John 13

Jesu'n Aseijuiho Keng Asil

1Kalchuh kut masangin, Jesu'n hiche vannoi'a kona a-Pa henga ache ding phat ahung lhungtai, ti ahen, Vannoi'a um ama-a ho chu angailun akhon ni geijin angailu lhumkeije.

2Chuin jan anneh kichaijin, diabol chun Simon chapa Judas Iscariot lung sunga ama matsahna ding lungthim akhumpeh tai. 3Jesu'n, Pan thil jouse ama khutna apeh, chule ama Pathen'a kona hungdoh ahia, Pathen henga chea ahi chu ahen; 4Ajan anneh ankonga konin akipatdoh-in, chuin aposil akoijin, tinotpon alan, akong akigah-in ahi. 5Chuin aman kisilna kong-ah twi alheijin, aseijuiho keng asilin, akong gahna tinotpon chun atheh pantan ahi. 6Chuin ama Simon Peter koma ahungin ahile aman ajah-a, Pakai, nangman kakeng neisilpeh dingham? atin ahile,

7Jesu'n adonbutnin ajah-a, Kabol hi nangman tun nahepoi; ajole henan nate, ati.

8Chuin Peter'in ajah-a, Nangman itih hijongle kakeng nasil louhel ding ahi, ati. Jesu'n adonbutnin ajah-a, Keiman nangma kasil loule keija nangman chan nanei lou ahi, ati.

9Simon Peter'in ajah-a, Pakai, kakeng keojeng hilouvin kakhut le kalu jonge, ati.

10Jesu'n ajah-a, Akisil jousa chu akeng tailou adang sil lou akhohpoi, apumpin angimsoh nai; chule nangho nangim naove, ahivangin nabonchao nahipouve, ati. 11Ijeh ham itile ama matsah-a pang dingpa chu aman ahetsa ahin; hiche jeh-a chu, aman, Nabonchaovin nangimpouve, ati ahi.

12 # Luk 22:27. Aman akengu asil jouvin, apon akilah-in atou kitnin, amaho jah-a chun, Nachung uva ipi bola kahi chu nahetnah-um? 13Nanghon keima Houhil le Pakai neitiuve; hiche natiu chu aphai, ijeh-inem itile keima hichu kahi. 14Hijeh chun keima Pakai le Houhil bonin nangho keng kasil leh, nanghon jong khatnin khat keng naki silpeh to dingu thu ahi. 15Ajeh chu keiman nangho kabol banga chu nanghon jong nabolna dinguva, vetsahna-a kabol ahi. 16#Matt 10:24; Luk 6:40; Jhn 15:20. Keiman nangho tahbeh beh-a kaseipeh nahiuve, Pakai sangin soh achungnung jopoi, asola sangin solchah jong achungnung jopoi. 17Hitiho hi nahetdoh uva nabol ule nangho anun noma nahiuve.

18 # Labu 41:9. Nangho nabon chaova thudola kasei ahipoi; keiman kalhendohho chengse chu kahenai; Ahivangin changlhah eineh khompi pan kachunga akengto alamtai, ti Pathen lekhabua thu guilhun theina dinga ahi. 19Tu-a kala ahung guilhun tengle, keima hi ama chu kahi nahetna dinguva, ahung guilhun masanga kaseipeh nahiuve. 20#Matt 10:40; Mrk 9:37; Luk 9:48; 10:16. Tahbeh beh-a kaseipeh nahiuve, Koi hijongle kamisol sang chan chun keima eisan ahi; chule keima eisang chan chun eisolpa asan ahi, ati.

Matsah-a Aumding Jesu'n Asei Masat

(Matt 26:20-25; Mrk 14:17-21; Luk 22:21-23)

21Chuin Jesu'n hiche chu aseijin, alungdong lheh jengin, ajah uva, Tahbeh beh-a kaseipeh nahiuve, nalah uva khat eipedoh-a pang ding ahi, tin aphongdoh tan ahi.

22Seijui ho chu khatle khat akive touvin, koipen asei ahi agelmove. 23Hichea chu aseijuiho lah-a khat, Jesu'n angailut chu a-anga kingai ahin; 24Simon Peter'in Koi pen aseina ham dongin tin amitnin agah houpin ahi.

25Hichun ama akingai bang chun akingaijin, Pakai, hiche chu koiham? tin adongin ahi.

26Jesu'n adonbutnin, Hiche changlhah hal hi kade-a kapeh dingpentah chu ama chu ahi, ati. Chuin aman changlhah hal chu adekot jouvin alan, Simon chapa Judas Iscariot chu apetai. 27Chuche changlhah hal akisan joutah chun Satan asungah alut tan; chuphat chun Jesu'n ajah-a, Nabol ding chu bol loijin, ati. 28Ahivangin aman ipi dola achuti sei ahi ankonga touho khatchan jong ahedoh pouve. 29Ijeh-inem itile kimkhatnin, Judas khutna sumbom aum jeh-a chu, kutna dinga imanchah dingu gacho-in atiham; ahiloule, vaichaho ikhattou pe dinga Jesu'n asolin angaitouvin ahi.

30Chuin aman changlhah hal chu akisan jouvin hiche pettah chun apotdoh paijeng tai. Chule hichu jan ahi.

Thupeh Thah

31Chutichun amapa apotdoh jouvin Jesu'n, Tun Mihem Chapa choi-atnin aumtai, ama-ah Pathen jong choi-atnin aumtai. 32Ama-a Pathen choi-atna aumle, Pathen'in jong amatah-a ama chu achoi-at ding ahi, chule achoi-at pai jeng ding ahi. 33#Jhn 7:34. Chapang neochaho, nang hotoh chomcha khat kaum nahlai ding ahi. Nanghon neihol dingu; ahivanga Judah ho jah-a kasei banga, tu-a nangho jah-a jong kasei ahi, Keima chena-a chu nangho nahung thei lou dingu ahi. 34#Jhn 15:12,17; 1 Jhn 3:23; 2 Jhn 5. Keiman nangho thupeh thah kapeh nahiuve, Nangho khatle khat kingailuto cheh-un; keiman nangho kangailut bangu hin nangho jong khat le khat kingailuvin. 35Nangho nangho lah-a naki ngailut tocheh uva nahiule, nangho chu keima seijui nahiu hichea chu mi jousen ahet ding ahi, ati.

Peter'in Aseilep Ding Jesu'n Asei Masah

(Matt 26:31-35; Mrk 14:27-31; Luk 22:31-34)

36Simon Peter'in adongin, Pakai, nangma hoilama nache dingham? ati. Jesu'n adonbutnin, Tun nangma kachena-a kanung nunga hungthei pon nate, ajo vangle kanung nunga nahung ding ahi, ati.

37Peter'in ajah-a, Pakai, ibola tu-a nanung nunga kahung thei lou dingham? Nangma jala kahinna jong kapeh ding ahi, ati.

38Jesu'n adonbutnin, Keima jala nahinna napeh dingham? Keiman nangma tahbeh beh-a kaseipeh nahi, thumvei nei seilep masangse-a ahchal khong lou ding ahi, ati.

Currently Selected:

John 13: THADBSI

Highlight

Copy