Mark 8

Jesu'n Mi Sangli Avahva

(Matt 15:32-39)

1Hichelai chun mihonpi chu atamlheh jengtan, chule nehding ima aneilou jeh-un, Jesu'n aseijuite chu ahenga akouvin, ajah uva; 2Mihonpi hi kakoma aumnao ni thum alhingtan, neh dingla anei hih-un, kalung ase lheh-e; 3Chule an ne louvin a-inlam cheh uva sollengla lhasampa ding ahiuve; ajehchu akimkhat hi gamlatah-a kona hung ahiuve, ati.

4Chuin aseijuiten adonbutnun, ajah-a, Hiche kom gamthip laija mi hichengpi ninglhinga vahna ding changlhah kon hoija kona alah dingham? atiuvin ahi.

5Chuin Aman mipi chu adongin, ajah uva, Changlhah pheng ijat naneijum? ati. Chuin amahon, Pheng sagi, atiuve.

6Chuin Aman mipi chu tolla tou dingin thu ape-in; chuin Aman changlhah pheng sagi chu alan, athangvah in, chujouvin ahehbal balin, a-anguva luipeh dingin aseijuite chu apen, amahon mipi anga chun aluipeh-un ahi. 7Chule nga neocha cha phabep khat jong aneijun; hi jong chu phatthei aboh-in, a-anguva luipeh dingin asoltan ahi. 8Chuin amahon aneuvin, ava sohkeijun, aneh moh-u ahal chu longkai sagi alohdoh-un ahi. 9Chule hiche an neho chu mi sangli tobang ahiuvin ahi. Chuin amaho chu asol tan ahi. 10Chule Ama aseijuite toh kong'a alutpaijun, Dalmanutha gam alhung taovin ahi.

Pharisai hon Thil Kidang Angeh-u

(Matt 16:1-4)

11 # Matt 12:38; Luk 11:16. Chuin Pharisai ho chu ahungdoh-un, apatepnan thu adongun, van'a kona melchihna aholtauvin ahi. 12#Matt 12:39; Luk 11:29. Chuin Ama alung sunga akhoisan, Tukhang mite hin ibola melchihna aholuham? Tahbeh-a kasei ahi, Hiche tukhang mite hi imacha melchihna kipe lou ding ahi, ati.

13Chuin amaho chu adalhan, kong'a alut kitnin, lang khat panga dingin akipatdoh tai.

Pharisaiho Leh Herod Chol

(Matt 16:5-12)

14Chuin amahon changlhah akeng haijun; kong'a chunla pheng khat tailou adang aumhih helin ahi. 15#Luk 12:1. Chuin Aman amaho chu ahilchah-in, ajah uva, Chingtheijun; Pharisai ho chol le Herod chol lah-a kihong phaovin, ati.

16Chuin amahon, Hiche hi changlhah ineilou jeh-u ahi, tin akihou lhiuvin ahi.

17Hichu Jesu'n ahetdoh phatnin, ajah uva, Changlhah nanei loujeh uva ibola kihouhou nahiuvem? Tugeija nalunguva hedoh loulai nahiuvem? Nalungu tahsah jing nalai nahiuvem? 18#Jer 5:21; Ezek 12:2; Mrk 4:12. Mit neijuva mu theilou nahiuva, nakhang neijuva ja thei lou nahiuvem? Gel jong nagel doh lou mongu ham? 19Mi sangnga lah-a changlhah pheng nga kahop peh-a chu nehmoh ahal longkai ijat nalo dimum? atile, amahon, Somleni, atiuvin ahi.

20Mi sangli lah-a pheng sagi kahop peh-a chu nehmoh hal longkai ijat nalo dimum? atile, amahon, Longkai sagi atiuve.

21Chuin Aman ajah uva, Iti dana tu-a jong hedoh loulai nahiuvem? ati.

Jesu'n Bethsaida-a Mitcho Khat Aboldam

22Chuin Bethsaida'a ahungin; hikoma chun mitcho khat ahenga ahinpuijun, atham dingin Ama henga ataovun ahi. 23Chuin Aman mitchopa chu akhutnin atuh-in, khosunga kon chun apuidoh-in; chuin amitna achil asetnin, achunga khut angamin, Kho namu-em, tin adongin ahi.

24Ama adahdoh-in, Mihem chu thing tobangin kamun, avahleuve, ati.

25Chujouvin amit akhutnin atham kitnin, chuin adadoh sah-in ahile adamhel jengin, chule mi jouse kichentah-in amu theitan ahi. 26Chuin Aman ajah-a, khopisunga jong lut hih-in, khopi sunga koima cha jong hetsah hih-in, tin a-in lama asolmang tai.

Peter'in Jesu Aphondoh

(Matt 16:13-20; Luk 9:18-21)

27Chuin Jesu le aseijuite apotdoh-un, Caesaria Philippi'a khoneo dunga acheuvin; lam dunga aseijuite jah-a, Mihon keima hi koi ahi eitiuvem? tin adongin ahi.

28 # Mrk 6:14-15; Luk 9:7-8. Chuin amahon, John Baptist ahi atiuvin; ahin abangin Elijah ahi atiuvin; adangsen Themgaoho lah-a khat ahi atiuve, tin aseijun ahi.

29 # Jhn 6:68-69. Chuin Aman amaho adongin, Nanghonla koi ahi neitiuvem? ati. Chuin Peter'in adonbutnin, Nangma Christa chu nahi, ati.

30Chuin Aman ama thudol koimacha jah-a asei louna dingun hakhamin akhamin ahi.

Jesu'n Athoh Dingle Athiding Asei Masah

(Matt 16:21-28; Luk 9:22-27)

31Chuin Aman amaho chu, Mihem Chapan thil tamtah athoh-a, vaipo upa hole thempu pipuiho chule danthu sunho pampaija umding, kithatna chule ni thum joule thoudoh kit tei ding ahichu ahil pantan ahi. 32Aman hichu phongtah-a asei ahi. Hiche chun Peter'in ama apuidoh-in ahousetan ahi. 33Ahin Ama akiheijin, aseijuite aven, Peter chu aphoh-in, Kanung lama chen, Satan; nangman Pathen thulam gel louvin, mihem thulam jeng nagele, ati.

34Chuin Aman aseijuite le mihonpi chu ahenga akouvin, ajah uva, Koi hile kanung eijui noma chun ama kingaitom henlang athingpel kiput hen chule kanung hinjuihen. 35#Matt 10:39; Luk 17:33; Jhn 12:25. Ijeh-inem itile koi hile ahinna huhhing noma chun achan ding; amavang koi hile keima jal leh Kipana Thupha jala ahinna chana chun ahuhhing ding ahi. 36Ijeh-inem itile mihemin vannoi leiset apumpin neihenlang ahinna chantale, ipi phatchomna anei dingham? 37Min ahinna khela ipi apeh dingham? 38Koi hijongle tulai khang jonthanhoina le chonsetpan lah-a keima le kathu jachat chan chu, Mihem Chapan jong a-Pa loupina-a avantil thengtetoh ahung nile ama chu ajachatpi ding ahi, ati.

Currently Selected:

Mark 8: THADBSI

Highlight

Copy