JOHAN 10

Bheriki pesu Kimighipiye

1“Kuchouno ino nongu vilo pini, timi khuuno ahukikha vechesu bherikilo ilomono ala kutauno zumilisu iloghini keno paye kupukami eno suxakulumi lakhie. 2Ikemu khuuno ahukikha vechesu iloni keno pano bheriqo kheu ke. 3Pa pelo ilopeniye khagho kheuno khaqhitsu cheni; bherino pa sutsa chilu cheni, pano pawu bheriqo aje pighi kucheni eno khalau sawu cheni. 4Kughou pano bheriqo khalau saipeghi nikeno pano atughushi eno bheriqono pa papewu cheni, kughengu tipaqoye pa sutsa ithi ani. 5Tipaqoye inami papewu chemoe, ikemu tipaqoye tusumi launo pove nani, kughengu tipaqoye pa sutsa mthae.” 6Jisu no kimighipiyekeu tsa hipau panoqo vilo pie, ikemu pano panoqo vilo kiu piakeno panonguye ithikuthumoe.

Jisu ye Akheu Kiviu

7Jisu no itaghi panoqo vilo pi, “Kuchouno ino nongu vilo pini: Niye bheriqo ghenguno ahukikha ke. 8Izuu ighikemi kumtsu kupukami eno suxakulumi qoe; ikemu bheriqoye panoqo tsa initsumoe. 9Niye ahukikha ke; khunono ivechesu iloni keno xalu nani; paye ipe ilolu nani eno achuqupu phulu nani. 10Kupukamiye puka heqhi eno kutsanike ghengu likhino ighi cheni. Ino ighikeuye panongu pelo akuxu apenike eno akuxu tipau kupukunoshi apeni yeke. 11Niye akheu akiviue. Akheu akiviuye bheriqo ghenguno pa kuxu pephetsuve cheni. 12Aqekiqemiye akheu kumo eno bheri kipighiu kumo kehu, kughou tungtugha chekeu ithulu nikeno bheriqo qhiveno pove cheni; tileno tungtughano tipaqo tsuqu luveno hapiyepighive cheni. 13Paye poveukeuye kutau ghenguno kumono paye aqekiqemi eno bheriqo ghenguno alokumsu kuhae. 14-15Niye akheu akiviuke. Apu no ni ithi ani, eno ino Apuh ithi ani, tihutoi ino iwu bheriqo ithi ani eno panonguno ni ithi ani. Niye panoqo ghenguno ikuxu pephetsu cheni. #Mt 11.27; Lk 10.22 16Hipau bheri bokuthalo kuhakeu iwu bheri kutau ghi ani; niye tipaqo ghi saghi masae; panonguno isutsa chilu nani, tilehino aqo lakhi eno akheu lakhi shive nani.

17“Ino ikuxu pephetsu eno itaghi ikhichilelu penike tsuvekeu ghenguno Apu no ikimiye cheni. 18Khunomu ilauno ikuxu ikhilu mlae; ino ilikhi igho shi puzu ikuxu pephetsuve. Tipau pephetsuni kepu kuka ino ani, eno tipau ikhichile luvenikepu kuka ino anie. Ahza hipauye iPuh launo sughike.”

19Atsa hipaqo pikeulo Judamiqo dolo itaghi kuqhakumla ipeghive. 20Panoqo gholo kutomono, “Timi hipauye tughami sa-anie! Paye izuwuvae! Nonguye kushiye pa tsa inini kya?” ipi ae. 21Ikemu kutami khamino pi, “Tughami sa-akemiye hipaqo pichemoe! Tughamiye anhethi kighiche tsukholupe nani kesha?”

Judamino Jisu Peve

22Jerusalem lo Alhou lau Ikhiphe tsukeu Ghulhu shinikeu ghuloki tove, tiye susutsala shiae. 23Achinekilo Solomon kisheqho holo Jisu no iqho-iqi akelo 24Judamino pa suhope kumqoluve eno pa vilo pi, “Noye ningu pelo khitohi okhelho apeniye kya? Nono Mesiya keaye nivilo vejoi pitsulo.” 25Jisu no khochile, “Niye nongu vilo pivae ikemu nonguno ipulumoe. Ino iPu je lono akumla shikeuno ishepe shitsu ani; 26ikemu nonguno pulumoe, kughengu nonguye iwu bheri kumoe. 27Iwu bheriqoye isutsa chilu chenie ino panoqo ithi ani eno panonguno ipape cheni. 28Ino lhokta kuxu panoqo tsucheni eno panonguye khilemu hauvemo nani; eno khunomu i-u lono panoqo suxasuwuvemla nani. 29IPuhno kiu itsuve akeno tiye kumtsu nguno akijeuke eno khunomu iPuh u-lono tipaqo suxasuwuve mlae. 30Ni eno Apuh ye lakhie.”

31Judamino itaghi atu ikhipe pa veniye kuto. 32Jisu no panoqo vilo pi, “Apu no ivilo shilo pikeu akumla kivi kutomo ino nongu zulo shivetsue; tipaqo gholo khipau ghenguno nonguye atu pesu iveni kya?” 33Judamino pa khochileghi pi, “Akumla kivi ghenguno ninguye atu pesu oveniepi anike kumoe, ikemu nono Alhou thaigha kehue! Noye timi keghi olikhi opesu Alhou kepi ani.” #Achine 24.16 34Jisu no panoqo khochile, “Alhou no pikeu nongu yezahlo ishi yepuani, ‘Nonguye alhouqo ke.’ #Leshe 82.6 35Alhou tsa khunoqo lau ighikeno tipaqo pesu alhouqo kepi ku-puani (eno kuchoyesulo pipuakeuye pevemlake.) 36Ino ‘Niye Alhou Nu ke’ ipi keghenguno Apu no kishepheno ayeghiqhalo puwukeu vilo nonguye, ‘Niye Alhou thaigha anie!’ ipini kesha? 37Ino iPu kumla shimono aghi aye ipulube kevilo; 38ikemu ino tipaqo shiaghi aye nonguno ishou pulubemo namu nonguye ikumla likhimu pulu kepue, tishianguno Apu ye igholo ani eno niye Apu gholo ani kepi nonguno mutsumishei ithi apenike.” 39Itaghi panonguno pa kughaluniye pukaputsa, ikemu panongu launo paye chesu wuve.

40Jisu ye itaghi Jordan hukuku-u khilehi Johan no baptiz shiachekeno tilau ide iku ngo-auve. #Jn 1.28 41Timi kutomono pa lau ighi, eno panonguno ishipi: “Johan ye amchipu kumla kumu shimoe ikemu Johan no timi hipau ghili pikeu kumtsu kuchouke.” 42Tilehi timi kutomono pa pululuve.

Currently Selected:

JOHAN 10: SUMIBSI

Highlight

Copy