Mark 3

Jesu'n Khut Langthipa Adamsah

(Matt 12:9-14; Luk 6:6-11)

1Chuin kikhopna in'a alut kitnin ahile, chuachun mi khutlang ngoi khat aumin ahi. 2Chuin ama chu ahehset theina dingun, cholngah ni-a aboldame aboldam hih-em, tin achang lhiuvin ahi. 3Chuin Aman khutlang ngoipa jah-a chun, Alaija hung dingdoh-in, ati. 4Chuin ajah uva, Cholngah ni-a apha bol angaiha, ase bol angaiham? Lhagao huhhing angaiha, suhmang angaiham? atin ahile, amaho athip chetchut jengun ahi. 5Chuin Aman alungtah jeh-u chun alungphamon, lungsatenin amaho chu ave kimvelin, chuin mipa jah-a chun, Nakhut lhangin, ati. Chuin alhangin ahile, akhut chu alangkhat bangin adamtan ahi.

6Chuin Pharisai ho chu apotdoh-un, amachu iti suhmang dingham ngaiton, Herod miho chutoh akihoutoh paitaove.

Dillen Panga Mipi ho

7Chuin Jesu aseijuite toh dillen lama chun achetauve. Chule mipi tamtah-in ajuijin, Galilee gama kon, Juda gama kon, 8Jerusalem khopi-a kon, Idumia gama kon, Jordan gala kon, Tyre le Sidon gam kimvela kon chule mihonpi tamtah ahiuvin, athilbol loupitah ho ajah phatnun, ahengah ahungun ahi. 9#Mrk 4:1; Luk 5:1-3. Mipi jeh chun kongneo gotsa koijin aseijuite asolin, achuti loule eineh khauvinte, ati. 10Mi tamtah adamsah ahitah jeh chun, natna nei jousen ama atohkhah theina dingun Ama aumchah jengun; 11Lhagao boh chengse jong chun ama amuchanun a-angah aboh khupmun, Nang Pathen Chapa chu nahi, tin asamjiuvin ahi.

12Ahin Aman ama chu aphondoh louna dingun amaho chu akhamchah-in ahi.

Jesu'n Solchah Somleni Alhen

(Matt 10:1-4; Luk 6:12-16)

13Chuin mol chunga akaltouvin, aman angaichat chengse chu akouvin, amaho ahenga ahungun ahi. 14Chuin akoma um dingle, thuhil lhangle-a asol dingin, somleni alheng doh-in, 15Damlou ho damsah theina thahat neidingle, thilhaho nodoh theina thunei dingin:

16Simon aman Peter asah-in; 17Zebedee chapa Jacob, chule anaopa John, amani chu amin Boanerges asah-in; hichu van gin chate, tina ahi; 18Andrew, Philip, Bartholomew, Matthew, Thomas, Alphaeus chapa Jacob, Thaddaeus, Canaan mi Simon, 19Chule Ama matsah-a pang Judas Iscariot ahiuve. Chuin amaho insunga alut taovin ahi.

Jesu Le Beelzebul

(Matt 12:22-32; Luk 11:14-23; 12:10)

20Chuin mihonpi ahung kikhom kit taovin ahile, an tahbah jong anethei tapouvin ahi. 21Hichu a-inkoten ajahdoh phatnun, angola hitakhu atiuvin, ahung konun thahatsana mat dingin ahung gouvin ahi.

22 # Matt 9:34; 10:25. Chule Jerusalem'a kona hungsuh danthu sunho jong chun, Beelzabul vop ahi, chule thilha anodoh jong hi thilhaho lengpa vanga anodoh hija hi, atiuvin ahi.

23Chuin Aman amaho chu akouvin, thulemin aseijin ajah uva, Satan'in Satan iti anodoh thei dingham? 24Gamsung khat amale ama kidouto hen kikhenle, hiche gam chu dingdoh thei louding ahi. 25Insung khat amale ama kidouto henlang hileh, hite insung chu dingdoh thei pouvinte. 26Satan jong amale ama kidouto henlang kisep khenle, dingdoh thei louva mangthahjo ding ahi.

27Koiman mihat chu kanchom masa louvin, a-in'a alutnin athilkeu achompeh theipoi; akanchom masatna chutengle achom dingbou ahi.

28Chule tahbeh-a kaseipeh nahiuve, Mihem chate hi achonsetnao itobang hijongle, Pathen ataitom nao hijongle, taitomna jouseu chu kingaidam ding ahi. 29#Luk 12:10. Amavang koi hileh Lhagao Theng taitom vang chun imatih chana ngaidam amulou ding; tonsot themo channa-a chua ahitai, ati. 30Lhagao boh vop ahi, ati jeh uva chutia chu asei ahi.

Jesu Nu le Asopiho

(Matt 12:46-50; Luk 8:19-21)

31Chuin anu le asopite ahungun, inpoa adingun, ama kouvin mi asolun ahi. 32Chule avela chu mihonpi touchah khet ahin, amahon ajah-a chun, Ven, inpoa khun nanu le nasopiten nahol uve atiuve.

33Chuin Aman ajah uva, Kanu le kasopite koi koi hiuvem? tin adonbutne. 34Chuin akimvela touho chu ave golin, Hiteho hi kanu le kasopite ahiuve. 35Ijeh-inem itile Pathen lunglama chonpatah chu kasopipa le kasopinu chule kanu ahi, ati.

Currently Selected:

Mark 3: THADBSI

Highlight

Copy