Dtiicanĩ cĩg ꞌThooyyiahu 4

Aꞌnyakta Pẽẽtũrũ hĩ Yõaannẽ lokihooa

1Ma baa nga irrioonĩk Pẽẽtũrũ hĩ Yõaannẽ eeta, uppwaatta paadĩrꞌnya#4:1 Paadĩr: Eetinii cĩg Ĩꞌthĩraẽlĩ, ĩĩn paadĩrĩ eet ꞌcĩ aku habuccieetaa cĩ ꞌLeevi nẽ ĩnõõnnõ ꞌcĩ ĩbbõõr ꞌgaarrieenit halaangatõõ cĩ ꞌCieeth cĩ Nyekuci. hĩ makayyioohit cĩ athegereeꞌnya ꞌcĩg ẽbẽk ꞌCieeth cĩ Nyekuci hĩ Thadutheei.#4:1 Thadutheei: Ĩĩn Thadutheei eet cĩg ꞌJudeei ꞌcĩg aꞌthũũnnĩ nyattal cĩ Mũũꞌtha diooni nẽ hõllõngaa aꞌnyak lemiinit ꞌcĩ aĩ arũgna hatĩ eeta ꞌcĩg adaahito daahĩtha. Baa hõllõngaa ẽlẽmĩ nẽẽg loriẽẽt hĩ aajĩlẽẽt. Tigiil ꞌBuuk cĩ Dtiicanĩ cĩg ꞌThooyyiahu 23:8. 2Baa alĩĩlĩ nẽẽg gẽrrẽẽt, hĩnĩngĩtĩ alliman ꞌthooyyiaha cieeg eet nẽ udukta thõõth ꞌcĩ arũgnaanĩ Yeesu daahĩtha. 3Ma ho, aggamit nẽẽg Pẽẽtũrũ hĩ Yõaannẽ, hĩnĩngĩtĩ baa ĩĩ lõõcĩ ꞌjiaatĩn, nĩngĩtĩ õõ aarĩkĩ nẽẽg ĩhõõggõ baabuuthatõõ, ĩꞌthõng loohoth cĩnnĩ. 4Nẽẽthĩ hinnia, baa ĩthĩhĩt eeta ꞌcĩg mẽẽlĩg nyeemuut nẽ elemita, nĩngĩtĩ ĩttoorini lothippiti cĩ lemmioohu hĩĩtõ aalibꞌnya ꞌtur (5,000).

5Ma loohoth cĩnnĩ, ũllũngattaa makayyiooha hĩ eet ꞌcĩg obbitig cĩg eetuk hĩ ꞌlimmanniook cĩg nyattaalak hiita hommottio ꞌJeruꞌthalẽma. 6Baa aaĩ Annathĩ paadĩrĩ cobbi#4:6 Paadĩr cobbi: Maka paadĩrĩ cobbi ĩllõõan paadĩrꞌnya vẽlẽk, hĩnĩngĩtĩ paadĩr cobbi dioo ꞌcĩ aduhun Nĩngĩtĩ ꞌcĩ Aꞌngirannii ꞌcĩ Ẽllẽẽmĩth Gẽrrẽẽt ꞌCieethaa cĩ Nyekuci tabattĩ hõdẽẽthõng irkita. Baa aayyi Nyekuci Nĩngĩtĩ icci Aꞌngirannii ho bulẽẽtta, ĩnõõ ꞌcĩ adukni paadĩrĩ cobbi Nĩngĩtĩ icci nẽ ũũk urwacan biyyiẽẽtĩ, hátĩ hatamaatĩk Nyekuci eet, hĩnĩngĩtĩ ꞌthẽccanẽẽt cĩggĩĩng ko. Tigiil ꞌBuuk cĩ Levitiko 16; Ebereei 9. hĩ Kaĩava hĩ Yõaannẽ hĩ Alĩthandoro hĩ eet ũgĩ ꞌcĩg obbitig cĩg halang cĩ paadĩr cobbi. 7Nĩngĩtĩ aꞌnyakiaanĩ Pẽẽtũrũ hĩ Yõaannẽ hẽbẽrẽẽnnĩĩ cĩggĩĩng nẽ ijinit ĩĩttĩk, “ꞌTirrian iina ꞌcĩ adĩmannu niig thõõth icci nẽ ꞌthaar cĩg nganĩ ꞌcĩg adticaniinnu niig ko?”

