ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 11

ꠎꠦꠞꠥꠎꠣꠟꠦꠝꠅ ꠢꠎꠞꠔ ꠙꠤꠔꠞ

1ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠀꠞ ꠄꠢꠥꠖꠤꠀ ꠎꠤꠟꠣꠞ ꠢꠇ꠆ꠇꠟ ꠝꠥꠝꠤꠘ ꠜꠣꠁꠀꠁꠘ꠆ꠔꠦ ꠢꠥꠘꠟꠣ, ꠅ-ꠁꠢꠥꠖꠤ ꠅꠇꠟꠦꠅ ꠀꠟ꠆ꠟꠣꠞ ꠇꠣꠟꠣꠝꠞ ꠃꠙꠞꠦ ꠁꠝꠣꠘ ꠀꠘꠍꠂꠘ। 2ꠄꠞꠟꠣꠉꠤ ꠙꠤꠔꠞ ꠎꠦꠛꠟꠣ ꠎꠦꠞꠥꠎꠣꠟꠦꠝꠅ ꠀꠁꠟꠣ, ꠁ ꠡꠝꠄ ꠝꠍꠟꠝꠣꠘꠤ ꠇꠞꠣꠁꠟ ꠁꠝꠣꠘꠖꠣꠞ ꠅꠇꠟꠦ ꠔꠣꠘꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠀ ꠇꠁꠟꠣ, 3“ꠀꠙꠘꠦ ꠔ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠝꠣꠘꠡꠞ ꠊꠞꠅ ꠢꠣꠝꠣꠁꠍꠂꠘ, ꠀꠞ ꠔꠣꠞꠣꠞ ꠟꠉꠦ ꠈꠣꠘꠣꠅ ꠈꠣꠁꠍꠂꠘ।” 4ꠔꠦꠃ ꠙꠤꠔꠞꠦ ꠙꠄꠟꠣ ꠕꠣꠇꠤ ꠎꠦꠔꠣ ꠎꠦꠔꠣ ꠊꠐꠍꠤꠟ, ꠔꠣꠞꠣꠞ ꠉꠦꠍꠦ ꠄꠇ ꠄꠇ ꠇꠞꠤ ꠛꠥꠎꠣꠁꠀ ꠇꠁꠟꠣ, 5“ꠀꠝꠤ ꠎꠣꠚꠣ ꠡꠢꠞꠅ ꠖꠥꠀ ꠇꠞꠣꠔ ꠀꠍꠟꠣꠝ, ꠅꠝꠘ ꠡꠝꠄ ꠙꠣꠇ ꠞꠥꠢꠥꠞ ꠖꠞꠡꠘ ꠙꠣꠁꠟꠣꠝ, ꠀꠝꠤ ꠖꠦꠈꠟꠣꠝ, ꠀꠍꠝꠣꠘ ꠕꠣꠇꠤ ꠛꠠ ꠌꠣꠖ꠆ꠖꠞꠞ ꠟꠣꠈꠣꠘ ꠄꠇꠈꠣꠘ ꠌꠤꠎꠞ ꠌꠣꠁꠞ ꠇꠥꠘꠣꠔ ꠗꠞꠤꠀ ꠀꠝꠣꠞ ꠉꠦꠍꠦ ꠟꠣꠝꠣꠁꠀ ꠖꠦꠅꠀ ꠅꠞ। 