Maatteeo 14

Daahĩth cĩ Yõaannẽ Batitta

(Tigiil Maarko 6:14-29; ꞌLuuka 9:7-9)

1Waathinnioohĩ nĩĩcag, baa ĩĩn Ẽrõõdẽ habu#14:1 Habu Ẽrõõdẽ: Ĩĩn ciee Ẽrõõdẽ Antipa baa ĩĩn habu baa aggameek Yõaannẽ Yeesu baattithimo. Tigiil thõõth cĩnnĩ ꞌBuuhaa cĩ Maatteeo 14:1; Maarko 6:14; ꞌLuuka 3:1; Dtiicanĩ cĩg ꞌThooyyiahu 4:27. Ĩĩn nẽẽ ngeertĩ Ẽrõõdẽ Cobbi baa ĩĩn habu baa adiim aruk Yeesu baa nga arrittiaa thõng. Tigiil thõõth cĩnnĩ ꞌBuuhaa cĩ Maatteeo 2:1-8; ꞌLuuka 1:5. Ma baa uruta, ikia aau habuui umwaa ꞌcĩ haĩ Ẽrõõdẽ Agirippa, ngeertĩ loholeec cĩ Ẽrõõdẽ Cobbi. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:1-13:1., ikia ĩthĩk nẽẽ nyeemuut cĩ Yeesu. 2Nĩngĩtĩ aduhaakĩ dticcianniook cĩgĩnnĩg annẽẽkĩ, “Ĩĩn ciee Yõaannẽ Batitta, ũrũga nẽẽ daahĩtha! Ĩnõõ ꞌcĩ aꞌnyahĩ ꞌtirrian ꞌcĩ adticanĩ thooꞌthiok ꞌcĩg ĩnaat eeta ho.”

3Baa aggam Ẽrõõdẽ Yõaannẽ hẽcẽb nẽ aarĩk baabuuthatõõ, hĩnĩngĩtĩ ngagõtõnõõnĩ ꞌcĩ haĩ Erodia, ngaa cĩ Pilippo,#14:3 Pilippo: Baa nga arũgĩ Pilippo, baa attik ꞌgotonnia Ẽrõõdẽ Antipa, Erodia ngaa cĩ Pilippo. 4hĩnĩngĩtĩ baa gõõng ara aduhaak Yõaannẽ ĩnõõnnõ anneek, “Aꞌngirannii ngaatĩ attihi ngaggotonoonu nga hadaak ꞌgotonu.” 5Baa adiim aruk Ẽrõõdẽ Yõaannẽ nẽ baa itieelli nẽẽ lothippit cĩ eetu, hĩnĩngĩtĩ baa aĩ nẽẽg, ĩĩn Yõaannẽ põrõvẽtaac.

6Ma baa õdõlanit waathinniooha cĩg karrama cĩ kõr baa arrittiaanĩ Ẽrõõdẽ, ikia tĩnaatĩ Erodia ũrũgũmeek eet cĩg karramaawak nẽ aaꞌnyĩk Ẽrõõdẽ haccamanoothĩk gẽrrẽẽt, 7nẽ ũbũtan ngaatĩ aaꞌnyĩkĩ ĩnõõnnõ ꞌgii vẽlẽk ꞌcĩ adiim nẽẽnĩ. 8Ma ho, ikia uduhaak bũhẽẽc nicci ngaannia ĩĩnnĩk, “Bĩĩt duhaak Ẽrõõdẽ anneek, ‘Hadiimi aarĩka õõ cĩ Yõaannẽ Batitta hẽddẽẽma.’ ” 9Baa hõllõngaa accamanoothĩk habuui, nẽẽthĩ, hĩnĩngĩtĩ lõbũtĩ baa aduha nẽẽ hẽbẽrẽẽnnĩĩ cĩg heerinnioohu, ikia uduhaak athegereec 10hũũk ĩĩcĩ baabuutho, hũũk hẽttẽẽda õõ cĩ Yõaannẽ Batitta. 11Nĩngĩtĩ aꞌnyakiaanĩ õõ cĩnnĩ hẽddẽẽma nẽ aaꞌnyĩhoothĩk bũhẽẽc nicci haꞌnyahoothĩk aattĩnnĩ. 12Ma ho, iita ootti nuyyiooha cĩg Yõaannẽ ẽlẽ cĩnnĩ nẽ õõt adaacõ. Nĩngĩtĩ õõ aduhaakĩ Yeesu daahĩth nicci.

