MARK 13
13
Mathruunna Thlaam Anpilsamrel Jisu in Trong
(Met 24:1–2; Luk 21:5–6)
1 #
Met 24:1–51; Luk 21:5–36 Che amah in mathruunna thlaamnata anthruh in, aroi inkhat in akuunga ason, “Anro, Lulok, jikcha phah a salungkhouna lung mahche jikcha phah a salungkhouna veia anseem innmeio!” 2#Luk 19:43–44; Mak 14:58; 15:29; Jon 2:19; Noon 6:14Che Jisu in akuunga ason, “Nangin mah liinna anseem inni nimuh eime? Lung inkhat in inkhatchunga khalekho inthoongnoh a athlanga inpilkir umang.”
Klah knang Khatkho Chut
(Met 24:3–14; Luk 21:7–19)
3 #
Mak 5:37; 9:2 Che amah in mathruunna thlaamtonga amaingat a chorophol muulla inbok a amlaia, Pitar, Jems, John mahche Andriu in amahkuunga inruktea anrui, 4#Luk 17:20“Kanisonro mahchu tik a suuk ume, che mah thlou naamte atlungna tupot i jaknang daang ah inromna vei ume?” 5Chunna Jisu in ankuunga son amthronpei, “Tukhat inkho nannihta inhea nanimruui noh natu cheksilve. 6#Jon 8:24; 1 Jon 2:18Kei i amah khasang tih a kikminga miitam thlengtuei, mah i antihtu, che anmah in inhea miitam nanimruuitu. 7Che nannih in raal khatkho raalhou nantheih laia, nanril malah a inchoinohve, mah i inlitnoh a thlengtu, chuta achenavah nohmang. 8Alamva ramboom khatleh ramboom khat in andah tuei, che kurung huunna khatleh kurung huunna khat in andah tuei; amun aje jea runaangnu thoutu, mahche buhchaal suuktu; chuta naopok in klah kanang aphahnanga mah naamte i suuk usa.
9 #
Met 10:17–22; Luk 12:11,12 “Chuta nanroua cheksilve; alamva anmah in nannihta jama ankuunga nanimlantu; che nannihta sinakok ah nanimrattu; mahche nannih in keirella rampuui leh kurung anmaikuunga ngir uchou, anmah anmaikunga sakhi namilantu. 10Che Akthra Trongi ramboom anaamtea matsah a inlitnoh a inraantu. 11#Jon 14:26; 16:7–11; Luk 12:11–12Che anmah in nannihta chaang naniannatu mahche nanimlannatu nanithlenlaia, nannih in jangkison umeta matsah a inhalnohve; chuta mah pungchun nankuunga nanimlankha trong paningve, alamva mahlaichun nannih in trongnoh uchou, chuta Li Akseeng in trongtu. 12Che unaoin unaota mahche apa in asata thihnatu amlantu, che ansa in annu anpachunga andah tuei che anmah in inthat tuei; 13#Met 10:22; Jon 15:21Mii naamtein keiming rella nannihta nantirh tuei, chuta tukhat in achena phah a akdouchek mii in inkal aphahtu.”
Trihkhop a Intritna
(Met 24:15–28; Luk 21:20–24)
14“Che kmaang krem trihkhop ngirhnaphunoh amunta nannih in nanmuh laia (akpaa in louthei eiso). Chuche Judia a ak am ei in muulla tlaaneiso; 15#Luk 17:31innchunga ak am in trumnoh eiso, jangmekhat slakho louva atlaannatu innsungakho luutnoh eiso; 16louvah ak am inkho puunrei lohnatu inlengnoh eiso. 17#Luk 23:29Che mahlaichun nao inpooi mahche naoroiei turelva lahnasa a! 18Mah i phalbia asuuknoh natu ngenve. 19#Mad 7:14Alamva Ringpu in tukleiram seem amthron lainata pekphah aksuuknoh klah knang suuktu, che aknu avah suukho suuknoh usa. 20Che Akpu in aknikhata machomnoh leva, tukhatkho inkal cheknohtu; chuta amah in charra akdommii iturella, amah in aknichu amchomtu. 21Chunna tukhat in nankuunga, ‘Anve, onna Khrista am!’ nohle, ‘Anve, ohkhanna amah amsa!’ Nannih in mahchu malotnohve. 22#Met 7:15; Jon 4:48Chimnoh Khrista leh chimnoh ringraan thlengtuei che daang leh salungkhouna jikcha nanimmuhtuei, jaleva achar miiluungta chimnohtinga aphurhtu. 23Chuta cheksilve, keiin thlou anaamte matsah a kisonpeichou.”
Miivaa Asa kupa in Athlengna
(Met 24:29–31; Luk 21:25–28)
24 #
Mad 6:12,13 “Chuta mah aknichun, klah knang aknua, kini in inthimtu, che thla in amah avaarkha malannohtu, 25che ringramna arsi in triltuei, mahche ringramna atuui inloktu. 26#Met 10:23; Mak 8:38; Mad 1:7Chunna nannih in miivaa Asa kupa in paarthra leh akliin tuuisoh inruuia sumphaia thleng nanmuhtu. 27Chunna amah in ringroi amthlahtu, thliraang akiing manli nata, thalei adongna khatnata ringram achena phah a amah in acharmiita amchuntu.”
Thotthing nata Romnatu Para
(Met 24:32–35; Luk 21:29–33)
28“Thotthingata para veia nanromnatu nanimtheihkha romve: abaak in intha a annouche abur suun, mahchun nannih in suurjai naisa ta nanrom. 29Mahchunanga, thlou anaamte i suuk nanmuh laia, amah i innaia phalkuunga amsa ta nannih in nanrom. 30#Mak 9:1Atak a, keiin kisonchou, thlou annamte i matsah a asuuknohmiil mah ringnatluun i maangnoh umangtu. 31#Met 5:18; Luk 16:17Ringram leh thaleiva maangtu, chuta kei kitrongva tikniakho maangnoh luungtu.”
Aknileh Pungchu Tukhat inkho Romnoh
(Met 24:36–44)
32 #
Met 24:36; Noon 1:7 “Chuta mah aknichu nohle pungchu tukhat inkho romnoh, ringramna ringroi inkho romnoh ei, Asa kupa inkho romnoh, chuta Apa akrouin aromning 33#Eph 6:18; Kol 4:2Cheksilve, heithriil theihve; alamva nannih in laichu tik a thlengtu romnoh uchou. 34#Met 25:14; Luk 12:36–38Mah i kupakhat in rapkheitla ah seh nangjim, amah in inn amthlahltumma roijuihta angut masilla, anmah anthlou nujuih a, che thong angaakta heithriiltheih anveinatu jathang amlanei. 35#Luk 12:35–40Heithriilla amve, alamva khulouhramma, nohle jaanjaia, nohle aar ankhuung laia, nohle juktiinga nohle innpuin tik a thlengtu nannih in romnoh uchou 36Chunohleva amah in kak hanga athlenglai nannihta inkhemma am nanituuktu. 37Che keiin nannaamta kisonchou: heithriil theihve.”
Currently Selected:
MARK 13: TARAOBSI
Highlight
Share
Copy

Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.