Solchah 1

Thu Makai

1 # Luk 1:1-4. Vo Theophilus, lekha masa-a chun Jesu thilbol le athuhil kipattil thudol jouse, 2Asolchah lhenho Lhagao Thenga thu apeh jouva lahtouva aum ni geija thu chu kanasunin ahi: 3Gim genthei athoh jouvin, chuche solchah ho chu thontheilou hetphotna tamtah toh thon ahingin akimusah in, nisomli geijin ahenguva akilah jin, Pathen lenggam thudol aseijin: 4#Luk 24:49. Chule amahotoh aum khomin, amaho chu hiche thuhi apen, Nanghon Jerusalem dalha hih-un; Pa thutep keija kona najah-u chu ngah jingun. 5#Matt 3:11; Mrk 1:8; Luk 3:16; Jhn 1:33. Ijeh-inem itile John chun twija baptize achansah ahin, nangho vang tukal ni phabep joule Lhagao Thenga baptize nachan dingu ahi, ati.

Jesu Van'a Akaltou

6Hichun amaho ahung kikhomun ajah-a, Pakai tu-a hi Israelte gam nakiledoh sah kit dingham? tin adongui.

7Chuin aman ajah uva, Pan athuneina-a angaitoa agot phat le nikho chu nangho het dingdol ahipoi. 8#Matt 28:19; Mrk 16:15; Luk 24:47-48. Amavang Lhagao Theng nachung uva ahung lhun tengle nanghon thahat nanei dingu ahi; chule nangho Jerusalem'a jong, Juda gamsung le, Samaria gamsung, chule leiset chung gam jouse-a, kolmong geija kathu hettohsah-a napan dingu ahi, ati. 9#Mrk 16:19; Luk 24:50-51. Chuin thu hicheng chu asei jouvin, amahon avet vet pettah-un ama lahtouvin aumin; amitmuva konin meilhang khatnin atolmangtan ahi.

10Chuin akaltouva van lam avet vet pettah-un, veuvin, ponbang sil mi ni akenguvah ahung dingin; 11Miteni chun, Nangho Galilee gam miho, ibola nadin uva van lam navet jinguham? Hiche Jesu nangho koma kona van'a kilatou hi, van'a akaltou namu bang banguva hi hung ding ahi, ati lhone.

Juda Iscariot Khelding Kilhen

12Chutah-in Olivet molsanga kon chun Jerusalem'a akiletaove; hichu Jerusalem komcha ahin cholngah ni lampi bou ahi. 13#Matt 10:2-4; Mrk 3:16-19; Luk 6:14-16. Chuin alhunun, aumnao indan chungnunga chun aluttou taove. Peter, le Jacob, John le Andrew, Philip le Thomas, Bartholomew le Matthew, Alphaeus chapa Jacob le Zealot Simon, chule Jacob chapa Judas; hicheng chu ahiuve. 14Hiteho chengse chu numei phabep toh, Jesu nu Mariam toh, asopiteho toh, lungkhat tah-in taona le ngehna ajomjing taove.

15Hiche nikho lai chun Peter seijui ho lah-a adingdoh-in (mipi akikhoma chu mi jale somni jen ahiuve,) 16Sopiteho, Jesu manho lamkaija pang Judas chungchang thudol, Lhagao Thengin David kama aseisah Pathen lekhabua thu chu guilhung ding mong ahi; 17Ijeh-inem itile ama chu eiho lah-a kisimtha ahin, chule hiche lhacha natohna mun jonghi changa ahi.

18 # Matt 27:3-8. Tun heche mipa hin khan gitlou man sumin leimun khat alamin, akhupbon achun, atumpi apohkeh-in, chule agil jouse ahungdoh tan ahi. 19Hiche thuhi Jerusalem'a cheng jousen ahesoh keije; hiti chun amaho paovin chuche leimun min chu Aceldama asahtaove; hichu thisan lei tina ahi.

20 # Labu 69:25; 109:8. Ijeh-inem itile Labu-a,

Ama chenna mun chu agoh keuvin umhen,

chua chun koima cheng hihhen;

chule apanmun chu midang changhen, tin akisune.

21Hijeh chun, Pakai Jesu eiho lah-a achele ahungleh phatlai sungse, 22#Matt 3:16; Mrk 1:9; 16:19; Luk 3:21; 24:51. John'in baptize achansah-a pat, Pakai Jesu eihoa kona lahtouva aum ni geija ikiloi khompiu hiche miho lah-a khat hi, ama thodoh kit hettohsah-a eipanhu diuva lhentei ngaiding ahi, ati.

23Chuin mi ni, Barsabas atiu Joseph (amin chom Justus), le Matthias chu alheng doh-un ahi. 24Chuin amaho ataovun, Vo mijouse lung hesoh Pakai, hiteni koijoh hi 25Chonset jala Judas'in ama mun'a achena dinga alha hiche lhacha na le solchah panmun chu lo dinga nalhenem neivet sah-un, atiuve. 26Chuin amahon vang asanun ahile, avang sanu chu Mathias chunga achutan; hitichun ama chu solchah somlekhat chutoh akisimtha tai.

Currently Selected:

Solchah 1: THADBSI

Highlight

Copy