6ꠀꠝꠤ ꠗꠤꠀꠘ ꠗꠞꠤ ꠌꠣꠁꠀ ꠌꠤꠘ꠆ꠔꠣꠔ ꠙꠠꠤꠉꠦꠟꠣꠝ, ꠀꠞ ꠖꠦꠈꠟꠣꠝ, ꠄꠞ ꠝꠣꠎꠦ ꠢꠇꠟ ꠎꠣꠔꠞ ꠙꠡꠥ, ꠙꠣꠈꠤ, ꠎꠋꠟꠤ ꠎꠣꠘꠥꠀꠞ ꠀꠞ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠅꠇꠟ ꠀꠍꠂꠘ। 7ꠛꠣꠖꠦ ꠄꠇ ꠀꠅꠀꠎ ꠢꠥꠘꠟꠣꠝ, ꠙꠤꠔꠞ, ꠃꠑꠅ, ꠝꠣꠞꠤꠀ ꠈꠣꠅ। 8ꠀꠝꠤ ꠇꠁꠟꠣꠝ, ꠘꠣ, ꠘꠣ ꠝꠣꠟꠤꠇ, ꠇꠥꠘꠥꠝꠘ꠆ꠔꠦꠃ ꠘꠣ, ꠘꠣꠙꠣꠇ ꠛꠣ ꠢꠣꠞꠣꠝ ꠇꠥꠘ꠆ꠔꠣ ꠀꠝꠤ ꠇꠥꠘꠥꠖꠤꠘ ꠝꠥꠈꠅ ꠖꠤꠍꠤ ꠘꠣ। 9ꠛꠣꠖꠦ ꠖꠥꠍꠞꠣꠛꠣꠞ ꠀꠍꠝꠣꠘ ꠕꠣꠇꠤ ꠅꠃ ꠀꠅꠀꠎ ꠢꠥꠘꠟꠣꠝ, ꠀꠟ꠆ꠟꠣꠄ ꠎꠦꠔꠣ ꠢꠣꠟꠣꠟ ꠇꠞꠍꠂꠘ, ꠔꠥꠝꠤ ꠁꠔꠣꠞꠦ ꠢꠣꠞꠣꠝ ꠇꠁꠅ ꠘꠣ। 10ꠅꠃꠟꠣ ꠔꠤꠘꠛꠣꠞ ꠇꠅꠀꠞ ꠛꠣꠖꠦ ꠢꠇꠟꠔꠣ ꠀꠍꠝꠣꠘꠅ ꠔꠥꠟꠤ ꠘꠦꠅꠀ ꠅꠁꠟ। 11ꠀꠞ ꠄꠞ ꠟꠉꠦ ꠟꠉꠦꠃ, ꠀꠝꠤ ꠎꠦ ꠛꠣꠠꠤꠔ ꠀꠍꠟꠣꠝ ꠅꠃ ꠛꠣꠠꠤꠔ ꠀꠁꠀ ꠔꠤꠘꠎꠘ ꠝꠣꠘꠥꠡ ꠢꠣꠝꠣꠁꠟ, ꠔꠣꠞꠣꠞꠦ ꠇꠂꠍꠞꠤꠀ ꠕꠣꠇꠤ ꠙꠣꠑꠣꠁꠟ ꠅꠁꠍꠤꠟ। 12ꠔꠦꠃ ꠙꠣꠇ ꠞꠥꠢꠦ ꠀꠝꠣꠞꠦ ꠇꠁꠟꠣ, ꠇꠥꠘꠥ ꠡꠘ꠆ꠖꠄ ꠘꠣ ꠇꠞꠤꠀ ꠔꠣꠞꠣꠞ ꠟꠉꠦ ꠅꠁꠀ ꠎꠣꠅꠀꠞ ꠟꠣꠉꠤ। ꠀꠞ ꠅꠃ ꠍꠄꠎꠘ ꠜꠣꠁꠅ ꠀꠝꠣꠞ ꠟꠉꠦ ꠉꠦꠍꠟꠣ। ꠛꠣꠖꠦ ꠀꠝꠞꠣ ꠅꠃ ꠅ-ꠁꠢꠥꠖꠤꠞ ꠛꠣꠠꠤꠔ ꠢꠣꠝꠣꠁꠟꠣꠝ। 13ꠔꠣꠁꠘ ꠇꠤꠟꠣ ꠔꠣꠘ ꠛꠣꠠꠤꠔ ꠄꠇꠎꠘ ꠚꠤꠞꠤꠡ꠆ꠔꠣꠞ ꠖꠞꠡꠘ ꠙꠣꠁꠍꠟꠣ ꠁꠔꠣ ꠀꠝꠞꠣꠞꠦ ꠢꠥꠘꠣꠁꠟꠣ। ꠢꠃ ꠚꠤꠞꠤꠡ꠆ꠔꠣꠄ ꠔ ꠔꠣꠘꠞꠦ ꠇꠁꠍꠟꠣ, ꠍꠣꠁꠝꠘ ꠃꠞꠚꠦ ꠙꠤꠔꠞꠞꠦ ꠀꠘꠣꠞ ꠟꠣꠉꠤ ꠎꠣꠚꠣ ꠡꠢꠞꠅ ꠝꠣꠘꠥꠡ ꠙꠣꠑꠣꠅ। 