ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 12
12
ꠢꠎꠞꠔ ꠁꠀꠇꠥꠛꠞꠦ ꠎꠣꠘꠦ ꠝꠣꠞꠣ ꠀꠞ ꠙꠤꠔꠞꠞ ꠈꠣꠟꠣꠍ
1ꠢꠤ ꠡꠝꠄ ꠞꠣꠎꠣ ꠢꠦꠞꠥꠖꠦ ꠎꠝꠣꠔꠞ ꠇꠄꠎꠘ ꠝꠣꠘꠡꠞꠦ ꠗꠞꠣꠁ ꠀꠘꠤꠀ ꠎꠥꠟꠥꠝ ꠇꠞꠟꠣ। 2ꠔꠣꠁꠘ ꠢꠣꠘ꠆ꠘꠣꠘꠞ ꠜꠣꠁ ꠁꠀꠇꠥꠛꠞꠦ ꠔꠟꠥꠀꠞ ꠖꠤꠀ ꠇꠣꠐꠤꠟꠤꠟꠣ। 3ꠄꠞꠟꠣꠉꠤ ꠁꠢꠥꠖꠤ ꠅꠇꠟ ꠈꠥꠡꠤ ꠅꠁꠍꠂꠘ ꠖꠦꠈꠤꠀ, ꠔꠣꠁꠘ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖꠞ ꠅꠇ꠆ꠔꠅ ꠙꠤꠔꠞꠞꠦꠅ ꠀꠐꠇ ꠇꠞꠟꠣ। 4ꠀꠞ ꠔꠣꠘꠞꠦ ꠎꠦꠟꠅ ꠢꠣꠞꠣꠁꠟꠣ, ꠎꠦꠟꠅ-ꠅ ꠙꠣꠢꠣꠞꠣ ꠖꠦꠅꠀꠞ ꠟꠣꠉꠤ ꠌꠣꠁꠞ ꠎꠘ ꠇꠞꠤ, ꠌꠣꠁꠞ ꠖꠟ ꠍꠤꠙꠣꠁꠞꠦ ꠢꠥꠇꠥꠝ ꠖꠤꠟꠣ। ꠢꠦꠞꠥꠖꠞ ꠘꠤꠅꠔ ꠀꠍꠤꠟ ꠀꠎꠣꠖꠤ ꠁꠖꠞ ꠛꠣꠖꠦ ꠙꠤꠔꠞꠞꠦ ꠝꠣꠘꠡꠞ ꠍꠣꠝꠘꠦ ꠛꠣꠞ ꠇꠞꠤ ꠛꠤꠌꠣꠞ ꠇꠞꠛꠣ। 5ꠙꠤꠔꠞ ꠎꠦꠟ ꠈꠣꠘꠣꠔ ꠛꠘ꠆ꠖꠤ ꠞꠁꠟꠣ, ꠅꠁꠟꠦ ꠎꠝꠣꠔꠞ ꠝꠣꠘꠡꠦ ꠙꠤꠔꠞꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠣꠔ ꠞꠁꠟꠣ।
6ꠛꠤꠌꠣꠞꠞ ꠟꠣꠉꠤ ꠎꠦꠖꠤꠘ ꠙꠤꠔꠞꠞꠦ ꠛꠣꠞꠦ ꠀꠘꠣꠁꠔꠣ, ꠄꠞ ꠀꠉꠞ ꠞꠣꠁꠔ ꠔꠣꠁꠘ ꠖꠥꠁꠎꠘ ꠍꠤꠙꠣꠁꠞ ꠝꠣꠎꠈꠣꠘꠅ ꠖꠥꠁꠉꠦꠍꠣ ꠌꠦꠁꠘꠖꠤ ꠛꠣꠘ꠆ꠖꠣ ꠢꠣꠟꠔꠦ ꠊꠥꠝꠅ ꠀꠍꠟꠣ, ꠀꠞ ꠛꠣꠞꠦ ꠍꠤꠙꠣꠁ ꠅꠇꠟꠦ ꠖꠥꠀꠞꠅ ꠙꠣꠢꠣꠞꠣ ꠖꠤꠞꠣ। 