Dtiicanĩ cĩg ꞌThooyyiahu 5

Anania hĩ Thavira

1Baa aaĩ ẽẽtĩ umwaa ꞌcĩ haĩ Anania hĩ ngaa cĩnnĩ ꞌcĩ haĩ Thavira, ꞌcĩg baag ũũtẽnĩ ijjio ꞌcĩg abadtẽc. 2Ma hoti ho, iita elemit nẽẽg ngaatĩ itiangꞌthĩ ꞌrabbẽẽt ũgĩ nẽ aꞌnyaktoothĩk ũgĩ ꞌthooyyiak.

3Ma ho, ĩĩ Pẽẽtũrũ, “Anania, alũllũmannii ꞌThĩttaanĩ#5:3 ꞌThĩttaan: Ĩĩn ꞌThĩttaanĩ habu cĩ aajĩlẽẽt baag abũrĩ Nyekuc nẽ itiggia Nyekuci ĩnõõnnõ hẽẽtahujjieen. Tigiil ꞌBuuk cĩ Terethiitto 12:9.nganiit ꞌgõõl Lori ꞌcĩ Ẽllẽẽmĩth ngaatĩ itiangꞌthĩ ꞌrabbẽẽt aag aaꞌnyĩhoothikii, aa ũũtẽnĩ nii ijjio ho hutuno? 4Ĩĩn cieeg ijjio cugunnig aa nga tũũõĩ. Nẽ ma urutaa ꞌcĩ ũtũũõĩ ẽlẽk, nga ĩĩn ꞌrabbẽẽta buúk cugunnig? Nẽ neegi ꞌcĩ aaꞌnyi nganiit dĩman thõõth ꞌcĩ aaĩ hoti ho? Hõllõngaa iggooli nii eeta, iggooli Nyekuc.”

5Ma baa athĩhĩ Anania thõõth icci ho, ẽttẽẽd looc noho ꞌlir, nĩngĩtĩ adaaknĩ. Ma ho, aggam tẽẽlꞌthĩtĩ eet vẽlẽk ꞌcĩg baag athĩhĩ thõõth icci gẽrrẽẽt. 6Nĩngĩtĩ au ammũmmũũranĩ buul ũgẽẽgĩ ẽlẽ cĩnnĩ nẽ õõt ũmmũtĩta.

7Ma urutaa cĩ ꞌthaaꞌnya iyyio, uppwaanna ngaa cĩnnĩ ꞌcĩ baa hõllõngaa aga ne hatĩ ꞌcĩ abathĩ hĩ maac cĩnnĩ. 8Nĩngĩtĩ ajini Pẽẽtũrũ ĩnõõnnõ annẽẽkĩ, “Duhaahaa da nganĩĩt, ꞌrabbẽẽt hatĩ ꞌthẽk vẽlẽk ꞌcĩg hatĩ ũũtennu niig hĩ Anania ijjio ho cieegi?”

Ẽdẽcĩ nẽẽ aĩ, “Eei, ꞌrabbẽẽt ꞌthẽk tĩko nicciaagi.”

9Ma ho, ĩĩnnĩk Pẽẽtũrũ ĩnõõnnõ, “Atuhannu hatĩ niig vẽlẽk ꞌrammaattĩg hutuno ẽlẽmtõ ngaatĩ attĩmannu Lori ꞌcĩ Ẽllẽẽmĩth ko? Cĩĩn nõõ! ꞌCakaꞌthiook cĩg eet aag ada maac cunni hattũũga nẽ irrionganeeki hatĩ nganiit buúk battaala.”

10Ma ꞌthaa niccia noho, ẽttẽẽd Thavira looc ꞌthõõnĩĩ cĩg Pẽẽtũrũ, nĩngĩtĩ adaaknĩ noho ꞌthẽl. Ma baa õbõda buul ho, ummuddieek Thavira õdõhõhõõthĩ ẽlẽk. Nĩngĩtĩ irrionganĩ ĩnõõnnõ nẽ adaacõ hõbõktõ hĩ maac cĩnnĩ. 11Baa aggam lothippit cĩ lemmioohu tẽẽlꞌthĩtĩ cobbi gẽrrẽẽt baa ĩthĩhĩt thõõth icci.

