ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 19

1ꠛꠣꠖꠦ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠦ ꠁꠍꠣꠞꠦ ꠌꠣꠛꠥꠇ ꠝꠣꠞꠣꠞ ꠢꠥꠇꠥꠝ ꠖꠤꠟꠣ। 2ꠀꠞ ꠍꠤꠙꠣꠁ ꠅꠇꠟꠦ ꠉꠍꠣ-ꠇꠣꠐꠣ ꠖꠤꠀ ꠄꠇ ꠝꠥꠇꠥꠐ ꠛꠣꠘꠣꠁꠀ ꠔꠣꠘ ꠝꠣꠕꠣꠔ ꠖꠤꠟ, ꠀꠞ ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠟꠦꠛꠣꠍ ꠚꠤꠘ꠆ꠖꠣꠁꠟ। 3ꠛꠣꠖꠦ ꠔꠣꠞꠣ ꠔꠣꠘ ꠍꠣꠝꠘꠦ ꠀꠁꠀ ꠇꠁꠟ, “ꠅ ꠁꠢꠥꠖꠤꠞ ꠛꠣꠖꠡꠣ, ꠝꠣꠞꠢꠣꠛꠣ!” ꠅꠈꠣꠘ ꠇꠁꠀ ꠇꠁꠀ ꠔꠣꠞꠣ ꠔꠣꠘ ꠉꠣꠟꠅ ꠌꠠꠣꠁꠟ। 4ꠔꠦꠃ ꠙꠤꠟꠣꠔ ꠢꠤꠞꠛꠣꠞ ꠛꠣꠞꠦ ꠀꠁꠀ ꠇꠁꠟꠣ, “ꠢꠥꠘꠅ, ꠀꠝꠤ ꠄꠞꠦ ꠔꠥꠝꠞꠣꠞ ꠉꠦꠍꠦ ꠛꠣꠞ ꠇꠞꠤꠀ ꠀꠘꠤꠀꠞ, ꠔꠦꠃ ꠔꠥꠝꠞꠣ ꠛꠥꠎꠛꠣꠄ, ꠀꠝꠤ ꠄꠞ ꠇꠥꠘꠥ ꠖꠥꠡꠃ ꠙꠣꠁꠞꠣꠝ ꠘꠣ।” 5ꠢꠃ ꠉꠍꠣ-ꠇꠣꠐꠣꠞ ꠝꠥꠇꠥꠐ ꠀꠞ ꠛꠣꠁꠋꠉꠘꠤ ꠟꠦꠛꠣꠍ ꠚꠤꠘ꠆ꠖꠣ ꠢꠣꠟꠔꠦ ꠁꠍꠣ ꠛꠣꠞ ꠅꠁꠀ ꠀꠁꠟꠣ, ꠀꠞ ꠙꠤꠟꠣꠔꠦ ꠇꠁꠟꠣ, “ꠅꠃ ꠖꠦꠈꠅ, ꠢꠃ ꠝꠣꠘꠥꠡ।” 6ꠁꠍꠣꠞꠦ ꠖꠦꠈꠤꠀ ꠛꠠ ꠁꠝꠣꠝ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠙꠥꠟꠤꠡ ꠅꠇꠟꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠔꠣꠞꠦ ꠍꠟꠤꠛꠅ ꠖꠦꠅ, ꠍꠟꠤꠛꠅ ꠖꠦꠅ।” ꠙꠤꠟꠣꠔꠦ ꠇꠁꠟꠣ, “ꠀꠝꠤ ꠔ ꠔꠣꠞ ꠇꠥꠘꠥ ꠖꠥꠡ ꠙꠣꠁꠍꠤ ꠘꠣ, ꠔꠦ ꠔꠥꠝꠞꠣꠃ ꠔꠣꠞꠦ ꠘꠤꠀ ꠍꠟꠤꠛꠅ ꠉꠣꠕꠤꠟꠣꠅ।” (ꠁ ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ, ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।) 7ꠁꠢꠥꠖꠤ ꠘꠦꠔꠣ ꠅꠇꠟꠦ ꠙꠤꠟꠣꠔꠞꠦ ꠇꠁꠟꠣ, “ꠀꠝꠞꠣꠞ ꠡꠞꠤꠅꠔ ꠝꠣꠚꠤꠇ ꠔꠣꠞ ꠝꠞꠘ ꠅꠀ ꠃꠌꠤꠔ, ꠇꠣꠞꠘ ꠢꠦ ꠘꠤꠎꠞꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣ ꠇꠁꠍꠦ।”

8ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠀꠞꠅ ꠛꠦꠡꠤ ꠒꠞꠣꠁꠉꠦꠟꠣ। 9ꠔꠣꠁꠘ ꠢꠤꠞꠛꠣꠞ ꠐꠋꠉꠤ-ꠊꠞꠞ ꠜꠤꠔꠞꠦ ꠢꠣꠝꠣꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠥꠀꠁ ꠕꠣꠇꠤ ꠀꠁꠍ?” ꠅꠁꠟꠦ ꠁꠍꠣꠄ ꠇꠥꠘꠥ ꠎꠥꠀꠙ ꠖꠤꠟꠣ ꠘꠣ। 10ꠄꠞꠖꠣꠄ ꠙꠤꠟꠣꠔꠦ ꠁꠍꠣꠞꠦ ꠇꠁꠟꠣ, “ꠔꠥꠝꠤ ꠀꠝꠣꠞ ꠝꠣꠔꠞ ꠇꠥꠘꠥ ꠎꠥꠀꠙ ꠖꠤꠔꠣꠄ ꠘꠣ ꠘꠤ? ꠔꠥꠝꠤ ꠎꠣꠘ ꠘꠤ, ꠔꠥꠝꠣꠞꠦ ꠈꠣꠟꠣꠍ ꠖꠤꠛꠣꠞ ꠛꠣ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣꠞ ꠈꠦꠝꠔꠣ ꠀꠝꠣꠞ ꠀꠍꠦ?” 11ꠔꠦꠃ ꠁꠍꠣꠄ ꠇꠁꠟꠣ, “ꠃꠙꠞꠦ ꠕꠣꠇꠤ ꠀꠙꠘꠣꠞꠦ ꠈꠦꠝꠔꠣ ꠘꠣ ꠖꠦꠅꠀ ꠅꠁꠟꠦ, ꠀꠝꠣꠞ ꠃꠙꠞꠦ ꠀꠙꠘꠣꠞ ꠇꠥꠘꠥ ꠈꠦꠝꠔꠣꠃ ꠕꠣꠇꠔ ꠘꠣ। ꠄꠞꠟꠣꠉꠤ ꠎꠦ ꠝꠣꠘꠡꠦ ꠀꠝꠣꠞꠦ ꠀꠙꠘꠣꠞ ꠀꠔꠅ ꠗꠞꠣꠁ ꠖꠤꠍꠦ, ꠢꠦ-ꠃ ꠛꠠ ꠉꠥꠘꠣꠉꠣꠞ।” 12ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠈꠣꠟꠣꠍ ꠖꠤꠟꠣꠁꠔꠣ ꠌꠣꠁꠟꠣ, ꠅꠁꠟꠦ ꠁꠢꠥꠖꠤ ꠘꠦꠔꠣ ꠅꠇꠟꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠀꠙꠘꠦ ꠎꠥꠖꠤ ꠄꠞꠦ ꠈꠣꠟꠣꠍ ꠖꠤꠟꠣꠁꠘ, ꠔꠦ ꠀꠙꠘꠦ ꠞꠥꠝꠣꠘ ꠛꠣꠖꠡꠣꠞ ꠖꠥꠡ꠆ꠔ ꠘꠣꠄ। ꠎꠦ ꠝꠣꠘꠡꠦ ꠘꠤꠎꠞꠦ ꠛꠣꠖꠡꠣ ꠇꠁꠀ ꠖꠣꠛꠤ ꠇꠞꠦ, ꠢꠦ ꠔ ꠞꠥꠝꠣꠘ ꠛꠣꠖꠡꠣꠞ ꠖꠥꠡꠝꠘ।”

13ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠛꠣꠞ ꠇꠞꠤ ꠀꠘꠟꠣ ꠀꠞ ꠙꠣꠔ꠆ꠔꠞꠖꠤ-ꠛꠣꠘ꠆ꠖꠣ ꠘꠣꠝꠞ ꠄꠇ ꠃꠑꠣꠘꠅ ꠛꠤꠌꠣꠞꠞ ꠀꠡꠘꠅ ꠛꠁꠟꠣ। ꠁꠛꠞꠣꠘꠤ ꠜꠣꠡꠣꠄ ꠁ ꠃꠑꠣꠘꠞꠦ ꠉꠣꠛ꠆ꠛꠣꠕꠣ ꠇꠅꠀ ꠅꠄ। 14ꠁ ꠖꠤꠘ ꠀꠍꠤꠟ ꠀꠎꠣꠖꠤ ꠁꠖꠞ ꠀꠄꠅꠎꠘꠞ ꠖꠤꠘ। ꠅꠃ ꠡꠝꠄ ꠛꠦꠁꠟ ꠅꠘꠥꠝꠣꠘ ꠖꠥꠁꠚꠞ ꠅꠁꠉꠦꠍꠦ। ꠙꠤꠟꠣꠔꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠅꠃ ꠖꠦꠈꠅ, ꠔꠥꠝꠞꠣꠞ ꠛꠣꠖꠡꠣ।” 15ꠁꠍꠣꠞꠦ ꠖꠦꠈꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟ, “ꠅꠉꠥꠞꠦ ꠢꠞꠣꠅ, ꠢꠞꠣꠅ, ꠔꠣꠞꠦ ꠍꠟꠤꠛꠅ ꠖꠦꠅ।” ꠙꠤꠟꠣꠔꠦ ꠇꠁꠟꠣ, “ꠔꠥꠝꠞꠣꠞ ꠛꠣꠖꠡꠣꠞꠦ ꠀꠝꠤ ꠍꠟꠤꠛꠅ ꠖꠤꠟꠣꠁꠔꠣꠝ ꠘꠤ?” ꠛꠠ ꠁꠝꠣꠝ ꠅꠇꠟꠦ ꠇꠁꠟꠣ, “ꠈꠣꠟꠤ ꠞꠥꠝꠣꠘ ꠛꠣꠖꠡꠣ ꠍꠣꠠꠣ, ꠀꠝꠞꠣꠞ ꠀꠞ ꠇꠥꠘꠥ ꠛꠣꠖꠡꠣ ꠘꠣꠁ।” 16ꠔꠦꠃ ꠢꠣꠇꠤꠝ ꠙꠤꠟꠣꠔꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣꠞ ꠟꠣꠉꠤ ꠁꠍꠣꠞꠦ ꠔꠣꠞꠣꠞ ꠀꠔꠅ ꠡꠝꠎꠣꠁ ꠖꠤꠟꠣ, ꠀꠞ ꠍꠤꠙꠣꠁ ꠅꠇꠟꠦ ꠔꠣꠘꠞꠦ ꠟꠁꠀ ꠉꠦꠟꠣ।

ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠝꠃꠔ

17ꠛꠣꠖꠦ ꠁꠍꠣꠄ ꠔꠣꠘ ꠍꠟꠤꠛ ꠘꠤꠎꠦ ꠛꠁꠀ ꠇꠟ꠆ꠟꠣꠞ ꠌꠣꠠ ꠘꠣꠝꠞ ꠎꠣꠉꠣꠔ ꠉꠦꠟꠣ। ꠁꠛꠞꠣꠘꠤ ꠜꠣꠡꠣꠄ ꠁ ꠎꠣꠉꠣꠞ ꠘꠣꠝ ꠉꠟꠉꠣꠕꠣ। 18ꠢꠤꠘꠅ ꠘꠤꠀ ꠔꠣꠞꠣ ꠔꠣꠘꠞꠦ ꠍꠟꠤꠛꠅ ꠟꠐꠇꠣꠁꠟ। ꠁꠍꠣꠞꠦ ꠝꠣꠎꠈꠣꠘꠅ, ꠀꠞ ꠔꠣꠘ ꠖꠥꠁ ꠉꠣꠟꠣꠞ ꠖꠥꠁꠅ ꠍꠟꠤꠛꠅ ꠅꠁꠘ꠆ꠘ ꠖꠥꠁꠎꠘꠞꠦ ꠟꠐꠇꠣꠁꠟ।

19ꠀꠞ ꠙꠤꠟꠣꠔꠦ ꠄꠇꠈꠣꠘ ꠅꠙꠞꠣꠗ-ꠘꠣꠝꠣ ꠟꠦꠈꠤꠀ ꠁꠍꠣꠞ ꠍꠟꠤꠛꠞ ꠃꠙꠞꠦ ꠟꠣꠉꠣꠁꠟꠣ। ꠁꠈꠣꠘꠅ ꠟꠦꠈꠣ ꠀꠍꠤꠟ, “ꠘꠣꠍꠣꠞꠔ ꠉꠣꠃꠞ ꠁꠍꠣ, ꠁꠢꠥꠖꠤꠞ ꠛꠣꠖꠡꠣ।” 20ꠎꠦ ꠎꠣꠉꠣꠔ ꠔꠣꠘꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠅꠃ ꠎꠣꠉꠣ ꠐꠣꠃꠘꠞ ꠇꠣꠘ꠆ꠖꠣꠔ ꠀꠍꠤꠟ ꠉꠔꠤꠇꠦ ꠛꠃꠔ ꠁꠢꠥꠖꠤꠄ ꠅꠃ ꠅꠙꠞꠣꠗ-ꠘꠣꠝꠣ ꠙꠠꠟ। ꠁꠈꠣꠘ ꠁꠛꠞꠣꠘꠤ, ꠁꠃꠘꠣꠘꠤ ꠀꠞ ꠞꠥꠝꠣꠘ ꠜꠣꠡꠣꠄ ꠟꠦꠈꠣ ꠀꠍꠤꠟ। 21ꠁꠢꠥꠖꠤꠞ ꠛꠠ ꠁꠝꠣꠝ ꠅꠇꠟꠦ ꠢꠣꠇꠤꠝ ꠙꠤꠟꠣꠔꠞꠦ ꠇꠁꠟꠣ, “ꠁꠢꠥꠖꠤꠞ ꠛꠣꠖꠡꠣ ꠘꠣ ꠟꠦꠈꠤꠀ, ꠀꠙꠘꠦ ꠅꠟꠣ ꠟꠦꠈꠃꠇ꠆ꠇꠣ, ꠢꠦ ꠇꠁꠔ, ꠀꠝꠤ ꠁꠢꠥꠖꠤꠞ ꠛꠣꠖꠡꠣ।” 22ꠙꠤꠟꠣꠔꠦ ꠇꠁꠟꠣ, “ꠀꠝꠤ ꠎꠦꠔꠣ ꠟꠦꠈꠍꠤ, ꠟꠦꠈꠍꠤꠃ।”

