Yõaannẽ 21
21
Uppwaannak Yeesu nuyyiook cĩgĩnnĩg tũkĩramma
1Ma baa uruta, uppwaannak Yeesu nuyyiook cĩgĩnnĩg tarĩ dẽmẽtaa cĩ Bũlũc cĩ Tiberia. Baa aaĩ thõõth hoti. 2Baa arũmĩ ꞌThimõõnẽ Pẽẽtũrũ hĩ Tomaaꞌthio ꞌcĩ haĩ ꞌthaar ũgĩ Diidimo hĩ Nathaniele ꞌcĩ aku ꞌtaaũnaa cĩ Kana looccaa cĩ ꞌGalileea, hĩ ꞌJeemith hĩ Yõaannẽ lõhõlĩ cĩg ꞌThebedeeo, hĩ nuyyiook ũgĩ ꞌramma nĩngaata. 3Ma ho, ĩĩnnĩk ꞌThimõõnẽ Pẽẽtũrũ ꞌgõõnõgĩ, “Nga hõkõ haggami naa ulugo.”
Ẽdẽcĩ ꞌgoonoggia anneek, “Hookorit hõdẽĩ.” Nĩngĩtĩ õtõdĩ nẽẽg haahũl õõĩ. Nẽẽthĩ hinnia, baalin niccia, baa aitiõõ ulugo ꞌcĩg aggam nẽẽg tõõ.
4Ma baa ngerrenita, ikia ĩbĩl Yeesu dẽmẽtaa cĩ bũlũcõ nẽ baa hõllõngaa aga nuyyiooha cĩgĩnnĩg ngaatĩ ĩĩnnĩ Yeesu ũdũt. 5Nĩngĩtĩ aũyyĩ Yeesu ĩhõõggõ annẽẽkĩ, “Lõggõõ niccieegi! Nga aggamit ulugo ũgĩ buúk?”
Ẽdẽcĩ nẽẽg aĩ, “Aitiõõ tõõ!”
6Ma ho, uduhaak Yeesu ĩhõõggõ ĩĩnnĩk, “Udhukteek da nyelelewwa ĩĩcĩ aꞌthiit cobbi, hátĩ ummuddia ũgĩ.” Ma baa adhuheek ho, aggam hinnia ulugo ꞌcĩg mẽẽlĩg ꞌrĩng, hĩdĩddĩng nyelelewwa hanyaman ĩhõõggõ ngaatĩ agurraakĩ haahũlatõõ.
7Ma ho, uduhaak nuyyioohiti baa gõõng ammĩnan Yeesu Pẽẽtũrũ ĩĩnnĩk, “Ĩko Makayyioohit niccieeni!” Ma athĩhĩ ꞌThimõõnẽ Pẽẽtũrũ ngaatĩ abbũũngĩ aĩnnĩ, “Ĩko Makayyioohit ho,” ikia itihim cẽrẽm ꞌcĩ baa aara nẽẽnĩ nẽ ĩꞌngothoothĩk maamĩtõõ. 8Baa obokii haahũlĩ hĩ dẽmẽt, aꞌnyak mĩĩtĩrꞌnya ꞌmiia hõdẽĩ. Nĩngĩtĩ idionganĩ nuyyiooha ũgẽẽgĩ haahũlatõõ nẽ utugurrieek haahũl hĩ nyelelewwa ꞌcĩg abbĩꞌthĩĩ ulugo ho ĩĩcĩ demeto. 9Ma baa adukna nuyyiooha haahũla battaala ho, iita udtuukta ũbũnẽẽt ũgĩ hĩ ꞌgwoo ꞌcĩ ĩwaadini ulugo.
10Nĩngĩtĩ annẽẽkĩ Yeesu ĩhõõggõ, “Iitaaĩ da ulugo aag nga aggammu thõng ũgĩ.”
11Ma ho, õtõd ꞌThimõõnẽ Pẽẽtũrũ ũũk haahũlatõõ nẽ utuguraak nyelelewwa dẽmẽta. Nyelelewwaatõõ nĩĩcĩ, baa ĩĩn ulugo ꞌcĩg obbitig ꞌmiia hõdẽĩ hĩ hẽẽn ꞌtur hĩ iyyio (153) nẽ hõllõngaa errecci nyelelewwa buúk.
12Nĩngĩtĩ aũyyĩ Yeesu ĩhõõggõ annẽẽkĩ, “Iita udukto!” Nẽẽthĩ, baa hõllõngaa aallak nuyyiooha ngaatĩ ajini annẽẽkĩ, “Nganĩ nẽẽ?” Hĩnĩngĩtĩ baa agaacõ nẽẽg ngaatĩ ĩĩnnĩ Makayyioohit. 13Ma ho, ikia uurana Yeesu ũbũnẽẽt niccig nẽ eꞌngereek ĩhõõggõ nẽ ẽꞌngẽr ulugo buúk. 14Baa ĩĩ ciee tabattĩ iyyio, ꞌcĩ uppwaannakĩ nẽẽ nuyyiook cĩgĩnnĩg nganĩngĩtĩ arũgnaanĩ nẽẽ daahĩtha.
Yeesu hĩ Pẽẽtũrũ
15Ma baa urutaa ꞌcĩ duhẽẽttõ, ĩĩnnĩk Yeesu ꞌThimõõnẽ Pẽẽtũrũ, “ꞌThimõõnẽ ngeertĩ Yõaannẽ, ammĩnannaa nii nganĩĩt ꞌlõõan ꞌgoonogu iccig?”