Aaꞌnyĩk Yeesu eet aalibꞌnya ꞌtur ꞌgẽẽn

(Tigiil Maarko 6:30-44; ꞌLuuka 9:10-17; Yõaannẽ 6:1-14)

13Ma baa urutaa ꞌcĩ ĩthĩhĩ Yeesu daahĩth cĩ Yõaannẽ, ikia abaahĩ nẽẽ bũlũc cĩ ꞌGalileea ũũk ngaamwaanĩ ngaatĩ õkõ aayyi ẽmmẽn. Ma baa athĩhĩ eeta thõõth icci ho, iita ũnnẽẽcõ ĩnõõnnõ lothippiꞌnya ꞌcĩg au ꞌtaaũnnioohĩ ꞌthõõnĩ. 14Ma baa uduhuna Yeesu haahũla battaalaa, ikia ĩcĩn nẽẽ lothippit cĩ eetu nẽ atamaatĩk ĩhõõggõ, nĩngĩtĩ aaꞌnyĩkĩ eet ꞌcĩg õmmõõrĩ hũbũttaathõ.

15Ma baa ĩĩ ꞌjiaatĩn, iita ummuddiaak nuyyiooha ĩnõõnnõ nẽ ĩĩttĩk, “Ĩĩn nĩngitee ngadik nẽ utub lõõcĩ. Aꞌnyĩĩk lothippit hĩꞌthaanĩ hõõt hutuuyyia eeta ꞌgẽẽn olooyyiohĩ.”

16Ẽdẽcĩ Yeesu ĩhõõggõ anneek, “Hõllõngaa adiim occa õõ nẽẽg ĩĩmwaanĩ. Aanytĩk nõõ ĩhõõggõ ꞌgiimwa hadahit.”

17Ẽdẽcĩ nẽẽg anneek, “Haꞌnyaka naag ngaati ũbũnẽẽt ꞌtur hĩ ulugo ꞌramma thõng.”

18Ma ho, ĩĩnnĩk Yeesu ĩhõõggõ, “Aꞌnyaktahaangu da nganĩĩt ngaati,” 19nĩngĩtĩ aduhaakĩ nẽẽ eet haauto loota arteetta. Ma ho, ittiha nẽẽ ũbũnẽẽt ꞌcĩg ĩĩn ꞌtur hĩ ulugo ꞌcĩg ĩĩn ꞌramma ho nẽ ẽdẽẽnyõthĩ hẽẽtkujjieen nẽ aggatana nẽ appaha. Nĩngĩtĩ aaꞌnyĩkĩ nuyyiook cĩgĩnnĩg heꞌngerrieek eeta. 20Ma baa udukto eeta vẽlẽk hũũppattĩ, iita uluttia nuyyiooha ꞌgẽẽn ꞌcĩ anyiꞌthiaa abbĩꞌthĩĩ lohoddwa õmmõtõ hĩ ꞌramma. 21Baa ĩĩn eeta ꞌcĩg maacĩg ꞌcĩg aduhi aalibꞌnya ꞌtur (5,000) nẽ hõllõngaa agiili ngaaĩ hĩ lõhõlĩ ꞌcĩg kidicig.

