Mathew 23

Danthu Sunho le Pharisaiho'a Kon Gihsalna

(Mrk 12:38-39; Luk 11:43,46; 20:45-46)

1Hichun Jesu'n mipi jahle aseijuite jah-a, 2Danthu sunho le Pharisai ho Mosi touna mun'a tou ahiuve. 3Hiche jeh chun athupeh chengseu abonchan bolunlang nit sohkeijun; ahin athilbol bangun vang bol hih-un; ijeh-inem itile amahon asei chu aseijun abolji pouve. 4Amahon doutheilou pohgih akanun miho lengkouvah asep-un, amahonla akhutjung khatchan jong thamloh ding anompouve. 5#Matt 6:1; Minb 15:38; Danb 6:8. Ahin amahon athilbol jouseu khu mi mu dingabou abolu ahi; ijeh-inem itile amahon thuchinbom akibu ule akibehho chengu khu apeh aletsah-un; chule aponmongu acholsah-un, 6Golvahna-a mun pipen chule kikhopna in'a touna pipen, 7Kai lhanga min chibai aboh dingule, min Rabbi, Rabbi, ati dingu adeijun ahi. 8Nanghon vang mi Rabbi kitisah hih-un; ijeh-inem itile nangho nahiluva khat, Christa jengtah chu aumnai. Chule nangho nabonchaovin sopikhat cheh nahiuve. 9Vannoi leiset chunga koima pa sah hih-un; ijeh-inem itile van'ah na-Pau khat aume. 10Chule nanghon mi lamkai kitisah hih-un; ijeh-inem itile nalamkaija khat, Christa jengbou ahi. 11#Matt 20:26-27; Mrk 9:35; 10:43-44; Luk 22:26. Nalah uva alenpen chu najenleuva pang ding ahibouve. 12#Luk 14:11; 18:14. Koi hile ama kichoi sang chu kisunem ding; chule koi hile akineosah-a chu kichoi sang ding ahi.

Jesu'n Aphatlhemu Themmo Achan

(Mrk 12:40; Luk 11:39-42,44,52; 20:47)

13Ahinla ohe, Danthu sun le Pharisai miphalhem ho, nadau ahi! Ijeh-inem itile nanghon miho masanga van lenggam nakhah-un; nanghola nalutpouvin, chule lut dinga kigoho jong nalutsah pouvin ahi. 14Vo danthu sunho le Pharisai miphalhem ho, nadau ahi! Ijeh-inem itile nanghon meithaiho in napum valun, kilepnan sot tahtah natao jiuve; hijeh-a chu nangho themmo chungnung nachan dingu ahi.

15Ohe, Danthusun le Pharisai miphalhem ho, nadau ahi! Ijeh-inem itile mi khat Juda hou housahna dingin twikhanglen le leiset chunga nache kimvel leuvin, chule koi hile najopjop chu nangho sanga ajat ni-a damun mi nahisah jiuvin ahi.

16Ohe, lamhil mitcho ho, nadau ahi! Ijeh-inem itile nanghon koi hile houin pana kihahsel imathu aumpoi; koi hile houin'a um sana pana kihahsel bou chu leiba ahi, nati uve. 17Vo lungthimbei le mitcho ho, sana suthenga houin le sana chu hoijoh chungnung-jo-a ham? 18Chule nanghon, Koi hile maicham pana kihahsel imathu aumpoi, maicham chunga um thilto pana kihahsel bou chu leiba ahi, nati uve. 19Vo mitcho ho, thilto suthenga maicham le thilto chu hoijoh chungnung-jo-a ham? 20Hijeh chun koi hile maicham pana kihahsela chun, maicham le achunga um thilto aboncha apatna kihahsela ahi. 21Chule koi hile houin pana kihahsela chun, houin le achengpa chu agoma apatna kihahsela ahi. 22#Isai 66:1; Matt 5:34. Chule koi hile van pana kihahsela chun, Pathen touna le achunga Toupa agoma apatna kihahsel ahi.

23 # Thmpu 27:30. Ohe, Danthu sun le Pharisai miphalhem ho, nadau ahi! Ijeh-inem itile nanghon pudina le pathikhom, chule jira hicheng chu somakhat natohji uvin, danthupeh lah-a alupen, thu adih-a tan, milungset, chule tahsan hicheng chu nalhadah-un ahi. Ahin hicheho hi naman uva, hitiho jong chu nalha lou dingu ahi. 24Vo lamhil mitcho ho, nanghon thouvaisi nalhiuvin, sagongsang napumval-ui!

25Ohe, Danthu sun le Pharisai miphalhem ho, nadau ahi! Ijeh-inem itile nanghon khonle lheng apolam nasil ngimun, asunglam hunama lah le kitimlouna adimsetnin ahi. 26Vo Pharisai mitcho, khonle lheng chu asunglam silngim masale chun, apolam jong ngim dingbou ahi.

27 # Sol 23:3. Ohe, Danthusun le Pharisai miphalhem ho, nadau ahi! Ijeh-inem itile nangho lhan bangleh-a kiloi tobang nahiuve; hitiho chu apolam hoilheh-in akimun, asunglam mithi gu le imanen aboh jouse adimsetnin ahi. 28Chutobang chun nangho jong napolamu mi mu dingin chonphatah nahiuve; ahin nasunglamu vang phatlhemna le khangitlouna adimsetnin ahi.

Jesu'n Talen Amudiu Asei Masah

(Luk 11:47-51)

29Ohe, Danthu sun le Pharisai miphalhem ho, nadau ahi! Ijeh-inem itile nanghon themgaoho lhan nasemun, chule michonpha ho lhan najemun, 30Chule, Kapu kapateu hinlaija chu keiho uma hileuveng, themgaoho thisan sona-a chu pan kalahlou dingu ahi, nati uve. 31Chutichun nangho themgaoho that teho son nahiuve ti chu, nangho le nangho ahetoh-a nahiu ahi. 32Napu napateu thil tena dan chu bulhit pai ngaltaovin. 33#Matt 3:7; 12:34; Luk 3:7. Vo gulteho, gulse sonho, nangho hi damun thutan na-a kona iti nahoi thei dinguham? 34Veuvin, keiman naheng uva themgao, miching, chonna danthuhil kahinsole; amaho lah-a chu abang nathauva thingpel'a nakhetbeh uva, abang kikhopna ina najep uva, chule khotina nabolset dingu ahi. 35#Semt 4:8; 2 Thusm 24:20-21. Hichu michonpha Abel thisan kiso-a pat, houin le maicham kikah-a natha-u Barachiah chapa Zekariah thisan kiso geija, leiset chunga michonphateho thisan kiso themona jouse aboncha nangho chunga achuh theina dinga ahi. 36Tahbeh-a kaseipeh nahiuve, Hicheng chu aboncha tulai mite chunga chu ding ahi.

Jesu'n Jerusalem Akacham

(Luk 13:34-35)

37Vo Jerusalem, Jerusalem, themgaoho that le ahenga kisol teho songa seplih, ahpin anoute alha noija a-opkhum banga keiman jong nachate ijatvei opkhum dinga kagot hitam! Ahin nangho nanompouve. 38#Jer 22:5. Veuvin, na-in'u chu akamhel dinga nangho kidalhah peh nahitaove. 39#Labu 118:26. Ijeh-inem itile kaseipeh nahiuve, Pakai mina hungpa chu anunnome, nati masangseuva, tukala keima neimu lou dingu ahi, ati.

Currently Selected:

Mathew 23: THADBSI

Highlight

Copy