Mathew 10
10
Solchah Somleni Ho
(Mrk 3:13-19; Luk 6:12-16)
1Chuin aman aseijui somleni chu akoma akouvin, lhagao boh nomang dingle, hivei namkim le nat namkim damsah dingin, amaho chu thuneina apen ahi. 2Hiche solchah somleni ho chu aminu hicheng hi ahi: Amasan Peter kiti Simon le anaopa Andrew, Zebedai chapa Jacob le anaopa John,
3Philip le Bartholomew, Thomas le kaidong Matthew, Alphaeus chapa Jacob le Lebbaeus aminchom Thaddaeus; 4Chule Canaan mi Simon le ama matsah-a pang Judas Iscariot ahi.
Somleni ho Natoh Ding
(Mrk 6:7-13; Luk 9:1-6)
5Hicheng somleni chu asolin, thu apen, ajah uve, Chidang namdang koima lampi jot hih-un, chule Samaria ho khopi sung khatcha-a jong lut hih-un; 6Amavang chu sangin Israel insung mi amangsa kelngoi henga cheovin. 7#Luk 10:4-12. Chule nache pumun, Vangam anaitai, tin hillhang leuvin. 8Anaho damsah-unlang, athi thouvun, aphahho suthengun, chule thilha nodoh-un; manbeija nasanu ahin, manbeijin homun. 9Nanghon nadangka dip sunguva sana, dangka, sumsan kiken hih-un; 10#1 Cor 9:14; 1 Tim 5:18. chule najinnaova dingin sakhao ahiloule sangkhol thoni, kengchot, tengol kiken hih-un; ijeh-inem itile natongan aneh ding amua lom ahi. 11Chule nacheuva khopi sung hile khoneo sung hile nalut tengule, lhunna-a kilom koi umam phatechan ngaitouvin; chule chua kona napotdoh kahseuvin hikoma chun umun. 12Chule in khatna nalut tengule, hiche in chu phatthei boh-un. 13Chule hiche in chu phatthei changhoi ahile, nalungmonnau chu achungah umhen; achanghoi ahi louvangle hiche lungmonna chu naheng uva hung kile kittahen. 14#Sol 13:51. Chule koi hile nalhunsah louvule nathu seiju ngai lou chu, chuche in'a konle chuche kho-a kona napotdoh tengule, nakengphang uva leivui sanin thinglhau vin. 15#Matt 11:24; Semt 19:24-28. Keiman nangho jah-a tahbeh-a kasei ahi, Thupi kitan nile chuche kho umchan sanga chu Sodom le Gomorrah gam umchan thohbai joding ahi.
Ahunglhung ding Bolsetna
(Mrk 13:9-13; Luk 21:12-17)
16 #
Luk 10:3. Veuvin, keiman nangho ngeihon lah-a kelngoi banga kasol nahiuve; hijeh chun nangho gul bangin lungthim themun, vakhu bangin suhset neilou hiuvin. 17#Mrk 13:9-11; Luk 12:11-12; 21:12-15. Ahivangin mihem lamah kichih theijun; ijeh-inem itile amahon nangho thutan vaihom kikhopna-a pedoh-un natin, chule akikhopnao in'a navoh dingu ahi. 18Chule amahole chidang namdangte hetsahna dinga, gamvaipote le leng teho anga keima jala hung kikai ding nahiuve. 19Ahivangin min napehdoh tengule, ipi iti nasei dingu lungkham hih-un; sei ding chan chu apettah-le nakipe dingu ahi. 20Ijeh-inem itile thuseija chu nangho hilouvin, na-Pau Lhagaovin nalung sunguva asei ahibouve.
21 #
Mrk 13:12; Luk 21:16. Chule asopin asopi, pan acha tha dinga ahinpehdoh ding; anu le apa douna-a chate dingdoh diu, chule athi nadiu ahin boldoh dingu ahi. 22#Matt 24:9,13; Mrk 13:13; Luk 21:17. Chule keima min jala nangho mi jouse hotna nahung umdingu ahi; ahin akhon ni geija thohlhum keija pangdetpa bou chu huhhing-a umding ahi. 23Hiche khopi-a min nabolset tengule, khopi dangah jam lutnun; ijeh-inem itile tahbeh-a kaseipeh nahiuve, Mihem Chapa ahung masanga, Israelte khopi jouse nachotsoh lou dingu ahi.
