Rome 4

Abraham Vetkah Ding

1Chuti ahile tahsa lama ipuluiju Abraham'in amu chu ipi isei dingu ham? 2Ajeh iham itile ama chu natoh vanga chonpha kisim ahile kisonna anei ahi, ahinla Pathen lamah aneipon ahi. 3#Semt 15:6; Gal 3:6. Ajeh chu Pathen lekhabun ipi aseijem? Abraham'in Pathen atahsan jal-in atahsan chu ama dingin chonphatnin akisimtai. 4Natongte sum san hi lungsetman kiti louvin, asan ding abatnin akiseijon ahi. 5Ahinla Pathen helou natoh beija chonpha chansahpa tahsana chu, atahsan chu chonphatna kisima ahi. 6Natong louva Pathen'in michon pha-a asimho chu phatthei achan dingjeu chu, David'in jong aseijin,

7 # Labu 32:1-2. Asuhkhelnau kingaidama,

Chule achonsetna kikhu khumho chu anun nomui.

8Pakaiyin achonsetna asimlou dingpa chu anun nome, ati.

9Chuti ahile chuche phattheina chu cheptante chung jenga ham, cheptan louho chunga jongham? Ajeh chu eihon Abraham atahsan chu ama dinga chonphatna-a kisim ahitai, itiu ahi. 10Achutile iti aum petna chonpha kisim ham? Acheptan jouha, cheptan louva aum laija ham? Cheptana aum jou hilouvin, cheptan louva aum lai ahi: 11#Semt 17:10. Chule cheptan louva uma atahsanho jouse pa ahi theina dingle, amaho dinga chu chonphatna-a akisim theina dinga, chule cheptan jeng jong hilouva ipuluiju Abraham cheptan louva aum laija atahsan chu, 12Hiche tahsan nungjuija cheptanho pa jong ahi theina dinga, cheptan louva uma tahsan vanga chonphat chu hetna-a melchih na-a cheptan chu amu ahi.

Pathen Thutep Chu Tahsan Vanga Kimu ahi

13 # Semt 17:4-6; 22:17-18; Gal 3:29. Ajeh chu Abraham le achilhah chu, vannoi goulo ding ahi tia thutep chu danthua kon hilouvin, tahsana kona chonphat vanga joh ahibouve. 14#Gal 3:18. Ajeh iham itile danthua kona chonpha kisimhon alouva ahile, tahsan chu ahomkeo ahitai, chule thutep jong chu pannabei ahitai. 15Ajeh chu danthun lunghan akonsah ahi; danthu beina-a chun suhkhel jong aumpoi.

16 # Gal 3:7. Hijeh-a chu lungsetna-a ahi theina-a, danthu noija umho chang jeng hilouva Abraham tahsan noija um achilhahte jousen, hiche thutep alo dingu chu adet theina dinga, amahon alo dingu chu tahsan vanga alo dingu ahibouve. 17#Semt 17:5. Mithiho hinsah theija, aum louho auma banga kou Pathen, Abraham'in atahsan chu, ama angsunga Abraham chu ibon chaova ikonnao ipuluiju ahi; chule hitin jong akisune, Keiman nangma vai tamtah kona puluija kasem ahitai, ati. 18#Semt 15:15. Chule kiholna neilou ahivangin, nachilhah hijatpi khu hi ding ahi tia, asei thucheng dungjuija, khonungle vai tamtah pului ahung hi ding chu kiholin atahsanin ahi. 19#Semt 17:17. Chule kum jakhat jen alhina, athisa tobang atahsa le Sarah chin jong chu ngaiton, atahsan daideh louhelin aumin, 20Pathen thutep chu tahsan lellin aumpon ahi. 21Pathen'in athutep chu bol jong bol thei ahi ti ahechenin, Pathen avahchoijin atahsan ahat chehjotan ahi. 22Hiche jeh-a chu atahsan chu ama dinga chonphatna kisima ahitai. 23Tahsan chu ama ding jenga chonphatna-a kisima kisun ahipoi; eiho dinga jong kisun ahi. 24Pakai Jesu Khrista athia kona kaithoupa tahsana eiho, eiho dinga jong chonphatna-a kisim ding ahi. 25#Isai 53:4-5. Hiche Jesu chu eiho suhkhel jeh-a kipedoh ahitai; chule eiho chonpha ikisimna dinguva kaithouva uma ahitai.

Currently Selected:

Rome 4: THADBSI

Highlight

Copy