Maarko 6

Ũtũbũrĩt eeta Yeesu Naaꞌtharẽta

(Tigiil Maatteeo 13:53-58; ꞌLuuka 4:16-30)

1Ma baa ũtũngteek Yeesu hĩ nuyyiook cĩgĩnnĩg nĩngĩtĩ niccia, iita oboddiõõthĩ nẽẽg ꞌtaaũnaa cĩ õlõ cĩnĩĩng Naaꞌtharẽta. 2Ma Kõr cĩ ꞌYiommaanõ, iꞌthianaaĩ nẽẽ ũũk illiman eet ꞌCieethaa cĩ Laiitto. Baa abulan thõõth ꞌcĩ alliman nẽẽ ho eet ꞌcĩg mẽẽlĩg gẽrrẽẽt, baa ĩthĩhĩt ĩnõõnnõ. Nẽ othoothito ẽmmẽn ĩĩtõ, “Ammũda baa ẽẽtĩ ciee ꞌgẽẽnyĩth icci vẽlẽk ĩĩna? ꞌGẽẽnyĩth baa ꞌcĩ aaĩ hutuno ꞌcĩ aaꞌnyĩhoothĩk ĩnõõnnõ ho? Nẽ adtican nẽẽ thooꞌthiok ꞌcĩg ĩnaat eeta ho hutuno? 3Hõllõngaa nooyyia ĩĩn nẽẽ ngeertĩ toddoyyioohit Yothebo nẽ ĩĩ aattĩnnĩ Maria? ꞌGõtõnĩ ꞌJeemithi hĩ Yothebo hĩ ꞌJuuda hĩ ꞌThimõõnẽ? Hõllõngaa nooyyia harũmĩ naag hĩ ngõõnõgĩ ngaati thõng?” Nẽ baa ittiha nẽẽ ꞌgẽẽnyĩth icci aaĩ hoti ho ĩĩna?

4Nĩngĩtĩ annẽẽkĩ Yeesu ĩhõõggõ, “Itieelli eeta põrõvẽtaac loonyini vẽlẽk nẽ ũtũbũrĩt looccaa cĩnnĩ hĩ ittioonniohĩĩ cĩgĩnnĩg hĩ eet ꞌcĩg õlõ cĩnĩĩng.” 5Baa hõllõngaa adtican Yeesu thooꞌthiok ꞌcĩg ĩnaat eeta nĩngaata, nẽẽthĩ nẽẽꞌthẽk, baa ataadĩk athĩn cĩgĩnnĩg eetini ũgẽẽgĩ ꞌcĩg baag abadtẽc ꞌcĩg õmmõõrĩ nẽ aaꞌnyĩk ĩhõõggõ hũbũttaathõ. 6Nẽ baa aꞌngalĩlĩ nẽẽ gẽrrẽẽt, hĩnĩngĩtĩ thõõth ꞌcĩ hõllõngaa aꞌnyahĩ eeta lemiinit.

Ĩꞌthõ Yeesu nuyyiook õmmõtõ hĩ ꞌramma

(Tigiil Maatteeo 10:5-15; ꞌLuuka 9:1-6)

