Maarko 11

Aduhun Yeesu ꞌJeruꞌthalẽm

(Tigiil Maatteeo 21:1-11; ꞌLuuka 19:28-40; Yõaannẽ 12:12-19)

1Ma baa õbõktĩ Yeesu hĩ nuyyiook cĩgĩnnĩg õdõlanit ꞌJeruꞌthalẽm, iita uppwaattak ꞌtaaũnniook ꞌcĩg haĩ Bẽthvaje hĩ Bẽthani Muuraa cĩ Olivi. Ma nĩngaata, ikia ĩꞌthõ Yeesu nuyyiook cĩgĩnnĩg ꞌramma hutuattĩ hõõt ĩĩcĩ oou. 2Baa aduhaak Yeesu ĩhõõggõ anneek, “Õõt õlõõ ꞌcĩ acinooꞌthu hata nẽ ma uduhuttu, ammũdoothiku hatĩ thigir ꞌcĩ hidici ꞌcĩ ecebbi ꞌcĩ nga hõtõõĩ eet umwaa ũdũt. Õõgta noho nẽ aꞌnyaktaau ngaati. 3Má ajinnuung eet umwaa anneekuung, ‘Ne ꞌcĩ adĩmannu ho?’ Uduktaak ĩĩttĩk, ‘Adiim Makayyioohiti thigir nẽ õbõdaanĩ hatĩ hĩdĩĩkoothong.’ ”

4Nĩngĩtĩ õõ ammũdõõthĩkĩ nuyyiooha cĩg Yeesu ho thigir tĩho dĩdĩ, ecebbi hattũũga ꞌgõõla. Ma baa aĩ hõõgtawa nẽẽg thigir ko, 5ajin hinnia eeta ũgẽẽgĩ ꞌcĩg baag abĩlĩ nĩngaata ĩhõõggõ anneek, “Ne ꞌcĩ adĩmannu niig hataa? Õõgannu thigir nicciaa inni?”

6Ma ho, edecit nuyyiooha ꞌgõõlaa ĩbaa aduhaakĩ Yeesu ĩhõõggõ, nĩngĩtĩ ẽlẽmaakĩ eeta tĩko ĩhõõggõ thigir hootti. 7Ma baa ootti nẽẽg thigir aꞌnyaktoothĩk Yeesu, õõt ataaddik ceremwa cĩggĩĩng bahuucaa cĩ thigiiro, nĩngĩtĩ ataadõõthĩkĩ Yeesu bahuuca lokora. 8Baa mẽẽlĩg eeta ꞌcĩg aara ceremwa cĩggĩĩng ꞌcĩg bungẽẽttak nẽ eteettik ꞌgõõla nẽ tarĩ eteettik ũgẽẽgĩ taba ꞌcĩg ẽꞌngẽdda mõrẽẽnĩtõõ. 9Baa awacak eeta ꞌcĩg baag uwwattĩ hĩ ꞌcĩg au uruta vẽlẽk aĩ,

“Hubuluthit Nyekuc!”

“Aꞌnyĩĩk Nyekuc haggatan eet ꞌcĩ aku ꞌthaarĩĩ cĩg Makayyiookto!”#Tigiil ꞌBuuk cĩ Tegellwaanu 118:25; 118:26

10“Aꞌnyĩĩk Nyekuc haggatan habuccieet ꞌcĩ hatĩ aku hĩ baangeet cĩnaac Daavide!”

“Hĩdĩhĩthĩt Nyekuc ꞌcĩ aaĩ hẽẽtahujjieen!”#11:10 Daavide: Baa ĩĩn Daavide habu cĩ Ĩꞌthĩraẽlĩ nẽ ĩĩ maaꞌnyĩ maajihi Yeesu baa ĩꞌthõõa Nyekuci hikia hĩĩ habu cĩ looc baa aggam Daavide. Tigiil ꞌBuuk cĩ ĩĩn 1 cĩ Thamueele 16:1-13; Dtiicanĩ cĩg ꞌThooyyiahu 2:30.

11Ma baa õdõlan Yeesu ꞌJeruꞌthalẽm, ũũk uduhun nẽẽ ꞌCieeth cĩ Nyekuci#11:11 ꞌCieeth cĩ Nyekuci: Baa ĩĩn ꞌCieeth cĩ Nyekuci hõdẽẽthõng ꞌJeruꞌthalẽma, aꞌnyak ꞌcieeth ciee nĩngĩtĩ hõdẽẽthõng ꞌcĩ ĩbbõõrĩkĩ paadĩrꞌnya Nyekuc ꞌgaarrieenit. Baa aaĩ Nyekuci bulẽẽtta ꞌCieethaa cĩnnĩ Ngaatĩ Aꞌngirannii Ẽllẽẽmĩth Gẽrrẽẽt ko. Paadĩr cobbi dioo ꞌcĩ aduhun Nĩngĩtĩ Aꞌngirannii ho, õkõõĩ biyyi cĩg ꞌgaarrieettak, hátĩ hũũk hũtũngeek Nyekuci ꞌthẽccanẽẽt cĩg eetuk. Tigiil thõõth icci ꞌBuuhaa cĩ Levitiko 16; Ebereei 9. nẽ atarraaban looc hĩcĩn hẽlẽggĩ vẽlẽk. Ma baa utub lõõcĩ, õõt nẽẽg hĩ ꞌthooyyiak cĩgĩnnĩg ĩĩcĩ Bẽthani.

