Taeka n Rabakau 7
7
Nanobaban te Aki Kakaonimaki
1Natiu, ongora raoi
ao tai m'am'aninga
te b'ai ae I tuangko b'a ko na karaoia.
2Ongotaeka irou, ao ko na maiu!
kariki au taeka n reirei b'a kaanga
kaub'aim aika a rangi n kakannato.
3Kaawakin i aon tabonibaim
ao koroi
i nanom.
4Karika te wanawana b'a kaanga m'anem
ao karika te iangoraoi
b'a kaanga raoraom ae ko rangi n i tangitangiri ma ngaia.
5A na bon kaawakiniko
man ana taeka ni karang
buun temanna.
6I karina n nooria
tabem'aang rorobuaka
7aika a nanobaba man wintoon au auti.
8E a bon rangi n tairaa
ao n tabetai ngke e a tib'a roo.
9E rairaki nakon te koona
temanna mai buakoia rorobuaka aikai
ao e nakonako i rarikin ana auti
te buu are e aki kakaonimaki.
10E kunnikainna n te kunnikai ae e tamaroa
kaanga ainen mataawa
ma ana kaantaninga ae ti teuana i nanona.
11Bon temanna ngaia mai buakoia aine
aika a mautakarara man aki rau
ao a aki konaa n tiku ni mwengaia,
12aika a nooraki ni kawain nako te kaawa,
ni kaakaraniia m'aane.
13E rawea te m'aane ao e kiiti ma ngaia,
ao bon akea mamaana naba teutana,
ao e taku:
14“N na anga au karea
ao e rangi ni m'aiti nikiran te iriko ni man
i bukin te baka n am'arake.
15Ma ngaia ae, I roko b'a n na kakaaeko
ao ngaia ko mena ikai!
16Taian rabuna ni kainiwene i aon te kainiwene
bon taiani kunnikai aika a matamata
mai Aikubita.
17Ao I a tia ni
kaboiararai ni boiarara
aika a karaoaki man te muura
te aroe, ao te tineman.
18“Ti a nako ikekei
b'a ti na kareke tangira ni kangainaa.
19Are e m'ananga nako buu
ao e a rangi n raroa nako.
20E uoti ana m'ane aika a m'aiti,
ao e aki konaa ni waekoa n okira te auti
i m'aain nuukan
te nam'akaina.”
21Ai ngaia are, e kam'anea teuarei
n ana taeka aika a karewerewe ni kabane
ao ana taeka ni karang.
22Ao e iria nako teuarei
kaanga te kaom'aane
ae kairaki nakon te tiringaki,
ke kaanga ai aron te nanobaba ae e kairaki
nakon te katuaaeaki #7.22 kaanga te nanobaba... katuaaeaki: Teuana mai buakon nanon te taeka n Ebera ae e matoatoa.
23ao e tiringaki n taian kanoanikatebe.
Ti te bo arona ma te mannikiba
ae kawaekoaa nakon te kainikab'aru,
ma n aki ataia
b'a e na kabuanib'ai maiuna iai.
24Natiu te m'aane, kakauongo raoi
nakon te b'ai ae I taekinna.
25Ko na bon aki katabea nanom
iroun te aine ae aron anne
ke n anga ngkoe b'a ko na kam'aneaki
iroun te aine ae ai arona.
26E a tia te aine anne ni karika
te b'aka rikaaki ao te mate
nakoia m'aane aika a m'aiti.
27Ana auti bon te kawai teaina
ae e kaineti rikaaki
nakon aia aonnaba maate.
Currently Selected:
Taeka n Rabakau 7: KNVB
Highlight
Share
Copy
Want to have your highlights saved across all your devices? Sign up or sign in
