ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 20
20
ꠢꠎꠞꠔ ꠁꠍꠣ ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠟꠣ ꠀꠞ ꠛꠃꠔꠦ ꠖꠦꠈꠟꠣ (২০:১-২১:২৫)
ꠢꠎꠞꠔ ꠁꠍꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠟꠣ
1ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠚꠎꠞ ꠅꠇ꠆ꠔꠅ ꠀꠘ꠆ꠖꠣꠁꠞ ꠞꠁꠔꠦꠃ ꠝꠉꠖꠤꠟꠤꠘꠤ ꠝꠞꠤꠅꠝ ꠢꠎꠞꠔ ꠁꠍꠣꠞ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠟꠣ। ꠉꠤꠀ ꠖꠦꠈꠟꠣ, ꠇꠄꠛꠞꠞ ꠝꠥꠈ ꠕꠣꠇꠤ ꠙꠣꠔ꠆ꠔꠞꠐꠣ ꠢꠞꠣꠁꠟ ꠅꠁꠉꠦꠍꠦ। 2ꠖꠦꠈꠤꠀ ꠔꠣꠁꠘ ꠍꠣꠁꠝꠘ-ꠙꠤꠔꠞ ꠀꠞ ꠎꠦ ꠍꠣꠢꠣꠛꠤꠞꠦ ꠁꠍꠣꠄ ꠈꠥꠛ ꠝꠣꠄꠀ ꠇꠞꠔꠣ, ꠄꠞꠣꠞ ꠉꠦꠍꠦ ꠖꠃꠠꠣꠁꠀ ꠉꠤꠀ ꠇꠁꠟꠣ, “ꠢꠥꠘꠍꠂꠘ ꠘꠤ, ꠢꠥꠎꠥꠞꠞ ꠟꠣꠡ ꠝꠣꠘꠡꠦ ꠇꠄꠛꠞ ꠕꠣꠇꠤ ꠔꠥꠟꠤꠀ ꠘꠤꠍꠂꠘꠉꠤ। ꠘꠤꠀ ꠇꠁ ꠞꠣꠈꠍꠂꠘ ꠀꠝꠞꠣ ꠎꠣꠘꠤ ꠘꠣ।”
3ꠈꠛꠞ ꠙꠣꠁꠀ ꠙꠤꠔꠞ ꠀꠞ ꠅꠃ ꠍꠣꠢꠣꠛꠤ ꠇꠄꠛꠞꠞ ꠛꠣꠄ ꠞꠅꠀꠘꠣ ꠅꠁꠟꠣ। 4ꠖꠥꠁꠅꠎꠘꠦ ꠄꠇꠟꠉꠦ ꠖꠃꠠꠣꠁꠞꠣ। ꠙꠤꠔꠞꠞꠦ ꠈꠞꠦ ꠚꠣꠟꠣꠁꠀ ꠢꠃ ꠍꠣꠢꠣꠛꠤ ꠀꠉꠦ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠟꠣ। 5ꠉꠤꠀ ꠃꠘ꠆ꠖꠣ ꠅꠁꠀ ꠖꠦꠈꠟꠣ, ꠇꠄꠛꠞꠞ ꠜꠤꠔꠞꠦ ꠇꠣꠚꠘ ꠙꠠꠤ ꠞꠁꠍꠦ, ꠅꠁꠟꠦ ꠔꠣꠁꠘ ꠇꠄꠛꠞꠞ ꠜꠤꠔꠞꠦ ꠢꠣꠝꠣꠁꠟꠣ ꠘꠣ। 6ꠙꠤꠔꠞꠅ ꠔꠣꠘ ꠈꠞꠦ ꠈꠞꠦ ꠀꠁꠟꠣ, ꠀꠁꠀ ꠇꠄꠛꠞꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠟꠣ, ꠈꠣꠟꠤ ꠇꠣꠚꠘꠈꠣꠘ ꠙꠠꠤ ꠞꠁꠍꠦ। 