7ꠅꠝꠘ ꠡꠝꠄ ꠀꠈꠔꠣꠃ ꠝꠣꠛꠥꠖꠞ ꠄꠇꠎꠘ ꠚꠤꠞꠤꠡ꠆ꠔꠣ ꠢꠘꠅ ꠀꠁꠀ ꠃꠛꠣꠁꠟꠣ, ꠀꠞ ꠎꠦꠟꠞ ꠜꠤꠔꠞ ꠚꠞ ꠅꠁꠉꠦꠟ। ꠚꠤꠞꠤꠡ꠆ꠔꠣꠄ ꠙꠤꠔꠞꠞ ꠉꠔꠞꠅ ꠑꠦꠟꠣ ꠖꠤꠀ ꠔꠣꠘꠞꠦ ꠢꠎꠣꠉ ꠇꠞꠤ ꠇꠁꠟꠣ, “ꠎꠟꠖꠤ ꠃꠑꠅ!” ꠔꠦꠃ ꠙꠤꠔꠞꠞ ꠖꠥꠁꠅ ꠀꠔ ꠕꠣꠇꠤ ꠌꠦꠁꠘ ꠈꠥꠟꠤꠀ ꠙꠠꠤꠉꠦꠟ। 8ꠛꠣꠖꠦ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠇꠝꠞꠅ ꠇꠣꠙꠠ ꠚꠤꠘ꠆ꠖꠅ ꠀꠞ ꠎꠥꠔꠣ ꠙꠣꠅꠔ ꠖꠦꠅ।” ꠔꠣꠁꠘ ꠅꠃꠟꠣ ꠇꠞꠟꠣ। ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠔꠥꠝꠣꠞ ꠌꠣꠖ꠆ꠖꠞ ꠉꠔꠞꠅ ꠖꠤꠀ ꠀꠝꠣꠞ ꠈꠞꠦ ꠈꠞꠦ ꠀꠅ।” 9ꠙꠤꠔꠞ ꠚꠤꠞꠤꠡ꠆ꠔꠣꠞ ꠈꠞꠦ ꠈꠞꠦ ꠎꠦꠟꠈꠣꠘꠣ ꠕꠣꠇꠤ ꠛꠣꠞ ꠅꠁ ꠀꠁꠟꠣ, ꠅꠁꠟꠦ ꠚꠤꠞꠤꠡ꠆ꠔꠣꠄ ꠎꠦꠔꠣ ꠇꠞꠟꠣ, ꠁꠔꠣ ꠎꠦꠘ ꠢꠣꠍꠣꠞꠞꠃ ꠅꠞ, ꠁꠔꠣ ꠇꠥꠘ꠆ꠔꠣꠃ ꠙꠤꠔꠞꠦ ꠛꠥꠎꠔꠣ ꠙꠣꠞꠟꠣ ꠘꠣ, ꠔꠣꠁꠘ ꠝꠘꠅ ꠇꠞꠟꠣ ꠁꠔꠣ ꠇꠥꠘꠥ ꠖꠞꠡꠘ ꠖꠦꠈꠞꠣ। 10ꠔꠣꠞꠣ ꠙꠄꠟꠣ ꠀꠞ ꠖꠥꠁ ꠘꠝ꠆ꠛꠞ ꠙꠣꠞꠣꠖꠣꠞꠞ ꠖꠟꠞꠦ ꠙꠣꠞ ꠅꠁꠀ ꠎꠦꠛꠟꠣ ꠡꠢꠞꠅ ꠢꠣꠝꠣꠁꠛꠣꠞ ꠟꠥꠀꠞ ꠉꠦꠁꠐꠞ ꠉꠦꠍꠦ ꠀꠁꠟꠣ, ꠉꠦꠁꠐ ꠘꠤꠎꠦ ꠘꠤꠎꠦꠃ ꠈꠥꠟꠤꠉꠦꠟ। ꠔꠣꠞꠣ ꠛꠣꠞ ꠅꠁꠀ ꠄꠇ ꠉꠟ꠆ꠟꠤꠞ ꠢꠦꠡ ꠉꠣꠟꠣꠔ ꠀꠁꠀ ꠀꠎꠤꠟꠣ, ꠀꠞ ꠅꠃ ꠡꠝꠄ ꠚꠤꠞꠤꠡ꠆ꠔꠣ ꠙꠤꠔꠞꠞ ꠟꠉ ꠕꠣꠇꠤ ꠉꠦꠟꠣꠉꠤ। 