Nĩngĩtĩ õvvõõĩ Yeesu olooyyiohĩ vẽlẽk allimanĩ eeta. 7Ma nĩngaata, ikia ũtũvvũ nẽẽ ꞌthooyyiak cĩgĩnnĩg õmmõtõ hĩ ꞌramma nẽ ĩꞌthõ ĩhõõggõ hõõt hĩ ꞌramma hĩ ꞌramma nẽ aaꞌnyĩk ꞌtirriani ꞌcĩ õõ iiggiaĩ loriẽẽt ꞌcĩg abathĩ. 8Baa aduhaak nẽẽ ꞌthooyyiak cĩgĩnnĩg anneek, “Ma haꞌnyaku ꞌgiimwa hẽẽrõna cunuung ko, aꞌnyahit hĩbahĩꞌnya cĩg tohomiittak diooni, ma haꞌnyaku ꞌgẽẽn hode ꞌrabbẽẽt hode locoburo ꞌcĩ aꞌnyaku ꞌgiimwa. 9Itihimit caawa diooni, ma haꞌnyaku ceremwa ꞌramma. 10Ma uduhuttu õlõ umwa ngaatĩ elemmuung eeta, aallattia õlõõ tĩho ĩꞌthõng hõdõlan kõrra ꞌcĩ uunniku õlõ tĩho. 11Nẽ má hõllõngaa elemmuung eeta õlõõ ꞌcĩ uppwannothoothiku ho nẽ hõllõngaa athiknuunga, ũtũngteek eet nicciag nẽ utuddungteehu tuduhaac cĩ ꞌthoo cugguung nĩngaata, hátĩ hĩĩ terethiinit cĩ bathi cĩnĩĩng.”

12Ma ho, ĩtĩngaacõ ꞌthooyyiaha nẽ õõt illimanit eet ꞌgõõl ꞌcĩ ũũnnĩkĩ ꞌthẽccanẽẽt cĩggĩĩng, 13nẽ õõt itiggiaacõ loriẽẽt ꞌcĩg abathĩ eleetinii cĩg eet ꞌcĩg mẽẽlĩg nẽ ĩnĩĩbĩtõ eet ꞌcĩg õmmõõrĩ ho ngõõrra#6:13 Ngõõrrõ: Anĩĩb ꞌthooyyiaha eet ꞌcĩg õmmõõrĩ ngõõrra hũbũttaathõ. hũbũttaathõ.

Daahĩth cĩ Yõaannẽ Batitta

(Tigiil Maatteeo 14:1-12; ꞌLuuka 9:7-9)

14Baa aku athĩhĩ habuui Ẽrõõdẽ#6:14 Habu Ẽrõõdẽ: Ĩĩn ciee Ẽrõõdẽ Antipa baa ĩĩn habu baa aggameek Yõaannẽ Yeesu baattithimo. Tigiil thõõth cĩnnĩ ꞌBuuhaa cĩ Maatteeo 14:1; Maarko 6:14; ꞌLuuka 3:1; Dtiicanĩ cĩg ꞌThooyyiahu 4:27. Ĩĩn nẽẽ ngeertĩ Ẽrõõdẽ Cobbi baa ĩĩn habu baa adiim aruk Yeesu baa nga arrittiaa thõng. Tigiil thõõth cĩnnĩ ꞌBuuhaa cĩ Maatteeo 2:1-8; ꞌLuuka 1:5. Ma baa uruta, ikia aau habuui umwaa ꞌcĩ haĩ Ẽrõõdẽ Agirippa, ngeertĩ loholeec cĩ Ẽrõõdẽ Cobbi. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:1-13:1. thõõth cĩ Yeesu ho, hĩnĩngĩtĩ baa ĩꞌthaattothoothĩk ꞌthaara cĩg Yeesu loonyin vẽlẽk. Nẽ baa õthõõth eeta ũgẽẽgĩ aĩ, “Ũrũga Yõaannẽ Batitta daahĩtha, ĩnõõ ꞌcĩ aꞌnyahĩ nẽẽ ꞌtirriani ꞌcĩ adticanĩ thooꞌthiok ꞌcĩg ĩnaat eeta ho.”

15Baa hinnia ammuk eeta ũgẽẽgĩ aĩ, “Ĩĩn Yeesu Eliijja.#6:15 Eliijja: Baa ĩĩn nẽẽ põrõvẽtaac cĩ Nyekuci ꞌcĩ baa õkõõĩ Nyekuci hẽẽtahujjieen rũgẽtẽẽt. Baa arittiaa nẽẽ baa ĩĩn irkiꞌnyia ꞌmiiaꞌnya tũrkũwwec baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Habueetu 17-21; 2 Habuẽẽt 1-3.”

