇꠕꠣ ꠀꠍꠤꠟ, ꠅꠃ ꠄꠢꠤꠀꠃ ꠅꠁꠟꠣ ꠢꠃ ꠁꠟꠤꠀꠍ। 15ꠎꠣꠞ ꠇꠣꠘ ꠀꠍꠦ, ꠢꠦ ꠢꠥꠘꠃꠇ।
16“ꠁ ꠎꠝꠣꠘꠣꠞ ꠝꠣꠘꠡꠞꠦ ꠀꠝꠤ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ? ꠔꠣꠞꠣ ꠔ ꠅꠝꠘ ꠢꠥꠞꠥꠔ꠆ꠔꠣꠞ ꠟꠣꠈꠣꠘ, ꠎꠦꠔꠣꠄ ꠛꠣꠎꠣꠞꠅ ꠛꠁꠀ ꠄꠇꠦ-ꠅꠁꠘ꠆ꠘꠞꠦ ꠒꠣꠇꠤꠀ ꠇꠂꠘ, 17‘ꠢꠂ, ꠀꠝꠞꠣ ꠔꠥꠝꠞꠣꠞ ꠟꠣꠉꠤ ꠛꠣꠡꠤ ꠛꠣꠎꠣꠁꠟꠣꠝ, ꠔꠥꠝꠞꠣ ꠔ ꠘꠣꠌꠟꠣꠄ ꠘꠣ, ꠀꠢꠣꠎꠣꠞꠤꠞ ꠉꠣꠘ ꠉꠣꠁꠟꠣꠝ, ꠔꠥꠝꠞꠣ ꠔ ꠇꠣꠘꠟꠣꠄ ꠘꠣ।’ 18ꠑꠤꠇ ꠅꠟꠣꠈꠣꠘ, ꠄꠢꠤꠀ ꠘꠛꠤꠄ ꠀꠁꠀ ꠡꠝꠣꠎꠞ ꠟꠉꠦ ꠈꠣꠅꠀ-ꠖꠣꠅꠀ ꠘꠣ ꠇꠞꠣꠄ, ꠝꠣꠘꠡꠦ ꠇꠁꠞꠣ ꠔꠣꠘꠦ ꠜꠥꠔꠦ ꠗꠞꠍꠦ। 19ꠅꠁꠟꠦ ꠀꠝꠤ ꠛꠤꠘ-ꠀꠖꠝ ꠀꠁꠀ ꠈꠣꠅꠀ-ꠖꠣꠅꠀ ꠇꠞꠣꠄ ꠔꠥꠝꠞꠣ ꠇꠁꠞꠣꠄ, ‘ꠖꠦꠈꠃꠇ꠆ꠇꠣ, ꠁ ꠛꠦꠐꠣ ꠔ ꠙꠦꠐꠥꠀ, ꠝꠖꠈꠥꠞ, ꠢꠦ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠖꠥꠡ꠆ꠔꠤ ꠇꠞꠦ।’ ꠔꠦ ꠀꠈꠟ ꠈꠣꠐꠣꠁꠀ ꠎꠦꠞꠣ ꠌꠟꠦ, ꠔꠣꠞꠣꠞ ꠌꠣꠟ-ꠌꠟꠘ ꠕꠣꠇꠤꠃ ꠙꠞꠝꠣꠘ ꠝꠤꠟꠦ, ꠀꠈꠟꠃ ꠅꠁꠟ ꠈꠣꠐꠤ-ꠘꠤꠈꠥꠔ ꠌꠤꠎ।”
ꠟꠣꠘ꠆ꠘꠔꠤ ꠉꠣꠃ ꠀꠞ ꠐꠣꠃꠘ
20ꠢꠎꠞꠔ ꠁꠍꠣꠄ ꠎꠦꠔꠣ ꠉꠣꠃꠀꠁꠘ꠆ꠔꠅ ꠀꠞ ꠐꠣꠃꠘꠅ ꠛꠦꠡꠤꠞ ꠜꠣꠉ ꠇꠦꠞꠣꠝꠔꠤ ꠖꠦꠈꠣꠁꠍꠟꠣ, ꠁꠔꠣꠞ ꠝꠣꠘꠡꠦ ꠔꠃꠛꠣ ꠇꠞꠍꠂꠘ ꠘꠣ। ꠄꠞꠟꠣꠉꠤ ꠔꠣꠁꠘ ꠁ ꠉꠣꠃ ꠀꠞ ꠐꠣꠃꠘꠞ ꠃꠙꠞꠦ ꠛꠦꠎꠣꠞ ꠅꠁꠀ ꠇꠁꠟꠣ, 21“ꠢꠣꠄꠞꠦ ꠛꠣꠄꠔ-ꠍꠄꠖꠣ ꠀꠞ ꠈꠥꠞꠣꠍꠤꠘ ꠉꠣꠃ, ꠔꠥꠝꠞꠣ ꠔ ꠟꠣꠘ꠆ꠘꠔꠤ। ꠔꠥꠝꠞꠣꠞ ꠝꠣꠎꠦ ꠎꠦꠔꠣ ꠇꠥꠖꠞꠔꠤ ꠇꠣꠝ ꠖꠦꠈꠣꠁꠟ ꠅꠁꠍꠦ, ꠁꠔꠣ ꠎꠥꠖꠤ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠔ ꠖꠦꠈꠣꠁꠟ ꠅꠁꠔ, ꠔꠦ ꠛꠃꠔ ꠀꠉꠦꠃ ꠔꠣꠞꠣ ꠇꠣꠔꠞ ꠅꠁꠀ ꠔꠃꠛꠣ ꠇꠞꠟ ꠅꠘꠦ। 22ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠤꠀꠝꠔꠞ ꠖꠤꠘ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠞ ꠖꠡꠣ ꠕꠣꠇꠤꠅ, ꠔꠥꠝꠞꠣꠞ ꠖꠡꠣ ꠛꠃꠔ ꠇꠑꠤꠘ ꠅꠁꠛ। 23ꠅ ꠇꠚꠞꠘꠣꠃꠝ ꠐꠣꠃꠘ, ꠢꠥꠘꠅ, ꠔꠥꠝꠤ ꠛꠥꠟꠦ ꠃꠌꠣ ꠅꠁꠀ ꠀꠍꠝꠣꠘꠅ ꠉꠤꠀ ꠟꠣꠉꠔꠣꠄ? ꠘꠣ, ꠙꠣꠞꠔꠣꠄ ꠘꠣꠄ! ꠔꠥꠝꠣꠞꠦ ꠙꠣꠔꠣꠟꠅ ꠟꠣꠝꠣꠘꠤ ꠅꠁꠛ। ꠔꠥꠝꠣꠞ ꠝꠣꠎꠦ ꠎꠦꠔꠣ ꠇꠥꠖꠞꠔꠤ ꠝꠥꠎꠦꠎꠣ ꠖꠦꠈꠣꠁꠟ ꠅꠁꠍꠦ, ꠁꠔꠣ ꠎꠥꠖꠤ ꠍꠣꠖꠥꠝ ꠐꠣꠃꠘꠅ ꠖꠦꠈꠣꠁꠟ ꠅꠁꠔ, ꠔꠦ ꠁ ꠐꠣꠃꠘ ꠅꠈꠘꠅ ꠐꠤꠇꠤꠀ ꠞꠁꠟ ꠅꠘꠦ। 24ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠢꠣꠡꠞꠞ ꠖꠤꠘ ꠍꠣꠖꠥꠝ ꠐꠣꠃꠘꠞ ꠢꠣꠟꠔꠅ ꠔꠥꠝꠞꠣꠞ ꠕꠣꠇꠤ ꠛꠃꠔ ꠜꠣꠟꠣ ꠅꠁꠛ।”
ꠢꠎꠞꠔ ꠁꠍꠣꠞ ꠖꠥꠀ ꠀꠞ ꠀꠞꠣꠝꠞ ꠖꠣꠅꠔ
