JOHAN 9

Anhethi Icheno Punukeu Shipivi

1Jisu no chesu wuchekelo anhethi icheveno punukeu sasu kusholu. 2Tile pa khopemino pa vilo iniju, “Kutsuchekeu, timi hipauye pa xine ghenguno keo pa puaza xine ghenguno anhethi icheghi punu kya?” 3Jisu no khochile, “Hiye timi hipauno axine shiveke ghenguno kumoe momu pa puazano axine shiveke ghenguno kumoe, ikemu pano anhethi iche akeuye Alhou kuka kumla pa shouno pephepiyeni ke. 4Atsala kua lono ninguye khuno ipuwukeno pa kumlaqo mla amasae, putho shive aye khunomu mlalu chemoe. 5Ino ayeghilo khitohi anikeno tikutolo niye ayeghilomi kuvue.” #Mt 5.14; Jn 8.12 6Hipatsa pi puzu Jisu no ayeghilo musu puku eno amiti pesu aniba kunue, eno tipau anhethi kighicheu nhethilo nutsuno 7ishipi, “Wulo eno Silom Zukucho lono qhuvelo.” (Silom kiqiye “Puwukeu.”) Ike timi huno wuve puzu pa nhethi qhu eno pa nhethi tsukholu-ghi ideighi. 8Pa kisughumi ngo pano khuchucheke ithulupe puakemiqono ishipi, “Timi hipauye iqa puzu khuchu chekeu hu kumo kesha?” 9Timi khamino, “Hiye tipau huke” ipi, ikemu kutami khamiye, “Moe, pa kumoke, paye tipau kimihike.” Ikelo pa ampino ishi pi, “Timi tipau hu nike.” 10Timiqono pa vilo iniju, “Onhethi kishieno tsukholuve kya?” 11Timi huno khochile, “Timi lakhi Jisu ipichekeu huno aniba kunu puzu inhethilo nutsuno ivilo, ‘Silom lo wuno qhuvelo’ ipike. Ike ino wu puzu qhukelauye inhethi tsukholuvae.” 12Tileno panonguno pa vilo, “Timi tipauye khile ani kya?” ipi iniju. Pano khochile, “Niye mthae.”

Viluvekeu Farisimino Phu

13Tile panonguno puzuu anhethi iche achekeu timi hu sasu Farisimi lau saghi. 14Jisu no aniba kunu puzu timi nhethi xukhotsukeu tsala huye Sabat tsala lono ke. 15Farisimino tileno timi tipau vilo paye kishi shi puzu pa nhethi ithulu kepu shiluve keno iniju kithe. Timi huno panoqo vilo pi, “Pano aniba pesu inhethilo datsu eno ino qhukelauye itehiye inhethiye ithuluvae.” 16Farisimi khamino pi, “Timi khuno hipau shikeno paye Alhou launo ighikemi kumoe kughengu paye Sabat yezah hebideke.” Tishimu khamiye ishipi, “Timi axinemi lakhiye kishi puzu amchipu hipaqo shiluni kya?” Tilehi panoqo gholo kuqhakumla ipeghive.

17Tighenguno Farisimino itaghi anhethi kighicheu vilo inijukithe, “Pano onhethi xuqhovetsuake noye paye kiutoi kemi kepi nani kya?” Timi huno khochile, “Paye tungkupu lakhi.” 18Timi tipau puaza kusaghi mphi kutolo Judamiye timi huye anhethi iche ache puzu pa nhethi tsukholuve kepi pulutsumoe. 19Ikehu pa puaza vilo iniju, “Timi hipauye nonu kesha? Paye punuqhi kelono anhethi iche kesha? Tishiaye paye itehiye kishieno pa nhethi tsukholuvea kya?” 20Pa puazano khochile, “Paye ninu kepi nino ithi ani eno paye punuqhi kelono anhethi icheke, 21ikemu paye itehiye kishi puzu anhethi tsukholuve keno ninguye mthae momu khuno pa nhethi tsukholupe keno mthae. Paye kichimi shiveake pa vilo inijulo, pa likhi pano pipelo.” 22Pa puazano hipatsa pikeuye kutau kumono panonguye Judami musaveke, kughengu Judamino xatha pe puakeuno timi khuno Jisu ye Khristo kepi pipheni keno Sinagog lono timi tipau haphevenikeu shiae. 23Tighenguno pa puazano, “Paye kichimi shiveake pa vilo inijulo” ipive.

24Ghuthu akiniu ghi panonguno anhethi iche achekeu hu ku-puzu pa vilo pi, “Alhou jukuvupu shi kuchou tsa pilo! ninguno ithi anike timi huye axinemi lakhie.” 25Anhethi iche achekeuno pi, “Paye axinemi lakhi keo mokela niye mthae. Thime lakhi ino ithi anie: ike niye anhethi iche achekemu itehi niye tsukholuvae.” 26Panonguno pa vilo iniju, “Pano olau kiu kishi shitsu kya? Paye kishi puzu onhethi tsukholuve pe kya?” 27Pano khochile, “Niye nongu vilo pikhave, ikeghi nonguno initsumoe. Nonguye kushiye iniju kithenishi ani kya? Nongu ghi pa khopemi shiwuve nishi ani kesha?” 28Tileno panonguno pa ghushoqhi pi, “Noye timi hupau khopemike ikemu ninguye Muse khopemiqoe. 29Ninguno ithi akeuno Alhou no Muse putsae, ikemu timi hupauye pano khilauno ighikeno ninguye mthae.” 30Timi huno khochile pi, “Ya! Tiye akichiqhipuke kumo kesha? Paye khilano ighikeno nonguye mthae, ikemu pano inhethi tsukholuvepeke! 31Ningu kumtsuno ithi anike, Alhou ye axinemi tsa initsu chemoe, ikemu khunono pa qhoqhu cheni eno pa pulou shicheni keno Alhou no tipano tsa initsu chenie. 32Inahu-u ayeghiqha huthu kelono itehi kutolo timi khunomu punuqhi kelono anhethi ichekemi nhethi tsukholuvepe keu chimla aphie. 33Timi hipauye Alhou launo ighimo napiaye paye kiumu shimlani cheke.” 34Panonguno pa khochile, “Noye axine lono punu puthu kena ipuzu noye ningu shikaniepi ani kesha?” Eno panonguno Sinagog lono pa hapheve.

Aghungulo Anhethi Kighichemi

35Panonguno pa haphevea pikeu Jisu no chilu, eno pa phuwuno pa vilo pi, “Noye Timi Nu shou pulube ani ma?” 36Timi huno khochile pi, “Akijeu, paye khukela ivilo pitsulo, tishiaye ino pa shou pulubeni ke!” 37Jisu no pa vilo pi, “Noye pa ithuluvae eno paye itehi oputsa akeu huke.” 38“Ampeu, ino pulube ani!” ipi timi huno pi eno Jisu zulo itsaiqi qhoqhunhe.

39Jisu no pi, “Kughakuthapu ghenguno niye ayeghi hipaulo ighie, tishianguno anhethi kighichemi pelo ithulupe eno ithulu akemiqo pelo anhethi icheve peni kehue.” 40Pa phivilo Farisimi khami akeqono hipau chilu puzu pa vilo iniju, “Ningu ghi anhethi iche kesha?” 41Jisu no khochile, “Nonguno anhethi iche keaye nonguye kuqu aghimoni cheke, ikemu nonguno, Ninguye ithulu anie ipikeu kiqiye nonguye kuqu aphie.”

Currently Selected:

JOHAN 9: SUMIBSI

Highlight

Copy