Õvvõ Yeesu maamĩ hujjieen

(Tigiil Maarko 6:45-52; Yõaannẽ 6:15-21)

22Ma nĩngaata, ikia uduhaak Yeesu nuyyiook cĩgĩnnĩg hotodit haahũl habaaktĩ bũlũc hoboddioothĩ ĩĩaa auuni, nga ĩꞌthaan nẽẽ lothippit hõõt. 23Ma baa urutaa ꞌcĩ ĩꞌthaanĩ nẽẽ lothippit, ikia õtõd muur ĩĩcĩ õkõ aayyi ẽmmẽn nẽ ũũk alaõ. Baa aaĩ nẽẽ ĩĩca ẽmmẽn ĩꞌthõng hĩĩ ꞌjiaatĩn lõõcĩ, 24nẽ ꞌthaa niccia, ikia ĩĩ ꞌrẽẽn haahũlĩ gẽrrẽẽt hĩ dẽmẽt cĩ bũlũcõ. Baa uuhan ngõõtĩ hĩdda haahũl nẽ õtõmõõcõ maama buúk gẽrrẽẽt.

25Ma baa õbõhĩ alĩĩthĩ, ikia otooyyia Yeesu maamĩ hujjieen ũmmũdaak nuyyiook cĩgĩnnĩg. 26Ma baa atiny nuyyiooha ĩnõõnnõ ho, ammuk hinnia nẽẽg aĩ miningit. Nĩngĩtĩ akulẽẽkĩ ꞌjieen hurruuyyio.

27Ma hĩdĩĩkoothong, ikia othoothĩk Yeesu ĩhõõggõ ĩĩnnĩk, “Aanytĩk ꞌthinneeti hokomit! Nganĩĩt Yeesu. Ma hiteelinnu.”

28Ẽdẽcĩ Pẽẽtũrũ ĩnõõnnõ anneek, “Makayyioohit, má ĩĩnĩ nganiit dĩdĩ, tũvvaa hotooyyia maamĩ lokora hikia hĩ nganiita.”

29Ẽdẽcĩ Yeesu ĩnõõnnõ anneek, “Tooyyia ijjia!”

Nĩngĩtĩ ĩꞌngõthaanĩ Pẽẽtũrũ haahũla battaala nẽ õtõ maamĩ hujjieen ũũk ĩĩcĩ aayyi Yeesu. 30Ma ho, ĩcĩn Pẽẽtũrũ ngaatĩ attiranĩ ngõõtĩ nẽ itingõlĩ, nĩngĩtĩ iꞌthianaanĩ iithoĩ maamĩtõõ nẽ urruuo ĩĩ, “Ẽlaanĩ Makayyioohit!”

31Ma hĩdĩĩkoothong, aggam Yeesu aꞌthiit cĩ Pẽẽtũrũ hõdõnga ĩnõõnnõ nẽ ĩĩ, “Hĩdĩc lemiiniti cunnẽẽnĩ. Akidani inni?”

32Ma baa õdõlanit Yeesu hĩ Pẽẽtũrũ haahũl, ikia ĩjjaahõ ngõõtĩ, 33nĩngĩtĩ au alaĩ nuyyiooha ꞌcĩg baag aattĩg haahũlatõõ Yeesu annẽẽkĩ, “Ĩĩnĩ nii Ngeertĩ Nyekuci dĩdĩ!”

Aaꞌnyĩk Yeesu moorriak hũbũttaathõ

(Tigiil Maarko 6:53-56)

34Iita abaaktĩ Yeesu hĩ nuyyiook cĩgĩnnĩg bũlũc cĩ ꞌGalileea nẽ õdõlanit dẽmẽt cĩ nĩngĩtĩ haĩ ꞌJẽnẽꞌtharẽt. 35Ma ho, iita ummuddia eeta ngaatĩ aayyi nẽẽ nĩngaata. Nĩngĩtĩ ĩꞌthanõthõõthĩkĩ nyeemuut looc tĩho vẽlẽk, ma hĩdĩĩkoothong iita aꞌnyaktaak eeta ĩnõõnnõ eet ꞌcĩg õmmõõrĩ vẽlẽk, 36hiita halaacõ Yeesu hẽlẽmaahĩ eet ꞌcĩg õmmõõrĩ huhumit ceremwa cĩgĩnnĩg, nẽ eeta vẽlẽk ꞌcĩg baag uhumit ĩnõõnnõ, iita ũbũttaathõ.

Currently Selected:

Maatteeo 14: did

Highlight

Copy