Maarko 5

Eet ꞌcĩ aꞌnyak loriẽẽt ꞌcĩg abathĩ

(Tigiil Maatteeo 8:28-34; ꞌLuuka 8:26-39)

1Õõt abaaktĩ Yeesu hĩ nuyyiook cĩgĩnnĩg Bũlũc cĩ ꞌGalileea nẽ õõt ĩĩcĩ dẽmẽt ꞌcĩ õbõhõõ hĩ looc ꞌcĩ haĩ ꞌGerathẽnẽ. 2Ma hĩdĩĩkoothong ĩcĩ ĩꞌngõthaaĩ Yeesu haahũla battaala, iita ommottio nẽẽ hĩ eet umwa ꞌcĩ aꞌnyak loriẽẽt ꞌcĩg abathĩ ꞌcĩ adukna ꞌlõõhĩtĩĩ cĩg daakiahu nĩngaata noho ꞌtur. 3Baa aar ẽẽtĩ ꞌcĩ aꞌnyak loriẽẽt ꞌcĩg abathĩ ho nĩngĩtĩ adaiini eeta ho, hĩĩ õlõ cĩnnĩ nẽ aitiõõ ẽẽtĩ ꞌcĩ occa ũũlũ ngaatĩ aggamĩ ĩnõõnnõ nẽ ẽcẽb nyerikooca tõõ. 4Hĩnĩngĩtĩ ecebbi nẽẽ tabattĩ mẽẽlĩg nẽ ẽttẽẽd nyeriko ꞌcĩg ecebiini athĩna hĩ ꞌthoo hõdõõkõthĩ haauto cũũmõ cũũmõ. Hiꞌthihi eet ꞌcĩ ũũlũ ngaatĩ occa aggamĩ ĩnõõnnõ ũdũt, hĩnĩngĩtĩ attiran nẽẽ gẽrrẽẽt. 5Arruui nẽẽ waathĩn hĩ baalin ngaatĩ adaiini eeta hĩ hõrõmẽẽtĩ, ẽggẽrẽny nẽ ẽttẽẽd ẽlẽ cĩnnĩ tẽllẽẽnĩ.

6Ma baa acĩnoothi nẽẽ Yeesu ꞌrẽẽna ho, ukul gẽrrẽẽt nẽ ũũk akat huruꞌnyia muumaa cĩnnĩ, 7nẽ okoleek ulwa ĩĩ, “Yeesu Ngeertĩ Nyekuc ꞌcĩ aaĩ hẽẽtahujjieen, atabi nii hĩ nganĩĩt neegi? Halayyi ꞌthĩnĩta ꞌthaarĩĩ cĩg Nyekuc ꞌcĩ ĩllõõan vẽlẽk, ma huukaanĩ!” 8Õthõõth nẽẽ hoti, hĩnĩngĩtĩ baa uduhaak Yeesu ĩnõõnnõ ĩĩnnĩk, “Duhuna eetaa cĩ battaala, nii lorii ꞌcĩ abathi ho!”

9Nẽ ijin Yeesu ĩnõõnnõ ĩĩnnĩk, “Haĩ ꞌthaar cugunnig nganĩ?”

Ẽdẽcĩ nẽẽ aĩ, “Haĩ ꞌthaar cĩgannĩg Lejjion, hĩnĩngĩtĩ hĩĩgĩnna mẽẽlĩg.” 10Ma nĩngaata, ala lorii ꞌcĩ abathĩ ho Yeesu hiriiri ĩĩnnĩk, ma hiiggiaeekeet looccaa cĩ battaala.

11Baa obokii tẽẽnyĩ cĩ ꞌngõõhĩꞌnyannu ẽgĩ muuraa lõmẽrra nĩngaata. 12Nĩngĩtĩ alaĩ loriẽẽta ꞌcĩg abathĩ ho Yeesu annẽẽkĩ, “Tiggiaeeheet baaĩ nuun ngagĩĩt ꞌngõõhĩꞌnyannĩtõõ.” 13Ma ho, ẽlẽmaahĩ Yeesu ĩhõõggõ hõõt, nĩngĩtĩ aduknaanĩ loriẽẽta ꞌcĩg abathĩ ho eeta nĩĩcĩ nẽ õõt uduhunit eleeti cĩg ꞌngõõhĩꞌnyannu. Ma nĩngaata noho, iita õꞌngõnytõõĩ ꞌngõõhĩꞌnya ꞌcĩg ĩĩn aalibꞌnya ꞌramma vẽlẽk ꞌthilo nẽ uumurrioothĩk bũlũcatõõ noho paappuu hutududdi hĩĩ lõõcĩ ꞌthĩĩ.

