MATHI 22

Kulakupu Ghulhu Pesu Kimighipiye

(Lk 14.15-24)

1Jisu no itaghi kimighipiyekeu pesu timiqo putsa.Pano ishipi, 2“Kungugha yehkipeye kukami lakhino pa nu ghenguno kulakupu ghulhu kutope qhikeu toike. 3Kulakupu ghulhulo kusupuakeqo kuwupenike pano aqemi hapuwue, ikemu panonguno ighinishimoe. 4Itaghi pano aqemi kutami puwuno ishipi, ‘Kusupuakeqo vilo ishi pilo, Niye ighulhu kutope qhivae, amshitsu ngo amshiti athakupu heqhino thwokha kutope ani. Kulakupu ghulhulo ighilo!’ 5Ikemu ku-supuakeqono ti jukunathaveno pututa shelo wuve, lakhino pa lulo huve, lakhino pa lhikishialo wuve 6eno kutamiqono pa qemi tsuquluveno kuoqhi pithivetsu. 7Akukauno axuideveno pawu ghushimi puwu puzu hekiqhimiqo pithive eno panoqo phughi pitivetsu. 8Tishino pano pa qemi vilo ishipi, ‘Kulakupughulhuye kishekulu kutope ani, ikemu ku-supuakeqono tipaulo sukuzupu qhemi kumoveke. 9Itehiye alaghilalo wupuzu timi khijehi nonguno sholu nikeno tipaqo kulakupu ghulhulo kusulo.’ 10Ike aqemiqono alaghilalo wuno akivimi na alhoksami namu panonguno sholukemi kumtsu kusaghi eno kulakupu kutope akeu-a huye inamino chhive.

11“Akukauno inamiqo juniye iloghi, eno tilehi timi lakhiye kulakupulo ukeu phimini pepumono aghikeu ithulu. 12Akukauno ishi pa iniju, ‘Ashou, noye kulakupulo ukeu phimini pepumono hilehi kishi iloghilu kya?’ Timi huye kiu-tsamu pimlave. 13Tileno akukauno aqemiqo vilo ishipi, ‘Pa phi a-u pheno khalau akuzulo vephevelo. Tilaye ahu-tsughububu shi qah nani.’ ” #Mt 8.12; 25.30; Lk 13.28 14Jisu no kishekha ghi pi “Kutomo ku-suke, ikemu aghulo likhi kishelue.”

Asuqha Tsukeu vehu Iniju

(Mk 12.13-17; Lk 20.20-26)

15Tileno Farisimiqoye wuveno panonguye pa sasu atsa kutsala keu lono pa kitimeluveniye kuchughupe qhive. 16Ikehu panonguno panokhopemi khami pelo Herod laumi sasu kumtsa Jisu lau puwu. Tipaqono ishipi, “Kutsuchekeu ninguno ithi anike noye amikuchomi eno timi ghenguno Alhou pulou akeu vehu kuchou nono kutsu cheni, eno kutamiye kishi kumsu aghi nani kela ipi pi chemoe, kughengu noye timino ashouno kiu kiu thotsu shi aghinamu tipau jupesu kutuqukeu shichemoe. 17Tishiaye noye hipau kishi kumsu anikela nivilo pitsulo. Rommi kukau lau asuqha tsukeu ningu yezah loye achipi keo mokya?” 18Ikemu Jisu no panoqono muqumgha shi akeu vetha luveno ishipi, “Nongu kuhakughaqo! Nonguye kushiye ikitimeveniye pukaputsa ani kya?” 19“Asuqha tsuchekeu tsandiyi ipiyejulo!” Panonguno tsandiyi lakhi pa lau sughi, 20eno pano panoqo vilo ishi iniju, “Hiye khuu julho eno khuu je kya?” “Rommi kukauke” ipi panoqono khochile. 21Tileno Jisu no panoqo vilo ishipi, “Tishiaye, Rommi kukau wu kiu keno Rommi kukau tsulo eno Alhou wu kiu keno Alhou tsulo.” 22Kughou panonguno ti chilukeno, panonguye apuchopungoveno panonguno pa qhiveno wuve.

