Yõaannẽ 20

Ũrũga Yeesu daahĩtha

(Tigiil Maatteeo 28:1-10; Maarko 16:1-8; ꞌLuuka 24:1-12)

1Ma baa lomidikaawa ngerrenita, baa õbõhĩ aal lõõcĩ, ikia ũũk Maria Madalẽẽna ĩĩcĩ ꞌloohu. Ma baa õdõlan nẽẽ ꞌlook ko, ammũdõõthĩk hinnia eꞌnyeehoothĩk bẽẽ ꞌcĩ baa aꞌnyũũgẽnĩ ꞌlook ko ngadiiha. 2Nĩngĩtĩ avviri nẽẽ ammũdõõthĩkĩ ꞌThimõõnẽ Pẽẽtũrũ hĩ nuyyioohit umwa baa ammĩnan Yeesu nẽ uduhaak ĩhõõggõ ĩĩnnĩk, “Ammanyattõõĩ eeta ẽlẽ cĩ Makayyiookto ꞌloohatõõ nẽ hõllõngaa haga nĩngĩtĩ õõ aarĩkĩ ẽlẽ cĩnnĩ!”

3Ma nĩngaata, ĩtĩngaacõ Pẽẽtũrũ hĩ nuyyioohit ꞌcĩ ammĩnan Yeesu ho, õõt ĩĩcĩ ꞌloohu. 4Baa avvir nẽẽg ꞌrammaattĩg, nẽẽthĩ hinnia, baa avvir nuyyioohiti ꞌcĩ umwa ho, hĩjjaar Pẽẽtũrũ hũũk hitiman ꞌlook ĩĩcĩ oou. 5Nĩngĩtĩ õkõ iiõnõõꞌthĩ nẽẽ ꞌlook nẽ ẽdẽẽnyõthĩ cẽrẽm ngaatĩ aayyi nĩngaata, nẽẽthĩ, baa hõllõngaa aduhun nẽẽ ĩĩttõõ.

6Ma baa õdõlan ꞌThimõõnẽ Pẽẽtũrũ baa anũa ĩnõõnnõ uruta ho, ikia ũũk edeceek nẽẽ ꞌloohatõõ. Nĩngĩtĩ adtuuhanĩ cẽrẽm baa amũmmũũraniini ẽlẽ cĩ Yeesu 7hĩ cẽrẽm baa amũmmũũraniini muum cĩ Yeesu buúk, ngaatĩ atũllũngẽẽnĩ ẽmmẽn nĩngaata. 8Ma urutaa cĩnnĩ, ikia uduhun nuyyioohiti baa õdõlan ꞌlook ĩĩcĩ oou buúk ĩĩttõõ. Nĩngĩtĩ acĩnĩ nẽ ẽlẽma. 9Baa nga hagaacõ nẽẽg thõõth cĩ ꞌBuuk cĩ Nyekuci baa aĩ, arũgna hatĩ Yeesu daahĩtha. 10Nĩngĩtĩ õbõdõõꞌthĩ nuyyiooha olooyyiohĩĩ cĩggĩĩng.

Uppwaannak Yeesu nuyyiook hĩ Maria Madalẽẽna

(Tigiil Maarko 16:9-11)

11Baa abĩlĩ Maria Madalẽẽna battaalaa cĩ ꞌloohu nẽ utulu. Ma baa nga alu nẽẽnĩ, ikia iiõnõõthĩ ꞌlook, 12nẽ udtuuha aajĩlẽẽt ꞌramma ꞌcĩg ahimit ceremwa ꞌcĩg õõrĩg, aattĩg loota nga baa aarĩhõõthĩkĩ ẽlẽ cĩ Yeesu. Baa aaĩ aajĩlõ umwa ĩĩcĩ oou nẽ aau umwaa ĩĩcĩ ꞌthoonu.

13Nĩngĩtĩ ajini aajĩlẽẽta Maria annẽẽkĩ, “Alu inni?”