23ꠁꠍꠣꠞꠦ ꠍꠟꠤꠛꠅ ꠟꠐꠇꠣꠘꠤꠞ ꠛꠣꠖꠦ ꠍꠤꠙꠣꠁ ꠅꠇꠟꠦ ꠔꠣꠘ ꠇꠣꠙꠠ-ꠌꠥꠙꠠ ꠌꠣꠁꠞ ꠛꠣꠐ ꠇꠞꠤ ꠛꠣꠐꠤꠀ ꠘꠤꠟꠣ। ꠛꠣꠖꠦ ꠔꠣꠘ ꠇꠥꠞ꠆ꠔꠣꠐꠣꠅ ꠘꠤꠟꠣ। ꠁ ꠀꠡ꠆ꠔꠣ ꠇꠥꠞ꠆ꠔꠣꠞ ꠉꠟꠣ ꠕꠣꠇꠤ ꠛꠣꠁꠘ ꠇꠞꠣ, ꠇꠥꠘꠥ ꠡꠤꠟꠣꠁ ꠀꠍꠤꠟ ꠘꠣ। 24ꠄꠞꠟꠣꠉꠤ ꠍꠤꠙꠣꠁ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠁꠇꠐꠣ ꠘꠣ ꠍꠤꠠꠤꠀ ꠛꠞꠋ ꠟꠐꠣꠞꠤ ꠝꠣꠞꠤ ꠖꠦꠈꠤ, ꠇꠣꠞ ꠜꠣꠁꠉ꠆ꠉꠔ ꠙꠠꠦ।” ꠁꠔꠣ ꠊꠐꠍꠤꠟ, ꠎꠣꠔꠦ ꠀꠍꠝꠣꠘꠤ ꠇꠤꠔꠣꠛꠞ ꠇꠕꠣ ꠚꠟꠦ, ꠇꠤꠔꠣꠛꠅ ꠟꠦꠈꠣ ꠀꠍꠦ,

ꠔꠣꠞꠣ ꠘꠤꠎꠞ ꠝꠣꠎꠦ ꠀꠝꠣꠞ ꠇꠣꠙꠠ-ꠌꠥꠙꠠ

ꠛꠣꠐꠣ-ꠛꠣꠐꠤ ꠇꠞꠍꠦ,

ꠀꠝꠣꠞ ꠇꠥꠞ꠆ꠔꠣꠞ ꠟꠣꠉꠤ ꠔꠣꠞꠣ

ꠟꠐꠣꠞꠤ ꠝꠣꠞꠍꠦ।

25ꠀꠞ ꠢꠣꠍꠣꠃ ꠔꠣꠞꠣ ꠅꠟꠣ ꠇꠞꠟ।

ꠢꠎꠞꠔ ꠁꠍꠣꠞ ꠍꠟꠤꠛꠞ ꠇꠣꠘ꠆ꠖꠣꠔ ꠔꠣꠘ ꠝꠣ, ꠈꠣꠟꠣ, ꠇꠥꠟꠥꠚꠣꠞ ꠛꠃ ꠝꠞꠤꠅꠝ ꠀꠞ ꠝꠉꠖꠤꠟꠤꠘꠤ ꠝꠞꠤꠅꠝ ꠃꠛꠣ ꠀꠍꠟꠣ। 26ꠁꠍꠣꠄ ꠖꠦꠈꠟꠣ, ꠔꠣꠘ ꠝꠣ ꠀꠞ ꠝꠣꠄꠀꠞ ꠢꠃ ꠍꠣꠢꠣꠛꠤ ꠗꠣꠞꠅ ꠃꠛꠣꠁ ꠞꠁꠍꠂꠘ। ꠖꠦꠈꠤꠀ ꠙꠄꠟꠣ ꠔꠣꠘ ꠝꠣʼꠞꠦ ꠇꠁꠟꠣ, “ꠝꠣꠁ ꠉ, ꠅꠃꠘꠥ ꠔꠥꠝꠣꠞ ꠙꠥꠀ।” 27ꠀꠞ ꠍꠣꠢꠣꠛꠤꠞꠦ ꠇꠁꠟꠣ, “ꠜꠣꠁ, ꠅꠃꠘꠥ ꠔꠥꠝꠣꠞ ꠝꠣ।” ꠅꠃ ꠡꠝꠄ ꠕꠣꠇꠤ ꠁ ꠍꠣꠢꠣꠛꠤꠄ ꠁꠍꠣꠞ ꠝꠣʼꠞꠦ ꠔꠣꠘ ꠘꠤꠎꠞ ꠊꠞꠅ ꠟꠁꠀ ꠉꠦꠟꠣꠉꠤ।

