LUKE 1

Trong Mathronna

1Amthron lainata anmit tak in anmuh mahche trongta rou aktlohmii, in ikuunga amilankha aknujuih a, 2#1 Jon 1:1; Noon 1:21; Hib 2:3inih ikaar a atlungkirche thlouvaa amramma mii aktam in thamin maveia kut ansunna turella, 3#Noon 1:1O, amtik liin Thiophilas nangin nitam akchim thaminta rom ajanatu, 4#Jon 20:31keikho matsahna thloulam anaamte nikuunga thratu ta madonna kimjih.

Aklup John Poktuta Matsah a Inson

5 # Met 2:1 Judia kurung Herot achup a Abijah loomvaa ruul veia, akming Jekhariah an ontunangkhat thiimpu inkhat am. Che amah akmeiva Aaron sakheina. Che amah akmingva Elijabeth. 6Che anmah innih in Akpu vaa trongthuun mahche pichaar naamte akchimnoh amnoh a seh a Ringpu maikunga akchimlamseh veiei. 7Chuta ansa amnoh, alamva Elijabeth va khungsa. Che anmah innih ankumkho tamsei.

8Chunna nga tloh a amah in aloom ruul aknujuih a Ringpu maikuunga thiimpu thlouta atlohlai, 9thiimpu phom kastam nujuih a Akpu thlaamsuunga luut a mekruk haal akuunga tlasa. 10Che mekruk ahaallaia mii naamte apaalla ngenna ammei. 11#Luk 2:9; Noon 5:19Mahchunna Akpu vaa ringroi inkhat in mekruk ahaalna mun akchangtonga ngirra amahta ammuhpei. 12Chunna Jekhariah in mahchuta amuhlai inhalsa, cheva tak a intri suuksa. 13#Luk 1:30,60Mahchunna ringroi in akuunga ason, “Intrinohro, Jekhariah, alamva nangin ningenkha atheihpei, chunna nang nikmei Elijabeth in asa kupa inkhat apoktu, che amah akming John niongtu. 14Chunna tlan mahche khalmo roomthok nangtu veitu. Che amah nipok in mii aktam anroomthoktu. 15#Luk 7:33Alamva amah in Akpu amit anna liintu, tuiibuhkho iinnohtu. Che anu vonsuung nata mathronna Li Akseeng in siptu. 16Chunna Israel asa aktamta amah in anmah Ringpu kuunga amlengtuei. 17#Met 11:14; 17:13Che anpa amilungta ansakuung che trongson amjuihnoh miita akchim lousingah amlengnatu Akpu turel amchaang miita thlouraang amtlohnatu, Akpu ninga Elijah vah li leh aktranga sehtu.”

18 # Luk 1:34 Mahchunna Jekhariah in ringroita ason, “Mahchu keiin khatloh a kiromume? Alamva keivah tarsang, che kikmeikho akum tamsa.” 19#Met 18:10Chunna ringroi in akuunga amsang, “Ringpu amaia akngir Kabriel keisang che nangsoh trongnatu mahche akthra trongi nikuunga thlennatu keita kamthlah ang. 20Che anro, thlou naamte i asuuknohsot mahnichu phah a nangva trong suuknoh uche, alamva akthlengsam laia aktlungsam kison trongta nangin malotnohche.” 21Nga tloh a asonlaia mii eiin Jekhariah ta apaalla gaak a amsei. Che amah in mathruunna thlaamma sotmal a am invah anmah in salungkhousei. 22Mahchuche amah in anthruh inva ankuunga trong cheknohsa. Cheva amah in mathruunna thlaamsuungah ahamuhta amuhpeita anmah in anrompei. Cheva amah in ankuunga trongtheihnoh sang ta daang atloh ei. 23Cheva amah in rou atlohna thlou amcheche inna inlengsa.

