Mathew 11

John Baptist'a Kona Thupole ho

(Luk 7:18-35)

1Hitichun Jesu'n aseijui somleni ho chu thu apeh jouvin, chukom mun'a kon chun akhotin uva thu hille dingle seiphongle dingin achetan ahi.

2Chuin John'in songkulah Christa thilbol umchan thu ajan ahileh, aseijui mini asolin, 3Chule ajah-a, Ahung dinga chu nangma nahimong hinam, ole achom dang khat kanga dinguham? agatisah-in ahi.

4Chuin Jesu'n adonbutnin, ajah lhona, Nangni chelhonin lang nathujah chengse lhon le nathilmu chengse lhon hi John jah-a gasei lhontan: 5#Isai 35:5-6; 61:1. Mitchon kho amutai, elbaijin lam ajottai, miphah suhthengin aumin, chule na-ngongin kho ajatan, mi thisa kaithouvin aumtai, chule mivaichate Kipana Thupha akiseipeh tai. 6Chule koi hijongle keija kipal lhuhna nei lou chu anunnom ahi, ati.

7Chuin amani chu ache nungin aman mipi jah-a chun, John thudol asei panin, Ipi ve dinga gamthipma chu nachedoh-uham? Huijin peng amut lingham? 8Achutile ipi ve dingaba chedoh nahiuvem? Ponnem kisil mi ham? Veuvin, ponnem sil hokhu leng in'a um ahiuve. 9Ibola nachedoh uham? Themgao ve dinga ong? Ahi, kaseipeh nahiuve, themgao sanga chungnungjo ahi. 10#Mal 3:1. Ven, keiman kasottol namasang sanga kasole; Aman namasang sanga nalampi asem ding ahi, tia kisun chu ama hi ahi. 11Najah uva tahbeh-a kasei ahi, Numei sunga peng lah-a John Baptist sanga lenjo koima asohdoh khapoi, ahivangin van lenggama aneojo chu ama sanga lenjo ahi. 12#Luk 16:16. Chule John Baptist nikho-a pat tugeija hi van lenggam hin gimbolna athoh ahin, chule mi gimbol hochun pumhatnin alauvin ahi. 13Ijeh-inem itile themgaoho jouse le danthun John phat geija chu gaothu aseiju ahitai. 14#Mal 4:5; Matt 17:10-13; Mrk 9:11-13. Chule nanghon hiche hi sanding nanop uva ahile, amachu ahung dinga kisei Elijah chu ahi. 15Angaina ding na neijan ngaihen.

16Tu khanga mite hi koitoh katekah tadem? Chapangho kaithel tolla touva, aloiho kou-a, 17Ajah uva, kuli kamutpeh-ule nalam hih-un; kakaule na-op nabeng pouve, tia seiho tobang nahiuve. 18Ijeh-inem itile John ahungin ne lou don lou ahin, hichun mihon thilhavop ahi, atiuvin ahi. 19Mihem Chapa ahungin anen adonin ahile, Veuvin, nehhat le julop, kaidongho le mi chonseho jolle gol ahi, atiuve. Ahinla chihna chu anatoh hon them achanan ahi, ati.

Atahsanlou Khopiho

(Luk 10:13-15)

20Chuphatnin thilbol kidang ahabol dehna khoho chun alung ahei lou jeh-u chun, aphohsal pantan ahi. 21#Isai 23:1-18; Ezek 26:1—28:26; Joel 3:4-8; Amos 1:9-10; Zech 9:2-4. Ohe Chorazin, nada ahi! Ohe Bethsaida, nada ahi! Ijeh-inem itile nalah uva thilbol thahatna kidang kibol chengse chu, Tyre le Sidon khopi-a kibol hile, sotpia pat chun achenghon khaodip pon kisilpum le vut kinu pumin alungu heitao vinte. 22Ahinla keiman kasei peh nahiuve, Thupi tan nikho le nangho thoh ding sanga Tyre le Sidon thoh ding oljo ding ahi. 23#Isai 14:13-15; Semt 19:24-28. Chule vangeija choisanga uma nang Capernaum, damuna notlhah-a umding nahi; ijeh-inem itile nalah uva thil kidang kibol chengse hi Sodom kho-a kibol hileh, tugei hin umnalai jinte. 24#Matt 10:15; Luk 10:12. Chujongle tahbeh-a kaseipeh nahiuve, Thupi tan nile nangho thoh ding sanga Sodam thoh ding oljo ding ahi, ati.

Kahenga Hungun lang Choldouvin

(Luk 10:21-22)

25Hiche pet chun Jesu apaovin, Vo ka Pa vanle lei Pakai, nangman michingte le lungthim themho hengah hicheng thuhi na-ima, naocha ho henga naphondoh jeh hin nangma kathangvah-e. 26Ahi, Pa, hiti chu nangma lunglhaina lam ahi.

27 # Jhn 3:35; 1:18; 10:15. Imajouse ka-Pan keima eipehdohsoh ahitai; chule Pa tailou Chapa chu koimachan ahepoi; chule Chapa tailoule aman aphondoh nomnapa tailou koimachan Pa chu ahepoi.

28Tong gimte le pohgih te, kahenga hungun; keiman nangho cholngah sah-unge. 29#Jer 6:16. Keima lungneng tah le nunnem tah kahi; hijeh chun kanamkoljon laovin lang keima-a kihilun; chutile nalunguva olna namu dingu ahi. 30Ijeh-inem itile kanamkoljon nomtah ahin, kapoh jong jangtah ahi, ati.

Currently Selected:

Mathew 11: THADBSI

Highlight

Copy