Ĩccĩĩn Yeesu ꞌmũũnĩc

(Tigiil Maatteeo 21:18-19)

12Ma baa loohoth cĩnnĩ, baa ũtũngteek Yeesu hĩ nuyyiook cĩgĩnnĩg Bẽthani, ikia adak ĩnõõnnõ magĩthĩ. 13Nĩngĩtĩ acĩnõõꞌthĩ ꞌmũũnĩc umwa ꞌcĩ dhudhungik bõllõõha ꞌrẽẽna, ma aĩ hũũk hĩcĩn ko, ammũdoothĩk hinnia nga hõddõngõt buúk, hĩnĩngĩtĩ baa hõllõngaa nyĩlõk ꞌcĩ abbiirri ꞌmũũnĩ niccia. 14Ma nĩngaata, ĩccĩĩn Yeesu ꞌmũũnĩc nicci ĩĩnnĩk, “Hiꞌthihi hatĩ eet umwa ꞌcĩ aduki tarĩ ũdũt!” Nẽ baa athĩhĩ nuyyiooha cĩgĩnnĩg ĩnõõnnõ muguruur.

Itiggia Yeesu eet ꞌCieethaa cĩ Nyekuci

(Tigiil Maatteeo 21:12-17; ꞌLuuka 19:45-48; Yõaannẽ 2:13-22)

15Ma baa õdõlanit Yeesu hĩ nuyyiook cĩgĩnnĩg ꞌJeruꞌthalẽm, ũũk uduhun nẽẽ halaangatõõ cĩ ꞌCieeth cĩ Nyekuci nẽ ũũk itiggiawaak tuuyyiok ꞌcĩg baag ũũtẽnĩ ijjio cĩggĩĩng vẽlẽk battaala. Baa ebelluukan nẽẽ tẽrẽmẽẽjĩt cĩg eet ꞌcĩg appak ꞌrabbẽẽta hĩ dtaabĩt cĩg eet ꞌcĩg ũũtẽnĩ ngabuuthiꞌnya, 16nẽ hõllõngaa ẽlẽmaakĩ eet umwa ngaatĩ irrionganĩ ꞌgiimwa halangatõõ cĩ ꞌCieeth cĩ Nyekuci. 17Nĩngĩtĩ allimanĩ eet annẽẽkĩ, “Aĩ Nyekuci ꞌBuuhaa cĩnnĩ,

“ ‘Haĩ hatĩ ꞌCieeth caannĩ,

ꞌCieeth cĩ Laiitto, ꞌcĩ alaiini eeta vẽlẽk cĩg loonyinu.’#Tigiil ꞌBuuk cĩ Iꞌthaia 56:7

Auunnu hinnia niig aarru hĩĩ ‘nĩngĩtĩ aguꞌthẽẽnĩ igorriaaha!’ ”#Tigiil ꞌBuuk cĩ ꞌJeremia 7:11

18Ma baa athĩhĩ makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha thõõth icci ho, iita atarrabanit ꞌgõõl ꞌcĩ adiim aruhi Yeesu. Nẽ baa itieelli nẽẽg ĩnõõnnõ, hĩnĩngĩtĩ baa mẽẽlĩg eeta ꞌcĩg abulan ꞌlimmanĩ cĩnnĩ ho gẽrrẽẽt.

19Ma baa ĩĩ ꞌjiaatĩn lõõcĩ, uduhutta Yeesu hĩ nuyyiook cĩgĩnnĩg ꞌtaaũnaa cĩ ꞌJeruꞌthalẽmĩ battaala.

ꞌLimman cĩ ꞌmũũnĩcõ

(Tigiil Maatteeo 21:20-22)

20Ma baa loohoth cĩnnĩ ngerrenita, baa nga õvvõ Yeesu hĩ nuyyiook cĩgĩnnĩg ꞌgõõlaa, iita udtuukta nuyyiooha cĩgĩnnĩg ꞌmũũnĩc ngaatĩ õdõhõknĩ ĩꞌthõng hõdõlan cõrrẽẽna. 21Ĩko nẽẽ nga ammuhoothi Pẽẽtũrũ thõõth baa accĩĩnĩ Yeesu ꞌmũũnĩc, nĩngĩtĩ aduhaakĩ Pẽẽtũrũ Yeesu annẽẽkĩ, “Cĩĩn nõõ ꞌlimmannioohit, ꞌmũũnĩc baa acciinni nii ciee õdõhõk kak ko!”