7ꠎꠦ ꠇꠣꠚꠘꠞ ꠐꠥꠇꠞꠣ ꠖꠤꠀ ꠔꠣꠘ ꠝꠣꠕꠣ ꠛꠣꠘ꠆ꠖꠣ ꠅꠁꠍꠤꠟ, ꠁꠈꠣꠘ ꠅꠁꠘ꠆ꠘ ꠐꠥꠇꠞꠣꠞ ꠟꠉꠦ ꠘꠣꠄ, ꠀꠟꠉꠣ ꠙꠠꠤ ꠞꠁꠍꠦ। 8ꠎꠦ ꠍꠣꠢꠣꠛꠤ ꠙꠄꠟꠣ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠍꠟꠣ, ꠛꠣꠖꠦ ꠔꠣꠁꠘꠅ ꠜꠤꠔꠞꠦ ꠢꠣꠝꠣꠁꠟꠣ, ꠢꠣꠝꠣꠁꠀ ꠢꠇꠟꠔꠣ ꠖꠦꠈꠤꠀ ꠄꠇꠤꠘ ꠇꠞꠟꠣ। 9ꠁꠍꠣꠞ ꠔ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀ ꠎꠞꠥꠞ, ꠙꠣꠇ ꠇꠤꠔꠣꠛꠞ ꠅꠃ ꠔꠣꠟꠤꠝꠞ ꠝꠣꠘꠤ ꠀꠉꠦ ꠔ ꠄꠞꠣ ꠇꠦꠃ ꠛꠥꠎꠍꠂꠘ ꠘꠣ।
10ꠄꠞꠛꠣꠖꠦ ꠍꠣꠢꠣꠛꠤ ꠅꠇꠟ ꠎꠣꠞꠎꠤꠞ ꠛꠣꠠꠤꠔ ꠉꠦꠟꠣꠉꠤ, 11ꠅꠁꠟꠦ ꠝꠞꠤꠅꠝꠦ ꠇꠄꠛꠞꠞ ꠇꠣꠘ꠆ꠖꠣꠔ ꠃꠛꠣꠁꠀ ꠇꠣꠘ꠆ꠖꠘ ꠟꠣꠉꠣꠁꠟꠣ। ꠔꠣꠁꠘ ꠇꠣꠘ꠆ꠖꠤ ꠇꠣꠘ꠆ꠖꠤ ꠃꠘ꠆ꠖꠣ ꠅꠁꠀ ꠇꠄꠛꠞꠞ ꠜꠤꠔꠞꠦꠖꠤ ꠌꠣꠁꠀ ꠖꠦꠈꠟꠣ, 12ꠁꠍꠣꠞ ꠟꠣꠡ ꠎꠦꠘꠅ ꠢꠥꠔꠣꠁꠀ ꠞꠣꠈꠣ ꠅꠁꠍꠤꠟ, ꠢꠘꠅ ꠗꠟꠣ ꠇꠣꠙꠠ ꠚꠤꠘ꠆ꠘ ꠖꠥꠁꠎꠘ ꠚꠤꠞꠤꠡ꠆ꠔꠣ ꠛꠁ ꠞꠁꠍꠂꠘ, ꠄꠇꠎꠘ ꠢꠤꠔꠣꠘꠦꠖꠤ, ꠀꠞꠇ ꠎꠘ ꠙꠣꠅ ꠉꠣꠟꠣꠛꠣꠄ। 13ꠚꠤꠞꠤꠡ꠆ꠔꠣ ꠅꠇꠟꠦ ꠝꠞꠤꠅꠝꠞꠦ ꠇꠁꠟꠣ, “ꠔꠥꠝꠤ ꠇꠣꠘ꠆ꠖꠤꠞꠣꠄ ꠇꠦꠘꠦ ꠉ?” ꠔꠣꠁꠘ ꠇꠁꠟꠣ, “ꠝꠣꠘꠡꠦ ꠀꠝꠣꠞ ꠝꠣꠟꠤꠇꠞ ꠟꠣꠡ ꠔꠥꠟꠤꠀ ꠘꠤꠍꠂꠘꠉꠤ, ꠘꠤꠀ ꠇꠁ ꠕꠁꠍꠂꠘ ꠎꠣꠘꠤ ꠘꠣ।”
14ꠅꠈꠣꠘ ꠇꠁꠀ ꠔꠣꠁꠘ ꠈꠞꠦꠖꠤ ꠌꠣꠁꠔꠦꠃ ꠖꠦꠈꠟꠣ, ꠢꠎꠞꠔ ꠁꠍꠣ ꠃꠛꠣꠁ ꠞꠁꠍꠂꠘ। ꠅꠁꠟꠦ ꠔꠣꠁꠘꠃ ꠎꠦ ꠁꠍꠣ, ꠝꠞꠤꠅꠝꠦ ꠁꠈꠣꠘ ꠛꠥꠎꠟꠣ ꠘꠣ। 15ꠁꠍꠣꠄ ꠝꠞꠤꠅꠝꠞꠦ ꠇꠁꠟꠣ, “ꠅꠉ, ꠔꠥꠝꠤ ꠇꠣꠘ꠆ꠖꠅ ꠇꠦꠘꠦ? ꠇꠣꠞꠦ ꠔꠥꠇꠣꠁꠞꠣꠄ?” ꠁꠍꠣꠞꠦ ꠛꠣꠉꠣꠘꠞ ꠝꠣꠟꠤ ꠝꠘꠅ ꠇꠞꠤꠀ ꠔꠣꠁꠘ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠙꠘꠦ ꠎꠥꠖꠤ ꠔꠣꠘ ꠟꠣꠡ ꠘꠤꠀ ꠕꠣꠇꠂꠘ, ꠔꠦ ꠇꠥꠀꠁ ꠘꠤꠍꠂꠘ, ꠇꠃꠇ꠆ꠇꠣ। ꠀꠝꠤ ꠔꠣꠘ ꠟꠣꠡ ꠘꠤꠝꠥ।” 