Aanytĩk ꞌthooyyiaha eet ꞌcĩg mẽẽlĩg hũbũttaathõ

12Baa adtican ꞌthooyyiaha thooꞌthiok ꞌcĩg ĩnaat eeta hõrggẽẽnaa cĩ eetu. Nẽ baa gõõng au õmmõtõõ lemmiooha vẽlẽk ꞌThĩĩmaa cĩ ꞌThõlõmõõnẽ. 13Nẽẽthĩ, baa hiꞌthihi eet ꞌcĩ aku hiita hũrũmtĩ hĩ ĩhõõggõ, tananga athithan eeta nẽ accamatta ĩhõõggõ gẽrrẽẽt. 14Nẽẽthĩ nẽẽꞌthẽk, baa iꞌthiattaaĩ elemit eeta ꞌcĩg mẽẽlĩg ꞌcĩg maacĩg hĩ ngaaĩ Makayyioohit Yeesu, hittoorito lothippit cĩ lemmioohu. 15Hĩnĩngĩtĩ authet icci, iita aꞌnyakta eeta moorriak hiita hatagguutho lotoonwẽẽtĩ ꞌgoolliohĩ, hátĩ huhum lorii cĩ Pẽẽtũrũ hatĩ aku ẽttẽẽd nĩngaata. 16Ma ho, uluttia lothippiꞌnya ꞌtaaũnnioohĩĩ cĩg õbõhõõ hĩ ꞌJeruꞌthalẽm, irriongatta moorriak cĩggĩĩng ꞌcĩg aꞌnyak loriẽẽt ꞌcĩg abathĩ hikia haaꞌnyĩk Pẽẽtũrũ ĩhõõggõ vẽlẽk hũbũttaathõ.

Pĩĩrnanĩt cĩ ꞌthooyyiahu

17Ma baa ho, iita iinanit paadĩrĩ cobbi hĩ Thadutheei dtiic ꞌcĩ adtican ꞌthooyyiaha ho. 18Nĩngĩtĩ aggamĩ ꞌthooyyiak nẽ arrik baabuuthatõõ. 19Ma baa baal, ikia aajĩlõ#5:19 Aajĩlẽẽt: Ĩĩn aajĩlẽẽta loriẽẽt ꞌcĩg arũmĩ hĩ Nyekuc hẽẽtahujjieen nẽ aitiõõ ĩhõõggõ eleeti tõõ. Ĩꞌthõõa Nyekuci ĩhõõggõ waathinnioohĩĩ ũgẽẽgĩ hiita haꞌnyaktaak nyeemuut cĩ Nyekuci eet loota nĩnga. cĩ Makayyiookto ubbuuk hattũũgẽt cĩg baabuuthak nẽ õõga ĩhõõggõ. 20Nĩngĩtĩ annẽẽkĩ aajĩlõ ĩhõõggõ, “Õõtõ, edeccieek halaangatõõ cĩ ꞌCieeth cĩ Nyekuci nẽ õõt uduktaahu eet nyeemuut vẽlẽk cĩ rũgẽt ꞌcĩ nga ĩĩn ngeju ho.”

21Ma baa ngerrenita, uduhunit nẽẽg halang cĩ ꞌCieeth cĩ Nyekuci hĩ baa adukiaak ĩhõõggõ nẽ iꞌthiattaaĩ ꞌlimman.

Ma baa õdõlan paadĩrĩ cobbi hĩ eet cĩgĩnnĩg ko, iita utuvuyyia mõtõõnĩt cobbi lokihooa cĩ makayyiook cĩg Ĩꞌthĩraẽlĩ nẽ ĩꞌthõõcõ athegereeꞌnya hoottik ꞌthooyyiak baabuutha. 22Ma baa õdõlan athegereeꞌnya ho, ammũdoothĩk hinnia ꞌthooyyiak aitiõõ tõõ. Nĩngĩtĩ õbõdõõꞌthĩ nẽ õõt uduktaak ꞌgaala ĩĩttĩg, 23“Hõlõ, aa hooyyia ngaati, hammũdoothĩka õrrõhanni hattũũgẽta hokomit kak nẽ abĩlĩ athegereeꞌnya buúk hattũũgẽtĩ. Nẽẽthĩ, ma habbuuka hattũũg nẽ huduhutta ĩttõõ ho, hammũdoothĩka hinnia hiꞌthihi eet.” 24Ma baa athĩhĩ makayyioohiti cĩ athegereeꞌnya ꞌcĩg ẽbẽk ꞌCieeth cĩ Nyekuci hĩ makayyiook cĩg paadĩrꞌnyaannu thõõth icci ho, idhirriaangtĩ hanyaman thõõth ꞌcĩ occa õthõõthĩ.