14Nẽ eeta ꞌcĩg baag ũũha ꞌngõõhĩꞌnya nĩngaata, iita ukulit õõt ĩꞌthaattĩk nyeemuut nicci ꞌtaaũna hĩ loonyin ꞌcĩg õbõhõõ nĩngaata vẽlẽk. Nĩngĩtĩ õõ acĩnĩ eeta thõõth ꞌcĩ baa aaĩ nĩngaata ho. 15Ma baa õdõlan nẽẽg Yeesu ho, au hinnia adtuuha eet aagõõng aꞌnyak loriẽẽt ꞌcĩg abathĩ ẽllaa cĩnnĩ iccioloongan loota, ahimit ceremwa, ĩĩ eet ꞌcĩ ũbũna õõ lõꞌngõõc nẽ baa itieelli nẽẽg vẽlẽk gẽrrẽẽt. 16Nẽ eeta baag ĩcĩnĩt thõõth icci dẽẽdẽ, uduktaak eet thõõth cĩ eet baa aꞌnyak loriẽẽt ꞌcĩg abathĩ, hĩ thõõth cĩ ꞌngõõhĩꞌnyannu buúk. 17Nĩngĩtĩ alaĩ nẽẽg Yeesu hũtũngeek looc cĩnĩĩng.

18Ma baa õtõd Yeesu haahũl, ikia ala ẽẽtĩ baa aꞌnyak loriẽẽt ꞌcĩg abathĩ ho ĩnõõnnõ ĩĩnnĩk, “Aꞌnyaa baaĩ nuun hookorit hĩ nganiita!” 19Baa hõllõngaa ẽlẽmĩ Yeesu ngaatĩ õõkõrĩ hĩ ĩnõõnnõ, anneek hinnia, “Bodooth ĩĩcĩ olu, bĩĩt duhaak eet cĩg õlõ cunuung, thõõth ꞌcĩ adĩmaneeki nganiit Makayyioohiti, hĩ ꞌgõõl baa ammaanniki nẽẽ nganiita.” 20Nĩngĩtĩ õkõõĩ ẽẽtĩ ciee ꞌtaaũnnioohĩĩ ꞌcĩg ĩĩn õmmõtõ, ĩcĩg haĩ Dekapoli, aduhaakĩ eet thõõth baa adĩmaneek Yeesu ĩnõõnnõ. Nẽ eeta vẽlẽk ꞌcĩg baag athĩhĩ thõõth icci, iita ĩtĩnaacõ thõõth cĩ Yeesu gẽrrẽẽt.

Bũhẽẽc ꞌcĩ adaahĩ hĩ ngaa ꞌcĩ õmmõõrĩ

(Tigiil Maatteeo 9:18-26; ꞌLuuka 8:40-56)

21Ma baa abaahĩ Yeesu haahũla tarĩ ũũk baakĩtaa cĩ bũlũcõ, uluttiaak lothippiti cobbi gẽrrẽẽt ĩnõõnnõ, baa nga aaĩ nẽẽ dẽmẽtaa cĩ bũlũcõ. 22Ma ho, uppwaanna ẽẽtĩ umwaa ꞌcĩ haĩ ꞌJairo eetinii ꞌcĩg baag ĩĩn makayyiook cĩg ꞌCieeth cĩ Laiitto. Ma acĩn ꞌJairo Yeesu ho, ẽttẽẽd looc ꞌthõõnĩĩ cĩgĩnnĩg, 23nẽ ĩĩlaleek Yeesu ĩĩnnĩk, “Õmmõõrĩ nganĩĩt loholeec ꞌcĩ ngayyi ꞌcĩ hidici gẽrrẽẽt. Ijjia baaĩ nuun bĩĩt huum ĩnõõnnõ athĩnĩĩ cugunnig, hátĩ hũbũna nẽ ũrũga!” 24Nĩngĩtĩ õõkõrĩ Yeesu hĩ ĩnõõnnõ.

Ma nĩngaata, ũnũõõthĩ lothippiti cobbi gẽrrẽẽt Yeesu nẽ õõt õꞌngõnytõõĩ eeta ĩnõõnnõ. 25Baa aaĩ ngaa umwaa ꞌcĩ ĩppĩĩra gẽrrẽẽt ꞌcĩ arik ẽlẽ irkiꞌnyia õmmõtõ hĩ ꞌramma, 26nẽ baa aꞌnyaman ẽgẽrnẽẽn vẽlẽk ꞌcĩg aaꞌnyĩk akĩĩmĩta ꞌcĩg mẽẽlẽẽgĩ. Ẽdẽcaak nẽẽ ijjio cĩgĩnnĩg vẽlẽk authetaa cĩ mõõrĩth cĩnnĩ ho nẽ hõllõngaa abũnnaa buúk, ittoorri hinnia mõõrĩthĩ habathõõthĩ gẽrrẽẽt. 27Ma baa athĩhĩ ngaa ciee thooꞌthiok cĩg Yeesu ho, ikia ũnũõõthĩ nẽẽ ĩnõõnnõ lothippitatõõ nẽ ũũk uhum cẽrẽm cĩ Yeesu ĩĩcĩ bahuuco. 28Hĩnĩngĩtĩ baa ammuk nẽẽ aĩ, “Má nẽẽ nuun huhum cẽrẽm cĩnnĩ haaga, occa hatĩ habũnna.” 29Ma baa ahum nẽẽ cẽrẽm cĩ Yeesu ho, ikia ĩbĩl mõõrĩthĩ ꞌcĩ arihi ĩnõõnnõ ẽlẽ ho hĩdĩĩkoothong, nĩngĩtĩ agaõõꞌthĩ nẽẽ buúk aĩnnĩ, hũbũnawa.