16ꠁꠍꠣꠄ ꠇꠁꠟꠣ, “ꠝꠞꠤꠅꠝ।” ꠔꠦꠃ ꠝꠞꠤꠅꠝ ꠚꠤꠞꠤꠀ ꠃꠛꠣꠁꠀ ꠁꠛꠞꠣꠘꠤ ꠜꠣꠡꠣꠄ ꠔꠣꠘꠞꠦ ꠇꠁꠟꠣ, “ꠞꠣꠛ꠆ꠛꠥꠘꠤ” ꠝꠣꠘꠤ ꠃꠡ꠆ꠔꠣꠖ। 17ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠀꠝꠣꠞꠦ ꠗꠞꠤꠀ ꠞꠣꠈꠤꠅ ꠘꠣ, ꠀꠝꠤ ꠔ ꠅꠈꠘꠅ ꠉꠣꠁꠛꠤ ꠛꠣꠚꠞ ꠉꠦꠍꠦ ꠃꠙꠞꠦ ꠉꠦꠍꠤ ꠘꠣ। ꠔꠥꠝꠤ ꠛꠞꠋ ꠀꠝꠣꠞ ꠜꠣꠁꠀꠁꠘꠞꠦ ꠉꠤꠀ ꠇꠅ, ꠎꠦꠁꠘ ꠀꠝꠣꠞ ꠀꠞ ꠔꠥꠝꠞꠣꠞ ꠉꠣꠁꠛꠤ ꠛꠣꠚ, ꠀꠝꠣꠞ ꠀꠞ ꠔꠥꠝꠞꠣꠞ ꠀꠟ꠆ꠟꠣ, ꠀꠝꠤ ꠃꠙꠞꠦ ꠔꠣꠘ ꠉꠦꠍꠦꠃ ꠎꠣꠁꠞꠣꠝ।” 18ꠔꠦꠃ ꠝꠉꠖꠤꠟꠤꠘꠤ ꠝꠞꠤꠅꠝꠦ ꠍꠣꠢꠣꠛꠤ ꠅꠇꠟꠞꠦ ꠉꠤꠀ ꠇꠁꠟꠣ, ꠁꠍꠣꠞ ꠟꠉꠦ ꠔꠣꠘ ꠖꠦꠈꠣ ꠅꠁꠍꠦ ꠀꠞ ꠁꠍꠣꠄꠃ ꠔꠣꠘꠞꠦ ꠁꠔꠣ ꠢꠇꠟꠔꠣ ꠇꠁꠍꠂꠘ।
ꠍꠣꠢꠣꠛꠤ ꠅꠇꠟꠦ ꠎꠤꠘ꠆ꠖꠣ ꠁꠍꠣꠞꠦ ꠖꠦꠈꠟꠣ
19ꠢꠃ ꠖꠤꠘ, ꠝꠣꠘꠤ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠍꠣꠢꠣꠛꠤ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠟꠣ। ꠅꠁꠟꠦ ꠁꠢꠥꠖꠤ ꠘꠦꠔꠣ ꠅꠇꠟꠞ ꠒꠞꠦ ꠊꠞꠞ ꠖꠥꠀꠞ-ꠈꠤꠠꠇꠤ ꠢꠇꠟꠔꠣ ꠛꠘ꠆ꠖ ꠀꠍꠤꠟ। ꠄꠞꠝꠣꠎꠦ ꠀꠈꠔꠣꠃ ꠢꠎꠞꠔ ꠁꠍꠣ ꠀꠁꠀ ꠄꠞꠣꠞ ꠝꠣꠎꠈꠣꠘꠅ ꠃꠛꠣꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।” 20ꠅꠈꠣꠘ ꠇꠁꠀ ꠢꠣꠞꠤ ꠔꠣꠁꠘ ꠘꠤꠎꠞ ꠖꠥꠁꠅ ꠀꠔ ꠀꠞ ꠙꠣꠔ꠆ꠔꠤ-ꠀꠠꠞ ꠎꠈꠝꠞ ꠖꠣꠉ ꠄꠞꠣꠞꠦ ꠖꠦꠈꠣꠁꠟꠣ। ꠢꠥꠎꠥꠞꠞꠦ ꠖꠦꠈꠤꠀ ꠍꠣꠢꠣꠛꠤ ꠅꠇꠟ ꠈꠥꠛ ꠈꠥꠡꠤ ꠅꠁꠟꠣ।