11ꠔꠦꠃ ꠙꠤꠔꠞꠞ ꠢꠥꠡ ꠅꠁꠟ ꠀꠞ ꠔꠣꠁꠘ ꠇꠁꠟꠣ, “ꠅꠈꠘ ꠀꠝꠤ ꠢꠣꠍꠣꠞꠞꠃ ꠛꠥꠎꠟꠣꠝ ꠎꠦꠘ, ꠝꠣꠛꠥꠖꠦ ꠔꠣꠘ ꠚꠤꠞꠤꠡ꠆ꠔꠣꠞꠦ ꠙꠣꠑꠣꠁꠀ, ꠢꠦꠞꠥꠖꠞ ꠀꠔ ꠕꠣꠇꠤ ꠀꠞ ꠁꠢꠥꠖꠤ ꠅꠇꠟꠞ ꠛꠖ ꠈꠣꠁꠡ ꠕꠣꠇꠤ ꠀꠝꠣꠞꠦ ꠢꠦꠚꠣꠎꠔ ꠇꠞꠍꠂꠘ।” 12ꠔꠣꠁꠘ ꠝꠘꠦ ꠝꠘꠦ ꠁꠔꠣ ꠝꠣꠔꠤ ꠝꠣꠔꠤ ꠝꠞꠤꠅꠝꠞ ꠛꠣꠠꠤꠞ ꠝꠥꠈꠣ ꠉꠦꠟꠣ, ꠁ ꠝꠞꠤꠅꠝ ꠅꠁꠟꠣ ꠢꠣꠘ꠆ꠘꠣꠘ ꠃꠞꠚꠦ ꠝꠣꠞ꠆ꠇꠥꠍꠞ ꠝꠣ। ꠅꠘꠅ ꠛꠃꠔ ꠝꠣꠘꠥꠡ ꠖꠟꠣ ꠅꠁꠀ ꠖꠥꠀ ꠇꠞꠣꠔ ꠀꠍꠟꠣ। 13ꠙꠤꠔꠞꠦ ꠉꠦꠁꠐꠅ ꠑꠥꠇꠣ ꠝꠣꠞꠣꠞ ꠛꠣꠖꠦ ꠞꠥꠖꠣ ꠘꠣꠝꠞ ꠄꠇ ꠛꠣꠘ꠆ꠖꠤ ꠛꠦꠐꠤꠄ ꠉꠦꠁꠐ ꠈꠥꠟꠣꠔ ꠀꠁꠟ; 14ꠀꠞ ꠙꠤꠔꠞꠞ ꠉꠟꠣꠞ ꠡꠥꠞ ꠢꠥꠘꠤꠀ ꠈꠥꠡꠤꠄ ꠔꠣꠁ ꠉꠦꠁꠐ ꠘꠣ ꠈꠥꠟꠤꠀ ꠖꠃꠠꠤꠀ ꠉꠤꠀ ꠢꠇꠟꠞ ꠉꠦꠍꠦ ꠇꠁꠟ, “ꠙꠤꠔꠞ ꠀꠁꠀ ꠛꠣꠞꠦ ꠉꠦꠁꠐꠅ ꠃꠛꠣꠁ ꠞꠁꠍꠂꠘ।” 15ꠔꠣꠞꠣ ꠁꠔꠣ ꠢꠥꠘꠤꠀ ꠢꠤ ꠛꠦꠐꠤꠞꠦ ꠇꠁꠟꠣ, “ꠔꠥꠝꠣꠞ ꠝꠣꠕꠣ ꠈꠣꠞꠣꠙ ꠅꠁꠍꠦ ꠘꠤ?” ꠛꠦꠐꠤꠄ ꠔꠣꠞꠣꠞ ꠟꠉꠦ ꠘꠤꠀꠄ ꠇꠞꠤꠀ ꠇꠁꠟ, “ꠘꠣ, ꠢꠣꠍꠣꠃ ꠙꠤꠔꠞꠞ ꠉꠟꠣ ꠢꠥꠘꠍꠤ!” ꠔꠦꠃ ꠢꠇꠟꠦ ꠇꠁꠟꠣ, “ꠔꠦ ꠄꠁꠘ ꠝꠘꠦ ꠅꠄ ꠙꠤꠔꠞꠞ ꠍꠥꠞꠔꠦ ꠇꠥꠘꠥ ꠚꠤꠞꠤꠡ꠆ꠔꠣ।” 16ꠁꠛꠣꠄ ꠙꠤꠔꠞꠦ ꠉꠦꠁꠐꠅ ꠑꠥꠇꠣꠘꠤꠔ ꠞꠁꠟꠣ। ꠅꠃ ꠔꠣꠞꠣ ꠈꠥꠟꠤꠀ ꠙꠤꠔꠞꠞꠦ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠉꠦꠟꠣ। 