Maatteeo 15

ꞌLimman cĩ hĩbaangĩ

(Tigiil Maarko 7:1-13)

1Baa au Variꞌtheei ũgẽẽgĩ hĩ ꞌlimmanniook cĩg nyattal cĩ Mũũꞌtha ꞌJeruꞌthalẽma nẽ iita ijinit Yeesu ĩĩttĩk, 2“Inni nuyyiooha cugunnig hẽꞌthẽcanit nyepitee#15:2 Nyepitee: Thõõthaa cĩ Nyekuci Dĩdĩngaayyi, ĩĩn nyepitee thooꞌthiok ꞌcĩg adĩman eeta cĩg ꞌJudeei ꞌcĩg hõllõngaa õõkõrõõ hĩ nyattal cĩ Nyekuci. cĩ makayyiook cĩg eetuk ko? Hõllõngaa nẽẽg ũũny athĩn cĩggĩĩng õõa ꞌcĩ duhẽẽttõ inni?”

3Ẽdẽcĩ Yeesu ĩhõõggõ anneek, “Inni niig ẽꞌthẽcanit tilooinit cĩ Nyekuci, hĩnĩngĩtĩ nyepitee cunuung ko? 4Hĩnĩngĩtĩ aduha Nyekuci aĩ, ‘Tingõlĩ maaꞌnyu hĩ ngaanu’#Tigiil ꞌBuuk cĩ Luugithõõ 20:12; Ditoronomi 5:16 nẽ ‘Ẽẽtĩ ꞌcĩ õdõõm maaꞌnyĩ hode aattĩnnĩ, occa aruhi nẽẽ hadaak.’#Tigiil ꞌBuuk cĩ Luugithõõ 21:17; Levitiko 20:9 5Othooꞌthu hinnia niig ainnu, má anneek eet umwaa maaꞌnyĩ hode aattĩnnĩ, ‘Eliiniti vẽlẽk ꞌcĩ occa baa heelli naa nganiita, ĩĩ ꞌbaaninit ꞌcĩ aaꞌnyĩhoothĩk Nyekuc.’ 6Ĩĩn occa ꞌthẽk ꞌgõõl ꞌcĩ iꞌngoliinnu maajihu hĩ ngaaggu cieeni? Amaaccu niig tilooinit cĩ Nyekuci nẽ unuyyu nyepitee cunuung. 7Niig oloꞌngiaaha cieegi! Baa ẽbẽaneek põrõvẽtaacĩ Iꞌthaia baa othooꞌthuung ngagiit aĩ,

8“ ‘Adĩhĩꞌthaa eeta cieeg nganĩĩt utugeetinii cĩggĩĩng haaga,

nẽ ꞌrẽẽttĩg ꞌthinneeti cĩggĩĩng hĩ nganĩĩta.

9Abathĩ ngaatĩ alayya nẽẽg nganĩĩt,

hatĩ alliman nyattal cĩ eetu.’ ”#Tigiil ꞌBuuk cĩ Iꞌthaia 29:13

ꞌGii ꞌcĩ aaꞌnyĩk eet hĩĩtõ ꞌriiring

(Tigiil Maarko 7:14-23)

10Nẽ ũtũvvũ Yeesu lothippit hiita hĩ ĩnõõnnõ nẽ ĩĩnnĩk, “Ĩthĩktõ nẽ agaac jurrung aĩ, 11ꞌgii ꞌcĩ aduhun ũtũũgaa cĩ eeto, hõllõngaa aaꞌnyĩk ĩnõõnnõ hĩĩ ‘ꞌriiring,’ nẽ thõõth ꞌcĩ aduha ẽẽtĩ ũtũũgaa cĩnnĩ, ĩĩn ꞌgii ꞌcĩ aaꞌnyĩk ĩnõõnnõ hĩĩ ‘ꞌriiring,’ ko niccia.”

12Nẽ iita ijinit nuyyiooha cĩgĩnnĩg ĩnõõnnõ ĩĩttĩk, “Aga nii ngaatĩ õdõõmĩ Variꞌtheei thõõthaa ĩĩaa aduha niina?”

13Ẽdẽcĩ Yeesu ĩhõõggõ anneek, “Abbutanniaa hatĩ hẽẽna vẽlẽk ꞌcĩg baag hõllõngaa atiboolan Nyakangaan caannĩ ꞌcĩ aaĩ hẽẽtahujjieen cõrrẽẽnĩ noho. 14Ũtũngteek Variꞌtheei niccig ẽmmẽn! Aattĩg nẽẽg hĩ eeta ꞌcĩg rubettĩg ꞌcĩg atĩꞌthĩt ꞌgõõnõgĩ ꞌcĩg rubettĩg nẽ hatĩ udhuktoothĩk nẽẽg vẽlẽk ꞌwooratõõ.”