8Baa ammũdeek aaĩ Lorii ꞌcĩ Ẽllẽẽmĩth hĩ Pẽẽtũrũ, nĩngĩtĩ aduhaakĩ nẽẽ ĩhõõggõ annẽẽkĩ, “Niig makayyiooha hĩ eet ꞌcĩg obbitig cĩg eetuk! 9Má havvaanna naag kõr icci hiita hijitteea, hĩnĩngĩtĩ tarbalꞌthẽẽt ꞌcĩ eterꞌthoothĩk tuhuulliahit hĩ ꞌgõõl ꞌcĩ abũnnayyĩ nẽẽnĩ, 10agaac thĩ nõõ thõõth icci niig hĩ eet cĩg Ĩꞌthĩraẽlĩ hũtũrũũr. ꞌThaar cĩg Yeesu Krĩstõ cĩ Naaꞌtharẽtĩ, baa odooddiku niig hurucceea nẽ ũrũgũtha Nyekuci daahĩtha, ꞌcĩ abũnnayyĩ ẽẽtĩ ciee abĩlĩ muumaa cunuung ko. 11Aaĩ Yeesu hĩ,

“ ‘Bẽẽ baa aburru niig teheꞌnyiooha

nẽ ꞌyioko, ĩĩ bẽẽ ꞌcĩ abũnnaa hĩllõõan ꞌgoonoginni vẽlẽk.’#Tigiil ꞌBuuk cĩ Tegellwaanu 118:22

12Yeesu dioo ꞌcĩ aꞌnyak ꞌtirrian ꞌcĩ eellianĩ eeta. ꞌThaar cĩgĩnnĩg dioo loota nĩnga ꞌcĩg occa ẽẽla eet umwa.”

13Ma baa adtuuha nẽẽg ngaatĩ arĩnyanaanĩ Pẽẽtũrũ hĩ Yõaannẽ thõõth gẽrrẽẽt nẽ ĩĩtõ eet ꞌcĩg nga hillimattĩ ho, iita aꞌngalilli nẽẽg nẽ agayyiõõthĩ ngaatĩ baa gõõng arũmẽẽnĩ Pẽẽtũrũ hĩ Yõaannẽ hĩ Yeesu. 14Nẽẽthĩ, baa hõllõngaa occa ẽppẽhan nẽẽg thõõth icci ũdũt. Baa abĩlĩ tuhuulliahiti hĩ ꞌthooyyiak hõdẽĩ. 15Nĩngĩtĩ nõõ aduhaakĩ makayyiooha ĩhõõggõ hõõt battaala cĩ ꞌcieeth cĩ lokihoo.#4:15 Lokiho: Ĩĩn lokiho nĩngĩtĩ õmmõtõõnĩ paadĩrĩ cobbi hĩ makayyiook cĩg eetuk hĩ makayyiook cĩg paadĩrꞌnyaannu hiita hutuhanit thooꞌthiok cĩg eetuk. Ma ho, ijitto nyaagwaana ĩĩtõ, 16“Hõgõõn occa eet iccig hutuno? Agaacõ eeta ꞌJeruꞌthalẽma nĩnga vẽlẽk, ngaatĩ ĩdĩmattĩ nẽẽg thooꞌthiok ꞌcĩg ĩnaat eeta nẽ occa hõllõngaa hẽppẽhan naaga. 17Nẽẽthĩ, ngaatĩ habĩllĩ thõõth icci hiittiõõ hõllõngaa ĩꞌthanothoothĩk eet ꞌrẽẽna, hirrioottĩk eet iccig hiittiõõ hõllõngaa abbũũngĩk eet ꞌthaar cĩg Yeesu tarĩ.”

