Maarko 3

Eet ꞌcĩ alalliaa aꞌthiiti

(Tigiil Maatteeo 12:9-14; ꞌLuuka 6:6-11)

1Ma baa kõr umwa, ikia ũũk Yeesu ĩĩcĩ ꞌCieeth cĩ Laiitto nẽ baa aaĩ ẽẽtĩ umwaa ꞌcĩ alalliaa aꞌthiiti tõõ nĩngaata. 2Baa adiim Variꞌtheei ũgẽẽgĩ ammũda ꞌgõõl ꞌcĩ õhõppõõcanẽẽkĩ Yeesu thõõth ꞌcĩ abathĩ nẽ ebehit ĩnõõnnõ gẽrrẽẽt, hátĩ hĩcĩnĩt má aaꞌnyĩk nẽẽ eet nicci õmmõõrĩ ho hũbũna Kõrraa cĩ ꞌYiommaanõ ho dĩdĩ.

3Ma nĩngaata, ikia uduhaak Yeesu eet ꞌcĩ alalliaa aꞌthiiti ho ĩĩnnĩk, “Tĩnga ꞌjieena bĩĩl hõrggẽẽna ngaatĩ acĩnni eeta vẽlẽk.” 4Ma ho, ijin nẽẽ Variꞌthei ĩĩnnĩk, “Occa abũnnaa ngaatĩ hadticanĩ ꞌgii ꞌcĩ abũnnaa hode ꞌcĩ abathĩ Kõrraa cĩ ꞌYiommaanõ? Occa hẽẽla rũgẽt cĩ eeto Kõrraa cĩ ꞌYiommaanõ hode haruk thõng?” Ĩjjaaki hinnia nẽẽg vẽlẽk kim, hiꞌthihi eet ꞌcĩ ẽdẽcĩ buúk.

5Nĩngĩtĩ ẽggẽlẽẽmĩ Yeesu ĩhõõggõ lĩĩlĩẽẽttaa nẽ iittiõõ hõllõngaa accamanoothĩk, hĩnĩngĩtĩ baa õkõmĩ ĩhõõggõ ooti. Nẽ uduhaak eet nicci ĩĩnnĩk, “Õõd aꞌthiit cunni hũũlan.” Nĩngĩtĩ õõdĩ nẽẽ aꞌthiit nẽ ũbũna aꞌthiiti cĩnnĩ ho tarĩ! 6Ma adtuuha Variꞌtheei thõõth icci ho, iita uduhunit õõt battaalaa cĩ ꞌCieeth cĩ Laiitto, nĩngĩtĩ õõ atuhanĩ hĩ eet cĩg Ẽrõõdẽ, ꞌgõõl ꞌcĩ occa aruhi nẽẽg Yeesu.

Lothippit cobbi ꞌcĩ anũ Yeesu

7Ma baa õõt Yeesu hĩ nuyyiook cĩgĩnnĩg ĩĩcĩ bũlũcõ, ikia ũnũ lothippiti ꞌcĩ maka ꞌcĩ aku ꞌGalileea ĩnõõnnõ. 8Ma baa athĩhĩ nẽẽg thooꞌthiok vẽlẽk ꞌcĩg baag adtican Yeesu ho, iita ummuddiaak eeta ꞌcĩg mẽẽlĩg gẽrrẽẽt ĩnõõnnõ. Baa au eeta cieeg looccaa cĩ ꞌJudeea hĩ ꞌJeruꞌthalẽma hĩ looccaa ꞌcĩ haĩ Idumeea, hĩ ꞌcĩg au ĩĩcĩ uruto cĩ hidioo cĩ ꞌJõrdanĩ nẽ iita ũgẽẽgĩ ꞌtaaũnnioohĩĩ cĩg ꞌTire hĩ ꞌThidõõnẽ. 9Baa maka lothippiti cĩ eetu ho gẽrrẽẽt, nĩngĩtĩ aduhaakĩ Yeesu nuyyiook cĩgĩnnĩg haꞌnyakta haahũl haavvi nẽẽnĩ, hátĩ hiittiõõ hõllõngaa ẽẽhõnĩ eeta ĩnõõnnõ. 10Ma baa aaꞌnyĩk nẽẽ eet ꞌcĩg mẽẽlĩg hũbũttaathõ ho, iita eeta vẽlẽk ꞌcĩg baag õmmõõrĩ, õꞌngõnytõõĩ ꞌgõõl ꞌcĩ aayyi nẽẽnĩ, aĩ hátĩ huhumta ĩnõõnnõ. 11Ma baa acĩn eeta ꞌcĩg aꞌnyak loriẽẽt ꞌcĩg abathĩ ĩnõõnnõ ho, iita etteedito looc nẽ urruuyyio ĩĩtõ, “Ĩĩnĩ nii Ngeertĩ Nyekuci!” 12Nĩngĩtĩ aduhaakĩ Yeesu ĩhõõggõ komiitta annẽẽkĩ, “Ma hõõ haduhaaku eet umwa hanneeku nganĩĩt nganĩ naa.”

