Mathew 7

Midang Oimo Thudola Thuhil

(Luk 6:37-38,41-42)

1Oimo-a naum louna dinguvin, mi oimo hih-un. 2Na-oimo bang cheh-a chu oimo-a naum dingu ahin; chule nanghon nate bang banguva chu nangho kitepeh dinga nahiuve. 3Nangma mitna thingtum uma chu ngaito louva, ibola nasopi mitna bohthem chu navet ham? 4Chule ven, nangma mitna thingtum uma, nasopi jah-a, namitna bohthem umchu neilahdoh sah-in nati theiham? 5Vo miphalhem, nangma mitna um thingtum chu kilahdoh masatnin; chutengle nasopi mitna bohthem chu lahdoh dinga namuchen dingbou ahi.

6Uichaho khu thiltheng pe hih-un, vohcha anga natwikoh changu seplha hih-un; amahon hitiho chu akengun chonuntin, chule hungkile heijuntin nangho jengjong nalhehtel dingu ahi.

Thumun, Holun, Kiuvun

(Luk 11:9-13)

7Thumun, kipe ding nahiuve; holun, namu dingu ahi; kiuvun, kihon peh ding nahiuve; 8Ijeh-inem itile athumchan achangin; aholan amun; chule akiuva chu kot kihon peh ding ahi. 9Achapan changlhah athumle song pe-a, 10Nga athumle gul pe dinga, nalah uva koi naum uvem? 11Hijeh chun nanghobon migiloutah hiuva, nachateo thilpha pehje nahet ule, hiche sanga chu gamchenga van'a na-Pau vin ahenga thumte chu thilpha apeh lou dingham?

Chondan Pha Chungnung pen

12 # Luk 6:31. Hijeh chun ima jouse-a min nangho iti nabolle nadeijum, nanghon jong chutobang chun bolun; ijeh-inem itile hichu dan thupeh le themgaoho thu ahi.

Kotjim

(Luk 13:24)

13Kot jima lutnun; ijeh-inem itile manna lam chu akot jatah ahin, alampi jong lentah ahi, chule chua lut chu tamtah ahi. 14Hinna lam chu akot jong ajimin, alampi akichin, chule hichu amua alhome.

Thingphung Chule Aga

(Luk 6:43-44)

15Kelngoi von kivona asunglamla ngei hangtah hia themgao lhem, naheng uva hungjiho-a konchun kichih theijun. 16Amaho chu agauva nahet jeng dingu ahi. Mihemin lingphunga lengpiga aloa, ahiloule meithai seltho linga theichang alo ngaijem? 17Hiche bang chun thingphung pha jouse aga aphan, thingphung lungvei chun ga phalou asepdoh jin ahi. 18Thingphung pha-a aphalou gathei lou; chule thingphung phalouva jong apha gathei lou ahi. 19#Matt 3:10; Luk 3:9. Thingphung aga phalou chengse chu kiphuh lhu-a meija kisep lutji ahi. 20#Matt 12:33. Hijeh chun nanghon amaho chu agauva nahet dingu ahi.

Keiman Nangho Kahekha Pouve

(Luk 13:25-27)

21Pakai, Pakai, eiti chan chu van lenggama lut ding ahipoi; koi hileh van'a um ka Pa lunglam bolpabou chu lut ding ahi. 22Hiche ni chule mi tamtah-in kajah-a, Pakai, Pakai, keihon nangma mina thu kasei lou uham? Chule nangma mina thilha kanodoh lou uham? Chule nangma mina bolmo kidang kabol lou uham, ati dingu ahi. 23#Labu 6:8. Hiteng chule keiman amaho chu phongtah-a kaseipeh-a, Keiman nangho imatihchanin kahekhapouve; vo chonset bolteho, kakoma konin chemangun, kati ding ahi.

In Kisa Jatni

(Luk 6:47-49)

24Hijeh chun koi hijongle kathu hicheng hi ja-a, bola chu, song chunga in sa milungthim phatah toh kitekah ding ahi. 25Chuin go ahung jun, twi ahungsoh-in, hui ahung nungin, chuche in'a chun achun; ahin song chunga kibulphu ahi jeh-in alhupon ahi.

26Chule koi hijongle kathu hicheng hi ja-a, bol lou chu, nellei chunga in sa milungthim bei toh kitekah ding ahi. 27Chuin go ahung jun, twi ahungsoh-in, hui ahung nungin, chuche in chu ahin nuhtan ahile alhutai; chule alhuh chu nasatah ahi, ati.

Jesu Thuneina

28 # Mrk 1:22; Luk 4:32. Chuin Jesu'n thu chucheng asei jouvin, mihonpi chun athuhil chu kidang asa lheh-un ahi, 29Ijeh inem itile Aman amaho danthu lekha sunho mihil banga hil louva, thuneitah banga amaho chu thu ahil ahi.

Currently Selected:

Mathew 7: THADBSI

Highlight

Copy