21ꠛꠣꠖꠦ ꠁꠍꠣꠄ ꠢꠤꠞꠛꠣꠞ ꠄꠞꠣꠞꠦ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ। ꠢꠥꠘꠅ, ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦꠟꠣ ꠀꠝꠣꠞꠦ ꠙꠣꠑꠣꠁꠍꠂꠘ, ꠀꠝꠤꠅ ꠅꠃꠟꠣ ꠔꠥꠝꠞꠣꠞꠦ ꠙꠣꠑꠣꠁꠞꠣꠝ।” 22ꠅꠈꠣꠘ ꠇꠁꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠃꠙꠞꠦ ꠚꠥ ꠖꠤꠀ ꠇꠁꠟꠣ, “ꠀꠟ꠆ꠟꠣꠞ ꠙꠣꠇ ꠞꠥꠢꠥꠞꠦ ꠇꠛꠥꠟ ꠇꠞꠅ। 23ꠢꠥꠘꠅ, ꠔꠥꠝꠞꠣ ꠎꠥꠖꠤ ꠇꠦꠃꠞꠦ ꠝꠣꠚ ꠇꠞꠤ ꠖꠦꠅ, ꠔꠦ ꠔꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠛ, ꠀꠞ ꠎꠥꠖꠤ ꠝꠣꠚ ꠘꠣ ꠇꠞ, ꠔꠦ ꠔꠣꠞ ꠉꠥꠘꠣꠞ ꠝꠣꠚꠤ ꠝꠤꠟꠔ ꠘꠣꠄ।”
ꠍꠣꠢꠣꠛꠤ ꠕꠥꠝꠣꠍꠞ ꠡꠘ꠆ꠖꠄ
24ꠢꠎꠞꠔ ꠁꠍꠣ ꠎꠦꠛꠟꠣ ꠍꠣꠢꠣꠛꠤ ꠅꠇꠟꠞ ꠍꠣꠝꠘꠦ ꠀꠁꠟꠣ, ꠅꠃ ꠡꠝꠄ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠕꠥꠝꠣꠍ ꠘꠣꠝꠞ ꠄꠇꠎꠘ ꠍꠣꠢꠣꠛꠤ ꠁꠘꠅ ꠀꠍꠟꠣ ꠘꠣ। ꠅꠃ ꠕꠥꠝꠣꠍꠞꠦ ꠎꠝꠎ ꠇꠁꠀ ꠒꠣꠇꠣ ꠅꠁꠔ। 25ꠄꠞꠟꠣꠉꠤ ꠛꠣꠇꠤ ꠍꠣꠢꠣꠛꠤ ꠅꠇꠟꠦ ꠕꠥꠝꠣꠍꠞꠦ ꠇꠁꠟꠣ, “ꠀꠝꠞꠣ ꠔ ꠢꠥꠎꠥꠞꠞꠦ ꠖꠦꠈꠍꠤ।” ꠕꠥꠝꠣꠍꠦ ꠇꠁꠟꠣ, “ꠢꠥꠘꠃꠇ꠆ꠇꠣ, ꠀꠝꠤ ꠀꠝꠣꠞ ꠘꠤꠎꠞ ꠌꠃꠈꠦ ꠎꠥꠖꠤ ꠔꠣꠘ ꠖꠥꠁꠅ ꠀꠔꠞ ꠙꠦꠞꠦꠉꠞ ꠖꠣꠉ ꠘꠣ ꠖꠦꠈꠤ, ꠅꠃ ꠎꠈꠝꠅ ꠀꠋꠉꠥꠟ ꠘꠣ ꠟꠣꠉꠣꠁ, ꠀꠞ ꠔꠣꠘ ꠙꠣꠔ꠆ꠔꠤ-ꠀꠠꠞ ꠎꠈꠝꠅ ꠀꠔ ꠘꠣ ꠖꠦꠁ, ꠔꠦ ꠇꠥꠘꠥꠝꠘ꠆ꠔꠦꠃ ꠀꠝꠤ ꠁꠔꠣ ꠄꠇꠤꠘ ꠇꠞꠔꠣꠝ ꠘꠣꠄ।”
26ꠄꠞ ꠄꠇ ꠢꠣꠙ꠆ꠔꠣ ꠛꠣꠖꠦ ꠢꠤꠞꠛꠣꠞ ꠍꠣꠢꠣꠛꠤ ꠅꠇꠟ ꠅꠃ ꠊꠞꠅ ꠖꠟꠣ ꠅꠁꠟꠣ, ꠄꠞꠣꠞ ꠟꠉꠦ ꠕꠥꠝꠣꠍꠅ ꠀꠍꠟꠣ। ꠅꠃ ꠡꠝꠄ ꠊꠞꠞ ꠢꠇꠟ ꠖꠥꠀꠞ-ꠈꠤꠠꠇꠤ ꠛꠘ꠆ꠖ ꠕꠣꠇꠟꠦꠅ ꠀꠈꠔꠣꠃ ꠁꠍꠣ ꠀꠁꠀ ꠔꠣꠞꠣꠞ ꠝꠣꠎꠈꠣꠘꠅ ꠃꠛꠣꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।” 