MATHI 3

Johan Baptist Sheshu

(Mk 1.1-8; Lk 3.1-18; Jn 1.19-23)

1Tipa ghulokilo Johan Baptist no Judia lo timi kughunamokeu qhalo ighi eno asheshu ae. 2“Axine lono Alhou lau xaideighivelo, kughengu Kungugha yehkipeye kupunuvae!” ipi pano pie. #Mt 4.17; Mk 1.15 3Isaya tungkupuno puzuuno ishi pipuakeu huye Johan vehu pipuanike:

“Khukelano timi kughunamo keu-a lono ishi asheshu anie,

‘Ampeu laghi kutope qhilo,

pano wuniye akeu laghi mzuchoyi shitsulo.’ ” #Isa 40.3

4Johan ye kemel mhino shikeu phimini pue, ashiyikono apokha shikeu pesu papo khapu eno leusu ngo aghalo khingozuno pa chuqupu shiche. #2 Kuka 1.8 5Jerusalem lo ngo Judia bocholo eno Jordan ghakhu qha kumtsulo timi akeqono Johan lau wue. 6Timiqono panoqo xine pipheve eno pano panongu Jordan lono baptiz shitsue.

7Kughou Farisimi ngo Sadukimi kutomono baptiz shitsupe niye cheghi keu Johan no ithulu keno, pano panoqo vilo pi, “Nongu apighi tiqo! Khuno nongu kutughu puzu Alhou loghu chekeu lono polule pi kya? #Mt 12.34; 23.33 8Nonguno axine lono Alhou lau xaideghi keu qhemi mlape piyelo 9eno nongu likhi nongu kijivilo ghi, ‘Ningu papuh ye Abraham ke,’ ipi kumsu akevilo. Ino nongu vilo pini, Alhou ye atu hipaqo ikhi pesu Abraham ghenguno atianuli kughulhove tsulu nanie! #Jn 8.33 10Amughuye itehimu asubo akuhu lono yeqhive nike kutope anie, tighenguno asubo khipaqono alothi kivi pithimo nikeno yeqhipe amilo vesuve nani. #Mt 7.19 11Niye azu pesu nongu baptiz shitsu cheni, tiye nonguye axine lono Alhou lau xaide ghiveapi piyekeu ke, ikemu ithiu milakhi ighini akeuye Aghungu Kimthe eno ami pesu nongu baptiz shitsu nani. Paye inguno shishe akijeue; niye pa pukhu kuqho mu petsu kuzupu kumoe. 12Pa ulo athi fuleve kepu phigha peani, eno pano pa niqa shikimthe puzu pa thi pekutsusawo alelo su nani, ikemu amu-uye ghapinhemla keu mi lono piti nani!”

Jisu Baptiz Shikulu

(Mk 1.9-11; Lk 3.21-22)

13Tile Jisu ye Galil lono Jordan lo wuno Johan pelo pa baptiz shivetsupe nike ighi, 14Ikemu Johan no pa lakha ghi ishipi, “Nono ikughape baptiz shitsu kepu thono, khilauno nouno ilau ighi ani kya?” 15Ikemu Jisu no pa khochile. “Itehiye hitoi shive aghi pelo, kughengu ishi shikeu lono Alhou no amikucho kiu avehupu shiani keno kumtsu ninguno shikupuluni chenie.” Tileno Johan no pulovetsu.

16Jisu no baptiz shilukelo pano azu lono ithughi kemtsa kungugha khaqhitsu eno Alhou Ghungu no miqhedu lakhi toi iqighino pa shou ngove keu pano ithulu, 17Tile kungugha launo asutsa lakhino ishipi. “Hiye iNu ino qhuyivulayi chekeuke, pa shou imlokiqi acheni.” #Bothu 22.2; Leshe 2.7; Isa 42.1; Mt 12.18; 17.5; Mk 1.11; Lk 9.35

Currently Selected:

MATHI 3: SUMIBSI

Highlight

Copy