28ꠄꠞꠛꠣꠖꠦ ꠢꠇ꠆ꠇꠟꠔꠣ ꠡꠦꠡ ꠅꠁꠉꠦꠍꠦ ꠎꠣꠘꠤꠀ, ꠀꠟ-ꠎꠛꠥꠞ ꠇꠤꠔꠣꠛꠞ ꠀꠄꠀꠔ ꠎꠣꠔꠦ ꠚꠟꠦ, ꠅꠔꠣꠞ ꠟꠣꠉꠤ ꠁꠍꠣꠄ ꠇꠁꠟꠣ, “ꠀꠝꠣꠞ ꠙꠤꠀꠍꠦ ꠗꠞꠍꠦ।” 29ꠅꠃ ꠡꠝꠄ ꠢꠤꠘꠅ ꠄꠇ ꠎꠉ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔ ꠀꠍꠤꠟ। ꠔꠣꠞꠣ ꠄꠇꠈꠣꠘ ꠔꠦꠘꠣ ꠀꠘꠤꠀ ꠅꠃ ꠡꠞꠛꠔꠞ ꠝꠣꠎꠦ ꠜꠤꠎꠣꠁꠀ, ꠄꠍꠥꠛ ꠉꠣꠍꠞ ꠒꠦꠐꠣꠞ ꠝꠣꠕꠣꠔ ꠟꠣꠉꠣꠁꠀ ꠃꠌꠣ ꠇꠞꠤ ꠔꠣꠘ ꠝꠥꠈꠞ ꠉꠦꠍꠦ ꠖꠤꠟ। 30ꠁ ꠡꠞꠛꠔ ꠈꠣꠁꠀ ꠢꠣꠞꠟꠦ ꠔꠣꠁꠘ ꠇꠁꠟꠣ, “ꠡꠦꠡ ꠅꠁꠉꠦꠍꠦ।” ꠅꠈꠣꠘ ꠇꠁꠀ, ꠔꠣꠁꠘ ꠝꠣꠕꠣ ꠘꠥꠀꠁꠀ ꠀꠈꠦꠞꠤ ꠖꠝ ꠚꠣꠟꠣꠁꠟꠣ।

