ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 21
21
ꠡꠣꠔꠎꠘ ꠍꠣꠢꠣꠛꠤꠞ ꠟꠉꠦ ꠎꠤꠘ꠆ꠖꠣ ꠁꠍꠣꠞ ꠡꠣꠇ꠆ꠇꠣꠔ
1ꠄꠞꠛꠣꠖꠦ ꠔꠤꠛꠤꠞꠤꠀ ꠘꠣꠝꠞ ꠀꠅꠞꠞ ꠙꠣꠞꠅ ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠢꠤꠞꠛꠣꠞ ꠖꠦꠈꠣ ꠖꠤꠟꠣ। ꠊꠐꠘꠣ ꠅꠃ ꠟꠣꠈꠣꠘ ꠅꠁꠟ। 2ꠍꠣꠁꠝꠘ-ꠙꠤꠔꠞ, ꠕꠥꠝꠣꠍ ꠎꠣꠞꠦ ꠎꠝꠎ ꠇꠅꠀ ꠅꠁꠔ, ꠀꠞ ꠉꠣꠟꠤꠟ ꠎꠤꠟꠣꠞ ꠇꠣꠘ꠆ꠘꠣ ꠉꠣꠃꠞ ꠘꠕꠘꠦꠟ, ꠎꠤꠛꠥꠖꠤꠀꠞ ꠙꠥꠀꠂꠘ ꠡꠢ ꠀꠞꠅ ꠖꠥꠁꠎꠘ ꠍꠣꠢꠣꠛꠤ ꠄꠇꠟꠉꠦ ꠀꠍꠟꠣ। 3ꠍꠣꠢꠣꠛꠤ ꠍꠣꠁꠝꠘ-ꠙꠤꠔꠞꠦ ꠟꠉꠞ ꠄꠞꠣꠞꠦ ꠇꠁꠟꠣ, “ꠀꠝꠤ ꠝꠣꠍ ꠝꠣꠞꠣꠔ ꠎꠣꠁꠀꠞꠉꠤ।” ꠔꠣꠞꠣ ꠇꠁꠟꠣ, “ꠀꠝꠞꠣꠅ ꠔꠥꠝꠣꠞ ꠟꠉꠦ ꠎꠣꠁꠝꠥ।” ꠔꠦꠃ ꠔꠣꠞꠣ ꠘꠣꠅ ꠟꠁꠀ ꠝꠣꠍ ꠝꠣꠞꠣꠔ ꠛꠣꠞ ꠅꠁꠟꠣ, ꠅꠁꠟꠦ ꠁ ꠞꠣꠁꠔ ꠇꠥꠘꠥ ꠝꠣꠍ ꠙꠣꠁꠟꠣ ꠘꠣ।
4ꠚꠎꠞ ꠅꠇ꠆ꠔꠅ ꠁꠍꠣ ꠀꠁꠀ ꠀꠅꠞꠞ ꠙꠣꠞꠅ ꠃꠛꠣꠁꠟꠣ। ꠅꠁꠟꠦ ꠔꠣꠁꠘꠃ ꠎꠦ ꠁꠍꠣ, ꠄꠞꠣ ꠁꠈꠣꠘ ꠛꠥꠎꠟꠣ ꠘꠣ। 5ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠅ ꠛꠦꠐꠣꠁꠘ, ꠔꠥꠝꠞꠣ ꠇꠥꠘꠥ ꠝꠣꠍ ꠙꠣꠁꠍ ꠘꠣ ꠘꠤ?” ꠔꠣꠞꠣ ꠇꠁꠟꠣ, “ꠎꠤ ꠘꠣ, ꠙꠣꠁꠍꠤ ꠘꠣ।”
6ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠦ ꠘꠣꠅꠞ ꠒꠣꠁꠘ ꠉꠣꠟꠣꠛꠣꠄ ꠎꠣꠟ ꠚꠣꠟꠣꠅ, ꠔꠦꠃ ꠙꠣꠁꠛꠣꠄꠘꠦ।” ꠔꠣꠘ ꠇꠕꠣꠝꠔ ꠔꠣꠞꠣ ꠎꠣꠟ ꠚꠣꠟꠣꠁꠟꠣ ꠀꠞ ꠎꠣꠟꠅ ꠅꠔ ꠝꠣꠍ ꠢꠣꠝꠣꠁꠟꠣ, ꠁꠈꠣꠘ ꠐꠣꠘꠤꠀ ꠔꠥꠟꠔꠣ ꠙꠣꠞꠟꠣ ꠘꠣ। 7ꠎꠦ ꠍꠣꠢꠣꠛꠤꠞꠦ ꠁꠍꠣꠄ ꠝꠣꠄꠀ ꠇꠞꠔꠣ, ꠔꠣꠁꠘ ꠙꠤꠔꠞꠞꠦ ꠇꠁꠟꠣ, “ꠄꠁꠘ ꠔ ꠝꠣꠟꠤꠇ।” ꠁ ꠡꠝꠄ ꠍꠣꠁꠝꠘ-ꠙꠤꠔꠞꠞ ꠉꠔꠞꠅ ꠇꠣꠙꠠ ꠀꠍꠤꠟ ꠘꠣ। “ꠄꠁꠘ ꠔ ꠝꠣꠟꠤꠇ” ꠅꠈꠣꠘ ꠢꠥꠘꠤꠀꠃ ꠔꠣꠁꠘ ꠇꠣꠙꠠ ꠚꠤꠘ꠆ꠖꠤꠀ ꠚꠣꠟꠖꠤ ꠙꠣꠘꠤꠔ ꠙꠠꠟꠣ। 8ꠅꠁꠟꠦ ꠛꠣꠇꠤ ꠍꠣꠢꠣꠛꠤ ꠅꠇꠟꠦ ꠝꠣꠍꠦ ꠜꠞꠣ ꠎꠣꠟꠈꠣꠘ ꠐꠣꠘꠤ ꠐꠣꠘꠤ ꠘꠣꠅ ꠟꠁꠀ ꠙꠣꠞꠅ ꠀꠎꠤꠟꠣ। ꠇꠣꠞꠘ ꠔꠣꠞꠣ ꠙꠣꠞ ꠕꠣꠇꠤ ꠛꠦꠡꠤ ꠖꠥꠞꠁ ꠘꠣꠄ, ꠅꠘꠥꠝꠣꠘ ꠖꠥꠁ-ꠡ ꠀꠔ ꠖꠥꠞꠁ ꠀꠍꠟꠣ।
9ꠔꠣꠞꠣ ꠙꠣꠞꠅ ꠃꠑꠤꠀ ꠖꠦꠈꠟꠣ ꠀꠋꠞꠣꠞ ꠀꠉꠥꠁꠘ, ꠅꠃ ꠀꠉꠥꠁꠘꠞ ꠃꠙꠞꠦ ꠝꠣꠍ ꠀꠞ ꠞꠥꠐꠤ। 10ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅꠈꠘ ꠎꠦꠔꠣ ꠝꠣꠍ ꠝꠣꠞꠍ, ꠅꠘ ꠕꠘꠦ ꠇꠄꠐꠣ ꠀꠘꠅ।” 11ꠍꠣꠁꠝꠘ-ꠙꠤꠔꠞꠦ ꠘꠣꠅ ꠕꠣꠇꠤ ꠎꠣꠟꠈꠣꠘ ꠙꠣꠞꠅ ꠐꠣꠘꠤꠀ ꠔꠥꠟꠟꠣ। ꠎꠣꠟꠞ ꠜꠤꠔꠞꠦ ꠄꠇ-ꠡ ꠔꠦꠙ꠆ꠙꠣꠘ꠆ꠘꠐꠣ ꠛꠠ ꠝꠣꠍ ꠀꠍꠤꠟ, ꠔꠦꠛꠃ ꠎꠣꠟ ꠚꠣꠠꠟ ꠘꠣ। 12ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠅ, ꠈꠣꠅ ꠀꠁꠀ।” ꠅꠁꠟꠦ ꠇꠥꠘꠥ ꠍꠣꠢꠣꠛꠤꠄ ꠎꠤꠇꠣꠘꠤꠞ ꠡꠣꠅꠡ ꠅꠁꠟ ꠘꠣ “ꠀꠙꠘꠦ ꠇꠦ?” ꠇꠣꠞꠘ ꠔꠣꠞꠣ ꠎꠣꠘꠔꠣ, ꠔꠣꠁꠘꠃ ꠝꠣꠟꠤꠇ। 