30Ma nĩngaata noho, ikia iiyyiela Yeesu ngaatĩ ũũhĩ ꞌtirriani umwaa ẽllaa cĩnnĩ battaala, nĩngĩtĩ abbuudẽnĩ nẽẽ lothippitatõõ nẽ ijino ĩĩ, “Nganĩ ꞌcĩ ahum cẽrẽm caannĩ ho?”

31Ma ho, edecit nuyyiooha cĩgĩnnĩg ĩnõõnnõ ĩĩttĩk, “Cĩĩn nõõ nii buúk ngaatĩ ẽẽhõnĩ lothippiti nẽ tarĩ ijino nii iinu, ‘Nganĩ ꞌcĩ ahum cẽrẽm caannĩ ho?’ ”

32Nẽ baa aalla hinnia Yeesu abbuudi adiim acĩn nganĩ ꞌcĩ ahum ĩnõõnnõ ho noho. 33Baa abarrit ngaa ciee nẽ itiẽẽlĩ gẽrrẽẽt, nĩngĩtĩ appulanaanĩ ẽlẽ cĩnnĩ, hĩnĩngĩtĩ agaõõthĩ nẽẽ ngaatĩ ammanyanõõĩ mõõrĩthĩ cĩnnĩ ho nẽ ikia akat huruꞌnyia muumaa cĩ Yeesu nẽ uduhaak ĩnõõnnõ thõõth vẽlẽk ꞌcĩ ĩĩn dĩdĩ. 34Ma nĩngaata, ĩĩnnĩk Yeesu ngaa nicci, “Aaꞌnyi lemiiniti cunni nganiit bũna, bĩĩt taliitta nẽ aau lõꞌngõõc pĩĩrnattaa baa nunni.”

35Ma baa nga õthõõth Yeesu hoti, uppwaanna hinnia eeta ũgẽẽgĩ ꞌcĩg au õlõõ cĩ ꞌJairo makayyioohit cĩ ꞌCieeth cĩ Laiitto nẽ iita uduktaak ꞌJairo ĩĩttĩk, “Adaak loholeeca, ma nga haccanani Makayyioohit.”

36Ma baa athĩhĩ Yeesu thõõth ꞌcĩ aduhaak eeta makayyioohit cĩ ꞌCieeth cĩ Laiitto ho, ikia uduhaak nẽẽ ĩnõõnnõ ĩĩnnĩk, “Ma hiteelli, ꞌnyaak lemiinit diooni.”

37Baa hõllõngaa ẽlẽmĩ Yeesu eet umwa hũnũ ĩnõõnnõ, baa ẽlẽmaakĩ nẽẽ Pẽẽtũrũ hĩ ꞌJeemith hĩ Yõaannẽ ꞌgõtõnĩ ꞌJeemithi diooni hũnnẽẽcõ ĩnõõnnõ. 38Ma baa iita õdõlanit nẽẽg õlõ cĩ makayyioohit cĩ ꞌCieeth cĩ Laiitto ho, ammũdeek hinnia Yeesu ulwa ꞌcĩ arruuẽnĩ eeta gẽrrẽẽt. 39Nĩngĩtĩ adukni nẽẽ ꞌcieetõõ nẽ ũũk uduhaak eet ĩĩnnĩk, “Inni urruuyyio niig gẽrrẽẽt ĩꞌthõng etteeddi eleeti looc ko? Nga hadaak loholeeca, õhõda ũꞌnyaaha haaga.” 40Baa hinnia arannĩ eeta Yeesu thõng.

Nĩngĩtĩ iiggiaẽẽkĩ nẽẽ ĩhõõggõ vẽlẽk hõõt battaala nẽ ikia ũũhĩ maaꞌnyĩ loholeeco hĩ aattĩnnĩ hĩ nuyyiook cĩgĩnnĩg baag ĩĩn iyyio diooni, ngaatĩ aayyi loholeec ko. 41Ma ho, aggam Yeesu loholeec aꞌthiit nẽ ĩĩnnĩk, “Talitha koum!” Nĩngĩtĩ aĩ, “Loholeeca, hanneekii naa nganiit tĩnga ꞌjieena!” 42Ma nĩngaata noho, ĩtĩnga loholeec nicciee ĩĩn irkiꞌnyia õmmõtõ hĩ ꞌramma ho ꞌjieena, nĩngĩtĩ õvvõõĩ. Baa nẽ ubulan thõõth ciee eet gẽrrẽẽt ũdũt. 43Ma ho, uduhaak Yeesu eet komiitta ĩĩnnĩk, “Ma hõõ haduhaaku eet umwa thõõth icci ũdũt,” nẽ uduhaak ĩhõõggõ tarĩ ĩĩnnĩk, “Aanytĩk loholeec ꞌgiimwa hadak.”

Currently Selected:

Maarko 5: did

Highlight

Copy