18Nĩngĩtĩ avvaanĩ ꞌthooyyiak hoboddia ꞌcieetõõ cĩ lokihoo tarĩ nẽ ommokteek ĩhõõggõ hiittiõõ hõllõngaa abbũũng hode alliman eet ꞌthaarĩĩ cĩg Yeesu. 19Baa ẽdẽcĩ Pẽẽtũrũ hĩ Yõaannẽ aĩ, “Ummuhit da nõõ niig hatĩ ma aũlan hĩ Nyekuc ngaatĩ occa hathiknuung naag ngagiit hĩllõõan ngaatĩ occa hathĩkna Nyekuc. 20Hĩnĩngĩtĩ hõllõngaa occa hĩjjaahinnia thõõth baa hĩthĩkta nẽ hĩcĩtta.”

21Nĩngĩtĩ ẽggẽrꞌnyẽẽkĩ makayyiooha Pẽẽtũrũ hĩ Yõaannẽ nẽ aanytĩk hõõt. Baa hõllõngaa ammũda nẽẽg thõõth ꞌcĩ occa uuki ĩhõõggõ, hĩnĩngĩtĩ baa adĩhĩth eeta vẽlẽk Nyekuc thooꞌthiohĩĩ ꞌcĩg adtican nẽẽg ko. 22Nẽ baa ĩĩ maka ẽẽtĩ ꞌcĩ ahuuli ꞌcĩ aaꞌnyĩhoothĩk hũbũna thõõthaa ꞌcĩ ĩnaat eeta ho, aꞌnyak irkiꞌnyia ꞌcĩg ĩllõõan hẽẽn ꞌwec.

Laiinit cĩ lemmioohu

23Ma baa õõgta Pẽẽtũrũ hĩ Yõaannẽ, iita edeccieek nẽẽg õõt uduktaak eet cĩggĩĩng thõõth vẽlẽk, baa aduhaak ĩhõõggõ makayyiooha cĩg paadĩrꞌnyaannu hĩ makayyiook cĩg eetuk. 24Ma baa athĩhĩ lemmiooha thõõth icci ho, iita uluttia nẽẽg vẽlẽk ngaatĩ hõdẽẽthõng nẽ alaacõ Nyekuc ĩĩtõ, “Nyekuc Makayyioohit, baa ẽhẽnyta nii hẽẽtkujjieen hĩ looc hĩ bũlũc hĩ hẽlẽggĩ vẽlẽk ꞌcĩg aattiyyi ĩhõõggõ. 25Baa othoothi nii Loriiaa ꞌcĩ Ẽllẽẽmĩth ũtũũgaa cĩ dticciannioohit cunni baangeet cĩnaang Daavide aini,

“ ‘Alĩĩllõõ eeta loonyinii ꞌcĩg mẽẽlĩg

nẽ aꞌnyahit muhẽẽnĩt ꞌcĩ atuhanĩ thõõth ꞌcĩ abathĩ ꞌcĩ aku ĩĩn õlõng inni?

26Aak habuẽẽta cĩg lootu jore

nẽ ulutti makayyiooha

nẽ aaburrieek Makayyioohit Nyekuc hĩ Krĩstõ cĩnnĩ ꞌcĩ Eberriaa.’#Tigiil ꞌBuuk cĩ Tegellwaanu 2:1-2

