Dtiicanĩ cĩg ꞌThooyyiahu 6

Eberria eeta tũkĩramma

1Ma baa waathinniook nicciag, iita ittoorri nuyyiooha#6:1 Nuyyiook: Baa ĩĩn nuyyiooha eet ꞌcĩg ẽlẽmĩ ꞌlimman cĩ Yeesu nẽ ĩthĩhĩt ĩnõõnnõ. Baa ẽbẽra Yeesu nuyyiook õmmõtõ hĩ ꞌramma, hiita hĩĩtõ ꞌthooyyiak cĩgĩnnĩg. Baa ĩꞌthõ Yeesu ĩhõõggõ makaꞌthĩta hõõt hĩdĩmanit thooꞌthiok ꞌcĩg ĩnaat eeta nẽ illimanit eet nyeemuut ꞌcĩ abũnnaa cĩ Yeesu. hĩĩtõ mẽẽlĩg, nĩngĩtĩ au alĩlalõõnĩ eeta cĩg ꞌJudeei ꞌcĩg õthõõth ꞌGiriheeyyi hĩ cĩg õthõõth Ebereeiyyi. Baa alĩlanõõ nẽẽg, hĩnĩngĩtĩ hõllõngaa aaꞌnyĩhoothĩk ngaatĩbõyyĩꞌnya ꞌcĩg õthõõth ꞌGiriheeyyi ꞌgẽẽn kõr ꞌcĩ eꞌngeriini ꞌgẽẽn waathinnioohĩ vẽlẽk. 2Ma ho, utuvuyyia ꞌthooyyiaha ꞌcĩg ĩĩn õmmõtõ hĩ ꞌramma ho nuyyiook vẽlẽk ngaatĩ hõdẽẽthõng nẽ ĩĩttĩk, “Aitiõõ hatĩ hõllõngaa aũlan hĩ ngagĩĩt ngaatĩ hũũnnĩka dtiic cĩ thõõth cĩ Nyekuci nẽ haautta tẽrẽmẽẽjĩtĩ heꞌngerria ꞌgẽẽn. 3ꞌGotoonoga hĩ ngoonoga, eberria eet tũkĩramma hõrggẽẽnaa cunuung ꞌcĩg iꞌngolli eeta nẽ agayyi ngaatĩ aꞌnyahĩ ꞌgẽẽnyĩth hĩ ngaatĩ aayyi Lorii cĩ Nyekuci hĩ ĩhõõggõ. Haaꞌnyĩk hatĩ ĩhõõggõ haggamit dtiic icci. 4Nẽ huꞌthuutti naag thõõth cĩ laiitto hĩ ꞌlimman cĩ Nyekuci.”

5Baa aaꞌnyĩk thõõth ciee eet vẽlẽk haccamattoothĩk gẽrrẽẽt, nĩngĩtĩ ẽbẽraanĩ nẽẽg eet umwa ꞌcĩ haĩ Tẽẽvẽnõ. Baa aꞌnyak Tẽẽvẽnõ lemiinit ꞌcĩ maka gẽrrẽẽt nẽ baa aaĩ Lorii ꞌcĩ Ẽllẽẽmĩth hĩ ĩnõõnnõ. Ma ho, eberria nẽẽg eet ꞌcĩg haĩ Pilippo hĩ Porokorio hĩ Nikanõõrẽ hĩ Tiimon hĩ Paramenath hĩ Nikõõla, ꞌcĩ aku ꞌtaaũnaa cĩ Antiohĩ, ꞌcĩ baa hikia hẽlẽm ꞌgõõl ꞌcĩ alaiini eeta cĩg ꞌJudeei. 6Ma baa ho, aꞌnyaktaak nẽẽg eet iccig ꞌthooyyiak, hiita halayyiõõĩ ĩhõõggõ.

7Ma nĩngaata, ikia ĩꞌthanothoothĩk thõõth cĩ Nyekuci looc vẽlẽk, hiita hittoorri nuyyiooha hĩĩtõ mẽẽlĩg ꞌJeruꞌthalẽma nĩngĩtĩ au ẽlẽmmĩ paadĩrꞌnya ꞌcĩg mẽẽlĩg Makayyioohit Yeesu.

