Mark 9

1Chuin Aman ajah uva, Tahbeh-a kaseipeh nahiuve, Hikoma dingho kimkhat hi Pathen lenggam thanei tah-a ahung lhun amu kahseuva thina tepkha lou ding aumuve, ati.

Jesu Avou Kikhel

(Matt 17:1-13; Luk 9:28-36)

2 # 2 Pet 1:17-18. Chuin ni gup jouvin Jesu'n Peter toh, Jacob toh, chule John atumin apuijin, molsang chung khatna apuitouvin, chuin Ama amaho ang sungah avou akikhelin ahi. 3Chule aponsil chu koimachan chutobang tah-a asopbang joulou ding khopmin abanglah lah jengin, buhbang sangin jong abangjon ahi. 4Chuin Elijah leh Mosi ahengah ahung kilah lhonin, Jesu toh akihouvun ahi. 5Chuin Peter'in Jesu jah-a, Rabbi, hikoma i-umu hi eiho dingin anome; lhambuh thum songung kate, khat nangma ding, khat Mosi ding, chule khat Elijah ding, ati. 6Ajehchu akichat behseh jeh-a seiding hetmoa asei ahi.

7 # Matt 3:17; Mrk 1:11; Luk 3:22. Chuin meilhang khatnin amaho chu ahinlekhun; mei lah-a kon chun aw ahung gingin, Hiche hi Ka-Chapa deitah ahi; athu ngaijun, ati.

8Chuin phulou helouvin akimvelu avetnuva ahile, koimacha amuta hih-un, Jesu changsehle amaho changbou aumtaovin ahi.

9Chuin molsanga kona ahung kumsuh phatnun, amaho chu hakhamin akhamin, Mihem Chapa athia kona athodoh kit kahsen koima jah-a seidoh hih-un, ati.

10Athusei chu alunguvah aching jingun, athia kona athodoh kit chu ipi aseina ahidem, tin akidongto jiuvin ahi. 11#Mal 4:5; Matt 11:14. Chuin amahon adongun, Ibola danthu sunhon Elijah hung masa ding ahi atiuham? atiuve.

12Aman adonbutnin, Elijah chu tahbeh-a hung masa-a, ijakai ahung semphat dingmong ahi; chule itidana Mihem Chapa thudol, Aman hesoh genthei tintang athoh-a chule mi nahsahmo-a aumding ahi, tia kisuna ham. 13Hijongle keiman nangho kaseipeh nahiuve, Elijah chu ahungsa ahitai, chule akhanchan dingthu asut bangtah-u chun achunga anopnop aboltauvin ahi, ati.

Jesu'n Lhagaoboh Vop Chapang Khat Aboldam

14Chuin aseijuite henga ahungin ahile akimveluva mi tamtah auma, chule danthu sunho chun thu adoh uva anakinelpiu amun ahi. 15Chuin mipi chun Ama amu mu-un kidang asa lheh-un, aheng lamah ahung lhaipaijun Ama chu alamtouvin ahi. 16Chuin Aman danthu sunho jah-a, Amaho khutoh ipi kinela nahiuvem? tin adonge.

17Chuin mipi lah-a khatnin ahindonbut nin, Pakai, kachapa nahenga kahinpui ahi, ama lhagao paomon avopmin; 18Chule hoikom hijongle aman amat matna-a aheh lhujin; chule achilphon alhan, aha ageljin, chule apumin akangjin; chule einodohpeh nadiuvin naseijuite henga kaseijin; amahon ajou pouvin ahi, ati.

19Chuin Aman adonbutnin, ajah uva, Vo tahsanna neilou khang mite, nakom uva itihchan kaumpi ding nahiuvem? Itihchan kakhongai ding nahiuvem? kahenga hinpuijun, ati. 20Chuin amahon ahenga ahinpuijun ahi. Chuin Aman ama chu amu phatnin, lhagaoboh chun amapa chu nasatah-in aveingoi paijenin ahile tolla alhun, achilphon alhalet lutnin akilihlelen ahi. 21Chuin Jesu'n apa jah-a, Ahiti nahi itihchan hitam? ati. Hichun aman, Achapan laija pat ahitai. 22Chule suhmang dingin abangle meijah, abangle twijah aleh lut lhoijin ahi: hijongle nangman alonaje nahetle, neilungset in neihutan, ati.

23Jesu'n adonbutnin, Natahsan photle! Atahsan ding chun ijakai ahi thei sohkeije, ati.

24Chutah chun chapangpa pa chun, amitlhi pumin, Pakai, katahsane; katahsan lelna-a neihun, tin asamtai.

25Chuin Jesu'n mihonpi hung lhaikhom chu amun, lhagao boh chu aphoh-in, ajah-a, Nang lhagao paomole na-ngong, thu kapeh nahi, asunga kon chun hung potdoh-in, chule lutkit tahih-in, ati.

