MATHI 27

Pilat lau Jisu Sawuve

(Mk 15.1; Lk 23.1-2; Jn 18.28-32)

1Inaqhe itheno Achinetomi ngo Judami kichimi kumtsuno Jisu pithive nike ghenguno kishivekepu kela kuchughuve. 2Panonguno pa tshuveno sasu wuno Ahng Pilat tsuve.

Judas Kithi

(Aposto 1.18-19)

3Jisu kughape thechu shikeu Judas ye Jisu pithiveni cheni pikeu xakuthatsa ithive puzu pa mlo xaideghive eno achinetomi ngo kichimiqo lau tsandiyi shighi hu pechilesu ighino 4ishipi, “Kuqumokeu timi hu pithivepe nike thechu shikeu lono ino axine shivae.” Panonguno khochile, “Ningu vilo kiu shilopikepu kya? Tiye olikhi ovehua thono!” 5Judas no tsandiyi pisa hu achinekilo vesuveno ipeve eno paye wuve puzu pa likhi pa tshuqhi pithive.

6Achinetomino pisa hu ikhikiche pesu ishipi, “Hiye ahjino qhuvekeu pisa keke achinekilo pekutsu puakeu kini gholo sukepu ni yezahlo kuhae.” 7Panongu kugha kuqhano pisa tipau pesu ali kumlami lu qhuve eno kicheghuzumi kumo qhokeu-a shitsu. 8Tighenguno tipau yeghi pesu ishi kutolo “Ahjino qhukeu yeghi” ipi cheni. #Aposto 1.18-19

9Tiye Jeremiya tungkupuno pipuakeu shikupuve; “Israilmino pano tsuniepi pulovekeu me hu, panonguno tsandiyi shighi ikhilu, 10eno Ampeu no ikichepiye kehutoi panonguno tipau pesu alikumlami lu qhuve.” #Zekha 11.12-13

Pilat no Jisu Inijukeu

(Mk 15.2-5; Lk 23.3-5; Jn 18.33-38)

11Jisu ye Ahng zulo puthughoa, ikelo Ahng no pa iniju, “Noye Judami kukau kesha?” Jisu no ishi khochile, “Nono ti pivae.” 12Ikemu achinetomi ngo kichimiqono pa ngukukeulo paye kiumu khochilemoe. 13Ikehu Pilat no pa vilo pi “Panonguno hipaqo kumtsu pesu onguku akeu noye chimla kesha?” 14Ikemu Jisu no ghechilekeu tsa lakhimu khochilemo, tishikehu Ahng ye shishe akichiqhive.

Jisu Pithivenikeu Kughathave

(Mk 15.6-15; Lk 23.13-25; Jn 18.39—19.16)

15Hechekulu Ghulhu atsutsulo Ahng ye timiqono lunishikeu kiqi lono akughumi lakhikhi khaqhipheve tsuche. 16Tipa ghulokilo Baraba ipi puzu alhoksa lono ajekipishi kemi lakhi akughu shia. 17Ikehu timi aqokitikhino kumqo-akelo, Pilat no panoqo vilo ishi iniju, “Nonguye ipelo khikhiu khaqhi phevetsu penishi ani kya? Baraba keo Mesiya ipi chekeu Jisu hu kya?” 18Panonguye Jisu ju anheshuke ghenguno ikhiphepe tsuvekeu Pilat no ithiake.

