MATHI 20

Atsayilu Kumlami

1“Kughengu Kungugha yehkipeye aki-alu pighimi lakhino inaqhe itheno wupuzu pa tsayilulo hupenike ghenguno aqekiqemi ghawukeu hutoike. 2-3Aqekiqemi sasu atsala lakhilo ajume tsunikeu shi kughave puzu panoqoye pa tsayilulo puhuve. Tulhu ghulokilo pano alhikishi-alo itaghi wuju kelauye timi khami kiumu shimono puthugho aghi. 4Ikelo panoqo vilo ishipi, ‘Nongu ghi atsayilulo hulo, eno nongu jume kiuno achipiu keno ino tsunike.’ 5Ikehu panonguno huve. Itaghi pano puchou lhuba ghulokilo wu puzu kutamiqo sasu ghi puzuu tholono kughatha. 6Phitsu ghulokilo pano alhikishi-alo wuju kelauye itaghi timi khami tile puthugho aghikeu ithulu. Panoqo vilo pano ishi iniju, ‘Nonguye kushiye ajupuka kiumu shimono hile puthugho ani kya?’ 7Panoqono pa vilo ishi khochile, ‘Khunomu ajume ningu piqe kepushi ghayighimoke.’ ‘Tishemaye, nongu ghi atsayilulo huno mlalo’ ipi pano panoqo vilo pive.

8“Kughou tsuzu keno, atsayilu ampiu huno pa kini peithakutsuu vilo ishipi, ‘Aqekiqemiqo kulo, eno ashekhashi hukemi launo huthususu atughushi hukemiqo kutolo panoqo jume tsuwolo.’ #Achine 19.13; Zaki 24.15 9Phitsu shivekethiuno timi hukemiqono ighikelauye milakhi khino atsalalo jume ithulu. 10Ikelo kughou atughushi hukemiqono ighi keno, panonguye alau ithulu nani kepi kumsuae, ikemu panoqo ghi lakhikhino aphiphi shi ithulue. 11Ti ikhiluve puzu panoqoye alu mipeu shou muchho ghi 12ishipi, ‘Timi hi atikhashi hughi kemiqoye asuchedo lakhi likhi mla, eno ninguye atsala kupuju aghimeshi eno tsukinheno phuqhi mla akeghi nono panongu tsuke qhemi ningu tsue!’ 13Ikemu alu mipeu no panoqo gholo lakhi vilo ishipi, ‘Qele akusau, niye kiumu opishi puamoe! Noye atsala kupuju jume isasu kughatha kekumo kesha? 14Owu kiukeno ti luveno wuvelo. Timi ashekhashi hukeu ghi otsuke qhemi niye pa tsunikeu shi anie. 15Ino pisa akeu pesu kiu shinishi keno tipau shipemoni kesha? Ikeo, ino alokeu shike ghenguno onheshuve kya?’ ” 16Jisu no ishi kishekha ghi pive, “Ikehu atikhamino atughu shive nani eno atughumino atikha shive nani.” Kughengu kutomo kulue ikemu aghuloshi kishelue. #Mt 19.30; Mk 10.31; Lk 13.30

Ghuthu akuthuu Jisu no Pano thinikeu ghili pi

(Mk 10.32-34; Lk 18.31-34)

17Jisu no Jerusalem lo wuniye chekelo, pa khopemi chighi kini kutashi sawu puzu, alalo checheke lono pano panoqo vilo ishipi, 18“Julo, ninguye Jerusalem lo iqho cheni tilano ni Timi Nu ye achinetomi ngo Ayezah kukutsumiqo lau kughaphepe tsuveni cheni, eno pa pithive penike panonguno kughathabeve nani, 19eno Ashiayeh kutami lau sawo tsuve nani eno tipaqono pa thaqhi, pa heqhi puzu kros lo pa yedave nani, eno atsala akuthuniye pa xuputhuve nani.”

Aza lakhino Qhuyiniju

(Mk 10.35-45)

20Tileno Zebedi nuliqo pazano li nuli sasu Jisu lau ighi eno lino pa vilo avehu lakhi qhuyiniju niye pa zulo qhoqhunhepe ngo. 21Jisu no li vilo ishi iniju, “Noye kiu lunishi ani kya?” Lino ishi khochile, “Oyehkipe ighikelo inu hi pama pelo lakhino o-u ajeu kudau eno lakhino o-u piyiu kudau iqape kepushi piqhive tsulo!” 22Ikemu Jisu no ishi khochile, “Nonguye nonguno kiu khu ani keno mtha aphie. Ino shoniye akeu jukhu nonguye sho kulupu kesha?” Pamano ishi pa khochile, “Nikujoye sho lunanie.” 23Pano pama vilo ishipi, “Nokujoye mutsuqheyino ijukhu sholu nani, ikemu i-u ajeu eno i-u piyiu iqanikeuye ighoshive mlae, tiye iPuh no khunoqo ghenguno kutope puani keno tipaqo ghengunoke.”

24Kughou akhopemi chighino ti chilu keno, panonguye pama athiazu shou axuideve. 25Ikehu Jisu no panongu kumtsu ku-kumqo puzu ishipi, “Nonguno ithi ani, ike Ashiayeh kutamiye ayehkipemi no timiqo shou Ampeu shi acheni, eno panongu wu kijemino panoqo shou ka cheni. 26Nongu gholoye hikitipu shimoni. Tsala nongu gholo milakhino kije shinishi aye paye kutami kumtsu qeu shimasa.#Lk 22.25-26 27Nongu gholo milakhino atughumi shinishi aye, paye aqu-axeu shivemasae.#Mt 23.11; Mk 9.39; Lk 22.26 28Timi Nu thotsu kutami pelono pa qepeniye ighike kumoe, ikemu kutami qeniye ighike eno timi kutomo xaphelu nike pa kuxu tsuniye ighie.”

Anhethi Kighichemi kini Shipivi

(Mk 10.46-52; Lk 18.35-43)

29Panonguno Jerikho phu qhiveno wuchekelo timi kumzapuno Jisu papesu che. 30Anhethi kighichekemi mikini ala phelo iqa ake, Jisu ye tipala zususu wu cheni ipi chilu puzu pamano ishi ighamuku, “David Nu! nikimiyekutu tsulo, Akijeu!” 31Timiqono pama vilo iquneyivelopi pama lompi, ikemu pamano alaushi ighamuku ishi igha, “David Nu, Akijeu, ni kimiyekutu tsulo!” 32Jisu no ngove eno pama ku-puzu ishi iniju, “Ipelo nokujo ghenguno kiu shitsu penishi ani kya?” 33Pamano ishi khochile, “Akijeu nikujoye opelo ninhethi xukhovetsu penishi ani!”” 34Jisu no pama kimiyeqhiyive eno pama nhethi chojutsu, ikelauye paikhavino pama nhethi tsukholuve, eno pa papewuve.

Currently Selected:

MATHI 20: SUMIBSI

Highlight

Copy