Ẽdẽcĩ nẽẽ anneek, “Halu hĩnĩngĩtĩ ootti eeta ẽlẽ cĩ Makayyioohit caannĩ nẽ hõllõngaa haga õõ aarĩk ĩĩna?”

14Ma nĩngaata noho, ubbuudi nẽ udtuuha Yeesu ngaatĩ abĩllĩ nĩngaata, nẽẽthĩ hinnia, baa hõllõngaa aga nẽẽ ngaatĩ ĩĩnnĩ Yeesu ꞌcĩ abĩlĩ ho.

15Ma ho, ijin Yeesu ĩnõõnnõ ĩĩnnĩk, “Alu inni? Nganĩ ꞌcĩ adiimi nii ho?”

Baa hinnia ammuk Maria aĩ, baattĩ manu ꞌcĩ ajin ĩnõõnnõ ho, nĩngĩtĩ annẽẽkĩ, “Ẽẽtĩ ciee, má ĩĩn nganiit ꞌcĩ õkõõĩ ẽlẽ cĩ Makayyiookto ho, duhaahaa baaĩ nuun, hátĩ hũũk haꞌnyaha.”

16Nĩngĩtĩ aũyyĩ Yeesu ĩnõõnnõ annẽẽkĩ, “Maria.”

Ma ho, ubbuudi nẽẽ nẽ ĩĩnnĩk Yeesu Aramaayyi, “Rabboni!” nĩngĩtĩ aĩ, ꞌLimmannioohit.

17Ma nĩngaata, uduhaak Yeesu ĩnõõnnõ ĩĩnnĩk, “Ma nõõ harabũũttaanĩ, nga hobodooth naa hĩ Baaba. Bĩĩt nõõ hĩ ꞌgotoonoga nẽ uduhaahu ĩhõõggõ ĩĩnnĩhuu, ‘Hobodootha naa hĩ Baaba caannĩ ꞌcĩ ĩĩn Maaꞌnyu cunuung buúk, hĩ Nyekuc caannĩ nẽ ĩĩ Nyekuc cunuung buúk.’ ”

18Ma ho, ũũk ũmmũdoothĩk Maria Madalẽẽna nuyyiook nẽ uduhaak ĩhõõggõ nyeemuut ꞌcĩ aĩ, “Hĩcĩna naa Makayyioohit!” Nĩngĩtĩ aduhaakĩ nẽẽ ĩhõõggõ thõõth ꞌcĩ baa aduhaak Yeesu ĩnõõnnõ ho.

Uppwaannak Yeesu nuyyiook cĩgĩnnĩg

(Tigiil Maatteeo 28:16-20; Maarko 16:14-18; ꞌLuuka 24:36-49)

19Ma baa lomidikaawa nĩĩca ꞌjiaat, baa alũtĩ nuyyiooha ngaatĩ hõdẽẽthõng, aꞌnyũũg hattũũgẽt, hĩnĩngĩtĩ baa iꞌngolli nẽẽg eet cĩg ꞌJudeei. Ma ho, uppwaanna Yeesu hikia hĩbĩl hõrggẽẽnaa cĩnĩĩng nẽ ĩĩ, “Aꞌnyĩĩk ganõn haau hĩ ngagiita!” 20Ma baa uduha nẽẽ thõõth icci ẽlẽk, ikia eteretheek ĩhõõggõ ngatũbĩ athĩnĩĩ cĩgĩnnĩg hĩ habanyta. Baa accamanoothĩk nuyyiooha gẽrrẽẽt ngaatĩ acĩnĩ Makayyioohit!

