Maarko 4

Thõõth cĩ eet ꞌcĩ ĩĩn kattioohit

(Tigiil Maatteeo 13:1-9; ꞌLuuka 8:4-8)

1Ikia iꞌthianaaĩ Yeesu ngaatĩ allimanĩ eet dẽmẽtaa cĩ Bũlũc cĩ ꞌGalileea tarĩ. Baa maka lothippiti ꞌcĩ baa aluttiaak ĩnõõnnõ gẽrrẽẽt, nĩngĩtĩ adukni nẽẽ haahũlatõõ nẽ aau lothippiti cĩ eetu dẽmẽta. 2Baa allimaneek nẽẽ ĩhõõggõ thooꞌthiok ꞌcĩg mẽẽlĩg ꞌcĩg awantoothĩk aĩ, 3“Ĩthĩktõ! Baa aaĩ ẽẽtĩ umwaa ꞌcĩ õkõ athacĩ hinyomo manaa cĩnnĩ. 4Ma baa athacĩ nẽẽ hinyomo ho, ĩꞌthanothoothĩk hinnia ũgẽẽgĩ ꞌgõõla nẽ iita uuranit hĩbaallĩ. 5Nẽ ĩꞌthaattothoothĩk hinyomona ũgẽẽgĩ ngaatĩ ĩĩn ꞌthẽhẽk nẽ ubuꞌthia hĩdĩĩkoothong, hĩnĩngĩtĩ baa hõllõngaa uuthik ꞌthẽẽma. 6Ma baa ikia kõrra, ikia ũtũũth haal niccig hummuduhito ĩꞌthõng hodohohit, hĩnĩngĩtĩ hõllõngaa aduhun cõrrẽẽna huuꞌthĩk. 7Nẽ ĩꞌthaattothoothĩk hinyomona ũgẽẽgĩ ngaatĩ ĩĩn mõrõ nẽ ĩĩ bĩlla ꞌcĩg alĩꞌtha nẽ uruhit haal hiittiõõ hõllõngaa abbiiri. 8Ma nĩngaata, iita ĩꞌthaattothoothĩk hinyomona ũgẽẽgĩ tarĩ ngaatĩ ĩĩn cooni nẽ ubuꞌthia haala hitiliꞌthia jurrung hibbiirito. Baa aꞌnyak haaliti hõdẽẽthõng haal hẽẽn iyyio nẽ aꞌnyak umwaa haal hẽẽn tõrkõnõn nẽ aꞌnyak umwaa haal ꞌmiia hõdẽĩ.”

9Nĩngĩtĩ aduhaakĩ Yeesu lothippit annẽẽkĩ, “Nẽẽthĩ, ẽẽtĩ ꞌcĩ aꞌnyak ĩtat aꞌnyĩĩk hĩthĩhõ.”

Inni hidticanõõĩ Yeesu dtẽẽllẽn ko?

(Tigiil Maatteeo 13:10-17; ꞌLuuka 8:9, 10)

10Ma baa aau Yeesu ẽmmẽn, iita ijinit eeta ꞌcĩg baag arũmĩ hĩ ĩnõõnnõ hĩ ꞌthooyyiak cĩgĩnnĩg thooꞌthiok ꞌcĩg awantoothĩk ko. 11Ẽdẽcĩ Yeesu ĩhõõggõ anneek, “Baa aaꞌnyĩhoothĩhuung ngagiit thõõth ꞌcĩ ammiꞌthi cĩ habuccieet cĩ Nyekuci. Nẽ haduhaahi naa eet ꞌcĩg battaalu thooꞌthiok ꞌcĩg awantoothĩk, 12hĩnĩngĩtĩ

“ ‘Acĩnĩ hatĩ eeta cieeg hiriiri nẽ hõllõngaa acĩnĩ,

nẽ athĩknĩ hatĩ nẽẽg hiriiri, nẽẽthĩ hinnia, hõllõngaa aga ũdũt,

nẽẽthĩ má hagaacõ, occa hatĩ õbõda nẽẽg hĩ Nyekuc,

nẽ hatĩ ũtũngeek Nyekuci ꞌthẽccanẽẽt cĩggĩĩng.’ ”#Tigiil ꞌBuuk cĩ Iꞌthaia 6:9-10

Ẽddẽẽba Yeesu dtẽẽllẽn cĩg kattiookto

(Tigiil Maatteeo 13:18-23; ꞌLuuka 8:11-15)