19Kughou Pilat no kughakilo iqa akeno, pa nipuno aghini lakhi pa lau shipuwu ghi ishipi, “Amikuchomi tipau shou kiumu shikepu kumoe, kughengu pa ghenguno iji isamou niye shishe ime puanie.” 20Ikemu achinetomi ngo Judami kichimiqono timiqo hakilhe pesu Baraba kuqho puwuveno Jisu pithivepe niye Pilat vilo khue. 21Ikemu Ahng no panoqo vilo ishi iniju, “Ipelo hipama dolo khikhiu nongu lau khaqhiphetsu penishi ani kya?” Ikelo panonguno ishi khochile, “Baraba khaqhipheve tsulo!” 22Pilat no panoqo vilo ishi iniju, “Tishiaye, Mesiya ipichekeu Jisu kughapesu niye kiu shilo pikya?” Timi kumtsu ghano ishi pi, “Kros lo pa yedavelo!” 23Tile Pilat no ishi iniju, “Paye kiu lhoksapu shipuani kya?” Ikemu timiqono alaushi ighamuku, “Kros lo pa yedavelo!” ipie. 24Kiumu shimlakepu shivekeu Pilat no ithuluve eno mutomushukeu alau shini keshive, ikehu timiqo zulono azu pesu pa-u mutsuveno ishipi, “Timi hipau kithi ghenguno ikipimipu kuha ke, hiye nonguno shiani!” #Zaki 21.6-9 25Timi kumtsu ghano ishi khochile, “Timi hipau pithivekeu ngsu ni shou eno ni-tianuli shou ikughi pelo!” 26Tishieno Pilat no panoqo lau Baraba kuqhophevetsu, ikemu Jisu kughapesu ghaqhi puzu kros lo yedavepe nike ikhiphe tsuve.

Ghushimi no Jisu Ghimeqhi

(Mk 15.16-20; Jn 19.2-3)

27Tileno Ahng ghushimi qono Jisu sasu Ahng kikhalalo wuve eno ghushimi akeqo kumtsu pa suhope kumqoluve. 28Panonguno pa phimini xavetsu eno lahuphi pa pu-ue. 29Panonguno asahubo ghokuna pesu akutsukuqho shieno pa qhopipe, eno pa-u ajeu akusu lakhi sutsu. Tishieno pa gizulo qhoqhunhepe puzu ishi pa thaighae, “Judami kukau, axu-pushulo!” 30Panonguno pa shou musute puku, eno akusu hu ikhipesu pa kutsulo ghatsue. 31Pa thaigha tave kethiu, panonguno lahuphi hu xaluve, eno pa- phimini pu-uve, eno kros lo pa yeda nike sunhe sasu wuve.

Kros lo Jisu Yedave

(Mk 15.21-32; Lk 23.26-43; Jn 19.17-27)

32Panonguno wuchekelo Kurinia noghami Simon ipikeu sholu, ike ghushimino tsumomo pa pelo Jisu wu kros xapupe. 33Panonguno Golgotha ipichekeu-a lakhilo ighi, tipau kiqiye “Akutsu-boghea” 34Tilehi panonguno pa pelo yepeniye aji ngo akukhu pama lekitevekeu pesu pa tsu, ikemu pano ti micheju puzu tipau yetsumove. #Leshe 69.21; Leshe 69.21

35Panonguno Kros lo pa yedave eno asaqhi puzu paphimini panongu dolono kijeluve; #Leshe 22.18 36tishieno panonguno tile iqa-ghi pa ghukhe shiae. 37Akipimi pa tsukeu panonguno yepesu pa kutsu sholo ishi qhi: “Hiye Judami Kukau Jisu ke.” 38Panonguno timi heqhi-buqhi suxaluve chekemi kini Jisu gholono kros lo yeda, lakhino pa-u ajeu eno lakhino pa-u piyiu shighi yedape qhi.

39Tipau vechesu wuchekemino panongu kutsu kungughi Jisu thaighakeu tsa ishipi: #Leshe 22.7 40“Noye Achineki xaleveno ghulo kuthulo ti shipe qhiluve nikeu pichekeu hu olikhi oxaluve julo, noye Alhou Nu kenapi aye kros lono iqighive julo!” #Mt 26.61; Jn 2.19 41Tipaphi lono achinetomi ngo Ayezah kukutsumi eno Judami kichimiqono pathaqhi ghi ishipi, 42“Paye kutami xalue, ikemu pa likhi pa xamlake. Paye Israilmi kukauke, kros lono itehino pano iqighiluveke aye ninguno pa shou pulubenike! 43Pano Alhou shou pukhube acheni eno paye Alhou Nu ke ipi cheni. Tishiaye, Alhou ye itehino pa xapheluni cheni kemo keno junie!” #Leshe 22.8 44Timi heqhi-buqhi puzu suxaluve chekemi pa gholo kros lo yedape qhikeqo ghi kutami gholo su-ghi pathaigha.

