Аман өһө 28
28
1Куһаҕан киһи ким да эккирэппэтэҕин үрдүнэн куотар,
оттон үтүө киһи, хахай курдук, киэҥ-холку.
2Араллааннаах дойду былааһа уларыйа-тэлэрийэ турар,
оттон сатабыллаах, мындыр баһылык дойдута туругурар.
3Кыра-хара дьону атаҕастыыр баһылык#28:3 …баһылык – Эбэтэр, дьадаҥы киһи.
үүммүт бурдугу үлтү сынньар алдьатыылаах ардах кэриэтэ.
4Таҥара Сокуонун умнааччылар хара дьайдаахтары арбыыллар,
оттон Сокуону тутуһааччылар кинилэри утараллар.
5Сидьиҥ кэмэлдьилээхтэр сиэрдээх быһыыны өйдөөбөттөр,
оттон Айыы ТойонУ көрдөөччүлэр барытын өйдүүллэр.
6Токур суоллаах-иистээх баай киһитээҕэр
иҥэ-дьаҥа суох дьадаҥы быдан ордук.
7Сокуону тутуһар уол муударай өйдөөх,
оттон көлөөктөрдүүн куодарыһааччы – аҕатын аатын алдьатар.
8Бырыһыаҥҥа иэс биэрэн байааччы үбэ-аһа
дьадаҥылары аһынар айыы санаалаахха тиксиэҕэ.
9Ким Сокуону истиэн баҕарбат,
ол үҥэрдиин сидьиҥ.
10Көнө дьону куһаҕаҥҥа уккуйааччы
бэйэтэ хаспыт иинигэр түһүөҕэ,
оттон ыраас дууһалаахтар дьоллоохтук олоруохтара.
11Баай киһи муударайбын дэнэр даҕаны,
өйдөөх дьадаҥы кинини курдары көрүөҕэ.
12Үтүө дьон өрөгөйдөөтөҕүнэ, үөрүү кэмэ үүнэр,
оттон куһаҕан киһи былааска таҕыстаҕына, норуот бүгэн биэрэр.
13Аньыытын кистэнээччи туох да үчүгэйи көрүө суоҕа,
оттон буруйун билинэн көнө суолга үктэнээччи үтүө сыһыаны көрсүөҕэ.
14 Айыы ТойонУ куруутун ытыктыыр киһи дьоллоох,
оттон тыйыс сүрэхтээх иэдээҥҥэ түбэһиэҕэ.
15Кыраны-хараны баттыыр бардам баһылык
уордайбыт хахайтан, торҕоннообут эһэттэн атына суох.
16Кылгас санаалаах тойон норуотун түһээнинэн кыһарыйар,
оттон куорҕаллыыры абааһы көрөөччү өр салайыаҕа.
17Киһи хаанын тохпут өлөрүөхсүт
иинин өҥөйүөр да диэри куота сылдьыаҕа;
киниэхэ ким да көмөлөһүө суохтаах#28:17 Былыргы еврей тылынан суруллубут тиэкис бу кэрчигин ис хоһооно чуолкайа суох..
18Омсото суох олохтооххо куттал суоһуо суоҕа,
оттон токур суоллаах соһуччу охтуоҕа.
19Сирин оҥостооччу дэлэй аһылыктаныаҕа,
оттон кураанаҕы сырсааччы аччыктыаҕа.
20Эрэбил киһи байым алгыһы ылыаҕа,
оттон баайга-дуолга дьулуһааччы буруйдаммакка хаалыа суоҕа.
21Дьону сирэйиттэн көрөн сыһыаннаһар куһаҕан,
сирэй көрбөх киһи быһыы килиэп да туһугар аньыыны оҥоруоҕа.
22Байа охсор дьулҕаннаах ымсыы киһи
хаһан эрэ дьадайыам диэн санаан да көрбөт.
23Ньылаҥныыр киһитээҕэр
сэмэлиир киһи кэлин ордук сөбүлэтиэҕэ.
24Ийэлээх аҕатыттан былдьаан ылан баран:
«Бу аньыы буолбатах», – диир киһи
талабырдьыкка тэҥнээх.
25Иҥсэ мэнэгэй иирээни үөскэтэр,
оттон Айыы Тойоҥҥо эрэнээччи эйэ дэмнээхтик олоруоҕа.
26Ким бэйэтин эрэ күүһүгэр эрэнэр, ол өйө суох,
оттон муударас суолун тутуһааччы быыһанар.
27Дьадаҥыга бэрсээччи тугунан да тутайыа суоҕа,
оттон киэр хайыһааччы үгүс дьонтон кыраныаҕа.
28Нэгэй дьон былааска таҕыстаҕына, ким барыта бүгэн биэрэр;
кэлин, кинилэр эһиннэхтэринэ, норуоту көнө киһи салайыаҕа.
Currently Selected:
Аман өһө 28: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