Nẽ tarĩ ummuhit ũgẽẽgĩ ĩĩtõ, “Ĩĩn nẽẽ põrõvẽtaac ꞌcĩ aaĩ hĩ põrõvẽtaaꞌnya baag baarkit.”

16Ma baa athĩhĩ habuui Ẽrõõdẽ thõõth icci ho, ikia õthõõth ĩĩ, “Yõaannẽ Batitta ꞌthẽk ꞌcĩ arũgna ho, eet baa hẽttẽẽda naa õõ!”

17Baa õthõõth Ẽrõõdẽ hoti, hĩnĩngĩtĩ baa ĩnõõnnõ ꞌcĩ ĩꞌthõ eet hõõt haggamit Yõaannẽ hecebit nẽ aarrik baabuuthatõõ. Adĩman Ẽrõõdẽ hoti, hĩnĩngĩtĩ baa attik nẽẽ Erodia ngaa cĩ Pilippo#6:17 Pilippo: Baa ĩĩn Pilippo ꞌgõtõnĩ Ẽrõõdẽ Antipa. ꞌgõtõnĩ cĩnnĩ. 18Nẽ tarĩ baa ara Yõaannẽ Batitta ngaatĩ aduhaakĩ Ẽrõõdẽ annẽẽkĩ, “Ẽꞌthẽcanuu nii gẽrrẽẽt, ngaatĩ attihi ngaggotonoonu Erodia.”

19Nĩngĩtĩ aꞌnyahẽẽkĩ Erodia Yõaannẽ mẽdẽr nẽ idiim uruk ĩnõõnnõ thõng, nẽẽthĩ hinnia, baa hõllõngaa ammũda ꞌgõõl ꞌcĩ occa aruhi ĩnõõnnõ ũdũt. 20Baa iꞌngolli Ẽrõõdẽ Yõaannẽ nẽ ẽẽla ĩnõõnnõ, hĩnĩngĩtĩ baa aga aĩ ĩĩn nẽẽ eet ꞌcĩ abũnnaa ꞌcĩ ẽllẽẽmĩthĩ. Nẽ tarĩ, baa ahayũnganni Ẽrõõdẽ gẽrrẽẽt, baa athĩhĩ nyeemuut cĩ Yõaannẽ, tananga accamana ngaatĩ athĩknĩ thõõth cĩnnĩ gẽrrẽẽt.

21Dtuurnattaa cĩnnĩ, ikia ũmmũda Erodia ꞌrõtĩ ꞌcĩ aruhi Yõaannẽ kõr baa aꞌnyahĩ Ẽrõõdẽ karrama cĩ kõr cĩ ꞌtirriaanĩt cĩnnĩ. Baa avvaa eeta ꞌcĩg ĩĩn ꞌgaala ꞌcĩg obbitig cĩg ũũrũta,#6:21 ꞌGaalac cobbi cĩ ũũrũta: Ĩĩn ciee ꞌgaalac ꞌcĩ aggam ũũrũta aalib hõdẽĩ. hĩ ꞌgaala ꞌcĩg obbitig cĩg looc cĩ ꞌGalileea vẽlẽk. 22Ma baa ũrũgũm tĩnaatĩ Erodia, ikia aaꞌnyĩk nẽẽ Ẽrõõdẽ hĩ heerinniook cĩgĩnnĩg haccamattoothĩk.

Nẽ ijin habuui Ẽrõõdẽ bũhẽẽc nicci ĩĩnnĩk, “Jinaa nganĩĩt ꞌgiimwa ꞌcĩ adiimi niina, hátĩ haaꞌnyii naa nganiita.” 23Ẽdẽcĩ Ẽrõõdẽ bũhẽẽc nicci anneek, “Habũtani haini, ‘Haaꞌnyii hatĩ naa ꞌgii ꞌcĩ ajinnaa nii nganĩĩta, tananga hẽꞌngẽraahii dhoorit cĩ looc ꞌcĩ haggami naa ho hõrggẽẽna bĩtĩ!’ ”

24Ma ho, ũũk bũhẽẽcĩ nicciee battaala nẽ ũũk ijin aattĩnnĩ ĩĩnnĩk, “Ne occa hatĩ ꞌcĩ hõkõ hajina Ẽrõõdẽ haaꞌnya ho?”

