Mark 4

Muchi Thepa Thulem

(Matt 13:1-9; Luk 8:4-8)

1 # Luk 5:1-3. Chuin dillen pangah thu ahilpan kittan ahile mihon tamtah akomah ahung kikhomun, chuin dillen chunga kong-ah alutnin atouvin; chule mipi chengse chu vapamah tolah aumuvin ahi. 2Chule amaho chu thulemin thu tamtah ahilin, athuhil lah-a chun aseije,

3Ngaijun, muchi thepa muchi then achen:

4chuin ahitin ahi, athe atheleh abang lamsih-a achun, chunga leng vachaten ahung lohgam taove. 5Chule abang songlheo chunga leipatna-ah achun, alei asalou jeh-in akehdoh pai jengin: 6Ahivangin nisa ahung soh-in ahile asanggon, jung anei lou jeh-in, agoptan ahi. 7Chule abang ling lah-a achun, aling chu ahung khangin adeplihtan, aga himhim aumtapoi. 8Chuin adangho chu leipha laijah achun, akehdoh-in ahung khangin chule agatan; abang somthum cheng, abang somgup cheng, abang ja khat cheng apungtan ahi, ati.

9Chuin Aman ajah uva, Angaina ding na neijan ngaihen, ati.

Thulem Kiseilo

(Matt 13:10-17; Luk 8:9-10)

10Chuin achanga aum petnin, akimvela umho le somleni chun athulem seiho chu adongun ahi. 11Chuin Aman amaho jah-a, Pathen lenggam thuguh chu nangho kipe-a nahitaove; polama um mite jah dinga vang ijakai thulema kisei ahi. 12#Isai 6:9-10. Chutia chu

amahon muvang chu amudingu, ahetdoh lou dingu,

jah vang chu ajah dingu, ahetkhen lou dingu ahi;

achuti loule hung kihei kitnuntin,

chule achonsetnao ngaidamin umgetninte, ati.

Jesu'n Muchi Thepa Thulem Ahilchet

(Matt 13:18-23; Luk 8:11-15)

13Chuin Aman ajah uva, Nanghon hiche thulem hi nahet lou mongu ham? Achutile thulem dang jouse iti nahet dinguham? 14Muchi thepa chun thu athe ahi. 15Chule hicheho hi thu kithena lamsih-a chuho chu ahi; amahon thu ajah jah-un, Satan ahung paijin, alung sunguva thu kithe chu alah mang peh tan ahi. 16Chutobangma chun songlheo chung leipatna-a chua chu hicheho hi ahi; amaho chu thu ajah jah-a thanom tah-a joppai jengho hi ahi; 17Ahivangin amaho chu jung nei lou ahiuvin, chomcha khat aumjiuvin ahi: chujoule thu jeh-a hesohna ahiloule bolsetna ahung umtengle, alhupaiji taove. 18Chule hicheho hi linglah-a muchi kithe ho chu ahiuve; amaho chun thu ajauvin, 19Ahivangin leiset hinkho lungkhamna, lheplhahna dimset haosatna, chule ngaichatna dangdang alutnin, hichun thu chu adeplih jin, ga louvin aumjitai. 20Chule lei pha laija chua chu; athu ja-a, jopteho chu ahiuvin, abang ajat som thumin, abang ajat som gupmin, chule abang ajat ja-in agapungin ahi, ati.

Meivah Lo kikhukhum

(Luk 8:16-18)

21 # Matt 5:15; Luk 11:33. Chuin Aman ajah uva, meivah khu lo noi, ahiloule jalkhun noija tun dinga kihinchoi ngaijem? Akhom chunga tunding chu angaina hilouham? 22#Matt 10:26; Luk 12:2. Ijeh-inem itile kiphong lou ding imacha ki-ima aumpoi; kilangdoh lou ding imacha akiselguh aumpoi. 23Koi hileh angaina ding na neijan ngaihen, ati.

24 # Matt 7:2; Luk 6:38. Chuin ajah uva, Najah chengseu hi ipiham, kichihtheijun. Nanghon natebang banguva nangho jong kitepeh ding nahiuve; chule nangho aja chengse hi kipehbe dingbon nahiuve. 25#Matt 13:12; 25:29; Luk 19:26. Ijeh-inem itile aneija chu kipehbentin; chule anei louva chu aneichasun jong chu ama-a kona kilahpeh ding ahi, ati.

Muchi Khangdoh Thulem

26Aman ajah uva, Pathen gam umchan chu, mikhatnin amuchi leija athe-a: 27Amachu sunteng imuji, janteng thouji, muchi chu hung kehdoh-a hung khangdoh, amatah-inla ajeh ahetlou tobang chu ahi 28Ijeh inem itile leisetnin achamin ama-a konin ahin ga sahjin, amasan akung, abanle ado, chujoule avui, chujou kitle avuija aga achanglhing jitai. 29#Joel 3:13. Ahin aga chu amin phatle, a-at phat ahitah jeh-in, aman koiten a-atpan jitai, ati.

Ankam Mu Thulem

(Matt 13:31-32,34; Luk 13:18-19)

30Chuin hitin asei kitne, Pathen gam hi ipitoh kitekah ding hitam? ahiloule ipi thulema kisei ding hitam? 31Ankam mu chang khat tobang ahi, hichu leija akithe-a ahile, vannoi leisetna muchi jouse lah-a aneopen ahin; 32Ahivangin akithe joule ahung kedoh-a, hung khanga, hampa dang jouse sanga hung lenjo; abah len tahtah hinso-a, chutia chu chunga leng vachate aboh lim noija age theiju tobang ahi, ati.

33Chuin chutobang thulem tamtah-in amahon ahetthei kham khamun thu ahilin ahi. 34Chule thulem louvin ajah uva imacha aseikhapoi: ahin aseijuite chengse vang chu achanguva aumtengule ijakai ahilchen jin ahi.

Jesu'n Twipi Kinonglai Aphothip

(Matt 8:23-27; Luk 8:22-25)

35Chuin nilhah-in Aman amaho jah-a, Agal lang khatna galkaiju hite, ati. 36Chutichun mihonpi chu asoldoh jouvun, ama aum bang bang chun kong'a akitolpi taovin, kong dang dangto jong alhonun ahi. 37Chuin khopihui ahung nungin ahile, twikinong chu kong sunga ahung kinong lut matchet jengtan, chuti ahi jeh chun kong chu dimpai ding ahitan ahi. 38Amala kong mei lamah lukhap akhapmin a-imun ahi: chuin asukhangun, ajah-a, Rabbi, kathigam dingu hi na ima lou louham? atiuvin ahi.

39Akhah phatnin huipi chu aphoh-in, dillen jah-a, Umthimin, thipbeh chan umin, ati. Chuin hui chu ahaijin, athip heltai. 40Chuin Aman ajah uva, Ibola chuti kichat nahiuvem? Iti dana tahsanna himhim nanei louvu ham? ati.

41Chuphatnin Ama chu kichat mainan akichata pouvin, Hichepa hi itobang mi hija, huipi leh dillen kinong sanin athu angaiham? tin akihouchut chut taovin ahi.

Currently Selected:

Mark 4: THADBSI

Highlight

Copy