Ẽdẽcĩ ꞌThimõõnẽ Pẽẽtũrũ anneek, “Eei Makayyioohit, aga ꞌthẽk nii ngaatĩ hammĩnanni naa nganiita.”
Ẽdẽcĩ Yeesu Pẽẽtũrũ anneek, “Tirok aꞌtha cĩgannĩg.”
16Ma tarĩ ho, ijin Yeesu ĩnõõnnõ tabattĩ ꞌramma ĩĩnnĩk, “ꞌThimõõnẽ ngeertĩ Yõaannẽ, ammĩnannaa nii nganĩĩta?”
Ẽdẽcĩ Pẽẽtũrũ anneek, “Eei Makayyioohit, aga nii ngaatĩ hammĩnanni naa nganiita.”
Ẽdẽcĩ Yeesu anneek, “ꞌThũũtĩ aꞌtha cĩgannĩg!”#21:16 Aꞌtha cĩgannĩg: Ma õthõõth Yeesu aꞌtha cĩgĩnnĩg, õthõõth nẽẽ eet ꞌcĩg ĩĩn nuyyiook cĩgĩnnĩg.
17Ma ĩcĩ ĩĩn iyyio cĩnnĩ, õbõdẽẽhĩ Yeesu ijin ꞌThimõõnẽ Pẽẽtũrũ ĩĩnnĩk, “ꞌThimõõnẽ ngeertĩ Yõaannẽ, ammĩnannaa nii nganĩĩta?”
Ma nĩngaata, ikia õmmõthĩ Pẽẽtũrũ gẽrrẽẽt ngaatĩ ajini Yeesu ĩnõõnnõ tabattĩ iyyio. Nĩngĩtĩ ẽdẽcĩ annẽẽkĩ, “Makayyioohit, aga nii thooꞌthiok vẽlẽk, aga ngaatĩ hammĩnanni naa nganiita.”
Ẽdẽcĩ Yeesu anneek, “Tirok aꞌtha cĩgannĩg. 18Haduhaakii dĩdĩ, baa nga ĩĩnĩ nii nyahaappan, baa gõõng ahimiti ẽlẽ cunni ẽmmẽn nẽ uuhu ĩĩcĩ adiimi niina. Nẽẽthĩ ma atahaanyu, odongi hatĩ athĩn cugunnig nẽ itihimttii eeta cĩrrĩĩng nẽ ootti ĩĩcĩ hõllõngaa adiimi niina.” 19Baa aduha Yeesu thõõth icci, hátĩ hẽtẽrẽtha ꞌgõõl ꞌcĩ hatĩ adaaknĩ Pẽẽtũrũ haꞌnyahaak Nyekuc bulẽẽnĩt. Nĩngĩtĩ annẽẽkĩ ĩnõõnnõ, “Nũaanĩ!”
Yeesu hĩ nuyyioohit baa ammĩnan nẽẽnĩ
20Ma baa ho, ubbuudi Pẽẽtũrũ nẽ udtuuha nuyyioohit baa ammĩnan Yeesu ngaatĩ anũĩ ĩhõõggõ. Baa eejehoothĩk nuyyioohiti ciee Yeesu baa aduhi nẽẽg ꞌjiaat nẽ ijin ĩnõõnnõ ĩĩnnĩk, “Makayyioohit, nganĩ hõrggẽẽnaa cĩnaang ꞌcĩ hatĩ õhõppõõcannii nganiit ko?” 21Ma baa acĩn Pẽẽtũrũ ĩnõõnnõ ho, ijin nẽẽ Yeesu ĩĩnnĩk, “Makayyioohit, ma ꞌyioko nuyyioohit icci?”
22Ẽdẽcĩ Yeesu anneek, “Má hadiimi naa ĩnõõnnõ hũrũg ĩꞌthõng hõbõda naana, ne niccia hĩ nganiit? Adiim anũyyaa nii nganĩĩta.” 23Hĩnĩngĩtĩ thõõth icci, iita ithithanit nuyyiooha thõõth icci ĩĩtõ, iittiõõ hatĩ nuyyioohiti nicciee hõllõngaa adaahĩ. Nẽẽthĩ, baa hõllõngaa aĩ Yeesu, hõllõngaa hatĩ adaahĩ nẽẽnĩ. Baa aduha nẽẽ thõõth hõdẽẽthõng diooni ꞌcĩ aĩ, “Má hadiimi naa ĩnõõnnõ hũrũg ĩꞌthõng hõbõda naana, ne niccia hĩ nganiit?”
24Nuyyioohit ꞌcĩ aduha thooꞌthiok iccig vẽlẽk ko cieeni nẽ eteheedĩk loota. Haga naag ĩĩn thõõth ꞌcĩ aduha nẽẽ ho dĩdĩ.
25Baa adtican Yeesu thooꞌthiok ũgĩ ꞌcĩg mẽẽlĩg gẽrrẽẽt buúk. Má baa heteheeddi thooꞌthioha cieeg vẽlẽk loota, hammuhi occa baa hõllõngaa aꞌnyak lõõcĩ vẽlẽk, nĩngĩtĩ occa aarĩhõõthĩkĩ ꞌbuuhẽta ꞌcĩg eheeddi ho vẽlẽk.
Currently Selected:
Yõaannẽ 21: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
