Luke 10

Seijui Somsagi Asoldoh

1Chucheng jou chun Pakaiyin midang somsagi alhendoh ben, ama chena ding khopi chengsele muntina chun amasang sang-ah mi ninin asolin ahi. 2#Matt 9:37-38. Chuin ajah uva, Chang at ding atam lheh-in, ahivangin natonga alhome; hiche jeh chun achang atna-a dinga natongho ahinsoldohna dingin, chang neipu henga taovun. 3#Matt 10:16. Cheovin; veuvin, ngeihon lah-a kelngoi nou banga nangho kasol nahiuve. 4#Matt 10:7-14; Mrk 6:8-11; Luk 9:3-5. Nanghon sumbom ahin, sakhao ahin, kengchot ahin, keng hih-un; chule lampia koima chibai boh hih-un. 5Chule in nalutna ding chanuva, amasatah-in, hiche in'a hin lungmon lhunghen, tiuvin. 6Chukoma chu lungmon umtah mi auma ahile, nalungmon chu achunga umding ahi; aum lou vangle nangho henga hung kile kit ding ahi. 7#1 Cor 9:14; 1 Tim 5:18. Chule ipi hijongle amahon napeh peh-u chu neuvin donun, hiche in'a chun umun; ijeh-inem itile natongan athaman asana lom ahi. In khatna konin in khatna kichon hih-un. 8Chule ipi kho hijongle nalutnaova chu min nanasan uva ahile, na-ang uva akoi chanu chu neuvin. 9Chukoma um anaho chu boldamun; chule amaho jah-a chun, Pathen gam chu nakomu alhungtai, tiuvin. 10Amavang ipi kho hijongle nalutna uva chu min nana lhunsah louvangule, chedoh-unlang akho sung lamlenuvah, 11Kakeng phanguva beh nakho sunguva leivui sana katheh lhah khum nahiuve; hijongle Pathen gam ahung naitai ti hi heuvin, tin seijun. 12#Semt 19:24-28; Matt 11:24; 10:15. Najah uva kasei ahi, chunileh chuche khopi thoh sanga chu Sodom thoh oljo ding ahi.

Tahsanna Neilou Khopiho

(Matt 11:20-24)

13 # Isai 23:1-8; Ezek 26:1—28:26; Joel 3:4-8; Amos 1:9-10; Zech 9:2-4. Ohe Chorazin! nada ahi, ohe Bethsaida! nada ahi; ijeh-inem itile nalah uva thilbol thahatna kidang kibol chengse chu, Tyre le Sidon khopi-a kibol hile, sotna pat chun achenghon khaodip pon kisilin vut lah-a touvuntin, alungu heitauvinte. 14Ahinla thupi tan nile nangni thoh sanga Tyre le Sidon thoh oljo ding ahi. 15#Isai 14:13-15. Chule vangeija choisanga uma nang Capernaum, damuna sotlhah-a umding nahi jobouve.

16 # Matt 10:40; Mrk 9:37; Luk 9:48; Jhn 13:20. Koi hile nangho thu ngai chan chun keima thu jong angai ahi; koi hile nangho pampaija chun keima jong eipampai ahi; chule keima eipampaija chun eisolpa jong apampai ahi, ati.

Somsagi Le Ni Hung Kile

17Chuin chuche somsagi ho chu kipahtah-in ahung kileuvin, Pakai, nangma minin thilhaho jong kathu-uvin anunge, atiuvin ahi.

18Aman amaho jah-a, Van'a kona kolphe banga Satan ahunglhah kamui. 19#Labu 91:13. Veuvin, gulle aipi chonpeh dingle, melmapa thilboltheina jouse chunga chu thuneina kapeh nahiuve; hitia chu imachan nangho nasuhset lou dingu ahi. 20Ahivangin lhagaoho nathuva anun jeh chun kipah hih-un, amavang naminu van'a akisut jeh chun kipah jouvin ati.

Jesu Kipa

(Matt 11:25-27; 13:6-17)

21Chuin hiche pettah chun Jesu Lhagao Thengah hapan akipah-in, hitin ati, Ka Pa, vanle lei Pakai, nangman mi chingtele lungthim themho henga hicheng thuhi na-ima, naocha ho henga naphon doh jeh hin nangma kathangvah-e; Pa, hiti chu nangma lunglhaina lam ahi.