25Ma hĩdĩĩkoothong, uppwaanna ẽẽtĩ umwaa hikia hĩĩ, “Hõlõ, aattĩg eeta baag aariku niig baabuuthatõõ ꞌyioko abĩlĩ halaangatõõ cĩ ꞌCieeth cĩ Nyekuci alliman eeta.” 26Nĩngĩtĩ ĩꞌngaannĩ makayyioohiti cĩ athegereeꞌnyanu hĩ athegereeꞌnya nẽ ũũk aꞌnyaha ꞌthooyyiak. Nẽẽthĩ, baa hõllõngaa õõ agurra ĩhõõggõ ꞌtirriaana, hĩnĩngĩtĩ baa iꞌngolli pee ngaatĩ hatĩ avvirriicanĩ eeta ĩhõõggõ biyyiẽẽnĩ.

27Ma baa aꞌnyakta ꞌthooyyiaha, iita arrihoothĩk hĩbĩlĩt lokihooa nẽ ijin paadĩrĩ cobbi ĩhõõggõ ĩĩnnĩk, 28“Baa haduhaakuung naag ngagiit hanneekuung ma hallimannu eet ꞌthaarĩĩ cĩg Yeesu. Ĩcĩnĩt thĩ dako thõõth ꞌcĩ adticannu niig ko! Allimannu eet ꞌJeruꞌthalẽm hũtũrũũr nẽ aanyteetu ngagĩĩt heteheellia daahĩth cĩ Yeesu.”

29Ma ho, edecit Pẽẽtũrũ hĩ ꞌthooyyiak ũgĩ ĩĩttĩk, “Hõllõngaa hathĩkna naag eeta. Hathĩkna naag Nyekuc. 30Baa aruku niig Yeesu ngaatĩ odooddiku hurucceea. Nẽẽthĩ, baa ũrũgũtha Nyekuci baa ala hĩbaangĩ cĩggaac baarkit ĩnõõnnõ daahĩtha. 31Õdõng Nyekuci ĩnõõnnõ nẽ aarĩk attiaa cĩnnĩ ĩcobbi, hĩĩ habu hĩ Ellioohit hẽlẽmaahĩ eet cĩg Ĩꞌthĩraẽlĩ hũtũngteek ꞌthẽccanẽẽt hatamaatĩk Nyekuci ĩhõõggõ. 32Hĩĩgĩnna naag hẽbẽrĩ cĩg thooꞌthiok iccig hĩ Lori ꞌcĩ Ẽllẽẽmĩth, baa aaꞌnyĩk Nyekuci eet ꞌcĩg athĩhĩ ĩnõõnnõ.”