24Mahni khannata chuche aknua akmei Elijabeth nao inpooisa che mah i sonna amah atak in thla ranga inthupsa. 25“Mah chuvah miikaara keiin injak kikoknatu kichunga Akpu in keianna aknikhanna keita nga tloh a kamsuuk peiang.”

Jisu Poksam Matsah a Inson

26Chunnata thla kuruk antang in Najareth antih Kalili vaa khuuboom phah a Ringpu kuungnata Kabriel ringroita amthlahpei 27#Met 1:18Devit innsuung Joseph an ong kupa inkhatta trong amromche akseeng rungaa kuunga thlengsa, che rungaak akmingvah Meri. 28Che amah in akuunga thlenga ason, “Doiphah veiro, malungsi akphah rungaak o, Akpu in nangta nanruuipi.” 29Chuta mah asontrong chunna amah in khalmo inchoisa, kamthruunni jaknangta kamthruunna vei satame ta arilsuunga amdonpei. 30#Luk 1:13Mahchunna ringroi in akuunga ason, “Intrinohro Meri, alamva nangin Ringpu akuungnata malungsi niphahpei. 31#Luk 2:21; Met 1:21Che anro, nangin nao inpooia nisakupa inkhat nipoktu. Mahche amah akmingva Jisu niongtu. 32#Met 28:18Amah in amtik liintu che ankaangremva Ringpu Asa kupa niongtu. Mahche Akpu Ringpu in amahkuunga apa Devit vaa anbokna amlantu. 33Che amah in Jakob atute chunga ache amnoh a paaltu. Che amah kurung huunnavaa ache amnohtu.” 34#Luk 1:18Mahchunna Meri in ringroi kuunga ason, “Keiva kamsalkho amnohmangta mahchu khatloh a vei ume?” 35#Met 1:20Mahchunna ringroin akuunga ason, “Akseeng Li in nangkuunga trumtu, che Akthloiremvaa tuui in nangkuunga aniim thla a thlou atlohtu; churella nipoksam akseengi Ringpu vaa Asa kupa niongtu. 36Mahche anro nang sakhei Elijabeth khungkha atartinga asa kupa inkhat inpooia ipek thla kuruk aphahpei. 37Alamva Ringpu nata anthruh trong naamte veinoh amnoh.” 38Mahchunna Meri in ason, “Anro, Akpu rou aktloh kumei keikuunga nangin nison nujuih a keikuunga suuk veiso.” Cheva ringroi in amahkuung nata amahpei.

Meri in Elijabeth ta Seh a Aphah

39Chunnata Meri in inthoua rapthing ram Judia khuuboom inkhat a intha sehsa. 40Mahche amah in Jekhariah inna luut a Elijabeth ta saambaan amlanpei. 41Chunna nga tloh a Elijabeth in Meri va saambaanta atheihlai avonsuungna naoin inthomsa. Che Elijabeth kho Li Akseeng in sipsa. 42#Luk 11:27–28Mahche amah in tranga in ongsa, “Kumei ankaar a nangva doiphah veisache. Chunna nivon suungna naoi doiphah veisa. 43Mainangi keininga khatloh vei ume? Keitu Akpu anuin kikuunga athlengi? 44Mah chuvah anro, nang saambaan ahou kimkuur in atheihlai, kivon suungna naoin khalmo roomthok a inthomsa. 45Chunna amlot kumeikha doiphah veisa. Alamva Akpu tingnata keikuuunga asonkha tlungusa.” 46Mahchunna Meri in ason, “Kei kiril in Akpu ta kampaakpei. 47#1 Tim 2:3; Tit 2:10; Jud 1:25Mahche kei kikli in keikal Akpu Ringpu akuunga aroomthoksa. 48Alamva Akpu nangta rou aktloh ah marnop kumei ahoongta nihun anpei. Alamva anro, ipeknata mathronna ringnatluun anaamte in keita doiphah vei ta kan ong usang. 49Alamva akchek amneh khanna keikuunga akliinthlou atlohpei, che Akpu amah akmingva akseengsa. 50Che amahta aktrih miiva ringnatluun rel Akpu arilvol am. 51Amah kutbaanga atrang ammuh, amah in amtuhta akrom ril in amah khanna thoiliin miita akthek kirpei. 52Phompii ah akchek amneh mii eita atuulsunpei. Chunna marnop miita amliinpei. 53Aktraam miita akthra poot ah amah in amsippei, mahche doonkhaal miita aruuk a amthlahpei. 54Abraham leh ache amnoh amah arilvol antheihnatu, 55inih ipa ipu ankuunga asonnanga amahvaa roijuih Israel ta amjoompei.” 56Mahche Meri in thla inthumvak amahsoh inruuia amsa cheva inna inlengsa.