15Ẽdẽcĩ Pẽẽtũrũ ĩnõõnnõ anneek, “Duhaaheet da ngagĩĩt dtẽẽllẽn aag aduha nii awantoothĩhĩ.”

16Ẽdẽcĩ Yeesu anneek, “Aitiõõ eet umwaa hõrggẽẽnaa cunuung ꞌcĩ aga thõõth caannĩ ho tõõ? 17Hõllõngaa agayyu niig aĩ, ꞌgẽẽn ꞌcĩ aariku niig utugeetinii cugguung, õkõ hẽẽngatõõ nẽ uduhuna battaala? 18Nẽ thooꞌthioha ꞌcĩg aduhaannu niiga, au ꞌthinneetinitõõ cugguung. Nẽẽthĩ, thooꞌthiok iccig ꞌcĩg aaꞌnyuung ngagiit ĩĩtõ ꞌriiring ko. 19Adukna ꞌthinneetini cugguung muhẽẽnĩtĩ ꞌcĩ abathĩ, ruhẽẽnĩt hĩ ꞌtihẽẽnĩt cĩ ngaa cĩ eeto, hĩ ꞌtihõõnĩt tahatak, hĩ ĩgõr hĩ thooꞌthiok ꞌcĩg addangaakĩ eeta ꞌgõõnõgĩ hĩ ngaatĩ aduhaanĩ eeta thooꞌthiok ꞌcĩg abathĩ hẽꞌthẽcanit ꞌthaar cĩg eet umwa. 20Thooꞌthiok ꞌcĩg aaꞌnyĩk eet hĩĩtõ ꞌriiring ko nicciag, nẽẽthĩ, ma aduhi ẽẽtĩ nga hũtũũnyĩ, hõllõngaa occa aaꞌnyĩk ĩnõõnnõ hĩĩ ꞌriiring.”

Lemiinit ꞌcĩ ngaaõ

(Tigiil Maarko 7:24-30)

21Ikia ũtũngeek Yeesu nĩngĩtĩ niccia nẽ ũũk ĩĩcĩ looc ꞌcĩ õbõhõõ hĩ ꞌtaaũnniook cĩg ꞌTire hĩ ꞌThidõõnẽ. 22Ma ho, ikia uppwaanna ngaa umwaa ꞌcĩ ĩĩn Kanaaneenit cĩ looc niccia, arruyyia ꞌjieena aĩ, “Makayyioohit, Ngeertĩ Daavide, tamaatĩhaanĩ! Appĩĩrna loholeec caannĩ aꞌnyak loriẽẽt ꞌcĩg abathĩ.”

23Baa ĩjjaaki Yeesu hõllõngaa ẽdẽcĩ ĩnõõnnõ. Ma nĩngaata, iita nuyyiooha cĩgĩnnĩg uduktaak Yeesu ĩĩttĩk, “Tiggiaeek ngaa nicci ꞌgõõla, hĩnĩngĩtĩ arruui nẽ ũnũeet ngagĩĩta.”

24Ẽdẽcĩ Yeesu aĩ, “Baa hĩꞌthooyyiahi naa eet cĩg Ĩꞌthĩraẽlĩ diooni! Hĩnĩngĩtĩ baa aauto nẽẽg hĩ aꞌtha ꞌcĩg iꞌngittõõthĩ.”

25Nĩngĩtĩ aku akannĩ ngaa nicciee huruꞌnyia muumaa cĩnnĩ nẽ ĩĩnnĩk, “Makayyioohit ẽlaanĩ!”

26Ẽdẽcĩ Yeesu anneek, “Hõllõngaa abũnnaa ngaatĩ attikiaanĩ ꞌgẽẽn cĩ loholeenu nẽ udhuhoothĩk ũthũrẽẽta.”#15:26 Lõhõlĩ hĩ ũthũrẽẽta: Lohollia ꞌcĩg õthõõth Yeesu ngaati ho, ĩĩn eet cĩg ꞌJudeei nẽ ũthũrẽẽta ꞌcĩg õthõõth nẽẽ ngaati ho, ĩĩn eet ꞌcĩg hõllõngaa ĩĩn ꞌJudeei. Baa gõõng athim eeta cĩg ꞌJudeei eet cĩrrĩĩng haauto hĩ ũthũrẽẽta. Nẽ ammĩnan Yeesu eet cĩg ꞌJudeei hĩ eet ꞌcĩg hõllõngaa ĩĩn ꞌJudeei buúk nẽ baa ĩꞌthõõa Nyekuci ĩnõõnnõ hikia hẽẽla eet vẽlẽk loota nĩnga.

27Ẽdẽcĩ ngaa nicciee aĩ, “Dĩdĩ Makayyioohit, tananga ũthũrẽẽta buúk, nga ꞌthẽk au auran thuruthur ꞌcĩg adhuhi tẽrẽmẽẽjawaa ꞌcĩ aduhẽẽnĩ makayyiooha cĩggĩĩng.”