Ẽdẽcĩ ngaannia ĩnõõnnõ anneek, “Bĩĩt jina õõ cĩ Yõaannẽ Batitta.”

25Nĩngĩtĩ õbõdõõꞌthĩ bũhẽẽcĩ nicciee hĩdĩĩkoothong hĩ habu nẽ ũũk uduhaak ĩĩnnĩk, “Hadiimmii naa nganiit ꞌyioko noho, ꞌtẽẽdahaa õõ cĩ Yõaannẽ Batitta nẽ aarĩka hẽddẽẽmaa cĩ.”

26Baa aaꞌnyĩk thõõth ciee habu hõmõthĩ gẽrrẽẽt nẽ occa hõllõngaa abũrĩ thõõth cĩ bũhẽẽc nicci buúk, hĩnĩngĩtĩ baa ũbũtan nẽẽ muumtinii cĩg heerinniook cĩgĩnnĩg ko vẽlẽk. 27Nĩngĩtĩ ĩꞌthõõĩ habuui athegereec umwa hĩdĩĩkoothong hũũk hẽttẽẽda õõ cĩ Yõaannẽ Batitta baabuuthatõõ noho dtum. 28Ma nĩngaata, aꞌnyaha athẽgẽrẽẽcĩ nicciee õõ cĩ Yõaannẽ Batitta hẽddẽẽma nẽ aꞌnyĩĩk bũhẽẽc nicci hũũk haaꞌnyĩk aattĩnnĩ. 29Ma baa athĩhĩ nuyyiooha cĩg Yõaannẽ thõõth icci ho, iita ootti nẽẽg ẽlẽ cĩ Yõaannẽ nẽ õõt adaacõ.

Irohĩt Yeesu eet aalibꞌnya ꞌtur

(Tigiil Maatteeo 14:13-21; ꞌLuuka 9:10-17; Yõaannẽ 6:1-14)

30Ma baa oboddia ꞌthooyyiaha hĩ Yeesu, iita uduktaak ĩnõõnnõ thooꞌthiok vẽlẽk ꞌcĩg baag õõ adtican nẽẽg, hĩ thooꞌthiok vẽlẽk baag õõ allimaneek nẽẽg eeta. 31Nĩngĩtĩ annẽẽkĩ Yeesu ĩhõõggõ, “Hõõt nõõ haaut ngaamwaanĩ ngadiiha ẽmmẽn hiyyiomanit hĩdĩĩc.” Hĩnĩngĩtĩ baa mẽẽlĩg eeta gẽrrẽẽt ꞌcĩg õõ, nẽ iita irigithit ũgẽẽgĩ thõng, hiittiõõ ꞌgõõl ꞌcĩ occa adahĩ ꞌthooyyiaha ꞌgẽẽn tõõ.

32Ma ho, otodit nẽẽg haahũl nẽ õõt ngaatĩ õõ aattiyyi ẽmmẽn. 33Baa mẽẽlĩg eeta ꞌcĩg acĩn ĩhõõggõ ngaatĩ ĩꞌngaannĩ õõĩ nẽ baa aga eeta niccieeg nĩngĩtĩ õõĩ nẽẽg ko. Ma ho, ukulit eeta cĩg ꞌtaaũnnioohu ho vẽlẽk, utuattĩ ĩꞌthõng hõõt hõdõlanit nĩngĩtĩ õõĩ nẽẽg ko ĩĩcĩ oou. 34Ma baa uduhuna Yeesu haahũla battaala, acĩn hinnia lothippit cobbi gẽrrẽẽt nẽ atamaatĩk ĩhõõggõ, hĩnĩngĩtĩ baa aattĩg nẽẽg hĩ aꞌtha ꞌcĩg aitiõõ tũhayyioohiti tõõ. Nĩngĩtĩ iꞌthianaanĩ nẽẽ allimanĩ ĩhõõggõ thooꞌthiok ꞌcĩg mẽẽlĩg.