ꠀꠟ-ꠝꠍꠤꠞ ꠟꠣꠡꠞ ꠙꠞꠤꠇ꠆ꠇꠣ

31ꠀꠎꠣꠖꠤ ꠁꠖꠞ ꠀꠉꠞ ꠖꠤꠘ ꠢꠎꠞꠔ ꠁꠍꠣꠄ ꠁꠘ꠆ꠔꠦꠇꠣꠟ ꠇꠞꠟꠣ। ꠛꠣꠖꠞ ꠖꠤꠘ ꠀꠍꠤꠟ ꠈꠣꠍ ꠙꠛꠤꠔ꠆ꠞ ꠄꠇ ꠎꠥꠝ꠆ꠝꠣꠛꠣꠞ। ꠄꠞꠟꠣꠉꠤ ꠁꠢꠥꠖꠤ ꠘꠦꠔꠣ ꠅꠇꠟꠦ ꠌꠣꠁꠟꠣ, ꠁ ꠖꠤꠘ ꠎꠣꠘꠥ ꠇꠥꠘꠥ ꠟꠣꠡ ꠍꠟꠤꠛꠞ ꠃꠙꠞꠦ ꠘꠣ ꠕꠣꠇꠦ। ꠅꠃ ꠔꠣꠞꠣ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠌꠣꠁꠟꠣ, ꠎꠣꠔꠦ ꠍꠟꠤꠛꠅ ꠎꠦꠞꠣ ꠀꠍꠦ, ꠔꠣꠞꠣ ꠎꠟꠖꠤ ꠝꠞꠣꠞ ꠟꠣꠉꠤ ꠔꠣꠞꠣꠞ ꠙꠣꠅ ꠜꠣꠋꠉꠤꠀ ꠍꠟꠤꠛ ꠕꠣꠇꠤ ꠟꠣꠝꠣꠘꠤ ꠅꠄ। 32ꠔꠦꠃ ꠁꠍꠣꠞ ꠟꠉꠦ ꠎꠦꠞꠣꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠍꠤꠙꠣꠁ ꠅꠇꠟꠦ ꠄꠞꠣ ꠖꠥꠁꠅꠎꠘꠞ ꠙꠣꠅ ꠜꠣꠋꠉꠤ ꠖꠤꠟ। 33ꠔꠣꠞꠣ ꠁꠍꠣꠞ ꠉꠦꠍꠦ ꠀꠁꠀ ꠖꠦꠈꠟ, ꠔꠣꠁꠘ ꠝꠣꠞꠣ ꠉꠦꠍꠂꠘ, ꠄꠞꠟꠣꠉꠤ ꠔꠣꠘ ꠙꠣꠅ ꠜꠣꠋꠟ ꠘꠣ। 34ꠅꠁꠟꠦ ꠄꠇ ꠍꠤꠙꠣꠁꠄ ꠍꠥꠟꠚꠤ ꠖꠤꠀ ꠔꠣꠘ ꠙꠣꠔ꠆ꠔꠤ-ꠀꠠꠞ ꠝꠣꠎꠦꠖꠤ ꠚꠣꠠ ꠝꠣꠞꠟ, ꠚꠣꠠꠞ ꠟꠉꠦ ꠟꠃ ꠀꠞ ꠙꠣꠘꠤ ꠛꠣꠞ ꠅꠁꠀ ꠀꠁꠟ। 35ꠎꠦ ꠎꠘꠦ ꠘꠤꠎꠞ ꠌꠃꠈꠦ ꠁ ꠊꠐꠘꠣ ꠖꠦꠈꠍꠂꠘ, ꠔꠣꠁꠘꠃ ꠡꠣꠇ꠆ꠇꠤ ꠖꠤꠍꠂꠘ ꠀꠞ ꠔꠣꠘ ꠡꠣꠇ꠆ꠇꠤ ꠢꠣꠍꠣ। ꠔꠣꠁꠘ ꠎꠣꠘꠂꠘ, ꠔꠣꠁꠘ ꠎꠦꠔꠣ ꠇꠁꠞꠣ ꠁꠔꠣ ꠢꠣꠍꠣ, ꠎꠣꠔꠦ ꠔꠥꠝꠞꠣꠅ ꠄꠇꠤꠘ ꠇꠞ।

36ꠁꠔꠣ ꠅꠁꠍꠤꠟ ꠎꠣꠔꠦ ꠙꠣꠇ ꠇꠤꠔꠣꠛꠞ ꠅꠃ ꠇꠕꠣ ꠙꠥꠞꠣ ꠅꠄ, ꠇꠤꠔꠣꠛꠅ ꠀꠍꠦ, ‘ꠔꠣꠘ ꠄꠇꠐꠣ ꠀꠒ꠆ꠒꠤꠅ ꠜꠣꠋꠉꠣ ꠅꠁꠔ ꠘꠣꠄ।’ 37ꠄꠅꠈꠣꠘ ꠀꠍꠦ, ‘ꠎꠣꠞꠣ ꠔꠣꠘꠞꠦ ꠉꠣꠕꠤꠍꠦ, ꠔꠣꠞꠣ ꠔꠣꠘ ꠛꠣꠄ ꠌꠣꠁ ꠞꠁꠛ।’

ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠖꠣꠚꠘ

38ꠁꠔꠣ ꠊꠐꠘꠣꠞ ꠛꠣꠖꠦ ꠀꠞꠤꠝꠣꠕꠤꠀ ꠉꠣꠃꠞ ꠁꠃꠍꠥꠚꠦ ꠁꠍꠣꠞ ꠟꠣꠡ ꠘꠤꠔꠣ ꠇꠞꠤ ꠢꠣꠇꠤꠝ ꠙꠤꠟꠣꠔꠞ ꠅꠘꠥꠝꠔꠤ ꠌꠣꠁꠟꠣ। ꠁꠃꠍꠥꠚ ꠀꠍꠟꠣ ꠁꠍꠣꠞ ꠄꠇꠎꠘ ꠟꠥꠇꠣꠁꠟ ꠃꠝ꠆ꠝꠔ, ꠇꠣꠞꠘ ꠔꠣꠁꠘ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠒꠞꠣꠁꠔꠣ। ꠙꠤꠟꠣꠔꠞ ꠅꠘꠥꠝꠔꠤ ꠙꠣꠁꠀ ꠔꠣꠁꠘ ꠁꠍꠣꠞ ꠟꠣꠡ ꠘꠤꠟꠣ। 39ꠀꠉꠦ ꠞꠣꠁꠔꠞ ꠛꠣꠟꠣ ꠎꠦꠁꠘ ꠁꠍꠣꠞ ꠉꠦꠍꠦ ꠀꠁꠍꠟꠣ, ꠢꠃ ꠘꠤꠇꠖꠤꠝꠦꠅ ꠝꠥꠞꠣ-ꠀꠔꠞ ꠀꠞ ꠅꠉꠥꠞꠥ ꠝꠤꠡꠣꠁꠀ ꠅꠘꠥꠝꠣꠘ ꠄꠇ ꠝꠘ ꠈꠥꠡꠛꠄ ꠝꠡꠟꠣ ꠟꠁꠀ ꠀꠁꠟꠣ। 40ꠀꠞ ꠁꠍꠣꠞ ꠟꠣꠡ ꠘꠤꠀ ꠁꠢꠥꠖꠤ ꠅꠇꠟꠞ ꠘꠤꠅꠝ ꠝꠣꠚꠤꠇ ꠅꠃ ꠈꠥꠡꠛꠄ ꠀꠟꠣ ꠝꠡꠟꠣ ꠝꠣꠈꠣꠁꠀ ꠇꠣꠚꠘ ꠚꠤꠘ꠆ꠖꠣꠁꠟꠣ।

41ꠁꠍꠣꠞꠦ ꠎꠦꠈꠣꠘꠅ ꠍꠟꠤꠛꠅ ꠉꠣꠕꠣ ꠅꠁꠍꠤꠟ, ꠢꠘꠅ ꠄꠇ ꠛꠣꠉꠣꠘꠞ ꠜꠤꠔꠞꠦ ꠙꠣꠠꠞ ꠉꠥꠢꠣꠞ ꠝꠣꠎꠦ ꠘꠄꠀ ꠄꠇꠐꠣ ꠇꠄꠛꠞ ꠈꠥꠖꠤꠀ ꠞꠣꠈꠣ ꠀꠍꠤꠟ। ꠁ ꠇꠄꠛꠞꠅ ꠇꠦꠃꠞꠞꠦ ꠖꠣꠚꠘ ꠇꠞꠣ ꠅꠁꠍꠦ ꠘꠣ। 42ꠅꠃ ꠖꠤꠘ ꠁꠢꠥꠖꠤ ꠅꠇꠟꠞ ꠁꠖꠞ ꠀꠉꠞ ꠖꠤꠘ ꠅꠀꠄ ꠀꠞ ꠇꠄꠛꠞꠐꠣꠅ ꠇꠣꠘ꠆ꠖꠣꠔ ꠕꠣꠇꠣꠄ, ꠔꠣꠞꠣ ꠔꠣꠠꠣ-ꠃꠠꠣ ꠇꠞꠤ ꠁꠍꠣꠞꠦ ꠅꠘꠅꠃ ꠖꠣꠚꠘ ꠇꠞꠟꠣ।

Currently Selected:

ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 19: sylN

Highlight

Copy