17ꠙꠤꠔꠞꠦ ꠀꠔꠖꠤ ꠁꠡꠣꠞꠣ ꠖꠤꠟꠣ ꠔꠣꠞꠣꠞꠦ ꠘꠤꠞꠣꠁ ꠅꠀꠞ ꠟꠣꠉꠤ, ꠀꠞ ꠎꠦꠟꠈꠣꠘꠣ ꠕꠣꠇꠤ ꠝꠣꠛꠥꠖꠦ ꠇꠤꠟꠣ ꠔꠣꠘꠞꠦ ꠛꠣꠞ ꠇꠞꠤ ꠀꠘꠟꠣ, ꠅꠃꠔꠣ ꠢꠇꠟꠔꠣ ꠇꠁꠟꠣ। ꠛꠣꠖꠦ ꠔꠣꠁꠘ ꠇꠁꠟꠣ, “ꠁ ꠈꠛꠞꠈꠣꠘ ꠔꠥꠝꠞꠣ ꠁꠀꠇꠥꠛ ꠀꠞ ꠛꠣꠇꠤ ꠜꠣꠁꠀꠁꠘ꠆ꠔꠞꠦꠅ ꠎꠣꠘꠣꠁꠅ।” ꠢꠦꠡꠦ ꠔꠣꠁꠘ ꠅꠘ ꠕꠣꠇꠤ ꠛꠣꠞ ꠅꠁꠀ ꠀꠞꠇ ꠎꠣꠉꠣꠔ ꠉꠦꠟꠣꠉꠤ। 18ꠞꠣꠁꠔ ꠙꠥꠀꠘꠤꠞ ꠛꠣꠖꠦ ꠙꠤꠔꠞ ꠇꠥꠀꠁ ꠉꠦꠟꠣ, ꠁ ꠝꠣꠔ ꠟꠁꠀ ꠍꠤꠙꠣꠁ ꠅꠇꠟꠞ ꠝꠣꠎꠦ ꠃꠟꠥꠡ꠆ꠕꠟ ꠙꠠꠤꠉꠦꠟ। 19ꠢꠦꠞꠥꠖꠦ ꠔꠣꠘꠞꠦ ꠔꠥꠇꠣꠁꠀ ꠘꠣ ꠙꠣꠅꠀꠄ ꠙꠣꠞꠣꠖꠣꠞ ꠅꠇꠟꠞꠦ ꠎꠦꠞꠣ ꠇꠞꠟꠣ, ꠀꠞ ꠔꠣꠞꠣꠞꠦ ꠎꠣꠘꠦ ꠝꠣꠞꠣꠞ ꠢꠥꠇꠥꠝ ꠖꠤꠟꠣ, ꠛꠣꠖꠦ ꠢꠦꠞꠥꠖ ꠘꠤꠎꠦꠅ ꠄꠢꠥꠖꠤꠀ ꠍꠣꠠꠤꠀ ꠇꠄꠖꠤꠘꠞ ꠟꠣꠉꠤ ꠇꠂꠍꠞꠤꠀꠔ ꠉꠦꠟꠣꠉꠤ।
ꠞꠣꠎꠣ ꠢꠦꠞꠥꠖꠞ ꠟꠣꠘ꠆ꠘꠔꠤ ꠝꠃꠔ
20ꠢꠤ ꠡꠝꠄ ꠢꠦꠞꠥꠖꠦ ꠡꠥꠞ ꠀꠞ ꠍꠤꠖꠘꠞ ꠝꠣꠘꠡꠞ ꠃꠙꠞꠦ ꠈꠥꠛ ꠉꠥꠍꠣ ꠀꠍꠟꠣ। ꠅꠁꠟꠦ ꠞꠣꠎꠣ ꠢꠦꠞꠥꠖꠞ ꠖꠦꠡ ꠕꠣꠇꠤ ꠔꠣꠞꠣꠞ ꠖꠦꠡꠅ ꠈꠣꠘꠤꠞ ꠍꠣꠝꠣꠘꠣ ꠀꠁꠔ ꠇꠞꠤ, ꠢꠤꠘꠞ ꠢꠇꠟ ꠝꠣꠘꠡꠦ ꠄꠇꠟꠉꠦ ꠝꠤꠟꠤꠀ ꠢꠦꠞꠥꠖꠞ ꠉꠦꠍꠦ ꠀꠁꠟꠣ, ꠔꠣꠞꠣ ꠞꠣꠎꠣꠞ ꠢꠥꠔꠤꠛꠣꠞ ꠊꠞꠞ ꠛꠦꠟꠣꠡ꠆ꠔꠍ ꠘꠣꠝꠞ ꠄꠇ ꠛꠠ ꠉꠥꠟꠣꠝꠞꠦ ꠀꠔ ꠇꠞꠤꠀ ꠞꠣꠎꠣꠞ ꠟꠉꠦ ꠀꠙꠥꠡ ꠇꠞꠣꠔ ꠀꠁꠟꠣ। 