22 # Jhn 3:36; 10:5. Imajouse ka Pan keima eipehdohsoh ahitai, chule Chapa chu koi ahi Pa tailouvin ahepoi; chule Pa chu koi ahi Chapa le Chapan Ama aphondoh aphondohna miho tailou koiman ahepoi, ati.

23Chuin seijuiteho lama chun akiheijin atumbeh-in ahenguva, Nathilmu chengseu namunao mit chu avangphai: 24ijeh-inem itile kaseipeh nahiuve, nangho thil mu hi themgaoho tamtah le lenghon mu atup lheh-u ahin, ahivangin amupouvin ahi; chule nathu jah chengseu hi jah atupmun, ahinla ajapouvin ahi, ati.

Samaria Miphapa Thulem

25 # Matt 22:35-40; Mrk 12:28-34. Chuin veuvin, danthu them khat adingdoh-in, apatep-in, Houhil, tonsot hin kemlou kanei theina dinga ipi kabol dingham, ati.

26Chuin aman ajah-a, danthua ipi kisunem? Nangman iti nasimem? ati.

27 # Thmpu 19:18; Danb 6:5. Chuin aman adonbutnin, Nangman nalung pumpin, nalhagao pumpin, nathanei apumpin, chule nalungthim pumpin Pakai na-Pathen chu ngailun; chule nangma naki ngailut bangin naheng nakoma ngailun, ati.

28 # Thmpu 18:5. Chuin aman ajah-a, Nadonbut dih tangeije; hiti chun bolin, chutile nahin ding ahi, ati.

29Ahivangin ama them kichan agon, Jesu jah-a, Ahile kaheng kakom chu koiham? ati.

Samaria Miphapa Thulem

30Jesu'n adonbutnin, Mi koiham khat Jerusalem'a konin Jericho'a achesuh-in, gucha michomho lah atohkhatan, amaho chun apon alahpeh-un, avovin, athi konin adalha taovin ahi. 31Chuin thempu khat chuche lampia chun achesuh-in; chuin amachu amu phatnin, lamsih lang khatna apeltan ahi. 32Chuin chutima chun Levi mi khatma chukom mun chu aphah phatnin, ahungin ama chu aven, lamsih lang khatna apeltai. 33#2 Thusm 28:15. Ahin Samaria mi khat vang chu akholchena lamah aumna mun chu ahinphan; chuin ama chu amun ahile alung asen, 34Akoma achen, avohnao mahaho chu thaole lengpitwi asunkhumin, amahaho chu atomin, chuin amatah gancha chungah atousah-in, jinlhun in'ah apuilutnin, ajentan ahi. 35Chuin ajingin apotdoh ding konin, sumnong ni aladoh-in, inneipu chu apen, Ama hi phatechan anajenin, hiche kalval ijat hijongle nasuhmang jat chu keima kahung kile kit teng nangma sanange, ati.

36Hicheng thum lah-a koipen chu gucha michom lah tohkhapa hengle kom nahisah-em? ati.

37Chuin aman, ama akhotopa chu, ati. Chuin Jesu'n ajah-a, Chenlang nangman jong chutobang chun gabolin, ati.

Jesu'n Martha le Mariam Agavil

38 # Jhn 11:1. Chuin acheuva ahile ama kho khatna alutnin; chuin amin Martha atiu numei khatnin a-in'a alhunsah-in ahi. 39Chule amanu chun Mariam kiti sopi khat aneijin, amanu jong chu Pakai keng khophang bulah atouvin, athu angaijin ahi. 40Martha vang chu lhachalen apangin akisalel lheh jengin, chuin ama henga ahungin, Pakai, kasopi nun keima jeng lhachale-a eichanglha hi ima nagel louham? Hijeh chun eikithopi dingin solin, ati.

41Ahin Jesu'n adonbutnin, amanu jah-a, Martha, Martha, nangma thil tamtah ngaito-a lungkhama lunggim nahi; 42Ahinla ngaichat akhoh chu khatsehbou ahin, chule Mariam'in chuche aphalai chu akilhen ahitai; hichu ama-a kona kilahpeh lou ding ahi, ati.

Currently Selected:

Luke 10: THADBSI

Highlight

Copy