Kithimi Xuithuvenikeu Iniju

(Mk 12.18-27; Lk 20.27-40)

23Tipani Sadukimino Jisu lau ighi, panonguye xuchilethughikeu kuhakepi pichekeqoke. Panonguno Jisu vilo avehu lakhi iniju ghi #Aposto 23.8 24ishipi, “Kutsuchekeu, Muse no pikeuno, ‘Timi lakhino atianuli kuhano thive aye, pa thikuzuuno pamu nipu achimeu hu sasu kughuna masae, tiye akithiu ghenguno atianuli lhophetsulu kepushi. #Zaki 25.5 25Ningu gholo athikuzumi tsuni acheke, akichiuno akibo shi puzu atianuli shimono thive eno pa nipu achimeu huye pa thikuzuuno valuve. 26Athikuzuu akiniu shou ghi tipaphi shive, athikuzuu akuthuu lono akutsuniu kutolo tipaphi shive. 27Ashekhalo atopuu ghi thive. 28Ike kithimi xuputhuke tsalalo liye khuu nipu shi nani kya? Kughengu liye panongu kumtsu sasu kughuna puani kehu!’ ”

29Ikemu Jisu no ishi panongu khochile, “Nonguye ighono pimi achenie! Nonguye kuchoyesu ghi mtha eno Alhou kuka ghi mthae. 30Kughono kithimi xuputhu nikeno panonguye kungughalo kungumi toive nani eno kulakupu shimove nani. 31Kithimi xuputhukeu vehu ghenguye Alhou no nongu vilo kiu pipuani keno nonguye phijumo kesha? Pano ishi pipuani, 32‘Niye Abraham Lhou, Isak Lhou eno Jakob Lhou ke.’ Paye kuxumi lhou kethono kithimi Lhou kumoe.” #Ipe 3.6 33Timi aqokitikhiye Jisu no hipau pesu kutsukeu chilu pesu apuchopungove.

Ayezah gholo Akhotou

(Mk 12.28-34; Lk 10.25-28)

34Jisu no Sadukimi ghehasuvae pikeu Farisimino chilu puzu panongu kumtsa ighi. 35Tipaqo gholo lakhiye Ayezah kukutsumike, pano Jisu kitimeniye ishi iniju, #Lk 10.25-28 36“Kutsuchekeu, Ayezah lo khipauno ahza tsupuakeu akhotou kya?” 37Jisu no pa vilo pi, “Noye omlo kuchopu okuxu kumtsu, okukumsu kumtsu eno okumto kumtsu pesu Ampeu oLhou qhuivumasae.” #Zaki 6.5 38Hipauno ayezah tsupuakeu gholo kumtsu nguno akhotou eno atughiuke. 39Eno ayezah tsupuakeu akiniu akhotouno hitoi ani. “Noye olikhi okusami okimiyeke toi kimiyelo.” #Achine 19.18 40Muse no sughikeu yezah kuchopu eno tungkupmino kutsuchekeuye ahza tsupuakeu hikuma shou bepe ani.

Mesiya vehu Iniju

(Mk 12.35-37; Lk 20.41-44)

41Farisimino kuhokumqo aghikelo Jisu no panoqo vilo ishi iniju, 42“Mesiya vehu nonguye kiu ithi ani kya? Paye khuno polo kughuko kya?” “Paye David polo kughukomike” ipi panonguno khochile. 43Tileno Jisu no ishi iniju, “Tishiaye, kushiye Alhou Ghungu no David kipekulhu puzu pa pelo ‘Ampeu’ ipipe kya? Kughengu David no ishipi. 44‘Ampeu no iMpeu vilo ishipi:

Ino oghumi pesu opukhu qholo qhitsumoke kutolo,

i-u ajeu iqalo.’ #Leshe 110.1 45Tishiaye, David no pa vilo ‘Ampeu’ ipiaye, Mesiya ye kishi puzu David polo kughukomi shini kya?” 46Timi khunomu atsa lakhimu pa khochile mlave, tinguno tilauye khunomu pa vilo kiuala inijunikeu ghi ighuve.

Currently Selected:

MATHI 22: SUMIBSI

Highlight

Copy