MATHI 4

Jisu Ghujukeu

(Mk 1.12-13; Lk 4.1-13)

1Tile Aghungu Kimithe no timi kughunamo keu alo Jisu sasu wuve, tiye tughami pelo ghuju peni yeke. #Ibri 2.18; 4.15 2Paye putho-pucho tsala lhobidi achuqupu chumono ae, ikehu Jisu ye shishe mzuthive. 3Ghukujuu no pa lau ighino pi, “Noye Alhou Nu ke aye atu hipaqo vilo asho ilhove lopi ahza tsulo.” 4Ikemu Jisu no khochile pi, “Kuchoyesulo ishi pipuani, ‘Timiye achuqupu likhino xulu chemoe, ikemu Alhou no pikeu tsa shou bepe xulu nanie.’ ” #Zaki 8.3

5Tithiu Ghukujuu no Akimthe phughilo Jisu sawuno achineki kutsuqalo ngope, 6eno pa vilo ishipi, “Noye Alhou Nu kena piaye, ilhe iqivelo; kughengu kuchoyesulo ishi pipuani:

‘Alhou no pawu kungumi pelo otucho luvepe nani,

Panonguno panongu-u lono okhapeluve nani,

Tishianguno opukhu pelo atu shou pusupukulu pemo nani.’ ” #Leshe 91.11-12

7Jisu no pa vilo pi, “Itaghi kuchoyesulo ishi pi puanie, ‘Noye Ampeu oLhou ghuju kepu kumoe.’ ” #Zaki 6.16

8Tileno Ghukujuu no ighono chuqumughai keu naghuto lakhilo Jisu sawu eno ayeghilo akukaqha jeli kumtsu eno tipauye kiutoi kijekeno pesu pa piye. 9Ghukujuuno Jisu vilo pi, “Nono itsaiqi puzu imlla aye, ino hipaqo kumtsu pesu otsuni,” 10Tile Jisu no pa vilo pi, “Chevelo, Satan! Kuchoyesulo ishi pipuani,’Noye Ampeu oLhou mllalo eno pa qeu likhi shialo!’ ” #Zaki 6.13

11Tileno Ghukujuuno pa qhive, eno kungumi ighino pa huthu auve.

Galil lo Jisu Kumla Huthu

(Mk 1.14-15; Lk 4.14-15)

12Johan kughape akughushivae pikeu Jisu no chilu kelo pa ye Galil lo ide wove. #Mt 14.3; Mk 6.17; Lk 3.19-20 13Paye Nazaret taunlo ngomove puzu wuve eno Galil zughi phivilo Kapernaum taunlo acheuve. Hiye Zebulun ngo Naftali kuma kokutha bocholoke . #Jn 2.12 14Tiye Isaya tungkupuno pipuakeu shikupuni ye ke:

15“Zebulun yeghi ngo Naftali yeghi,

Azughi kudau Jordan katha iku kelo, kutami shiayeqo wu Galil! #Isa 9.1

16Akuzulo achekemino akuvu kije lakhi ithulue,

Akithi zumoyike yeghilo ngo achekemi shou akuvuno yepuvuvae!”

17Tithiuye Jisu no ishi asheshu, “Axine lono Alhou lau xaide ghivelo; kughengu Kungugha yehkipeye kupunu khoivae!” #Mt 3.2

Jisu no Akhakukhami Bidi Kulu

(Mk 1.16-20; Lk 5.1-15)

18Jisu no Galil zughi phivilo wuchekelo, pano athiazu mikini ithulu, Pitor ipi kuvetsukeu Simon ngo pa thikuzu-u Andrew pama akhame pesu azughilo akha vecheghi, kughengu pamaye akha kukhamike, 19Jisu no pama vilopi, “Igholo ighilo, ino nokujo pelo akha khalukeshi timi kulukemi shipeni.” 20Pamano mtazu pama khame qhiveno pa gholo wuve.

21Tileno chesu wuchekelo Jisu no kutami athiazu mikini ithulu, Zebede nu Jems ngo pa thikuzu-u Johan pamano ashukalo pama papuh sasu akhame kishekulu kuto aghi. Jisu no pama ku kemtsa, 22pamaye ashuka ngo pama papuh ishi qhive puzu pa papesu wuve.

Shika, Asheshu eno Shipivi

(Lk 6.17-19)

23Jisu no Galil qha kumtsulo wupuzu Sinagog lo timiqo kutsu eno akukayeh wu lokivipu sutsa pesu asheshu, eno timiqo gholo akusu puaghikeu jeli eno kusukini shi aghi keu jeli kumtsu pano shipivitsu. #Mt 9.35; Mk 1.39 24Pa jekipiye Siriya yeghi bocho kumtsulo vekuphawove, ikehu akusupu jeli thwokha lono ichhe-ime aghikeqo kumtsu, eno suaghikeu, tughakusano sa-aghikemi, kilighakipemi, eno aghi-anhu thivekemi pa lau saghike Jisu no panoqo shipivitsue. 25Aqokitikhi kumzapuno pa papesu che eno timi tipaqoye Galil, Aphu Chighilo, Jerusalem lo, Judia lo eno Jordan nguno tuxau akeu yeghi lono ighikemiqoke,

Currently Selected:

MATHI 4: SUMIBSI

Highlight

Copy