21ꠀꠞ ꠢꠦꠞꠥꠖꠦ ꠄꠇ ꠖꠤꠘ ꠑꠤꠇ ꠇꠞꠤꠀ, ꠢꠤꠖꠤꠘ ꠔꠣꠘ ꠞꠣꠎ ꠟꠦꠛꠣꠍ ꠚꠤꠘ꠆ꠖꠤꠀ ꠡꠤꠋꠢꠣꠡꠘꠅ ꠛꠁꠀ ꠔꠣꠞꠣꠞ ꠍꠣꠝꠘꠦ ꠜꠣꠡꠘ ꠖꠦꠅꠀꠔ ꠀꠍꠟꠣ। 22ꠔꠣꠘ ꠇꠕꠣ ꠢꠥꠘꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟꠣ, “ꠁꠔꠣ ꠔ ꠝꠣꠘꠡꠞ ꠛꠥꠟꠤ ꠘꠣꠄ, ꠇꠥꠘꠥ ꠖꠦꠛꠔꠣꠞ ꠛꠥꠟꠤ!” 23ꠀꠞ ꠟꠉꠦ ꠟꠉꠦ ꠝꠣꠛꠥꠖꠞ ꠄꠇ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠝꠣꠞꠟꠣ, ꠇꠣꠞꠘ ꠢꠦꠞꠥꠖꠦ ꠀꠟ꠆ꠟꠣꠞ ꠁꠎ꠆ꠎꠔ ꠞꠣꠈꠟꠣ ꠘꠣ। ꠔꠦꠃ ꠇꠤꠞꠝꠤꠞ ꠈꠥꠞꠣꠇ ꠛꠘꠤꠀ ꠔꠣꠘ ꠖꠝ ꠛꠣꠞ ꠅꠁꠟ।
24ꠅꠁꠟꠦ ꠀꠟ꠆ꠟꠣꠞ ꠇꠣꠟꠣꠝ ꠢꠇꠟꠛꠣꠄ ꠀꠞꠅ ꠛꠦꠡꠤ ꠍꠤꠔ꠆ꠞꠤꠟ, ꠀꠞ ꠛꠃꠔ ꠝꠣꠘꠡꠦ ꠁꠝꠣꠘ ꠀꠘꠟꠣ। 25ꠁꠛꠣꠄ ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞ ꠔꠛꠟꠤꠉ ꠇꠣꠝ ꠡꠦꠡ ꠅꠀꠄ ꠔꠣꠞꠣ ꠢꠣꠘ꠆ꠘꠣꠘ ꠃꠞꠚꠦ ꠝꠣꠞ꠆ꠇꠥꠍꠞꠦ ꠟꠉꠦ ꠟꠁꠀ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠉꠦꠟꠣ।
Currently Selected:
ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 12: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
