Luke 9
9
Jesu'n Seijui Somleni ho Asoldoh
(Matt 10:5-15; Mrk 6:7-13)
1Chuin aman somleni ho chu akou khomin, thilhaho jouse chunga thuneina le nat boldamna thahat apen, 2Pathen lenggam thu hil lhangle dingle adamlouho boldam dingin asolin, 3#Luk 10:4-11; Sol 13:51. Ajah uva, Nakhol jinnauva dingin imacha keng hih-un, tenggol hihen, sakhao hihen, changlhah hihen, chule sum hijongle kiken hih-un; sangkhol thoni jong nei hih-un; 4Nalut lutnau in'a chun umun, chule chua kon chun potdoh-un. 5Chule nalhunsah lounao chanuva chu, chuche kho-a kona napotdoh tengule, amaho douna hettohsahnan nakengphang uva leivui thinglhau vin, ati.
6Chuin amaho acheuvin, akho kho-a Kipana Thupha ahillhangun, adamlou aboldampeh taovin ahi.
Herod Lunggim
(Matt 14:1-12; Mrk 6:14-29)
7 #
Matt 16:14; Mrk 8:28; Luk 9:19. Hichun Herod gamvaipopan thil kibol jouse chu ajan, alunggim lhehtan ahi. Ajeh chu mi abangin, John athia kona thoudoh kit ahi, atiuvin; 8Abangin, Elijah hung kilah ahi, atiuvin; adangse vang chun, Malaija themgaoho lah-a khat thoudoh kit ahi, atiuvin ahi. 9Herod'in, Keiman John lu katantan, ahinla hiche athu kajah hi hoi koiham? ati. Hichun ama mu atuptan ahi.
Jesu'n Mi Sangnga Avahva
(Matt 14:13-21; Mrk 6:30-44; Jhn 6:1-14)
10Chuin solchah ho chu ahung kile kitnun, athilbol chengseu chu ama jah-a aseijun ahi. Chuin aman amaho chu apuijin, Bethsaida atiu khopi mun thip khatna amaho changseh apotdoh taovin ahi. 11Ahivangin mipin hichu ahet phat uvin, anung ajuijun; chuin aman amaho chu anasangin, chuin ajah uva Pathen gam thu aseijin, chule boldam ngaiho chu aboldamtan ahi.
12Chuin nilhum kon ahitan; hichun somleni ho chu ahungun ajah-a, Mipi hi acheuva khoho le loujao dunga genale anneh agakihol theina dingun soltan; ijeh-inem itile hikoma eiho gamthipma um ihiuve, atiuvin ahi.
13Ahin aman amaho ajah-a, Nanghon nehding peuvin ati. Chuin amahon jah-a, Kacheuva hiche miho jouse dinga hi neh kagachoh ngal louvule, keihon changlhah pheng nga le nga ni kalval kaneipouve, atiuvin ahi 14Ijeh-inem itile amaho chu mi sangnga jen hiuva ahi. Chuin aman aseijuite jah-a, Amaho chu somnga cheng chengin aloi loijin tousah-un, ati.
15Chuin amahon achuti bolun, abonchauvin atousah-un ahi. 16Chuin changlhah pheng nga chule nga chu alan, van lam aven, hiteho chu phatthei aboh-in, ahehbal balin; chuin mipi anga chu luipeh dingin aseijuite thu apen ahi. 17Chuin amahon aneuvin, abonchauvin avasoh keijun, chuin anehmoh-u anong chengse paipeh somle paipeh ni alohdoh-un ahi.
Peter'in Jesu Aphondoh
(Matt 16:13-19; Mrk 8:27-29)
18Chuin ahitin ahi, ama achanga atao petnin, aseijuiho akomah aumun; hichun aman amaho chu adongin, Mipi ho hin keima hi koi ahi eitiuvem? ati.
19 #
Matt 14:1-2; Mrk 6:14-15; Luk 9:7-8. Chuin amahon adonbutnun, John Baptist ahi atiuve; abang vangin Elijah ahi atiuvin; chule adangsen, Malaija themgaoho lah-a khat thoudoh ahi tin aseijuve atiuvin ahi.
20 #
Jhn 6:68-69. Chuin aman amaho jah-a, Nanghonla koi ahi neitiuvem? ati. Chuin Peter'in adonbutnin, Pathen Khrista chu, ati.