14ꠢꠦ ꠔꠥꠝꠣꠞꠦ ꠅꠃꠟꠣ ꠘꠍꠤꠅꠔ ꠇꠞꠛ, ꠎꠦꠔꠣ ꠝꠣꠘꠤꠀ ꠔꠥꠝꠤ ꠀꠞ ꠔꠥꠝꠣꠞ ꠙꠞꠤꠛꠣꠞꠞ ꠢꠇꠟꠦ ꠘꠣꠎꠣꠔ ꠙꠣꠁꠛꠣꠄ। 15ꠀꠞ ꠀꠝꠤ ꠛꠄꠀꠘ ꠡꠥꠞꠥ ꠇꠞꠣꠞ ꠛꠣꠖꠦ, ꠙꠣꠇ ꠞꠥꠢꠥ ꠙꠄꠟꠣ ꠎꠦꠟꠣ ꠀꠝꠞꠣꠞ ꠃꠙꠞꠦ ꠀꠁꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠔꠣꠞꠣꠞ ꠃꠙꠞꠦꠅ ꠀꠁꠟꠣ। 16ꠅꠃꠉꠤ ꠀꠟ-ꠝꠍꠤꠞ ꠔꠣꠟꠤꠝ ꠀꠝꠣꠞ ꠝꠘꠅ ꠅꠁꠟ, ꠔꠣꠁꠘ ꠇꠁꠍꠟꠣ, ꠄꠢꠤꠀꠄ ꠔꠃꠛꠣꠞ ꠉꠥꠍꠟ ꠇꠞꠣꠁꠍꠂꠘ ꠙꠣꠘꠤꠔ, ꠀꠞ ꠔꠥꠝꠞꠣꠞ ꠉꠥꠍꠟ ꠅꠁꠛ ꠙꠣꠇ ꠞꠥꠢꠦ। 17ꠔꠦ ꠜꠣꠁ ꠅꠇꠟ, ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠀꠟ꠆ꠟꠣꠄ ꠀꠝꠞꠣꠞꠦ ꠎꠦꠟꠣ ꠖꠣꠘ ꠖꠤꠍꠂꠘ, ꠢꠃ ꠄꠇꠁ ꠖꠣꠘ ꠎꠦꠛꠟꠣ ꠔꠣꠞꠣꠞꠦꠅ ꠖꠤꠟꠣ, ꠔꠦ ꠀꠝꠤ ꠀꠞꠇ ꠎꠘ ꠇꠦ, ꠀꠟ꠆ꠟꠣꠞꠦ ꠘꠣ ꠇꠞꠔꠣꠝ?” 18ꠁꠈꠣꠘ ꠢꠥꠘꠣꠞ ꠛꠣꠖꠦ ꠄꠢꠥꠖꠤꠀꠞ ꠁꠝꠣꠘꠖꠣꠞ ꠅꠇꠟꠦ ꠀꠞ ꠇꠥꠘꠥ ꠀꠙꠔ꠆ꠔꠤ ꠘꠣ ꠇꠞꠤꠀ, ꠀꠟ꠆ꠟꠣꠞ ꠔꠣꠞꠤꠚ ꠇꠞꠣ ꠗꠞꠟꠣ, ꠔꠣꠞꠣ ꠇꠁꠟꠣ, “ꠔꠦ ꠀꠟ꠆ꠟꠣꠄ ꠅ-ꠁꠢꠥꠖꠤ ꠅꠇꠟꠞꠦꠅ ꠉꠥꠘꠣ ꠕꠣꠇꠤ ꠝꠘ ꠛꠖꠟꠣꠁꠀ, ꠎꠤꠘ꠆ꠖꠦꠉꠤ ꠙꠣꠅꠀꠞ ꠔꠚꠤꠇ ꠖꠤꠍꠂꠘ।”

ꠀꠘ꠆ꠔꠤꠅꠈꠤꠀꠔ ꠙꠄꠟꠣ ꠁꠍꠣꠄꠁ ꠃꠙꠣꠗꠤ