27ꠛꠣꠖꠦ ꠔꠣꠁꠘ ꠕꠥꠝꠣꠍꠞꠦ ꠇꠁꠟꠣ, “ꠔꠥꠝꠣꠞ ꠀꠋꠉꠥꠟ ꠟꠣꠉꠣꠁꠀ ꠀꠝꠣꠞ ꠖꠥꠁꠅ ꠀꠔ ꠖꠦꠈꠅ, ꠀꠞ ꠔꠥꠝꠣꠞ ꠀꠔ ꠛꠣꠠꠣꠁꠀ ꠀꠝꠣꠞ ꠙꠣꠔ꠆ꠔꠤ-ꠀꠠꠞ ꠎꠈꠝꠅ ꠢꠣꠞꠣꠅ, ꠄꠇꠤꠘ ꠇꠞꠅ, ꠡꠘ꠆ꠖꠄ ꠇꠞꠤꠅ ꠘꠣ।” 28ꠔꠦꠃ ꠕꠥꠝꠣꠍꠦ ꠇꠁꠟꠣ, “ꠝꠣꠟꠤꠇ ꠀꠝꠣꠞ, ꠀꠟ꠆ꠟꠣ ꠀꠝꠣꠞ।” 29ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠕꠥꠝꠣꠍ, ꠀꠝꠣꠞꠦ ꠖꠦꠈꠍ ꠇꠞꠤ ꠔꠥꠝꠤ ꠁꠝꠣꠘ ꠀꠘꠟꠣꠄ ꠘꠤ? ꠢꠥꠘꠅ, ꠗꠁꠘ꠆ꠘ ꠔꠣꠞꠣ, ꠎꠦꠞꠣ ꠘꠣ ꠖꠦꠈꠤꠀꠅ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ।”
ꠅꠃ ꠇꠤꠔꠣꠛꠞ ꠝꠥꠟ ꠘꠍꠤꠅꠔ
30ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞ ꠍꠣꠝꠘꠦ ꠀꠞꠅ ꠛꠃꠔ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠁꠍꠂꠘ, ꠁꠔꠣ ꠢꠇꠟꠔꠣ ꠔ ꠅꠃ ꠇꠤꠔꠣꠛꠅ ꠟꠦꠈꠣ ꠅꠁꠍꠦ ꠘꠣ। 31ꠈꠣꠟꠤ ꠅꠃ ꠊꠐꠘꠣ ꠅꠇꠟ ꠟꠦꠈꠣ ꠅꠁꠍꠦ, ꠎꠣꠔꠦ ꠅꠔꠣ ꠔꠤꠟꠣꠅꠔ ꠇꠞꠤꠀ ꠔꠥꠝꠞꠣ ꠁꠝꠣꠘ ꠀꠘ, ꠢꠎꠞꠔ ꠁꠍꠣꠃ ꠀꠟ꠆ꠟꠣ ꠙꠣꠇꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ, ꠔꠣꠁꠘꠃ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠀꠞ ꠁꠝꠣꠘ ꠀꠘꠤꠀ ꠎꠣꠔꠦ ꠔꠣꠘ ꠃꠍꠤꠟ꠆ꠟꠣꠄ ꠔꠥꠝꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞ।
Currently Selected:
ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 20: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