13ꠛꠣꠖꠦ ꠔꠣꠁꠘ ꠀꠁꠀ ꠔꠣꠞꠣꠞꠦ ꠞꠥꠐꠤ ꠈꠣꠁꠔꠦ ꠖꠤꠟꠣ, ꠅꠃꠟꠣ ꠛꠤꠞꠣꠘ ꠝꠣꠍꠅ ꠖꠤꠟꠣ। 14ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠛꠣꠖꠦ, ꠅꠃ ꠔꠤꠘ ꠘꠝ꠆ꠛꠞ ꠛꠣꠞ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠖꠦꠈꠣ ꠖꠤꠟꠣ।
ꠢꠎꠞꠔ ꠙꠤꠔꠞꠞ ꠟꠉꠦ ꠍꠅꠀꠟ-ꠎꠥꠀꠙ
15ꠔꠣꠞꠣꠞ ꠈꠣꠅꠀ-ꠖꠣꠅꠀꠞ ꠛꠣꠖꠦ ꠁꠍꠣꠄ ꠍꠣꠁꠝꠘ-ꠙꠤꠔꠞꠞꠦ ꠎꠤꠇꠣꠁꠟꠣ, “ꠅ ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ, ꠄꠞꠣ ꠎꠦꠟꠣ ꠀꠝꠣꠞꠦ ꠝꠣꠄꠀ ꠇꠞꠂꠘ, ꠔꠥꠝꠤ ꠀꠝꠣꠞꠦ ꠄꠞ ꠕꠣꠇꠤ ꠛꠦꠡꠤ ꠝꠣꠄꠀ ꠇꠞꠅ ꠘꠤ?” ꠔꠣꠁꠘ ꠇꠁꠟꠣ, “ꠎꠤꠅꠄ ꠝꠣꠟꠤꠇ, ꠀꠙꠘꠦ ꠔ ꠎꠣꠘꠂꠘ, ꠀꠝꠤ ꠀꠙꠘꠣꠞꠦ ꠇꠔ ꠝꠣꠄꠀ ꠇꠞꠤ।” ꠔꠦꠃ ꠁꠍꠣꠄ ꠇꠁꠟꠣ, “ꠔꠦ ꠀꠝꠣꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠞꠣꠈꠣꠟꠤ ꠇꠞꠅ।”
16ꠁꠍꠣꠄ ꠢꠤꠞꠛꠣꠞ ꠔꠣꠘꠞꠦ ꠎꠤꠇꠣꠁꠟꠣ, “ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ, ꠔꠥꠝꠤ ꠀꠝꠣꠞꠦ ꠝꠣꠄꠀ ꠇꠞ ꠘꠤ?” ꠙꠤꠔꠞꠦ ꠇꠁꠟꠣ, “ꠎꠤꠅꠄ ꠝꠣꠟꠤꠇ, ꠀꠙꠘꠦ ꠔ ꠎꠣꠘꠂꠘ, ꠀꠝꠤ ꠀꠙꠘꠣꠞꠦ ꠇꠔ ꠝꠣꠄꠀ ꠇꠞꠤ।” ꠁꠍꠣꠄ ꠇꠁꠟꠣ, “ꠔꠦ ꠀꠝꠣꠞ ꠝꠦꠠꠣꠞ ꠙꠣꠟ ꠖꠦꠈꠣ-ꠢꠥꠘꠣ ꠇꠞꠅ।”