13Nĩngĩtĩ ajini Yeesu ĩhõõggõ annẽẽkĩ, “Ma hõllõngaa agayyu niig dtẽẽllẽn ꞌcĩg awantoothĩk ko nẽ hatĩ agayyu dtẽẽllẽn ũgĩ ꞌcĩg awantoothĩk hutuno? 14Athacĩ kattioohiti nyeemuut ꞌcĩ ĩĩn thõõth cĩ Nyekuci. 15Aattĩg eeta ũgẽẽgĩ hĩ hinyomona ꞌcĩg athacoothĩk ꞌgõõla, athĩhĩ thõõth cĩ Nyekuci noho, ma hĩdĩĩkoothong, ikia ꞌThĩttaanĩ uvvucana thõõth nicci ꞌthinneetinii cĩggĩĩng. 16Hinyomona ꞌcĩg athacoothĩk ngaatĩ ĩĩn ꞌthẽhẽk ko, ĩthakꞌthoothĩk eet ꞌcĩg athĩhĩ thõõth cĩ Nyekuci hĩdĩĩkoothong nẽ elemit thõõth taliitta. 17Nẽ hõllõngaa aduhun thõõth ꞌthinneetinii cĩggĩĩng jurrung nẽ hõllõngaa aalla ĩꞌthõng. Nẽ ma ikia ꞌcannani hode pĩĩrnanĩtĩ, hĩnĩngĩtĩ thõõth cĩ Nyekuci, iita ũtũngteek nẽẽg thõõth nĩĩcĩ noho ꞌcõm. 18Aattĩg eeta ũgẽẽgĩ hĩ hinyomona ꞌcĩg athacoothĩk bĩllanĩtõõ, ĩthakꞌthoothĩk eeta cieeg eet ꞌcĩg athĩhĩ thõõth cĩ Nyekuci, 19nẽ hinnia ummuhit rũgẽt cĩ looc nicci hĩ mĩnnan cĩ baliitto hĩ hẽlẽggĩ vẽlẽk ꞌcĩg ammũyan ĩhõõggõ nẽ ẽꞌthẽcanit thõõth cĩ Nyekuci, iittiõõ hõllõngaa abbiiri haꞌnyakta hinyomo. 20Nẽ hinyomona ꞌcĩg athacoothĩk ngaatĩ abũnnaa ꞌthẽẽma ho, aattĩg hĩ eeta ꞌcĩg athĩhĩ thõõth cĩ Nyekuci nẽ elemita, abbiiri jurrung aꞌnyaha ũgẽẽgĩ haal hẽẽn iyyio, aꞌnyaha ũgẽẽgĩ haal hẽẽn tõrkõnõn nẽ aꞌnyakta ũgẽẽgĩ haal ꞌmiia hõdẽĩ.”

ꞌLoomo ꞌcĩ arimꞌthi dilaata

(Tigiil ꞌLuuka 8:16-18)

21Nẽ uduhaak Yeesu ĩhõõggõ tarĩ ĩĩnnĩk, “Ĩcca occa aꞌnyaha eet umwaa ꞌloomo nẽ ikia aarĩk ijjia uruta, hode nangẽrẽba uruta? Ĩcca occa hõllõngaa aarĩk tẽrẽmẽẽjawa lokora? 22Hĩnĩngĩtĩ appulanniaa hatĩ thooꞌthioha vẽlẽk ꞌcĩg ammiꞌthi lothippita battaala nẽ thooꞌthioha vẽlẽk ꞌcĩg ammiꞌthi, iittiõõ hatĩ hõllõngaa ammiꞌthi. 23Má aꞌnyak ẽẽtĩ umwaa ĩĩna, aaꞌnyĩk hĩthĩhõ.”

24Nẽ uduhaak Yeesu ĩhõõggõ tarĩ ĩĩnnĩk, “Uꞌthuutti thooꞌthiok ꞌcĩg athiknu niig ko jurrung. ꞌGii ꞌcĩ adĩmaneeku niig eet umwa, adĩmaneekuung hatĩ Nyekuci ngagiit buúk ꞌgõõlaa tĩho dioo, komiitta ꞌcĩ ĩllõõan gẽrrẽẽt. 25Ẽẽtĩ ꞌcĩ aꞌnyak ꞌgiimwa, ĩttoorothoothĩk hatĩ hẽlẽggĩ ũgẽẽgĩ hĩĩtõ mẽẽlĩg nẽ ẽẽtĩ ꞌcĩ hõllõngaa aꞌnyak ꞌgiimwa, attihi hatĩ ꞌgii ꞌcĩ abadtẽc ꞌcĩ aꞌnyak nẽẽ ho battaala.”