35Ma baa okoloothĩk kõrra cĩ ꞌjiaatĩn niccia, iita uduktaak nuyyiooha Yeesu ĩĩttĩk, “Ĩĩ ꞌjiaatĩn lõõcĩ nẽ ĩĩn nĩngĩtĩ ciee ngadik gẽrrẽẽt, 36aꞌnyĩĩk eet hõõt manẽẽnĩ hĩ olooyyiohĩĩ ꞌcĩg obokii nĩnga ho, hátĩ hõõt hutuuyyia ꞌgeenniok cĩggĩĩng hadahit.”

37Anneek hinnia Yeesu ĩhõõggõ, “Aanytĩk eet ꞌgẽẽn niiga.”

Ẽdẽcĩ ꞌthooyyiaha anneek, “Adiimmeet nii ngagĩĩt hoottia hutuuyyiawa ꞌgẽẽn ꞌcĩ ũũppan ꞌdinaarꞌnya#6:37 ꞌDinaar: Haĩ ꞌrabbẽẽt cĩg eet cĩg ꞌRooma ꞌdinaar. Nẽ ũũppan ꞌrabbaacit hõdẽẽthõng ꞌcĩ haĩ ꞌdinaar ko, dtiic ꞌcĩ adũmaniini ẽẽtĩ ꞌcĩ adticanni kõr hõdẽẽthõng. ꞌmiiaꞌnya ꞌramma, hátĩ haanytĩha eet hadahit?”

38Ẽdẽcĩ Yeesu ĩhõõggõ anneek, “Aꞌnyaku niig ũbũnẽẽt thõng? Õõt da ĩcĩnĩt!”

Ma baa õõ acĩn nẽẽg ũbũnẽẽt hĩ ulugo tĩko ho, iita uduktaak nẽẽg Yeesu ĩĩttĩk, “Aattĩg ũbũnẽẽta ꞌtur hĩ ulugo ꞌramma diooni.”

39Ma ho, uduhaak Yeesu ĩhõõggõ huduktaak eet haauto loota arteettaa ꞌcĩ cũlahĩ lothippiꞌnyaannĩ cũũmõ cũũmõ. 40Ma nĩngaata, aauto eeta loota lothippiꞌnyaannĩĩ ꞌcĩg ĩĩnnĩ eeta ꞌmiia hõdẽĩ nẽ ĩĩtõ ũgẽẽgĩ hẽẽn ꞌtur. 41Nĩngĩtĩ aggamaanĩ Yeesu ũbũnẽẽt ꞌcĩg ĩĩn ꞌtur hĩ ulugo ꞌcĩg ĩĩn ꞌramma ho nẽ ẽdẽẽnyõthĩ hẽẽtkujjieen nẽ aggatan ꞌgẽẽn nicci nẽ appak ũbũnẽẽt nẽ aaꞌnyĩk nuyyiook heꞌngerrieek eet. Nĩngĩtĩ ẽꞌngẽrẽẽkĩ nuyyiooha ulugo ꞌcĩg ĩĩn ꞌramma ho buúk ĩhõõggõ vẽlẽk. 42Baa aduhi eeta vẽlẽk hũũppattĩ. 43Ma ho, uluttia nuyyiooha lohoddwa ꞌcĩg idiongan õmmõtõ hĩ ꞌramma ꞌcĩg abbĩꞌthĩĩ ũbũnẽẽta hĩ ulugo. 44Baa ĩĩn eeta ꞌcĩg maacĩg dioo ꞌcĩg irohĩt Yeesu ho aalibꞌnya ꞌtur.