Jisu Kithi

(Mk 15.33-41; Lk 23.44-49; Jn 19.28-30)

45Puchou mtalo zumayikeuno ayeghiqha kumtsu nhaluve eno ayikihedo kuthu kutolo tishi ae. 46Ayi kuthu kihe ghulokilo Jisu no aghugha kuloghi shi ighae, “Eli,Eli, lama sabakhtani?” Tipau kiqiye, “iLhou,iLhou, noye kushiye ipheve ani kya?” #Leshe 22.1 47Tilehi puthugho akemi gholo khamino tipau chilu puzu ishipi, “Paye Elija kuanie!” 48Panoqo gholo lakhino mtazu posu wuno aghushi lakhi ikhipesu akiqhizulo putsuno ayeghu lono jipesu pa pelo musuye peniye chhopuku tsu. #Leshe 69.21 49Ikemu kutamiqono ishipi, “Qe-aghilo, Elija no ighi puzu pa xalunikeo mokeno ninguno junie!” 50Jisu no itaghi aghugha kuloghi shi ighano sutha huve.

51Tileno Judami chinekilo kokuthabo phi atsuqa lono abophi kutolo ala-kini shi suxu kututashive. Ayeghi sukughutha eno atuquqono ipokututa shive, #Ipe 26.31-33 52akumokiqo ipoveno lhapheve eno Alhou timi thivekeqo kutomo akumo lono xuthughive. 53Panonguno akumoki lono ipeghive; eno Jisu no akithi lono xuchilethughive kethiu, panonguno Akimthe Phughilo ilo eno timi kutomono panongu sholu.

54Ghushimi 100 shou akijeu ngo pa gholo ghushimi qono Jisu jughi khe akelo ayeghi ithakeu eno tile kishi akeno kumtsu ithuluno panonguye kichimamaiveno ishipi, “Paye kuchouno Alhou Nue!” 55Tilehi totimi kutomono putou ngono juae. Panoqoye Galil lono Jisu papesu ighikemiqoke eno pa hejuchekeqoke. 56Tipaqo gholo Magdala noghami Maria, Jems ngo Josef pama paza Maria eno Zebedi nu pama paza ngo ishi ae. #Lk 8.2-3

Jisu Kumo Kutsukeu

(Mk 15.42-47; Lk 23.50-56; Jn 19.38-42)

57Kughou avelau shive keno Arimathia lono kinimi lakhi ighi, pa jeye Josef eno pa ghi Jisu kukutsu papechekemi lakhi. 58Pano Pilat lau wuno Jisu sukumo ghenguno inijuke. Tile Pilat no asukumo hu Josef tsuvepe nike ahza tsuve. 59Ikehu Josef no Jisu sukumo peluveno phepheyikeu phi akithe lakhi lono ti kuzuve, 60eno tipau pesu pa kumoki akithelo qhive, tiye pano atuqu chhupho ilo anileshi mlapuakeu kumokike. Tishino pa no atupha kije lakhi tukulusawo akumoki hukikha khaveno wuve. 61Magdala noghami Maria ngo Maria lakhiu ngo ishi tile-a, pamaye akumoki ghungulo iqa-a.

Akumoki Khemi

62Tishiwo thoghiu, tiye Sabat tsalalo achinetomi ngo Farisimino Pilat sasu kushono 63ishipi, “Akijeu, hu kuhakughau huno pano xuaphi lono ishi pichekeu ninguno kumsulu ani: ‘Atsala kuthu thiu niye xuthughive nanie.’ #Mt 16.21; 17.23; 20.19; Mk 8.31; 9.31; 10.33-34; Lk 9.22; 18.31-33 64Tighenguno atsala kuthu kutolo akumoki kutokupuyi khepe nike ahza tsulo, tikumoaye pa khopemino wuno pa kumo pukasuwuve no timiqo vilo, ‘Paye akithi lono xuthuvae’ ipi nosake. Tishiveaye hi akimki ashekhau huye atughulo mikipuakeu nguno ihulokeu shi alhoksau shiniae.” 65Pilat no panoqo vilo ishipi, “Aghukhemi sawuno kishekulu shi akumoki khepe qhilo.” 66Ike panonguno wuno atupha shou amchishi mekhave eno aghukhemi pelo ti khepe nike kishekulu shipe qhive.

Currently Selected:

MATHI 27: SUMIBSI

Highlight

Copy