25ꠄꠞꠛꠣꠖꠦ ꠁꠍꠣꠄ ꠇꠁꠟꠣ, “ꠅ ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ, ꠔꠥꠝꠤ ꠔ ꠀꠍꠝꠣꠘ-ꠎꠝꠤꠘꠞ ꠝꠣꠟꠤꠇ। ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠎꠣꠘꠣꠁꠞꠣꠝ, ꠇꠣꠞꠘ ꠔꠥꠝꠤ ꠀꠈꠟꠖꠣꠞ ꠀꠞ ꠛꠥꠖ꠆ꠖꠤꠝꠣꠘ ꠅꠇꠟꠞ ꠉꠦꠍꠦ ꠁꠔꠣ ꠎꠣꠁꠞ ꠘꠣ ꠇꠞꠤꠀ, ꠛꠦꠛꠥꠎ-ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠍ। 26ꠛꠣꠛꠣ, ꠀꠍꠟꠦ ꠁꠔꠣ ꠢꠇꠟꠔꠣꠃ ꠔꠥꠝꠣꠞ ꠝꠞ꠆ꠎꠤ।
27“ꠀꠝꠣꠞ ꠉꠣꠁꠛꠤ ꠛꠣꠛꠣꠄ ꠢꠇꠟꠔꠣꠃ ꠀꠝꠣꠞ ꠀꠔꠅ ꠡꠙꠤ ꠖꠤꠍꠂꠘ। ꠛꠣꠚ ꠍꠣꠠꠣ ꠖꠥꠍꠞꠣ ꠇꠦꠃ ꠅꠃ ꠙꠥꠔꠞꠦ ꠌꠤꠘꠦ ꠘꠣ, ꠀꠞ ꠙꠥꠔ ꠍꠣꠠꠣ ꠖꠥꠍꠞꠣ ꠇꠦꠃ ꠅꠃ ꠛꠣꠚꠞꠦ ꠌꠤꠘꠦ ꠘꠣ। ꠙꠥꠔꠦ ꠛꠣꠚꠞꠦ ꠎꠣꠞ ꠉꠦꠍꠦ ꠎꠣꠁꠞ ꠇꠞꠣꠞ ꠈꠤꠀꠟ ꠅꠄ, ꠈꠣꠟꠤ ꠢꠦ-ꠃ ꠛꠣꠚꠞ ꠙꠞꠤꠌꠄ ꠙꠣꠄ।
28“ꠜꠣꠞ-ꠛꠥꠏꠣ ꠛꠁꠔꠦ ꠛꠁꠔꠦ ꠔꠥꠝꠞꠣ ꠎꠦꠞꠣ ꠢꠦꠞꠣꠘ ꠅꠁꠉꠦꠍ, ꠔꠥꠝꠞꠣ ꠢꠇꠟ ꠀꠝꠣꠞ ꠉꠦꠍꠦ ꠀꠅ, ꠀꠝꠤ ꠔꠥꠝꠞꠣꠞꠦ ꠀꠞꠣꠝ ꠖꠤꠝꠥ। 29-30ꠀꠝꠣꠞ ꠎꠥꠀꠟ ꠔꠥꠝꠞꠣꠞ ꠇꠣꠘ꠆ꠖꠅ ꠔꠥꠟꠅ ꠀꠞ ꠀꠝꠣꠞ ꠉꠦꠍ ꠕꠣꠇꠤ ꠔꠣꠟꠤꠝ ꠟꠅ, ꠔꠦꠃ ꠔꠥꠝꠞꠣꠞ ꠀꠞꠣꠝ ꠅꠁꠛ। ꠀꠝꠣꠞ ꠎꠥꠀꠟ ꠛꠁꠀ ꠘꠦꠅꠀ ꠡꠥꠎꠣ, ꠀꠝꠣꠞ ꠖꠦꠅꠀ ꠜꠣꠞ ꠈꠥꠛ ꠙꠣꠔꠟꠣ। ꠀꠝꠣꠞ ꠝꠤꠎꠣꠎ ꠈꠥꠛ ꠘꠞꠝ ꠀꠞ ꠑꠣꠘ꠆ꠒꠣ।”
Currently Selected:
ꠁꠘ꠆ꠎꠤꠟ ১: ꠝꠕꠤ 11: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