Dtẽẽllẽn ꞌcĩg awantoothĩk hinyomooc ꞌcĩ alĩthĩ

26Nẽ õthõõth Yeesu tarĩ ĩĩ, “Aaĩ habuccieet cĩ Nyekuci hĩ ẽẽtĩ ꞌcĩ athacĩ hinyomo manatõõ. 27Aitiõõ kattioohiti hõllõngaa iccionganeek mana baalin hĩ waathĩn. Tananga hõllõngaa aga nẽẽ ꞌgõõl ꞌcĩ abũthaanĩ mana, abũtha nẽẽ hatĩ hinyomona nẽ ĩtĩlĩthĩt noho. 28ꞌThẽẽm ꞌcĩg aaꞌnyĩk hinyomo hupwaanito nẽ aarrik haal ko. 29Ma ibbiir mana, aggam ẽẽtĩ habath, hĩnĩngĩtĩ õdõlan kõrra cĩ janiitto.”

Dtẽẽllẽn ꞌcĩg awantoothĩk hinyomooc ꞌcĩ dĩppĩlĩ

(Tigiil Maatteeo 13:31-32; ꞌLuuka 13:18-19)

30Nẽ õthõõth Yeesu tarĩ ĩĩ, “Occa haĩ naag aaĩ habuccieet cĩ Nyekuci hĩ nii? Thõõth iina ꞌcĩ occa hẽddẽẽbanĩ ĩnõõnnõ? 31Aaĩ nẽẽ hĩ hinyomooc ꞌcĩ dĩppĩlĩ ꞌcĩ athacoothĩk ꞌthẽẽmĩtõõ. Ĩĩn hinyomooc ꞌcĩ hidici gẽrrẽẽt loota nĩnga vẽlẽk. 32Nẽẽthĩ ma itiboolanĩ, alĩꞌtha hatĩ hĩĩ hẽẽt ꞌcĩ maka gẽrrẽẽt ꞌgoonoginni vẽlẽk manatõõ. Accawana tabana ꞌcĩg makatĩg ꞌcĩg au ẽhẽnytĩ hĩbaallĩ ꞌcieethi cĩggĩĩng ꞌriiyyiatõõ cĩnnĩ.”

Thõõth cĩ allimaniini Yeesu dtẽẽllẽnĩ

(Tigiil Maatteeo 13:34-35)

33Nẽ illimaneek Yeesu eet thooꞌthiok ꞌcĩg mẽẽlĩg ꞌcĩg awantoothĩk ho ĩꞌthõng hĩthĩhĩt eeta dhoorit umwa. 34Aitiõõ nẽẽ hõllõngaa aduhaak eet thõõth haaga, aduhaak thooꞌthiohĩĩ ꞌcĩg ammiꞌthi nẽ ma aau ẽmmẽn hĩ nuyyiook cĩgĩnnĩg, ẽddẽẽbak ĩhõõggõ thõõth vẽlẽk cũrũmũũm.

Abĩllĩ Yeesu ngõõt

(Tigiil Maatteeo 8:23-27; ꞌLuuka 8:22-25)

35Ma ꞌjiaatĩn cĩ kõr niccia, ikia uduhaak Yeesu nuyyiook cĩgĩnnĩg ĩĩnnĩk, “Habaaktĩ da bũlũc hõõt dhoortaa cĩ baakitu.” 36Nĩngĩtĩ ũũnnĩkĩ nẽẽg lothippit cĩ eetu nẽ otodit nuyyiooha haahũl hõdẽĩ hĩ Yeesu nẽ õõta. Baa aattĩg haahũlĩta ũgẽẽgĩ buúk ꞌcĩg õõkõr hĩ ĩnõõnnõ. 37Ma hĩdĩĩkoothong, uuhan ngõõtĩ ꞌcĩ attiran gẽrrẽẽt ꞌcĩ õmmõõnnĩ maam hiꞌngoꞌthia haahũlatõõ hõbõktĩ hũmmũlũũnyanit haahũl. 38Baa oongi Yeesu urutaa cĩ haahũlõ, aruha õõ dtaabawa. Nĩngĩtĩ attiranĩ nuyyiooha annẽẽkĩ, “ꞌLimmannioohit, hõllõngaa aga nii ngaatĩ hõõt hutududdi naaga?”

39Nĩngĩtĩ ĩꞌngaannĩ Yeesu ꞌjieena nẽ eggerenyeek ngõõt nẽ ĩĩnnĩk maam, “Ĩjjaaktõ! Ĩbĩlĩt!” Nĩngĩtĩ adaaknĩ ngõõtĩ hemmeethĩk ũdũt.

40Ma ho, ijin Yeesu nuyyiook cĩgĩnnĩg ĩĩnnĩk, “Itieelinnu niig inni? Nga aitioonnuung ngagiit lemiiniti tõõ?”

41Nẽ baa itieelli nẽẽg gẽrrẽẽt, nĩngĩtĩ õthõõthĩ aĩnnĩ, “Eet ꞌcĩ nganĩ gõõng ciee athĩhĩ ngõõtĩ hĩ maam thõõth cĩnnĩ ho?”

Currently Selected:

Maarko 4: did

Highlight

Copy