MATHI 28

Xuchilethuve

(Mk 16.1-10; Lk 24.1-12; Jn 20.1-10)

1Sabat tsala thiu tughakhani inaqhe vuqai ipeche kelo, Magdala noghami Maria ngo kutami Maria ishiye akumoki juniye wu. 2Tile zuleno ayeghi kughutha kije lakhi ighi, tiye Ampeuw kungumi lakhi kungugha lono iqighi puzu atulupha hu tukuluveno tipau shou iqa-a. 3Pa jukogheye tsutsukulomusu toi eno pa phiminiye murasu toi metsughoyike. 4Tilehi akhemiqoye pa musake launo khokhoshive eno akithi kumlhoshive.

5Tile kungumi huno totimiqo vilo pi, “Nonguye musakepu kuhae. Nonguye kros lo yedavekeu Jisu juniye chenikepi ino ithi ani. 6Pa ye hile kuhae, pano pivekeu toi pa ye xuithuvae. Hila ighilo eno khile pa qhipua keno tipa-a julo. 7Itehiye mtazu wulo eno pa khopemi vilo pilo: ‘Pa ye akithi lono xuthuvae eno pa ye nongu zuuno Galil lo wuni cheni ike nonguno tilauno pa ithulu nani!’ Ino nongu vilo pivekeu kumsuchile lulo.” 8Ikehu panonguye musa pulaghi alokivino chhitoive puzu akumoki lono mtazu wuve eno Jisu khopemi vilo pinike panonguno posu wuve.

9Paikhavino Jisu no ala lono panoqo sasu kushono ishipi, “Alokughuno nongu gholo alo!” Tile panonguno pa kupunu ighi eno pa pukhu tsuqupe puzu itsaiqino pa mlla. 10Jisu no panoqo vilo pi, “Musakevilo! Wulo eno ithikuzumi vilo Galil lo wulo pilo eno tilano panonguno isasu kusholu nani.”

Akhemiqono Pikeu-tsa

11Totimi qono wuchephi lono akumoki khemi ghushimi khamino aphughilo ilo puzu achinetomi vilo kishivekeno kishekulu pive aghi. 12Achinetomino Judami kichimiqo sasu kusho puzu panongu kumquveno pisa kutomo pesu ghushimiqo tsuno 13ishi pive: “Nonguye, nonguno zuaphi lono pa khopemino putho lono ighi puzu pa sukumo puka suwuveke, ipi pivelo. 14Tsala Ahng no hipau chilu aye, ninguno pa vilo pikidekudayive nani eno nongu pelo kupunapemo nani.” 15Akumoki khemi ghushimi qono pisa hu luve eno panongu vilo pivekeu toi shie. Ishi kutolo Judami gholo hipatsa pesu pekishe acheni.

Jisu no Akhopemi lau Ipeghi

(Mk 16.14-18; Lk 24.36-49; Jn 20.19-23; Aposto 1.6-8)

16Ike akhopemi chighi qhaqhi huye Galil lo khipau naghutolo Jisu no panoqo vilo wulo pi keno tipaulo wuve. 17Kughou panonguno pa ithulu keno itsaiqi puzu pa mlla, ikemu panoqo gholo khamiye amlo lipiveno ae. 18Jisu no kupunu ighi puzu panoqo vilo ishipi, “Kungughalo ngo ayeghilo akuka kumtsu itsuvae, 19Ike aqha kumtsulo ashiayeh kumtsu lau wulo eno ino kutsukeu lukemi shilupelo; Apuh jeku, Anu jeku eno Aghungu Kimthe jeku ishieno panoqo baptiz shitsulo; 20eno ino nongu lau ahza tsuvekeu kumtsu panoqo pelo pelupe nike kutsu tsulo. Eno julo! ayeghi kishekhake kutolo niye pulhapuju nongu sasu ache nani.”

Currently Selected:

MATHI 28: SUMIBSI

Highlight

Copy