24 #
Luk 6:40; Jhn 13:16; 15:20. Ahilpa sangin aseijui achungnung jopoi, a-pakai sangin jong asoh achungnung jopoi. 25#Matt 9:34; 12:24; Mrk 3:22; Luk 11:15. Aseijui chu ahilpa toh, chule soh a-pakaipa toh akikotle aphaset ahi. Amahon a-inneipu pen bon Belzabul atiule, a-insung mite chu iti atida dingu ham?
Koiham Gin Ding
(Luk 12:2-7)
26 #
Mrk 4:22; Luk 8:17. Hijeh chun nanghon amaho chu kicha hih-un; ijeh-inem itile akiphongdoh lou ding akisela imacha aumpoi, chule hetdoh lou ding imacha aki-ima aumpoi. 27Keiman nangho jah-a muthima kasei chu, nanghon khovah-a seijun; nanauva najah-u chu, in chunga saptho uvin. 28Chule natahsao thatna, lhagao that theilou ho chu kicha hih-un; lhagaole tahsa akopma damuna sumang theipa bou chu kichaovin. 29Vasilih ni paisa khat manna kilhaji louham? Achuti vangin na-Pau thu louvin hitiho chu khatcha jong tolla lha lou ding ahi. 30Nalu chunguva nasam jang jouseu jong kisim sohkeija ahi;
31Hijeh chun kicha hih-un; vasilih tamtah sanga nangho lujo nahiuve.
Christa Phondoh Leh Seilep
(Luk 12:8-9)
32Hijeh chun koi hile miho anga kei eiphongdoh chan chu, keiman jong van'a ka Pa anga kaphondoh ding ahi. 33#2 Tim 2:12. Amavang koi hile miho anga keima eiseileppa vang chu, keiman jong van'a ka Pa anga kaseilep ding ahi.
Chamna Hilou Chemjam Joh
(Luk 12:51-53; 14:26-27)
34Leichunga chamna hinpo dinga hungin neingaito hih-un; chamna hilouvin chemjam hinpo joh-a hung kahibouve. 35#Mica 7:6. Ijeh-inem itile achapa chu apa dousah ding, achanu chu anu dousah ding, amounu chu atehpi dousah dingjoh-a hung kahibouve. 36Chule mihem amelma chu ama insung mitetah hi ding ahi.
37Koi hile keima sanga anu le apa ngailujo-a chu keija hoi ahipoi; chule koi hile keima sanga achanu le achapa ngailujo-a chu keija hoi ahipoi. 38#Matt 16:24; Mrk 8:34; Luk 9:23. Chule koi hijongle athingpel kiputna kanung hinjui lou jong chu, keija hoi ahipoi. 39#Matt 16:25; Mrk 8:35; Luk 9:24; 17:33; Jhn 12:25. Koi hile ahinna mu-a chun achan ding; chule keima jala ahinna channa chun amu ding ahi.
Kipaman
(Mrk 9:41)
40 #
Mrk 9:37; Luk 9:48; 10:16; Jhn 13:20. Koi hile nangho lhunsah-a chun keima eilhunsah ahin; chule koi hile keima eilhunsah-a chun eisolpa alhunsah ahi. 41Themgao mina themgao lhunsah-a chun themgao kipaman asan ding; chule michonpha tia michonpha lhunsah-a chun, michonpha kipaman asan ding ahi. 42Koi hile hiche neochaho lah-a hi seijui ahi tia twi dap khon khat jengcha don dinga pechan chun, tahbeh-a kaseipeh nahiuve, iti nama jongle kipaman asan ding achan louding ahi.
Currently Selected:
Mathew 10: THADBSI
Highlight
Share
Copy
Want to have your highlights saved across all your devices? Sign up or sign in
Thadou Kuki CL (Re-edited) Bible - Pathen Thutheng BU
Copyright © 2015 by The Bible Society of India
Used by permission. All rights reserved worldwide.
Free Reading Plans and Devotionals related to Mathew 10
The Gospel of Matthew
Let's Read the Bible Together (April)
Living Life On Mission