19ꠡ꠆ꠔꠤꠚꠣꠘꠞ ꠝꠃꠔꠞ ꠊꠐꠘꠣꠞ ꠛꠣꠖꠦ ꠎꠦꠔꠣ ꠁꠝꠣꠘꠖꠣꠞ ꠅꠇꠟ ꠎꠥꠟꠥꠝꠞ ꠟꠣꠉꠤ ꠍꠤꠔ꠆ꠞꠤ ꠉꠦꠍꠟꠣ, ꠔꠣꠞꠣ ꠚꠂꠘꠤꠇꠤꠀ, ꠍꠣꠁꠙ꠆ꠞꠣꠍ ꠀꠞ ꠀꠘ꠆ꠔꠤꠅꠈꠤꠀ ꠙꠞ꠆ꠎꠘ꠆ꠔ ꠉꠤꠀ ꠈꠣꠟꠤ ꠁꠢꠥꠖꠤ ꠅꠇꠟꠞ ꠉꠦꠍꠦ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠟꠣ। 20ꠅꠁꠟꠦ ꠄꠞꠣꠞ ꠝꠣꠎꠦ ꠇꠄꠎꠘ ꠀꠍꠟꠣ ꠍꠣꠁꠙ꠆ꠞꠣꠍ ꠖꠤꠙ ꠀꠞ ꠇꠥꠞꠤꠘꠤ ꠄꠟꠣꠇꠣꠞ ꠝꠣꠘꠥꠡ, ꠄꠞꠣ ꠀꠘ꠆ꠔꠤꠅꠈꠤꠀꠔ ꠉꠤꠀ ꠁꠃꠘꠣꠘꠤ ꠅꠇꠟꠞ ꠉꠦꠍꠦꠅ ꠢꠎꠞꠔ ꠁꠍꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ। 21ꠀꠞ ꠀꠟ꠆ꠟꠣꠄ ꠔꠣꠘ ꠇꠥꠖꠞꠔꠤ ꠛꠟꠦ ꠔꠣꠞꠣꠞꠦ ꠡꠣꠁꠎ꠆ꠎ ꠇꠞꠟꠣ, ꠔꠦꠃ ꠛꠃꠔ ꠝꠣꠘꠥꠡ ꠁꠝꠣꠘ ꠀꠘꠤꠀ ꠔꠣꠘ ꠝꠥꠈꠤ ꠅꠁꠟꠣ। 22ꠁ ꠈꠛꠞ ꠎꠦꠞꠥꠎꠣꠟꠦꠝ ꠎꠝꠣꠔꠞ ꠝꠥꠝꠤꠘ ꠅꠇꠟꠞ ꠇꠣꠘꠅ ꠀꠁꠟ, ꠈꠛꠞ ꠢꠥꠘꠤꠀ ꠔꠣꠞꠣ ꠛꠣꠞ꠆ꠘꠣꠛꠣꠍꠞꠦ ꠀꠘ꠆ꠔꠤꠅꠈꠤꠀꠔ ꠙꠣꠑꠣꠁꠟꠣ। 23ꠔꠣꠁꠘ ꠢꠘꠅ ꠙꠃꠍꠤꠀ ꠀꠘ꠆ꠔꠤꠅꠈꠤꠀꠔ ꠀꠟ꠆ꠟꠣꠞ ꠝꠦꠢꠦꠞꠛꠣꠘꠤ ꠖꠦꠈꠤꠀ ꠈꠥꠛ ꠈꠥꠡꠤ ꠅꠁꠟꠣ, ꠀꠞ ꠝꠣꠘꠡꠞꠦ ꠀꠡꠣ ꠖꠤꠔꠣ ꠕꠣꠇꠟꠣ, ꠎꠣꠔꠦ ꠔꠣꠞꠣ ꠖꠤꠟꠦ-ꠎꠣꠘꠦ ꠝꠣꠟꠤꠇꠞ ꠘꠣꠝꠦ ꠁꠝꠣꠘꠦ ꠝꠎꠛꠥꠔ ꠞꠂꠘ। 24ꠛꠣꠞ꠆ꠘꠣꠛꠣꠍ ꠄꠇꠎꠘ ꠢꠇ ꠝꠣꠘꠥꠡ, ꠔꠣꠁꠘ ꠙꠣꠇ ꠞꠥꠢꠥ ꠀꠞ ꠁꠝꠣꠘꠦ ꠇꠣꠝꠤꠟ ꠀꠍꠟꠣ। ꠀꠞ ꠛꠃꠔ ꠝꠣꠘꠥꠡ ꠝꠣꠟꠤꠇꠞ ꠝꠥꠈꠤ ꠚꠤꠞꠤꠀ ꠀꠁꠍꠤꠟ। 