Ẽbẽra Yeesu ꞌthooyyiak õmmõtõ hĩ ꞌramma

(Tigiil Maatteeo 10:1-4; ꞌLuuka 6:12-16)

13Ma nĩngaata, ũũk aau Yeesu muuraa hujjieen nẽ ũtũvvũ eet baag adiim nẽẽ hiita hĩ ĩnõõnnõ. 14Nĩngĩtĩ ẽbẽraanĩ nẽẽ eet õmmõtõ hĩ ꞌramma nẽ akateek ꞌthaar ꞌcĩg haĩ ꞌthooyyiak,#3:14 ꞌThooyyiak: Ĩĩn ꞌthooyyiaha eet ꞌcĩg baag ĩꞌthõ Yeesu ꞌtirriaana hõõt hillimatteek eet thõõth cĩnnĩ nẽ aaꞌnyĩk ĩhõõggõ ꞌtirrian ꞌcĩ iiggiaĩ loriẽẽt ꞌcĩg abathĩ nẽ ĩdĩmanit hẽlẽggĩ ꞌcĩg ĩnaat eeta. hátĩ hũrũmtĩ hĩ ĩnõõnnõ nẽ ĩꞌthooĩk hõõt ꞌlimmaana, 15nẽ aaꞌnyĩk ĩhõõggõ makaaꞌthĩt ꞌcĩ iiggiaĩ loriẽẽt ꞌcĩg abathĩ. 16Eet õmmõtõ hĩ ꞌramma ꞌcĩg ẽbẽra nẽẽ ho cieegi. ꞌThimõõnẽ ꞌcĩ akanneek Yeesu ꞌthaar ꞌcĩg haĩ Pẽẽtũrũ, 17ꞌJeemith hĩ ꞌgõtõnĩ Yõaannẽ, lõhõlĩ cĩg ꞌThebedeeo ꞌcĩg akanneek Yeesu ĩhõõggõ ꞌthaar ꞌcĩg haĩ Boanergeth, nĩngĩtĩ aĩ, “Lõhõlĩ cĩg Boroheecak.” 18Andrea, Pilippo, Bartolomeeo, Maatteeo, Tomaaꞌthio, ꞌJeemith ngeertĩ Aliveo, Tadeeo, ꞌThimõõnẽ baa gõõng ĩĩn ꞌThilot,#3:18 ꞌThilot: Ẽẽtĩ ꞌcĩ haĩ ꞌThilot ko, ĩĩn ꞌJudeeinit ꞌcĩ ĩĩn toromeec ꞌcĩ adiim iiggia habu cĩ ꞌRooma. 19hĩ ꞌJuuda Ithkarioote ꞌcĩ hatĩ õkõ õhõppõõcan Yeesu.

Yeesu hĩ ꞌBeelthebub

(Tigiil Maatteeo 12:22-32; ꞌLuuka 11:14-23; 12:10)

20Ma baa ũũk uduhun Yeesu ꞌcieeth, ikia uluttia lothippiti cobbi gẽrrẽẽt, hanyaman ĩnõõnnõ hĩ nuyyiook cĩgĩnnĩg ꞌgõõl ꞌcĩ aduhẽẽnĩ. 21Ma baa athĩhĩ ittioonnioha cĩgĩnnĩg thõõth icci ho, iita idiimito õõt utugurria ĩnõõnnõ aĩ hoottia ĩĩcĩ olu, hĩnĩngĩtĩ baa ammuk nẽẽg aĩ, “Adak ĩnõõnnõ maangõnĩ.”

22Baa õthõõth ꞌlimmanniooha ũgẽẽgĩ cĩg nyattal cĩ Mũũꞌtha, ꞌcĩg baag au ꞌJeruꞌthalẽma aĩ, “Aꞌnyak nẽẽ ꞌThĩttaan ꞌcĩ haĩ ꞌBeelthebub ẽllaa cĩnnĩ nẽ iiggia nẽẽ loriẽẽt ꞌcĩg abathĩ ho, makaaꞌthĩtaa ꞌcĩ ĩĩnnĩ habu cĩ loriẽẽt ꞌcĩg abathĩ.”

