John 12

Bethany Kho-a Jesu Thao Kinu

(Matt 26:6-13; Mrk 14:3-9)

1Chuin kalchuh kut masang ni gup in, anathisa athodoh kit Lazarus umna Bethany'a chun Jesu ahungin ahi. 2Chukoma chun ama dingin jan an asemun; chule Martha'n ajenlen, Lazarus vang chu ankonga amatoh touho lah-a chu panga ahi. 3#Luk 7:37-38. Chuin Mariam'in halpibei spikenard kiti thao namtui, man tamtah ser keh ahin choijin, Jesu keng anun, asamin atheh ngimin ahile, agimnam chun insung chu alosoh jengin ahi. 4Chuin aseijuiho lah-a khat, Simon chapa Juda Iscariot, amatsah-a pang dingpa chun, 5Ibola hiche thao hi dangka jakhat le somnga #12:5: dangka jakhat le somnga: makhai (dinarii) jathum. mana kijoh-a, mivaicha gentheite kipe louham? ati. 6Aman hiche ati chu, vaicha genthei akhohsah-a asei ahipoi; ama chu gucha ahin, chule sumdip avop ahin, asunga kikoi chu akilahji jeh-a asei ahi.

7Chuin Jesu'n, amanu limsah hih-un; amanun kakivui ni-a dinga hiche hi akoi ahi. 8#Danb 15:11. Ijeh-inem itile vaichaho chu nang hotoh naum khom jing naove; ahin keima vang nang hotoh umjing ding kahipoi, ati.

Lazarus Tha Nading Tohgon

9Chuin Jesu chukoma chun aume, ti aheuvin, Judah ho mi tamtah ama chungchang jeng hilouvin, athi lah-a kona athodoh Lazarus jong chu vet nom-in ahenga ahungtaove. 10Ahin thempu pipuihon Lazarus sana chu tha dingin akihousom taove. 11Ajehchu ama jala Judah ho tamtah chemanguva, Jesu atahsanu ahi.

Loupitah-a Jerusalem Alut

(Matt 21:1-11; Mrk 11:1-11; Luk 19:28-40)

12Ajingin kutna dinga hung mipi atama tamin, Jesu Jerusalem'a dingin ahunge ti ajah phatnun, 13#Labu 118:25,26. Lusu na akidopmun, aga lamtouvin,

Hosanna:

Pakai mina hunga Israelte Lengpa chu anun nome; tin asam asamun ahi.

14Chuin Jesu'n sangan chalgol khat amun, achunga atouvin;

15 # Zech 9:9. Vo, Sion chanu, kicha hih-in;

ven, na Lengpa sangan nou chunga achongin, ahunge, tia kisun bang chu ahi.

16Hicheng thu chu amasan aseijuiten ahedoh pouve; ahin Jesu choi-atna aumdoh phat chun, hiche thu chu ama thudola kisunsa ahin, amahon hitia chu ama chunga abolu ahi, ti chu ageldoh taove.

17Aman Lazarus lhana kon akouva, athi lah-a kona athodoh pettah-a aumpi mipi chengse chu, athu hettohsah-a pang ahiuve. 18Hiche melchihna kidang abol ajah jehtah uva jong chu mipi chun alamtou ahi. 19Hijeh chun Pharisai ho amahole amaho akihouvun, Ima nalo thei louvu namuve; veuvin, vannoi'in anung ajuitai, atiuve.

Greek Mi Phabepmin Jesu Aholu

20Hiche kut na Pathen hou dinga hungho lah-a chun Greek mi phabep ajaovin; 21Amaho chu Galilee gama Bethsaida kho-a mi Philip henga ahungun, ajah-a, Pu, Jesu chu kamu nomui, ahung tiuve.

22Philip ahungin Andrew jah-a ahung seijin, chuin Andrew Philip toh ahungin, Jesu jah-a asei lhone. 23Chuin Jesu'n amaho chu adonbutnin, Mihem Chapa choi-at na aum ding phat ahung lhunge. 24Keiman nangho tahbeh beh-a kaseipeh nahiuve, Chang chang khat tolla alhah-a athi loule achangin aum jingji bouve; athi vangle tamtah aga jin ahi. 25#Matt 10:39; 16:25; Mrk 8:35; Luk 9:24; 17:33. Ahinna ngailu-a chun achan ding; chule hiche vannoi leiset chunga ahinna ho-a chun tonsot hinna-a dinga akikoi ahi. 26Koi hijongle kalhacha panga chun kanung eijuihen; keima umna-a chu, kalhacha jong umding ahi; mi koi hile kalhacha panga chu, Pa chun ajabol ding ahi.