17ꠛꠣꠖꠦ ꠔꠣꠁꠘ ꠔꠤꠍꠞꠣ ꠛꠣꠞ ꠎꠤꠇꠣꠁꠟꠣ, “ꠅ ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ, ꠢꠣꠍꠣꠃ ꠀꠝꠤ ꠔꠥꠝꠣꠞ ꠝꠣꠄꠀꠞ ꠝꠣꠘꠥꠡ ꠘꠤ?” ꠁꠍꠣꠄ ꠔꠤꠍꠞꠣ ꠛꠣꠞ ꠎꠤꠇꠣꠘꠤꠄ ꠙꠤꠔꠞ ꠝꠘꠦ ꠝꠘꠦ ꠇꠤꠍꠥ ꠖꠥꠈꠤꠔ ꠅꠁꠀ ꠇꠁꠟꠣ, “ꠝꠣꠟꠤꠇ, ꠀꠙꠘꠦ ꠔ ꠢꠇꠟꠔꠣꠃ ꠎꠣꠘꠂꠘ, ꠀꠙꠘꠦ ꠎꠣꠘꠂꠘꠃ ꠀꠙꠘꠦ ꠀꠝꠣꠞ ꠈꠥꠛ ꠝꠣꠄꠀꠞ ꠎꠘ।” ꠔꠦꠃ ꠁꠍꠣꠄ ꠇꠁꠟꠣ, “ꠔꠦ ꠀꠝꠣꠞ ꠝꠦꠠꠣ ꠙꠣꠟꠞ ꠞꠣꠈꠣꠟꠤ ꠇꠞꠅ। 18ꠀꠝꠤ ꠔꠥꠝꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠣꠞ ꠎꠥꠀꠘꠇꠤꠞ ꠡꠝꠄ ꠔꠥꠝꠤ ꠘꠤꠎꠦꠃ ꠔꠥꠝꠣꠞ ꠇꠝꠞ ꠛꠣꠘ꠆ꠖꠤꠀ ꠎꠦꠘꠅ ꠈꠥꠡꠤ ꠅꠘꠅ ꠎꠣꠁꠔꠣꠄ। ꠅꠁꠟꠦ ꠛꠥꠠꠣꠇꠤꠞ ꠡꠝꠄ ꠔꠥꠝꠣꠞ ꠀꠔ ꠛꠣꠠꠣꠁ ꠖꠤꠛꠣꠄ, ꠀꠞ ꠅꠁꠘ꠆ꠘ ꠎꠘꠦ ꠔꠥꠝꠣꠞꠦ ꠛꠣꠘ꠆ꠖꠤꠀ, ꠔꠥꠝꠤ ꠎꠦꠘꠅ ꠎꠣꠁꠔꠣꠄ ꠌꠣꠅ ꠘꠣ, ꠢꠘꠅ ꠟꠁꠀ ꠎꠣꠁꠛ।” 19ꠀꠟ꠆ꠟꠣꠞ ꠉꠃꠞꠛ ꠎꠣꠁꠞ ꠅꠀꠞ ꠟꠣꠉꠤ ꠙꠤꠔꠞꠞ ꠝꠃꠔ ꠇꠤꠟꠣꠘ ꠅꠁꠛ, ꠅꠈꠣꠘ ꠛꠥꠎꠣꠘꠤꠔ ꠉꠤꠀ ꠁꠍꠣꠄ ꠅꠃ ꠇꠕꠣ ꠇꠁꠟꠣ। ꠛꠣꠖꠦ ꠔꠣꠁꠘ ꠙꠤꠔꠞꠞꠦ ꠇꠁꠟꠣ, “ꠀꠅ, ꠀꠝꠣꠞ ꠟꠉꠦ ꠕꠣꠇꠅ।”
20ꠅꠃ ꠡꠝꠄ ꠙꠤꠔꠞꠦ ꠈꠞꠦꠖꠤ ꠌꠣꠁꠀ ꠖꠦꠈꠟꠣ, ꠁꠍꠣꠞ ꠢꠃ ꠝꠣꠄꠀꠞ ꠍꠣꠢꠣꠛꠤ ꠈꠞꠦ ꠈꠞꠦ ꠀꠁꠞꠣ। ꠅꠃ ꠍꠣꠢꠣꠛꠤꠄ ꠇꠄꠖꠤꠘ ꠀꠉꠦ ꠈꠣꠘꠤꠔ ꠛꠁꠀ ꠁꠍꠣꠞ ꠛꠣꠄ ꠎꠥꠇꠤꠀ ꠇꠁꠍꠟꠣ, “ꠢꠥꠎꠥꠞ, ꠀꠙꠘꠣꠞꠦ ꠖꠥꠡꠝꠘꠞ ꠀꠔꠅ ꠎꠦ ꠗꠞꠣꠁ ꠖꠤꠛ, ꠢꠦ ꠇꠦ?” 