Aklup John Poksam Matsah a Ason

57Cheva Elijabeth in nao apoknatu thla antang in asa kupa inkhat apokpei. 58Mahche Akpu in amahkuunga ralthloia arilvol ammuhpei ta anthringpi mii in mahche amah sakhei in antheih lai amahsoh inruuia anroomthoksei. 59Mahche nga tloh a nijan kirit atangin naota avun tannatu anmah in thlengsei. Che anmah in apavaa akming nujuih a naota Jekhariah anthunsam, 60chuta anuin ason, “Nganoh, amah akming John iongtu.” 61Mahche anmah in akuunga anson, “Nang sakhei ankaar a oinanga an ongming louamnoh.” 62Mahche amahta jaknangming nithunjame ta nao apakuunga anromna daang tloh a anruipei. 63#Luk 1:13Mahchunna amah in amjihnatu intlaap inkhat anih a, “Amah akming John” ta amjihpei. Che annaamte in salungkhousei. 64Mahche kak hang abao inhoongsa, amlei injaksa che amah in Ringpu ta mapaak a trongsa. 65Cheva anmahsoh inhiilla ak am annaam in intri suuksei. Che anaamte i Judia ram muul pumtea inthangsa. 66Mahche naoi jangvei umeta aktheih annnaam in anrilsuunga ansihpei. Alamva Akpu kut in amahsoh inruuisa.

Jekhariah in Aphoong

67Cheva apa Jekhariah in Li Akseeng sip a phoonga ason, 68“Israel vaa Ringpu Akpu doiphah veiso, alamva amah in athlengche amah amiita thloknatu thlou atlohpei, 69mahche amah roijuih Devit innsuunga inih turella chaanring aki amthruhpei, 70leithingnata akseeng ringraanei annar a amson khananga, 71inihta jekna mii mahche inihta inintirh ei ankutnata inikaltu; 72inih ipa ipuei rilvoltheih trongchetta impaangnatu, mahche amah akseeng trongirhnata mapolhnoh a intheihnatu, 73inih iputhou Abraham kuunga trongchet atloh nujuih a, 74inihta jeknaei ankutnata inikalla intri amnoh a amahta routloh icheknatu, 75inih iringna chaan in sot a amah maikuunga kseenga mahche akchimlamseh veia iamnatu. 76#Luk 7:26Mahche nao nangva, Ankaangrem ringraan kiong uche; alamva nangin Akpu alam nimchaangnatu amah amaa a seh uche, 77#Mak 1:4amah amiivaa anlehta ipnatu chaanring akrah amlantu, 78#Eph 5:14inih Ringpu in inirilvol apaalla inthim leh akthi aniimma anbok miita amvaarnatu, 79#Met 4:16anthimma anbok anchunga mahche akthivaa anniimma ak ammi anchunga amvaarnatu, inih ikehkaarta leh oi lamma inichingnatu relnasa.” 80#Luk 2:40; 2:52Naoin li inkho liinsa, trangkho trangsa, mahche amah atakta Israel ankuunga ammuh nohmiil raprilla amsa.

Currently Selected:

LUKE 1: TARAOBSI

Highlight

Copy