Jesu'n Athoh Ding Le Athi Ding Asei Masah
(Matt 16:20-28; Mrk 8:30—9:1)
21Ahivangin aman amaho chu hichu koima jah-a asei louna dingun hakhamin akhamchah-in; 22Ajah uva, Mihem Chapa chun thil tamtah athoh-a, chule vaipo upaho le thempu pipuiho, chule danthu sunho pampaija uma, chule kithat tei ding, chule ni thum nile kaithouva umtei ding ahi, ati.
23 #
Matt 10:38; Luk 14:27. Chuin aman abonchau jah-a, Koi hile kanung eijui noma chu ama kingaitom hen, niseh-in athingpel kiput hen lang kanung hinjuihen.
Eima Ima Hia Kigel Lou Ding
24 #
Matt 10:39; Luk 17:33; Jhn 12:25. Ijeh-inem itile koi hile ahinna huhhing noma chun achan ding; amavang koi hile keima jala ahinna chana chun ahuhhing ding ahi. 25Ijeh-inem itile min vannoi leiset apumpin neihenlang, ama kisumanghen ahiloule paidoh-in umtale, ama dinga ipi phachom dingham? 26Ijeh-inem itile koi hijongle keima le kathu jachat chanchu, Mihem Chapan ama loupinale, Pa loupina, chule vantil thengteho loupina-a ahung tengle, amapa chu ajachatpi ding ahi. 27Amavang tahbeh-a kaseipeh nahiuve, Hikoma dingho kimkhat hi, Pathen lenggam amu kahseuva, thina tepkha lou ding aumuve, ati.
Avou Kikhel
(Matt 17:1-8; Mrk 9:2-8)
28 #
2 Pet 1:17-18. Chuin ahitin ahi, chucheng aseikal ni get jen jouvin Peter toh, John toh, chule Jacob toh apuijin, atao dingin mol chunga akaltouvun ahi. 29Chuin ama ataopetnin, amaiso akikhelin, chule aponsil abanin abangin, aval lahlah jengin ahi. 30Chuin veuvin, mi nin akihoupin; amani chu Mosi le Elijah ahi lhonin, 31Loupia hung kilah lhona, Jerusalem'a thina athoh chai ding thu chu asei lhonin ahi. 32Hichun Peter le aumpiho chu a-imutsoh ngui ngui jengun, ahivangin hah jengin aumun, aloupije le akoma ding miteni chu amuvin ahi. 33Chuin akikhenpi lhona akoma kona achedoh pet lhonin, Peter'in Jesu jah-a, Pipu, hikoma i-umu hi eiho dingin anome; chule lhambuh thum songung kate, khat nangma ding, khat Mosi ding, chule khat Elijah ding, atin; ipi asei ahijong ahepon ahi.
34Chuin aman chucheng asei pet chun, mei lhang khatnin amaho chu ahinlekhun; chuin amaho mei lah-a alutnu chun akichauvin ahi. 35#Isai 42:1; Matt 3:17; 12:18; Mrk 1:11; Luk 3:22. Chuin mei lah-a kon chun aw ahung gingdoh-in, Hiche hi ka-Chapa deitah ahi; athu ngaijun, ati.
36Chuin awgin akichai phat chun, Jesu achangin akimutan ahi. Chuin athipbeh-un, chulai chun athilmu-u chu koima jah-a asei pouvin ahi.
Lhagao Boh Vop Chapangpa Khat Adamsah
(Matt 17:14-18; Mrk 9:14-27)
37Chuin ahitin ahi, akit ni-a mol chunga kona akumsuh phatnun, mipi atama tamin analam touvin ahi. 38Chuin veuvin, mipi lah-a kon chun mikhatnin ahin samin, Houhil, nahenga katao ahi, kachapa hi ven; ama hi kachapa changkhatseh ahi; 39Chule vetan, lhagaovin amanjin, phulou helouvin apengjahjin, chule aheh lhujin ahile achilphon akaijin, asuheh jin, lhakang manlouvin amavo jingin ahi. 40Chule anodoh dinga naseijuite henga kataole, amahonla anodoh joupouvin ahi, ati.
41Chuin Jesu'n adonbutnin, Vo tahsanna nei lou khanglamvai mite, nakom uva itihchan kauma, chule kakhongai ding nahiuvem? Nachapa chu hilama hinpuijin, ati.