33Ma baa athĩhĩ paadĩrĩ cobbi hĩ Thadutheei lokihooatõõ thõõth icci ho, iita ĩlĩĩllẽẽcõ gẽrrẽẽt hatabit huruhit ꞌthooyyiak. 34Tõjõhõ eet umwa ꞌcĩ baa ĩĩn Variꞌtheenit#5:34 Variꞌtheei: Ĩĩn Variꞌtheei lothippit cĩ ꞌJudeei ꞌcĩg aꞌthũũnnĩ nyattal cĩ Mũũꞌtha nẽ ẽlẽmĩ thõõth ꞌcĩ arũgnaanĩ daakiaha tarĩ nẽ elemit aajĩlẽẽt hĩ loriẽẽta. Tigiil ꞌBuuk cĩ Dtiicanĩ cĩg ꞌThooyyiahu 23:8. ꞌcĩ haĩ ꞌGamalieel. Baa ĩĩn ꞌGamalieelĩ ꞌlimmannioohit cĩ nyattaalõ nẽ itieelli eeta vẽlẽk ĩnõõnnõ. Ma ho, ĩtĩnga nẽẽ hĩbĩl ꞌjieena nẽ uduhaak eet hootti nõõ ꞌthooyyiak battaala hĩdĩĩc. 35Nĩngĩtĩ aduhaakĩ makayyiook cĩg lokihooak annẽẽkĩ, “Niig eeta cĩg Ĩꞌthĩraẽlĩ, ummuhit da nõõ jurrung ꞌgõõl ꞌcĩ occa adĩmannu eet iccig. 36Baa hũnũũk, baa aaĩ eet umwaa ꞌcĩ haĩ Theuda noho nẽ ĩĩ, hĩĩnĩ makayyioohit, nĩngĩtĩ aduknõõthĩkĩ eeta ꞌmiiaꞌnya ꞌwec thõõth cĩnnĩ. Ma ho, ikia uruhi nẽẽ hĩꞌthaattĩ nuyyiooha cĩgĩnnĩg ho hĩĩ lõõcĩ ꞌthĩĩ. 37Ma urutaa cĩnnĩ, ikia eet umwaa tarĩ baa haĩ ꞌJuuda cĩ looc cĩ ꞌGalileea waathinnioohĩĩ baag agiilẽnĩ eeta nẽ ũlũt lothippit hĩkõõtha jore. Ma baa ho, uruhi nẽẽ buúk hĩꞌthaattĩ eeta cĩgĩnnẽẽgĩ. 38Nẽ thõõthaa cĩ eet cĩg ꞌyioko ho, hõlõ haduhaakuunga, ũtũngteek eet iccig ẽmmẽn! Aanytĩk hõõt. Ma ĩĩn dtiici cĩnĩĩng ko, ꞌcĩ aku hĩ eet ꞌcĩ holli õõ haaga, aꞌnginoothi hatĩ ẽmmẽn. 39Nẽẽthĩ, má aku hĩ Nyekuc, hõllõngaa hatĩ uullu ngaatĩ abillu eet iccig. Atinyaannu hinnia hatĩ ngaatĩ aruhoonnu hĩ Nyekuc thõng.”

40Nĩngĩtĩ ẽlẽmmĩ makayyiooha cĩg lokihooak ꞌrioon cĩ ꞌGamalieelĩ. Ma nĩngaata, utuvuyyia nẽẽg ꞌthooyyiak hoboddia ꞌcieetõõ cĩ lokihoo nẽ ommogit ĩhõõggõ thõng. Ma ho, ĩttĩngatteek ĩhõõggõ hiittiõõ hõllõngaa alliman eet ꞌthaarĩĩ cĩg Yeesu, nĩngĩtĩ aaꞌnyĩkĩ hõõt.

41Ma baa uduhutta ꞌthooyyiaha ꞌcieethaa cĩ lokihoo, baa atalĩ nẽẽg gẽrrẽẽt, hĩnĩngĩtĩ accamana Nyekuci ĩhõõggõ pĩĩrnattaa cĩ uukẽnĩ ꞌthaarĩĩ cĩg Yeesu. 42Nẽ waathinnioohĩ vẽlẽk, õõ allimaneek ꞌthooyyiaha eet thõõth cĩ Nyekuci halaangatõõ cĩ ꞌCieeth cĩ Nyekuci nẽ õvvõ olooyyiohĩtõõ buúk. Baa hõllõngaa abĩllĩ nẽẽg ngaatĩ allimanĩ eet nyeemuut ꞌcĩ abũnnaa#5:42 Nyeemuut ꞌcĩ abũnnaa: Õthõõth Nyeemuut ciee Yeesu Krĩstõ baa aku ũũny ꞌthẽccanẽẽt cĩggaac daahĩthaa cĩnnĩ hurucceea nẽ aaꞌnyeet rũgẽt ꞌcĩ aalla ooo. ꞌcĩ ĩĩnnĩ Yeesu, Krĩstõ.

Currently Selected:

Dtiicanĩ cĩg ꞌThooyyiahu 5: did

Highlight

Copy