Mathew 22
22
Mou Kipui Golvah Thulem
(Luk 14:15-24)
1Chuin Jesu'n adonbutnin, ajah uva thulemin asei kitnin, 2Pathen lenggam chu Lengpa khat achapa jineina dinga golvah bol tobang ahi; 3Aman agolvahna-a dinga kouna changho chu hungtaovin tia kou dingin asohte asolin; ahinla amaho chu ahung nompouvin ahi. 4Chuin aman asohte asol kitnin, Akikouho henga cheovin lang, Veuvin, golvahna an aphasadema kagot ahitai: kabongchal le kagancha thao ho akithat tan, chule abonchan phasademin gotsan aumsohtai; nangho moupui golvahna-a hunguvin, tin gaseijun, ati. 5Ahivangin amahon dona neipeh louvin, achemang gamuvin, khat alouva achen, khat sumkol veijin achen; 6Adangsen asohte chu amanun, nahsahmo tah-in abolun, athat taovin ahi. 7Ahin lengpan hichu ajah phatnin, alunghang tan; asepaite chengse asolin, chuche tolthat ho chu asumanghelun, akhou jong ahalpeh taovin ahi. 8Chutah-in asohte jah-a, Golvahna an gotsa ahitai, ane dinga kakou tehola anehoi ahipouve. 9Hijeh chun lamka lamthoma cheovinlang, mi namu chanu golvah an nedingin gakouvun, ati. 10Chutichun asohte chu apot-un lampi dunga acheuvin amu chanu mipha mise apui khomun ahile, golvahna indan chu jin adimset tan ahi.
11Chuin lengpa chu jinho velen ahungin ahile, moupuina vona kivon lou mi khat amudohtan ahi. 12Aman, Kajol, moupuina vona kivon louva hikoma iti nahung lutham? tin adongin ahile, amapa sei ding helouvin aumtan ahi. 13#Matt 8:12; 25:30; Luk 13:28. Chuphatnin lengpan asottolleho jah-a, Akhut akeng kanun lang, kaidoh-un, chule polam muthim lah-a paidoh taovin; hikoma chu kale hagel umding ahi.
14Akikou vang tamtah ahin lhendoh vang lhomcha bou ahi, ati.
Kai Peh Thudola Thudoh
(Mrk 12:13-17; Luk 20:10-26)
15Chuin Pharisai hon athuseija kona mat theina ding doha abolun akihou taovin ahi. 16Chuin aseijuiteu chu Herod miho toh asolun, amaho chun ajah-a, Houhil, nangma mi dihtah nahi, dihtah-a Pathen lampi chu nahil ahin, chule koima gin naneipoi ti kaheuve; nangman mimai navepoi. 17Hijeh chun Caesar kai kapeh-u hi, dan ngai ham, hilouham? iti nagelem? neisei peh-un, atiuvin ahi.
18Jesu'n alunggilou vop-u chu ahen, ajah uva, Vo miphalhem ho, ibola neilunglah uham? 19Kai kidon na-a sum kipeji chu neivet sah-un, ati. Chuin amahon dinarii khat ahinchoi jun ahi. 20Chuin Aman, Hiche hi koi lim le koi minham? tin adonge.
21Amahon, Caesar'a ahi, tin adonbutnuve. Chuphatnin Aman, Caesar'a chu Caesar peuvinlang, Pathen'a chu Pathen peuvin, ati.
22Chuche ajah phatnun, adatmouvin, ama adalhauvin, achemang taovin ahi.
Athi Tho Kit Thudola Thudoh
(Mrk 12:18-27; Luk 20:27-40)
23 #
Sol 23:8. Chuche nimama chun, Mithi thokitna aumpoi ti Saddukai ho ahenga ahungun, thu ahung dongun, 24#Danb 25:5. Houhil, mi khatcha nei louva athile, asopipan anumeinu chu akichenpia, asopipa dinga chu chi akhaipeh ding ahi, tin Mosi'n eihilun ahi. 25Ahile tun kalah uva ucha pasal sagi aumun; amasapenpa chun ji aneijin athitai; ahin ama chu chikhai lou ahitah jeh chun, a-inneipi chu asopipa adalhah pehtai. 26Chuti chun abanapa jong, athumnapa jong, asaginapa geijin chutima chun aumtan ahi. 27Akhonna-in anumeinu chu athitai. 28Ahile thokitna-a amanu chu sagi lah-a koipen ji hitantem? Amahonla ji-a anei sohkeiju ahin, atiuvin ahi.
29Jesu'n adonbutnin, Pathen lekhabua thu le Pathen thahatna nahetlou jeh uva nakheljiu ahi. 30Thokitna-a chun amaho akicheng tapouvin, chen jong akichensah tapouve; van'a Pathen vantilte tobang ahiuve. 31Ahinla mithi thokit dol thu Pathen'in najah uva asei, 32#Pot 3:6. Keima Abraham Pathen, Isaac Pathen, chule Jacob Pathen kahi, ati chu simkha lou nahiuvem? Ama athiho Pathen hilouvin, ahingho Pathen ahijo bouve, ati.
33Mipi chun hichu ajauvin, athuhil chu kidang asa lheh jengun ahi.
Thupeh Lenpen
(Mrk 12:28-34; Luk 10:25-28)
34Aman Saddukai ho anelkhup hel jeng chu ajah phatnun, Pharisai ho akikhomun ahi. 35#Luk 10:25-28. Chule alah uva danthuthem khatnin apatepnan thu adongin, 36Houhil, chondan thupeh lah-a apipen hoiche ham? ati.
37 #
Danb 6:5. Chuin Jesu'n adonbutnin, Nangman nalung pumpin, nalhagao pumpin Pakai na-Pathen chu ngailun. 38Hichu thupeh pipen le amasapen ahi. 39#Thmpu 19:18. Chule chutobanga chu anina hiche ahi, Nangma naki ngailut bangin naheng nakoma ngailun. 40Thupeh hichete ni-a hin thupeh jouse le themgaoho thu kikhai cheh ahi ati.
Messiah Thudola Thudoh
(Mrk 12:35-37; Luk 20:41-44)
41Chuin Pharisai ho akikhop petnun, Jesu'n amaho thu adongin, ajah uva, 42Messiah thudol hi iti nagel uvem? Ama koi chapaham? atin ahile amahon, David chapa, atiuvin ahi.
43Chuin Aman ajah uva, Chuti ahile,
44 #
Labu 110:1. Pakaiyin ka Pakai jah-a,
Keiman namelmate chengse nakeng chotpha kaneisah masangsen,
kajetlama tou jingin, ati tia David chun Lhagaova ama chu Pakai iti atiham?
45Chutia David'in ama Pakai asahle, achapa iti hi dingham? ati.
46Chuin koimachan cheng khatchan jong adonbut thei tapouvin, chuche ni-a pat chun koimachan thudang khatcha jong adong ngam tapouvin ahi.
Currently Selected:
Mathew 22: THADBSI
Highlight
Share
Copy
Want to have your highlights saved across all your devices? Sign up or sign in
Thadou Kuki CL (Re-edited) Bible - Pathen Thutheng BU
Copyright © 2015 by The Bible Society of India
Used by permission. All rights reserved worldwide.