Õvvõ Yeesu maamĩ hujjieen

(Tigiil Maatteeo 14:22-33; Yõaannẽ 6:15-21)

45Ma hĩdĩĩkoothong, uduhaak Yeesu nuyyiook cĩgĩnnĩg hotodit haahũl hutuattĩ habaaktĩ hõõt ĩĩcĩ Beꞌthaida dhoortaa cĩ baakitu, baa nga ĩꞌthaan nẽẽ lothippit cĩ eetu hũũk. 46Ma urutaa ꞌcĩ ũtũngẽẽhĩ nẽẽ nuyyiook, ikia õtõd horooma nẽ ũũk alaõ.

47Ma baa ĩĩ lõõcĩ garrii garrii, ikia õdõlan haahũlĩ horggeeni cĩ bũlũcõ nẽ baa Yeesu dioo ꞌcĩ nga õvvõ dẽmẽta. 48Baa acĩnoothi nẽẽ nuyyiook ngaatĩ õꞌngõnyõõnĩ hĩ haahũl, hĩnĩngĩtĩ baa attĩlanoothĩk nẽẽg ngõõt ꞌcĩ uuhanniaak ĩhõõggõ. Ma baa õbõhĩ aal lõõcĩ, õtõ Yeesu bũlũca hujjieen ĩꞌthõng hõbõhĩ happacana ĩhõõggõ. 49Ma baa acĩn nuyyiooha ĩnõõnnõ ngaatĩ ovvooyyianĩ maamĩ hujjieen ko, baa ammuk hinnia nẽẽg aĩ miningit, nĩngĩtĩ õkõlẽẽkĩ luulu gẽrrẽẽt, 50hĩnĩngĩtĩ baa ikia aggam ĩhõõggõ tẽẽlꞌthĩtĩ cobbiẽẽnĩ.

Ma hĩdĩĩkoothong, uduhaak Yeesu ĩhõõggõ ĩĩnnĩk, “Aanytĩk ꞌthinneeti cugguung hokomit, nganĩĩt Yeesu, ma hiteelinnaangu.” 51Ma baa õtõd Yeesu ũũk haahũlatõõ, ikia ĩbĩl ngõõtĩ nẽ ĩtĩnaacõ nuyyiooha cĩgĩnnĩg thõõth icci gẽrrẽẽt, 52hĩnĩngĩtĩ baa adĩĩtĩ ooti cĩggĩĩng pĩd nẽ hõllõngaa aga dẽẽdẽ thõõth cĩ ũbũneetu nii.

Aaꞌnyĩk Yeesu eet ꞌcĩg õmmõõrĩ hũbũttaathõ

(Tigiil Maatteeo 14:34-36)

53Ma baa abaaktĩ Yeesu hĩ nuyyiook bũlũc, õõt õdõlanit nĩngĩtĩ haĩ ꞌJẽnẽꞌtharẽt, ngaatĩ baa õõ ẽcẽbĩ nẽẽg haahũl. 54Ma ho, uduhutta nẽẽg haahũla battaala nẽ iita agaacõ eeta Yeesu nĩĩcĩ noho. 55Nĩngĩtĩ avviri maajihi lootu looc niccia vẽlẽk, alũtaanĩ eet ꞌcĩg õmmõõrĩ nẽ irriongatta lotoonwẽẽtĩ haꞌnyakta ngaatĩ aayyi Yeesu. 56Nẽ ꞌgoolliohĩ ꞌcĩg õkõõĩ Yeesu olooyyiohĩ hĩ ꞌtaaũnnioohĩ hĩ manẽẽnĩ vẽlẽk, aꞌnyaha eeta eet ꞌcĩg õmmõõrĩ ho ꞌcuuha nẽ alaacõ ĩnõõnnõ haaꞌnyĩk ĩhõõggõ huhumit eetoc cĩ cẽrẽm cĩnnĩ nẽ eeta vẽlẽk ꞌcĩg baag uhumit cẽrẽm cĩnnĩ, iita ũbũttaathõ.

Currently Selected:

Maarko 6: did

Highlight

Copy