27Nẽ dĩdĩ, baa ommottio habuui Ẽrõõdẽ#4:27 Habu Ẽrõõdẽ: Ĩĩn ciee Ẽrõõdẽ Antipa, baa ĩĩn habu baa aggameek Yõaannẽ Yeesu baattithimo. Tigiil thõõth cĩnnĩ ꞌBuuhaa cĩ Maatteeo 14:1; Maarko 6:14; ꞌLuuka 3:1; Dtiicanĩ cĩg ꞌThooyyiahu 4:27. Ĩĩn nẽẽ ngeertĩ Ẽrõõdẽ Cobbi baa ĩĩn habu baa adiim aruk Yeesu baa nga arrittiaa thõng. Tigiil thõõth cĩnnĩ ꞌBuuhaa cĩ Maatteeo 2:1-8; ꞌLuuka 1:5. Ma baa uruta, ikia aau habuui umwaa ꞌcĩ haĩ Ẽrõõdẽ Agirippa, ngeertĩ loholeec cĩ Ẽrõõdẽ Cobbi. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:1-13:1. hĩ Ponthio Pĩlaatõ hĩ eet ꞌcĩg hõllõngaa ĩĩn ꞌJudeei hĩ eet cĩg Ĩꞌthĩraẽlĩ ꞌJeruꞌthalẽma ngaati nẽ ĩlĩhĩt dticciannioohit cunni ꞌcĩ ẽllẽẽmĩth Yeesu baa ẽbẽra niina. 28Baa ĩdĩmanit nẽẽg thõõth baa aduha nii ꞌtirriaana hĩ ꞌgẽẽnyĩthaa cunni hikia hedeeꞌnyia. 29Makayyioohit, cĩĩn thõõth ꞌcĩ adĩmanneet ngagĩĩt eeta ꞌbuth ko. Hĩĩgĩnna naag dticcianniook cugunnig. ꞌBaaneet ngagĩĩt ꞌtirrian hĩrrĩcattaawa nyeemuut cunni. 30Teretheeheet ngagĩĩt ꞌtirrian cunni, hĩcĩ haaꞌnyĩka eet hũbũttaathõ nẽ hĩdĩmatta thooꞌthiok ꞌcĩg ĩnaat eeta, ꞌthaarĩĩ cĩg dticciannioohit cunni ꞌcĩ ẽllẽẽmĩth Yeesu.”

31Ma baa alayyio lemmiooha ẽlẽk, ikia õtõmõ nĩngĩtĩ alaiini nẽẽg ko. Ma nĩngaata, ikia Lorii ꞌcĩ Ẽllẽẽmĩth hĩ ĩhõõggõ, nĩngĩtĩ arrĩcanaanĩ nẽẽg ngaatĩ irriõõnĩ nyeemuut cĩ Nyekuci ꞌtirriaana.

Otholit lemmiooha ijjio

32Baa aꞌnyak lemmiooha vẽlẽk muhẽẽnĩt hĩ ꞌthĩnneeti, ꞌgõõla hõdẽẽthõng. Baa aitiõõ ẽẽtĩ ꞌcĩ aꞌnyak ijjio cĩgĩnnĩg ẽmmẽn tõõ, nẽẽthĩ, baa õthõl nẽẽg hẽlẽggĩ vẽlẽk ꞌcĩg aꞌnyahĩ. 33ꞌTirriaanaa ꞌcĩ maka, baa irrioon ꞌthooyyiaha thõõth baa arũgnaanĩ Makayyioohiti Yeesu daahĩtha nẽ baa aggatan Nyekuci lemmiook vẽlẽk. 34Baa aitiõõ ẽẽtĩ ꞌcĩ appĩĩrna hõrggẽẽnaa cĩnĩĩng tõõ. Eeta vẽlẽk ꞌcĩg baag aꞌnyak manẽẽn hode ꞌcieethi ꞌcĩg obbitig, utuuyyiõĩ nẽ aꞌnyaktaak ꞌrabbẽẽt, 35ꞌthooyyiak heꞌngerrioothĩk eet ꞌgõõlaa ꞌcĩ pĩĩrnanĩt ꞌcĩ aꞌnyak eeta cũũmõ cũũmõ.

36Baa aaĩ eet umwaa ꞌcĩ haĩ Yothebo ꞌcĩ aku Ciporo. Baa ĩĩn nẽẽ eet cĩ hattũũg cĩ ꞌLeevi.#4:36 Hattũũg cĩ ꞌLeevi: Baa au paadĩrꞌnya cĩg Ĩꞌthĩraẽlĩ vẽlẽk hattũũgaa cĩ ꞌLeevi nẽ baa ĩĩn Arõõnẽ ꞌgõtõnĩ Mũũꞌtha paadĩr ꞌcĩ oou. Baa avvĩ ꞌthooyyiaha ĩnõõnnõ anneek Baarnaba nĩngĩtĩ aĩ, Eet ꞌcĩ akũtan ꞌgõõnõgĩ. 37Nĩngĩtĩ ũũtẽnĩ Yothebo mana cĩnnĩ nẽ aꞌnyahaak ꞌrabbẽẽt ꞌthooyyiak.

Currently Selected:

Dtiicanĩ cĩg ꞌThooyyiahu 4: did

Highlight

Copy