21ꠙꠤꠔꠞꠦ ꠄꠘꠞꠦ ꠖꠦꠈꠤꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠄꠘ ꠇꠤꠔꠣ ꠅꠁꠛ?” 22ꠁꠍꠣꠄ ꠙꠤꠔꠞꠞꠦ ꠇꠁꠟꠣ, “ꠀꠝꠤ ꠎꠥꠖꠤ ꠌꠣꠁ, ꠀꠝꠤ ꠖꠥꠍꠞꠣꠛꠣꠞ ꠖꠥꠘꠤꠀꠔ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠢꠦ ꠅꠘꠅ ꠞꠃꠇ, ꠔꠦ ꠔꠥꠝꠣꠞ ꠇꠤꠔꠣ? ꠔꠥꠝꠤ ꠀꠝꠣꠞ ꠟꠉꠦ ꠕꠣꠇꠅ।” 23ꠄꠞꠟꠣꠉꠤ ꠃꠝ꠆ꠝꠔ ꠅꠇꠟꠞ ꠝꠣꠎꠦ ꠈꠛꠞ ꠞꠐꠤ ꠉꠦꠟ, ꠅꠃ ꠍꠣꠢꠣꠛꠤ ꠝꠞꠔꠣ ꠘꠣꠄ। ꠅꠁꠟꠦ ꠁꠍꠣꠄ ꠙꠤꠔꠞꠞꠦ ꠁꠈꠣꠘ ꠇꠁꠍꠂꠘ ꠘꠣ। ꠛꠞꠋ ꠔꠣꠁꠘ ꠇꠁꠍꠟꠣ, “ꠀꠝꠤ ꠎꠥꠖꠤ ꠌꠣꠁ, ꠀꠝꠤ ꠢꠤꠞꠛꠣꠞ ꠔꠡꠞꠤꠚ ꠘꠣ ꠀꠘꠣ ꠙꠞ꠆ꠎꠘ꠆ꠔ ꠢꠦ ꠅꠘꠅ ꠕꠣꠇꠃꠇ, ꠔꠦ ꠔꠥꠝꠣꠞ ꠇꠤꠔꠣ?”
ꠟꠦꠈꠇ ꠍꠣꠢꠣꠛꠤꠞ ꠡꠣꠇ꠆ꠇꠤ
24ꠅꠃ ꠍꠣꠢꠣꠛꠤꠄ ꠁꠔꠣ ꠢꠇꠟ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠍꠂꠘ ꠀꠞ ꠟꠦꠈꠍꠂꠘ। ꠀꠝꠞꠣ ꠎꠣꠘꠤ, ꠔꠣꠘ ꠡꠣꠇ꠆ꠇꠤ ꠢꠣꠍꠣ। 25ꠢꠎꠞꠔ ꠁꠍꠣꠄ ꠀꠞꠅ ꠛꠃꠔ ꠇꠣꠝ ꠇꠞꠍꠂꠘ। ꠁꠔꠣ ꠎꠥꠖꠤ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠔ, ꠔꠦ ꠅꠔ ꠇꠤꠔꠣꠛ ꠅꠁꠔ, ꠁꠔꠣ ꠀꠡ꠆ꠔꠣ ꠖꠥꠘꠤꠀꠁꠄ ꠗꠞꠟ ꠘꠣ ꠅꠘꠦ॥
Currently Selected:
ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 21: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