23Ma ho, ũtũvvũ Yeesu ĩhõõggõ hiita hĩ ĩnõõnnõ nẽ uduhaak thõõth ꞌcĩ awantoothĩk anneek, “Occa gõõng iiggia ꞌThĩttaanĩ ꞌThĩttaan ꞌgõõnĩ hutuno?”#3:23 ꞌThĩttaan: Ĩĩn ꞌThĩttaanĩ habu cĩ aajĩlẽẽt baag abũrĩ thõõth cĩ Nyekuci, nĩngĩtĩ iiggiaĩ Nyekuci ĩhõõggõ hẽẽtahujjieen. Tigiil ꞌBuuk cĩ Terethiitto 12:9. 24Má ẽꞌngẽrĩ habuccieet umwaa nẽ aꞌnyak jore ẽmmẽn, ĩꞌthaanni hatĩ habuccieet niccia. 25Nẽ má eꞌngerri eeta halangatõõ nẽ urukto nyaagwaana, aitiõõ hatĩ halang niccia hõllõngaa abĩlĩ ĩꞌthõng, ĩĩn hatĩ dtuurnanĩt cĩnnĩ niccia. 26Má ẽꞌngẽr ꞌThĩttaanĩ habuccieet cĩnnĩ hĩĩ mẽẽlĩg, aitiõõ hatĩ nẽẽ hõllõngaa aalla ĩꞌthõng, ĩꞌthaanni hatĩ nẽ ĩĩ dtuurnanĩt cĩnnĩ niccia. 27“Nẽ dĩdĩ, occa hõllõngaa aduhun ẽẽtĩ umwaa ꞌcieeth cĩ eet ꞌcĩ attiranĩ nẽ ũũhĩ ijjio cĩgĩnnĩg, hatĩ nga hẽcẽb ĩnõõnnõ. Occa nõõ ẽcẽb nẽẽ ĩnõõnnõ thõng, nẽẽthĩ ẽbẽlan ijjio cĩgĩnnĩg.

28“Haduhaakuung naa ngagiit dĩdĩ, ũũnnothoothĩk hatĩ eet ꞌthẽccanẽẽta vẽlẽk hĩ thooꞌthiok ꞌcĩg ĩĩn doominit vẽlẽk ꞌcĩg horoong aduha nẽẽgĩ, tananga habathit hẽlẽggĩ tĩko gẽrrẽẽt. 29Nẽẽthĩ, ẽẽtĩ ꞌcĩ õdõõm Lori ꞌcĩ Ẽllẽẽmĩthĩ, aitiõõ hatĩ hõllõngaa ũũnnothoothĩk ꞌthẽccanẽẽta cĩgĩnnĩg ũdũt, hĩnĩngĩtĩ ĩdĩman nẽẽ ꞌthẽccan ꞌcĩ aalla ooo.” 30Baa õthõõth Yeesu hoti, hĩnĩngĩtĩ baa aĩ eeta, “Aꞌnyak nẽẽ lori ꞌcĩ abathĩ ẽllaa cĩnnĩ.”

Aattĩ Yeesu hĩ ꞌgõtõõnõgĩ cĩgĩnnĩg

(Tigiil Maatteeo 12:46-50; ꞌLuuka 8:19-21)

31Ma nĩngaata, uppwaatta aattĩ Yeesu hĩ ꞌgõtõõnõgĩ, iita ĩbĩlĩt battaala nẽ ĩꞌthõõcõ eet umwa hũũk hũtũvvũ ĩnõõnnõ. 32Baa arũmĩ Yeesu hĩ lothippit cĩ eetu, nĩngĩtĩ annẽẽkĩ nẽẽg ĩnõõnnõ, “Aĩ nganiit morwahit arũmĩ hĩ ꞌgotoonogu hĩ ngoonogu battaala adiimmi nganiita.”

33Ẽdẽcĩ Yeesu ĩhõõggõ anneek, “Nganĩ ꞌcĩ ĩĩn morwahit caannĩ nẽ hĩnganĩ ꞌcĩg ĩĩn ꞌgotoonoga ho?” 34Nĩngĩtĩ akannĩ nẽẽ hẽbẽrĩ lothippit nẽ õthõõth ĩĩ, “Ĩĩn cieeg morwahit caannĩ hĩ ꞌgotoonoga hĩ ngoonoga cĩgannĩg! 35Ẽẽtĩ ꞌcĩ ammĩnan nẽ ũnũ thõõth cĩ Nyekuci, ĩĩn ꞌgõtõna hĩ ngõõna hĩ morwahit caannĩ.”

Currently Selected:

Maarko 3: did

Highlight

Copy