28Ẽdẽcĩ Yeesu anneek, “Ngaa cieeni, aꞌnyahi nii lemiinit cobbi gẽrrẽẽt! Hẽlẽma naa thõõth ꞌcĩ ajini nii ho.” Nĩngĩtĩ abũnnayyĩ bũhaanyĩnĩ ꞌthaa niccia noho.

Aaꞌnyĩk Yeesu eet hũbũttaathõ

29Ma nĩngaata, ẽdẽc Yeesu dẽmẽt cĩ Bũlũc cĩ ꞌGalileea nẽ õtõd muur ũũk aau loota. 30Ma nĩngaata, ikia lothippiti umwaa cobbi gẽrrẽẽt, ꞌcĩ aꞌnyaha eet ꞌcĩg ngõõlĩg, hĩ ꞌcĩg rubettĩg hĩ ꞌcĩg hõllõngaa õthõõthĩ. Nẽ aarrik ĩhõõggõ vẽlẽk loota muumaa cĩ Yeesu. Nĩngĩtĩ aaꞌnyĩkĩ nẽẽ ĩhõõggõ vẽlẽk hũbũttaathõ. 31Ma nĩngaata, iita atalit eeta hõdẽĩ hõdẽĩ, hĩnĩngĩtĩ ꞌgii ꞌcĩ adtuuha hĩ ꞌcĩ athĩhĩ nẽẽgĩ. Iita othoothito eeta baag hõllõngaa õthõõthĩ. Iita õtõõcõ ꞌngoolliaha nẽ ĩcĩttĩ eeta baag rubettẽẽgĩ nẽ ĩdĩhĩthĩt eeta Nyekuc cĩ Ĩꞌthĩraẽlĩ.

Arũgũth Yeesu eet aalibꞌnya ꞌwec

(Tigiil Maarko 8:1-10)

32Baa avva Yeesu nuyyiook cĩgĩnnĩg hiita hĩ ĩnõõnnõ nẽ uduhaak ĩĩnnĩk, “Ammaannĩkaa eeta cieeg nganĩĩt gẽrrẽẽt, baa hũrũmteea hĩ ĩhõõggõ waathinniook iyyio nẽ hiꞌthihi ꞌgẽẽn ꞌcĩ adak buúk. Nẽ ꞌyioko, hõllõngaa hadiimi hĩꞌthooihi ĩhõõggõ ꞌgõõl uraa, occa hinnia hatĩ ẽttẽẽd looc ꞌgõõla.”

33Ẽdẽcĩ nuyyiooha cĩgĩnnĩg aĩ, “Hammũda ꞌyioko hatĩ ũbũnẽẽt ꞌcĩg ũũppan ngaatĩ hiroktĩ lothippit icci ngaatĩ ꞌrẽẽnĩ ho hutuno?”

34Ẽdẽcĩ Yeesu ĩhõõggõ tarĩ anneek, “Aꞌnyaku niig ũbũnẽẽt thõng?”

Ẽdẽcĩ nẽẽg aĩ, “Haꞌnyaka ũbũnẽẽt tũkĩramma hĩ ulugo ũgĩ cĩg kidicig haaga.”

35Nĩngĩtĩ aduhaakĩ Yeesu lothippit haau loota. 36Ma ho, ittiha nẽẽ ũbũnẽẽt ꞌcĩg ĩĩn tũkĩramma hĩ ulugo ꞌcĩg abadtẽc ko, ma baa ĩĩnnĩk nẽẽ Nyekuc Maaꞌnyĩ ĩlaallẽ, ikia ẽꞌngẽr nẽẽ ũbũnẽẽt nẽ aaꞌnyĩk nuyyiook cĩgĩnnĩg, heꞌngerrieek lothippit.

37Iita udukto nẽẽg vẽlẽk hũũppattĩ. Ma baa urutaa ꞌcĩ duhẽẽttõ, iita uluttia nuyyiooha cĩgĩnnĩg thuruthur cĩg ũbũneetu lohoddwa tũkĩramma ꞌcĩg abbĩꞌthĩĩ. 38Baa ĩĩn eeta ꞌcĩg aduhi ho vẽlẽk, aalibꞌnya ꞌwec nẽ hõllõngaa agiili ngaaĩ hĩ lõhõlĩ ꞌcĩg kidicig. 39Ma baa ĩꞌthooĩk Yeesu lothippit ꞌgõõl ẽlẽk, ikia uduhun nẽẽ haahũl nẽ abaahĩ ũũk ĩĩcĩ ũbũtĩ cĩ looc ꞌcĩ haĩ Magadan.

Currently Selected:

Maatteeo 15: did

Highlight

Copy