26Hichun lhagao chu apengin, hatah-in avei ngoijin, ama-a konchun ahung pottan ahi. Hichun chapangpa chu athi bangin aumtan, chuphatnin mi atamjopi chun, Athi hita khu, atiuve. 27Ahin Jesu'n akhutnin amanin, akaithouvin ahile, ahung thoudoh jengtan ahi.

28Chuin Jesu insung agalut phatnin, aseijuiten guhthimin, I-atile keihon kanodohjou louvu ham? tin adongun ahi.

29Aman adonbut-in, Hitobang hi an ngola taona tailouvin akinodoh theipoi, ati.

Athi Ding Asei Masah Aniveina

(Matt 17:22-23; Luk 9:43-45)

30Chuin chua kon chun achedoh-un, Galilee gam ajotnun, hichu min ahet ding Ama anompon ahi. 31Ijeh-inem itile Aman aseijuite ahilpeh jin, ajah uva, Mihem Chapa chu mihemte khutna kipedoh ahitan, amahon atha dingu; chule akitha jouteng, ni thum nile Ama hingdoh kit ding ahi, ati.

32Ahivangin athusei chu ahethei pouvin, Ama doh dingla akichauvin ahi.

Alenpen Koiham?

(Matt 18:1-5; Luk 9:46-48)

33Chutichun Ama Capernaum ahung lhungtan ahi. Chuin in sunga aumpetnin amaho chu adongin, Lampi'a chu ipi nakinel piu ham? ati.

34 # Luk 22:24. Ahivangin amaho lampi'a chu, Ilah uva hin koi hi alenpen ahidem? tia akinel jeh-u chun athipchet jengun ahi. 35#Matt 20:26-27; 23:11; Mrk 10:43-44; Luk 22:26. Hichun atouvin, somleni ho chu akouvin ajah uva, Koi hijongle amasapen hinom chu nukhah pen ding ahi, chule mi jouse jenlea pang hi ding ahi, ati. 36Chuin chapang neocha khat akouvin, alaijuva adinsah-in; chuin apomin, ajah uva, 37#Matt 10:40; Luk 10:16; Jhn 13:20. Koi hijongle keima mina hitobang chapangcha khat sanga chun keima eisan ahi; chule koi hileh keima eisang chan chun keima eisan hilouvin, eihinsolpa asanjoh ahi, ati.

Eidou uva Panglou Chu Eiho Lama Pang Ahi

(Luk 9:49-50)

38John'in adonbutnin ajah-a, houhil namina thilha nodoh mikhat kamuvin, eijui pouvin ahi: chule eijuilou jeh uvin kakham taove, ati.

39Ahin Jesu'n, Kham hih-un; kamina thil kidang bola, keima eiseiseloi theija koima aumpoi. 40#Matt 12:30; Luk 11:23. Ijeh-inem itile koi hijongle eiho eidou lou tapou chu eiho lama pang ahi. 41#Matt 10:42. Koi hijongle Christa mi ahi tia ama mina twi khon khat don ding napechanu chu, tahbeh-a kaseipeh nahiuve, iti nama jongle kipaman asan ding chu achanlou ding ahi.

Chonsetna Dinga Lhepna

(Matt 18:6-9; Luk 17:1-2)

42Chule koi hijongle keima eitahsanna hiche aneochaho lah-a khat kipal lhuhsah chan chu, angonga sumhei song lentah kikhai henlang, twikhanglen'a kileh lutle ama dingin aphajoi. 43#Matt 5:30. Chule nakhutnin nakipal lhuhsah-a ahile tanbong jengin, khut ni neija damun meikong mitthei louva nache sangin, tibukim louva hinna-a lut nangma dingin aphajoi. 44Damun chu Alungla thimo ameikongla mitmo ahi. 45Chule nakengin nakipal lhuhsah-a ahile, tanbong jengin; keng ni neija imatih-a mittheilou damun meikonga nakilelut sangin, kengbaija hinna-a lut nangma dingin aphajoi. 46Damun chu alungla thimo ameikongla mitmo ahi. 47#Matt 5:29. Chule namitnin nakipal lhuhsah-a ahile kaldoh jengin; mit ni neija damuna nakilelut sangin, mitlang cho-a Pathen lenggama lut nangma dingin aphajoi. 48#Isai 66:24. Damun chu alungla thimo ameikongla mitmo ahi.

49Ijeh-inem itile mijouse meija chisoa kiso ding, chule ganlhaina jouse chi kiso-al ding ahi.

50 # Matt 5:13; Luk 14:34-35. Chi hi aphai: ahivangin chi jong hi a-al hi tamtahen lang hileh ipi-a na-alsah kit dinguham? Nasunguva chi neicheh-un, khat le khat kichamdel cheh-in umuvin, ati.

Currently Selected:

Mark 9: THADBSI

Highlight

Copy