22Ma nĩngaata, uduhaak Yeesu nuyyiook ĩĩnnĩk, “Aꞌnyahit lemiinit hĩ Nyekuc. 23Haduhaakuung naa ngagiit thõõth dĩdĩ, má aduhaak ẽẽtĩ umwaa muur icci anneek, ‘Bĩĩt dhuhoothĩk bũlũcatõõ,’ nẽ hõllõngaa akidan ꞌthĩnĩtatõõ cĩnnĩ nẽ ẽlẽm ĩĩ, ĩĩn hatĩ thõõth ꞌcĩ aduha nẽẽ ho dĩdĩ, aku ꞌthẽk hatĩ ĩĩn thõõth tĩho dĩdĩ. 24Nẽ haduhaakuung naa ngagiita, ꞌgii ꞌcĩ ajinnu niig laiitta, elemit ĩĩtõ ammũdaannu ꞌthẽk hatĩnĩ nẽ hatĩ ĩĩ ꞌgii tĩho cunuung. 25Nẽẽthĩ má alaiinnu, atamaattik nõõ eet ꞌcĩg adĩmannuung ngagiit ꞌbuth, hátĩ hatamaatihuung Maaꞌnyu ꞌcĩ aaĩ hẽẽtahujjieen ngagiit buúk, hĩnĩngĩtĩ ꞌthẽccanẽẽt cugguung. 26Nẽẽthĩ, má hõllõngaa ammaanniku niig eet ꞌcĩg adĩmannuung ngagiit ꞌbuth, aitiõõ hatĩ Maaꞌnyu ꞌcĩ aaĩ hẽẽtahujjieen hõllõngaa ammaannĩk ꞌthẽccanẽẽt cugguung buúk.”

Jinẽẽnĩt cĩ makaaꞌthĩt cĩ Yeesu

(Tigiil Maatteeo 21:23-27; ꞌLuuka 20:1-8)

27Iita oboddia Yeesu hĩ nuyyiook cĩgĩnnĩg ꞌJeruꞌthalẽma, ma nĩngaata, ikia õtõ Yeesu halangatõõ cĩ ꞌCieeth cĩ Nyekuci. Nĩngĩtĩ au ajini makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha hĩ makayyiook cĩg eetuk ĩnõõnnõ. 28Baa ajin nẽẽg Yeesu anneek, “Makaaꞌthĩt ꞌcĩ attiha nii ngaana ꞌcĩ adticanĩĩ hẽlẽggĩ iccig ko? Nganĩ ꞌcĩ aaꞌnyi nganiit makaaꞌthĩt icci ho?”

29Ẽdẽcĩ Yeesu ĩhõõggõ anneek, “Ĩꞌnya da hijinuung naa buúk ngagiit thõõth hõdẽẽthõng. Má ẽdẽccaangu jurrung, haduhaakuung thĩ hatĩ naa buúk ngagiit makaaꞌthĩt ꞌcĩ hadticanĩĩ hẽlẽggĩ iccig ko. 30Uduktaahaangu da, aku baa baattithimo cĩ Yõaannẽ hẽẽtahujjieen hĩ Nyekuc hode aku hĩ eet ꞌcĩ holli õõ haaga?”

31Nĩngĩtĩ ahĩkĩĩmanĩ nẽẽg nyaagwaana aĩnnĩ, “Hanneek occa ne? Má haĩ hĩĩttĩk, ‘Baa aku baattithimo cĩ Yõaannẽ hẽẽtahujjieen,’ anneekeet hinnia hatĩ, ‘Nẽ thĩ baa hõllõngaa elemmu niig Yõaannẽ inni?’ 32Nẽ ꞌgõõlaa umwaanĩ, baa ẽlẽmĩ eeta cieeg ngaatĩ ĩĩnnĩ Yõaannẽ põrõvẽtaac. Nẽẽthĩ, occa hõllõngaa haĩ eet cĩ holli õõ haaga, ꞌcĩ aaꞌnyĩk ĩnõõnnõ makaaꞌthĩt ꞌcĩ aggamẽẽkĩ eet baattithimo ho.”

33Ma ho, ĩĩttĩk nẽẽg Yeesu, “Aitiõõ hõllõngaa hagayyĩa naaga.”

Nĩngĩtĩ annẽẽkĩ Yeesu ĩhõõggõ buúk, “Hõllõngaa thĩ haduhaakuung naa buúk ngagiit, eet iina ꞌcĩ aaꞌnyaa nganĩĩt makaaꞌthĩt ꞌcĩ hadticanĩĩ thooꞌthiok iccig ko.”

Currently Selected:

Maarko 11: did

Highlight

Copy