21Nẽ õbõdẽẽhĩ Yeesu õthõõth tarĩ ĩĩ, “Aꞌnyĩĩk ganõn haau hĩ ngagiita! Hĩ baa ĩꞌthõõannaa nganĩĩt Baaba, hĩꞌthooyyuung naa ngagiit buúk.” 22Ma nĩngaata, ũtũbbeek ĩhõõggõ ꞌlaũk nẽ ĩĩnnĩk, “Erito Lori ꞌcĩ Ẽllẽẽmĩthĩ. 23Má ammaanniku niig ꞌthẽccanẽẽt cĩg eet umwa, ammaannĩk hatĩ Nyekuci buúk, má hõllõngaa ammaanniku niig ꞌthẽccanẽẽt cĩg eet umwa, aitiõõ hatĩ Nyekuci hõllõngaa ammaannĩk ꞌthẽccanẽẽt cĩg eet tĩho buúk.”

Uppwaannak Yeesu Tomaaꞌthio

24Baa aitiõõ Tomaaꞌthio ꞌcĩ haĩ ꞌthaar ũgĩ Diidimo tõõ,#20:24 Diidimo: ꞌThaara ꞌcĩg haĩ Diidimo ho, nĩngĩtĩ aĩ heengti. nuyyiõõhĩĩ ꞌcĩg ĩĩn õmmõtõ hĩ ꞌramma ho, kõr baa uppwaannanĩ Yeesu. 25Nĩngĩtĩ aduhaakĩ nuyyiooha ĩnõõnnõ annẽẽkĩ, “Iyyia hĩcĩtta naag Makayyioohit!”

Ẽdẽcĩ hinnia Tomaaꞌthio aĩ, “Occa hõllõngaa helemi naa thõõth icci, hatĩ nga hĩcĩn ngatũbĩ athĩnĩĩ cĩgĩnnĩg ĩbaag õdõõddĩ ꞌgũthũmaarĩtĩ nẽ huhuma ngatubeenit cĩ habanyit cĩnnĩ nga baa acuhanni dĩlaawa.”

26Ma urutaa cĩ lomidika hõdẽĩ, baa iita aauto nuyyiooha ꞌcieetõõ hõdẽĩ tarĩ, baa aattĩ aaĩ Tomaaꞌthio buúk kõr niccia. Tananga baa aꞌnyũũgĩ hattũũgẽta, ikia ĩbĩl Yeesu hõrggẽẽnaa cĩnĩĩng nẽ ĩĩ, “Aꞌnyĩĩk ganõn haau hĩ ngagiita!” 27Ma nĩngaata, ĩĩnnĩk nẽẽ Tomaaꞌthio, “Arĩĩk aꞌthiit cunni ngaati nẽ icinu athĩn cĩgannĩg. Arĩĩk aꞌthiit cunni ngatubeettaa caannĩ. Ma nga hĩccaadi tarĩ, lẽmõ!”

28Ma ho, ĩĩnnĩk Tomaaꞌthio ĩnõõnnõ, “Makayyioohit caannĩ hĩ Nyekuc caannĩ!”

29Nĩngĩtĩ aduhaakĩ Yeesu ĩnõõnnõ annẽẽkĩ, “Ẽlẽmmaa nii nganĩĩt, hĩnĩngĩtĩ ĩcĩnaa thõng. Aꞌnyĩĩk haggatan Nyekuci eet ꞌcĩg ẽlẽmma nganĩĩt nga hĩcĩttaanĩ.”

Thõõth ꞌcĩ ẽhẽẽdĩ Yõaannẽ ꞌBuuk cĩnnĩ

30Baa adtican Yeesu thooꞌthiok ũgĩ ꞌcĩg mẽẽlĩg ꞌcĩg ĩnaat eeta hẽbẽrẽẽnnĩĩ cĩg nuyyiook cĩgĩnnĩg ꞌcĩg nga heteheeddi ꞌBuuhaa cĩ. 31Nẽẽthĩ, baa eheeddi thooꞌthioha cieeg, hátĩ elemit niig ngaatĩ ĩĩnnĩ Yeesu Krĩstõ Ngeertĩ Nyekuci. Nẽ má elemtu, aꞌnyaku hatĩ rũgẽt ꞌcĩ aalla ũdũt ꞌthaarĩĩ cĩgĩnnĩg.

Currently Selected:

Yõaannẽ 20: did

Highlight

Copy