42Chuin ahung petnin thilha chun ahehlhun, nasatah-in aveingoi jengin ahi. Ahivangin Jesu'n lhagao boh chu aphoh-in, chuin chapang chu aboldamin apa apetan ahi. 43Chuin miho jouse chun Pathen thilboltheina loupije chu kidang asa lheh jengun ahi. Chutia chu athilbol jouse chu kidang asah pettah-un Jesu'n aseijuite jah-a chun,
Jesu'n Aniveina-a Athi Ding Asei Masah
(Matt 17:22-23; Mrk 9:30-32)
44Hicheng thuhi nana sunguvah lutsah-un, ijeh-inem itile Mihem Chapa chu mihemte khutna kipedoh dingkon ahi, ati.
45Ahivangin hiche athusei chu ahedoh pouve; ijeh-inem itile amahon ahetdoh louna dinguva, amaho-a kona ki-ima ahin; chule hiche athusei chu ipi aseina ham doh dingla akichauvin ahi.
Koiham Alenpen?
(Matt 18:1-5; Mrk 9:33-37)
46 #
Luk 22:24. Chuin alah uva koipen chu alenpen ahidem tin kinelna aumtan ahi. 47Ahivangin Jesu'n alunguva chuche angaitou chu ahen, chapang neocha khat alan, akoma adinsah-in, 48#Matt 10:40; Luk 10:16; Jhn 13:20. Ajah uva, Koi hijongle hiche chapang neocha hi keima mina sanga chun keima eisan ahi; chule koi hijongle keima eisanga chun eihinsolpa asan ahi. Ijeh-inem itile nalah uva aneopen chu alen ahi, ati.
Nangho Douva Panglou Chanchu Nangho-a ahi
(Mrk 9:38-40)
49Chuin John'in adonbutnin, Pipu, mi khat namina thilha nodoh kamuvin, chuin nangma kajuiju eijuipi lou jeh-un kakham taove, ati.
50Ahin Jesu'n amaho jah-a, kham hih-un, ijeh-inem itile koi hijongle eidoulou tapouvu chu eiho lamma pang ahi.
Jesu Samaria Mihon Alhunsah Nomlouvu
51Chuin ahitin ahi; ama lahtouva aum ding phat alhin konin, Jerusalem'a che dingin amai angat changmelin, 52Amasangah thangkou asol masan; chule amaho acheuvin ama dinga gotsa anakoipeh dingin, Samaria miho kho khatnah aluttaovin ahi. 53Ahivangin ama Jerusalem'a che dinga amai angat jeh chun, amahon anasang tapouvin ahi. 54#2 Leng 1:9-16. Chule asolchah teni, Jacob le John nin hichu amulhon phatnin, Pakai, Elijah'in anabol banga, van'a kona meikong ahung lhah-a amaho hi akahvamna dingu thu peleuveng nalung ham, ati lhone.
55Ahivangin ama akiheijin amani chu aphoh-in, ajah lhonna, Itobang lhagao neija nahi nakihet lhonpoi; 56Ajeh chu Mihem Chapa hi mihemho hinkho sumang dia hung ahipon, ahuhhing diuva hunga joh ahibouve, ati. Chuin kho choma ache taovin ahi.
Jesu Nungjui Dinga Kilom
(Matt 8:19-22)
57Chuin lampia ache petnun mikhatnin ajah-a, Pakai, Nachena chan-ah juijinge, ati.
58Chuin Jesu'n ajah-a, Sial hon ko aneijun, chunga leng vachaten jong buh aneijun, Mihem Chapa vangin alu ngapna mun aneipoi, ati.
59Chuin aman achom khat jah-a, neijuijin, ati. Ahin aman, Pakai, amasan kache-a kapa kagavuina ding thu neipen, ati.
60Hichun Jesu'n ajah-a, mithihon amithiu kivuinao vinte; nangma chenlang Pathen gam thupha gahil lhang letan ati.
61 #
1 Leng 19:20. Achom khatman jong, Pakai, keiman nanung juijinge, amavang amasan ka-inkote kaga lhahna dingin neilhan, ati.
62Jesu'n ajah-a, Mi koi hile langkon tuhta-a, kiheija anunglam vea chu Pathen lenggama hoi ahipoi, ati.
Currently Selected:
Luke 9: THADBSI
Highlight
Share
Copy
Want to have your highlights saved across all your devices? Sign up or sign in
Thadou Kuki CL (Re-edited) Bible - Pathen Thutheng BU
Copyright © 2015 by The Bible Society of India
Used by permission. All rights reserved worldwide.