Aggamĩ Tẽẽvẽnõ

8Baa aaꞌnyĩk Nyekuci Tẽẽvẽnõ bũnnai hĩ ꞌtirrian ꞌcĩ adĩmanĩ hẽlẽggĩ ꞌcĩg ĩnaat eeta. 9Nẽ baa aattĩg eeta cĩg ꞌJudeei ũgẽẽgĩ cĩg ꞌCieeth cĩ Laiitto#6:9 ꞌCieeth cĩ Laiitto: Baa gõõng aꞌnyak eeta cĩg ꞌJudeei ꞌCieethi ꞌcĩg mẽẽlĩg cĩg Laiittak ꞌtaaũnnioohĩĩ cĩggĩĩng. Baa gõõng aluttiaak nẽẽg ꞌCieeth cĩ Laiitto Kõrraa cĩ ꞌYiommaanõ halaacõ Nyekuc nẽ itigiilito Thõõth cĩnnĩ. ꞌcĩg haĩ Eet ꞌcĩg Õõgta#6:9 Eet ꞌcĩg Õõgta: Baa ĩĩn cieeg eet ꞌcĩg ĩĩn ꞌJudeei ꞌcĩg baag ĩĩn appahacaaꞌnya nẽ iita õõgta haauto lõꞌngõõc. ꞌcĩg baag abũrĩ Tẽẽvẽnõ. Baa ĩĩn ꞌJudeei cieeg ꞌcĩg au ꞌtaaũnaa cĩ Alethandria hĩ looccaa cĩ Cireene hĩ ꞌCilicia hĩ Aaꞌthia. 10Nẽẽthĩ, baa hõllõngaa ũũlũ nẽẽg Tẽẽvẽnõ ꞌcĩ baa õthõõth ꞌtirriaana hĩ ꞌgẽẽnyĩthaa ꞌcĩ aaꞌnyĩk Lorii ꞌcĩ Ẽllẽẽmĩth ĩnõõnnõ.

11Ma ho, ũlũllũũmanit nẽẽg eet ũgĩ hiita hĩĩtõ, “Baa hathĩkna Tẽẽvẽnõ aduha thõõth ꞌcĩ abathĩ ꞌcĩ õdõõmĩ Mũũꞌtha hĩ Nyekuc.”

12Nĩngĩtĩ au aahĩ luulu eetini vẽlẽk hĩ makayyiook cĩg eetuk hĩ ꞌlimmanniook cĩg nyattal cĩ Mũũꞌtha, haggamit Tẽẽvẽnõ. Ma nĩngaata, iita utugurit ĩnõõnnõ ootti hĩ ꞌgaala cĩg lokihooak. 13Ma ho, aꞌnyakta eet ũgĩ ꞌcĩg baag ẽlẽmĩ ngaatĩ õõlõngĩ haddangtaak Tẽẽvẽnõ hiita hĩĩtõ, “Gõõng aduha ẽẽtĩ ciee hõdõõkõthĩ thooꞌthiok ꞌcĩg abathĩ ꞌcĩg õdõõmĩ ꞌCieeth cĩ Nyekuci ꞌcĩ aꞌngirannii ho hĩ nyattal cĩ Mũũꞌtha. 14Baa hathĩkna naag ĩnõõnnõ ngaatĩ aĩnnĩ aku hatĩ Yeesu cĩ Naaꞌtharẽtĩ hikia hirriban nĩngĩtĩ nẽ ũtũhũ nyattalliook baag aaꞌnyeet ngagĩĩt Mũũꞌtha.”

15Nĩngĩtĩ akannĩ lothippiti ꞌcĩ baa aaĩ lokihooa Tẽẽvẽnõ hẽbẽrĩ nẽ udtuukta ngaatĩ aayyi muum cĩnnĩ hĩcĩ aajĩlõ.

Currently Selected:

Dtiicanĩ cĩg ꞌThooyyiahu 6: did

Highlight

Copy