25ꠛꠣꠖꠦ ꠛꠣꠞ꠆ꠘꠣꠛꠣꠍ ꠡꠃꠟꠞ ꠔꠣꠟ꠆ꠟꠣꠡꠦ ꠔꠣꠞ꠆ꠡ ꠐꠣꠃꠘꠅ ꠉꠦꠟꠣ, 26ꠀꠞ ꠔꠣꠘꠞꠦ ꠙꠣꠁꠀ ꠀꠘ꠆ꠔꠤꠅꠈꠤꠀꠔ ꠟꠁꠀ ꠀꠁꠟꠣ। ꠛꠣꠞ꠆ꠘꠣꠛꠣꠍ ꠀꠞ ꠡꠃꠟ ꠙꠥꠞꠣ ꠄꠇ ꠛꠞꠍ ꠢꠘꠅ ꠎꠝꠣꠔꠞ ꠟꠉꠦ ꠝꠤꠟꠤꠀ ꠛꠃꠔ ꠝꠣꠘꠡꠞꠦ ꠔꠣꠟꠤꠝ ꠖꠤꠟꠣ। ꠅꠃ ꠀꠘ꠆ꠔꠤꠅꠈꠤꠀꠔꠃ ꠀꠟ-ꠝꠍꠤꠞ ꠃꠝ꠆ꠝꠔ ꠅꠇꠟꠞꠦ ꠙꠄꠟꠣ ꠁꠍꠣꠄꠁ ꠘꠣꠝꠦ ꠒꠣꠇꠣ ꠅꠁꠟ। 27ꠅꠃ ꠡꠝꠄ ꠇꠄꠎꠘ ꠘꠛꠤ ꠎꠦꠞꠥꠎꠣꠟꠦꠝ ꠕꠣꠇꠤ ꠀꠘ꠆ꠔꠤꠅꠈꠤꠀꠔ ꠀꠁꠟꠣ। 28ꠄꠞꠣꠞ ꠝꠣꠎꠦ ꠀꠉꠣꠛꠥꠍ ꠘꠣꠝꠞ ꠄꠇ ꠘꠛꠤꠄ ꠙꠣꠇ ꠞꠥꠢꠥꠞ ꠎꠞꠤꠀꠄ ꠈꠣꠠꠣ ꠅꠁꠀ ꠇꠁꠟꠣ, ꠀꠡ꠆ꠔꠣ ꠖꠥꠘꠤꠀꠁ ꠎꠥꠠꠤꠀ ꠄꠇ ꠛꠦꠎꠥꠁꠔꠣ ꠘꠤꠖꠣꠘ ꠖꠦꠈꠣ ꠖꠤꠛ; ꠛꠣꠖꠡꠣ ꠇꠦꠟꠣꠖꠥꠍꠞ ꠞꠣꠎꠔ꠆ꠔꠞ ꠇꠣꠟꠅ ꠁꠈꠣꠘ ꠙꠥꠞꠣ ꠅꠁꠟ। 29ꠄꠞꠟꠣꠉꠤ ꠝꠥꠝꠤꠘ ꠅꠇꠟꠦ ꠘꠤꠅꠔ ꠇꠞꠟꠣ, ꠄꠢꠥꠖꠤꠀ ꠎꠤꠟꠣꠞ ꠁꠝꠣꠘꠖꠣꠞ ꠅꠇꠟꠞ ꠈꠦꠎꠝꠔꠞ ꠟꠣꠉꠤ, ꠔꠣꠞꠣ ꠎꠣꠞꠎꠤꠞ ꠈꠦꠝꠔꠣ ꠝꠣꠚꠤꠇ ꠡꠣꠁꠎ꠆ꠎ ꠙꠣꠑꠣꠁꠔꠣ। 30ꠀꠞ ꠘꠤꠅꠔ ꠝꠣꠚꠤꠇ ꠇꠣꠝꠅ ꠔꠣꠞꠣ ꠇꠞꠟꠣ, ꠔꠣꠞꠣ ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞ ꠀꠔꠣꠘꠦ ꠄꠢꠥꠖꠤꠀꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠡꠣꠁꠎ꠆ꠎ ꠙꠣꠑꠣꠁꠟꠣ।

Currently Selected:

ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 11: sylN

Highlight

Copy