Jesu'n Athi Ding Asei

27Tun kalung adongtai; ipi kasei dingham? Pa, hiche nidana kon hin neihuh doh-in. Ahivangin hiche dinga hi tu nidan geija hi hung kahi. 28Pa, namin choi-anin, ati. Chuin van'a konin aw ahung gingin, Kachoi-antai, chule choi-an kit nalai ding kahi, ati.

29Hichun akimvela dinga mipi chun hichu ajauvin, Van aginge, atiuvin; adangsen, Vantil'in ajah-a thu asei ahi, atiuve.

30Jesu'n adonbutnin, Hiche aw hi keima jeh-a hung ahipoi; nangho dingjoh ahibouve. 31Tu-a hi hiche vannoi hi athu kitan ahi; vannoi'a vaihompa chu kipaidoh ding ahitai.

32Chule keima leija kona dop sanga kauma ahile, mi jouse kahenga kaloi khom ding ahi, ati. 33Hichu iti thia athi ding seina-a hitia chu asei ahi.

34 # Labu 110:4; Isai 9:7; Ezek 37:25; Dan 7:14. Hichun mipi chun adonbutnun, Keihonla Christa chu a-imatih chana umjing ahi, ti danthua kajauvin; Mihem Chapa dop sanga umding iti natiham? Hiche Mihem Chapa chu koiham? atiuvin ahi.

35Chuin Jesu'n ajah uva, Vah hi nalah uva chomcha khat umnalai ding ahi; muthimin nahinphah ma-un vah aumpet hin vahleu vin; ijeh inem itile muthima vahlea chun achena ding ahepoi. 36Vah chate nahi theina dingun, Vah chu nanei petchao hin, vah chu tahsanun, ati. Thu hicheng hi Jesu'n aseijin, apotdoh-in amaho-a kon chun akiseltai.

Mipin Atahsan Lou

37Ahin alah uva melchihna kidang tamtah abol vangin, amahon atahsan pouve.

38 # Isai 53:1. Hiche hi Isaiah themgaovin,

Pakai, kathuseiju kon atahsanem?

Chule Pakai ban thahat koi henga kilangam? tia asei chu guilhun theina ding ahi.

39Hiche thua hin Isaiah'in asei kitleuvin,

40 # Isai 6:10. Aman amitnu asuchon, alungu asutah tai;

Achuti loule amitnun muvintin,

chule alungun heuvintin,

chule hung kihei kitnun tin,

Keiman boldam get inge, ati; hiche jeh-a hi amahon atahsan thei louvu ahi.

41Hiche hi Isaiah'in ama loupina chu ana mu-a, ama thudol aseina-a kona, asei ahi.

42Achuti vangin vaipoho jeng jong tamtah-in atahsan taove; ahinla Pharisai ho jeh chun, kikhopna-a konin eikikaidoh khante tin aphongdoh aumpouve; 43Ajeh chu amahon Pathen choiat sanga mihem choiat adeijoh-u ahi.

Jesu Thuseija Thu Kitan

44Jesu'n aw sangtah-in asamin, Koi hijongle keima eitahsan chun, keima hilouva, eisolpajoh atahsan ahibouve. 45Chule keima eimu-a chun eisolpa amu ahi. 46Koi hijongle keima eitahsana chu muthima aum louna dinga, keima vah kahia vannoi'a kahung ahi. 47Mi khattouvin kathu jahen, tahsan hih jongle athu katanpoi; ijeh-inem itile keima vannoi thutana hung kahipoi, vannoi huhhing ding joh-a hung kahibouve. 48Koi hijongle keima eidei louva, kathu jong jop lou chu, athutanna khat aumnai; kathusei hochun ni nunung nile athu atan ding ahi; 49ijeh-inem itile keiman kathuneina-a kasei ahipoi; ahin eisola Pa chun kasei dingle kahil dinga thupeh eipeh ahibouve. 50Ama thupeh chu tonsot hinna ahi, ti kahei; hiche jeh-a chu kathusei hi Pan eihil bang banga kasei ahi, ati.

Currently Selected:

John 12: THADBSI

Highlight

Copy